1, 2. Moua e tautolu i fe e puipuiaga mogonei?

MANAMANATU LA ko koe ne fano hui i fafo he aho afā. Ne pouli fakahaga e lagi, kamata e hila ke kape, ti kamata ke pakū e lagi. Nakai leva kua tō lipilipi e uha. Kumi mena a koe ke fakamalu ai. Ko e mitaki ha ia ka moua e koe e matakavi ne haohao mitaki mo e mōmō!

² Pihia e tuaga ha tautolu mogonei. Holo ki mua e kelea he tuaga he lalolagi. Ti manamanatu a koe, ‘Moua e au i fe e puipuiaga?’ Ko e salamo he Tohi Tapu ne tohia: “To pehe atu au kia Iehova, Ko e haku a kolo, mo e haku a taue; ko e haku a Atua kua falanaki au kia ia.” (Salamo 91:2) Ē, maeke a Iehova ke foaki mai ki a tautolu e fakatotoka he tau lekua ha tautolu mogonei, ti foaki mai e ia e amaamanakiaga homo ue atu ma e anoiha.

3. Eke fēfē e tautolu a Iehova mo huaga ha tautolu?

³ Puipui fēfē e Iehova a tautolu? Maeke a ia ke lagomatai a tautolu ke fehagai mo e tau lekua ha tautolu, ti mua atu e malolō haana ke he ha tagata ka lali ke fakamamahi a tautolu. Pete he tupu taha mena kelea ki a tautolu mogonei, maeke a tautolu ke mauokafua to utakehe e Iehova e lekua he vahā anoiha. Fakamalolō he Tohi Tapu ki a tautolu: “Kia fakatumau e mutolu a mutolu ke he fakaalofa he Atua.” (Iuta 21) Lata a tautolu ke fakatata tumau ki a Iehova ke moua e lagomatai haana he tau magaaho uka. Ka e taute fēfē e tautolu e mena ia?

4, 5. Puhala fe kua fakakite e Iehova e fakaalofa haana ki a tautolu?

⁴ Ke fakatata tumau ki a Iehova, lata a tautolu ke mailoga e fakaalofa lahi haana ki a tautolu. Manamanatu  ke he tau mena oti kua taute e Iehova ma tautolu. Foaki mai e ia ki a tautolu e lalolagi fulufuluola ti fakapuke aki e tau akau mo e tau manu fulufuluola. Foaki mai foki e ia ki a tautolu e tau mena kai lolo ke kai mo e vai meā ke inu. I loto he Tohi Tapu, fakaako e Iehova ki a tautolu e higoa haana mo e tau mahani homo ue atu haana. Ka e mua atu ke he tau mena oti ia, fakakite e ia e fakaalofa haana ki a tautolu he fakafano mai haana a Tama fuataha ko Iesu ke he lalolagi ke foaki e moui ma tautolu. (Ioane 3:16) Ko e poa ia ati maeke a tautolu ke moua e amaamanakiaga homo ue atu ma e anoiha.

⁵ Kua foaki mai e Iehova e Kautu faka-Mesia, ko e fakatufono he lagi ka nakai leva ti fakaoti e tau matematekelea oti kana. Ko e Kautu ka taute e lalolagi mo parataiso ti nonofo mafola e tau tagata oti mo e fiafia tukulagi. (Salamo 37:29) Taha puhala foki kua fakakite e Iehova e fakaalofa haana ki a tautolu ko e fakaako mai e puhala kua mitaki lahi mahaki ke momoui mogonei. Uiina foki e ia a tautolu ke liogi ki a ia, ti mautali tumau a ia ke fanogonogo ke he tau liogi ha tautolu. Fakakite fakamaaliali ai e Iehova e fakaalofa haana ki a tautolu oti takitokotaha.

6. Lata a tautolu ke tali atu fēfē ke he fakaalofa ha Iehova?

⁶ Puhala fe kua lata a koe ke tali atu ke he fakaalofa ha Iehova? Fakakite ki a ia e loto fakaaue haau ke he tau mena oti ne taute e ia ma haau. Momoko ai, tokologa he vahā nei kua nakai loto fakaaue. Pihia foki he magaaho ne nofo a Iesu he lalolagi. Taha e magaaho, fakamaulu e Iesu tokohogofulu e tagata lepela, ka e tokotaha ni ne fakaaue ki a ia. (Luka 17:12-17) Manako a tautolu ke tuga e tagata ne fakaaue ki a Iesu. Ti manako tumau a tautolu ke loto fakaaue ki a Iehova.

7. Lata a tautolu ke hokulo fēfē e fakaalofa ki a Iehova?

⁷ Lata foki a tautolu ke fakakite e fakaalofa ha tautolu ki a Iehova. Tala age a Iesu ke he tau tutaki haana kua lata  a lautolu ke fakaalofa ki a Iehova mo e ha lautolu a tau loto katoa, tau agaaga, mo e tau manatu katoa. (Totou Mataio 22:37.) Ko e heigoa e kakano he mena ia?

8, 9. Puhala fe ka fakakite e tautolu ki a Iehova kua fakaalofa a tautolu ki a ia?

⁸ Lahi ni kia ke talahau kua fakaalofa a tautolu ki a Iehova? Nakai. Ka fakaalofa a tautolu ki a Iehova mo e ha tautolu a tau loto, agaaga, mo e manatu katoa, to fakakite e tautolu e fakaalofa ki a ia ha ko e tau gahua ha tautolu. (Mataio 7:16-20) Fakaako fakamaaliali mai he Tohi Tapu ka fakaalofa a tautolu ke he Atua, to omaoma a tautolu ke he tau poakiaga haana. Uka nakai e mena ia? Nakai, ha ko Iehova kua “nakai mamafa foki hana tau poaki.”​—Totou 1 Ioane 5:3.

⁹ Ka omaoma a tautolu ki a Iehova, kua fiafia mo e olioli e moui ha tautolu. (Isaia 48:17, 18) Ka ko e heigoa ka lagomatai a tautolu ke fakatata tumau ki a Iehova? To kitekite a tautolu ki ai.

10. Ko e ha kua lata a koe ke matutaki ke fakaako hagaao ki a Iehova?

¹⁰ Eke fēfē a koe mo kapitiga ha Iehova? Puhala he fakaako haau ke he Tohi Tapu, iloa lahi e koe a Iehova ti feaki e fakafetuiaga kapitiga mo ia. Ko e fakafetuiaga kapitiga nei kua tuga e afi ne manako a koe ke puho tumau. Tuga ni e afi ne lata ke hokoti ke puho, lata foki a koe ke matutaki ke fakaako hagaao ki a Iehova ke tumau e malolō he fakafetuiaga kapitiga haau mo ia.​—Tau Fakatai 2:1-5.

11. To lauia fēfē a koe he tau fakaakoaga he Tohi Tapu?

¹¹ He matutaki a koe ke fakaako e Tohi Tapu, to iloa e koe e tau mena kua aamotia mooli e loto haau. Mailoga e logonaaga he tau tutaki tokoua ha Iesu he fakamaama age e Iesu e tau perofetaaga he Tohi Tapu ki a laua. Pehē a laua: “Nakai kia velagia ha taua a tau loto ki loto ia taua he vagavagahau a ia mo taua ke he puhala, he fakamatala mai foki e ia e tau Tohi kia taua?”​—Luka 24:32.

12, 13. (a) Ko e heigoa ka tupu ke he fakaalofa ha tautolu ma e Atua? (e) Puhala fe ka tumau e fakaalofa ha tautolu ki a Iehova?

 ¹² Tuga ni ne aamotia e tau loto he tau tutaki he maama e laua e tau Tohiaga Tapu, liga logona hifo foki e koe e makai pihia he kamata a koe ke maama e Tohi Tapu. Lagomatai he mena nei a koe ke iloa a Iehova mo e fakaalofa ki a ia. Nakai manako a koe ke he fakaalofa nei ke momoko.​—Mataio 24:12.

¹³ Ka eke a koe mo kapitiga he Atua, lata a koe ke gahua fakalahi ke tumau e malolō he tuaga kapitiga haau. Lata a koe ke matutaki ke fakaako hagaao ki a Ia mo Iesu mo e manamanatu ke he tau mena haau kua fakaako, mo e puhala ka fakaaoga e koe he moui haau. (Ioane 17:3) Ka totou po ke fakaako a koe ke he Tohi Tapu, hūhū hifo: ‘Ko e heigoa kua fakaako mai he mena nei ki a au hagaao ki a Iehova ko e Atua? Ko e ha kua lata au ke fakaalofa ki a ia mo e loto mo e agaaga katoa haaku?’​—1 Timoteo 4:15.

14. Puhala fe kua lagomatai he liogi ke tumau e malolō he fakaalofa ha tautolu ki a Iehova?

 ¹⁴ Ka fai kapitiga mitaki a koe, to tutala tumau a koe ki a ia, ti fakatumau he mena nei e fakafetuiaga kapitiga ha mua ke malolō. Pihia foki, ka tutala tumau a tautolu ki a Iehova he liogi, to fakatumau ai e fakaalofa ha tautolu ki a ia ke malolō. (Totou 1 Tesalonia 5:17.) Ko e liogi ko e mena fakaalofa homo ue atu mai he Matua ha tautolu he lagi. Lata a tautolu ke tutala tumau ki a ia mai he tau loto ha tautolu. (Salamo 62:8) Nakai lata ke fatiaki e tau liogi ha tautolu he ako manatu, ka e lata ke fai kakano mooli e tau mena ne talahau e tautolu. Ē, ka matutaki a tautolu ke fakaako e Tohi Tapu mo e liogi mai he tau loto, to tumau e malolō he fakaalofa ha tautolu ki a Iehova.

15, 16. Fēfē e onoonoaga haau ke he gahua fakamatala?

¹⁵ Ka manako a tautolu ke fakatumau e fakatata ki a Iehova, lata foki a tautolu ke tutala ke he falu hagaao ke he tua ha tautolu. Ko e tutala ke he falu hagaao ki a Iehova ko e lilifu homo ue atu. (Luka 1:74) Ti ko e matagahua ne kua age e Iesu ke he tau Kerisiano mooli oti. Igatia a tautolu mo e lata ke fakamatala e tala mitaki he Kautu he Atua. Kua taute nakai e koe e mena nei?​—Mataio 24:14; 28:19, 20.

¹⁶ Logona hifo he aposetolo ko Paulo ko e gahua fakamatala kua mua e mitaki; ti fakahigoa e ia ko e “koloa” uho. (2 Korinito 4:7) He tutala ke he falu hagaao ki a Iehova mo e haana finagalo ko e gahua aoga lahi mahaki ka taute e koe. Ko e puhala ma haau ke fekafekau ki a Iehova, ti uho ki a ia e gahua haau ne taute ma haana. (Heperu 6:10) Aoga foki e fakamatala ma haau mo e tau tagata kua fanogonogo ki a koe ha kua lagomatai e koe e falu mo koe ke fakatata ki a Iehova mo e ke moua e moui tukulagi. (Totou 1 Korinito 15:58.) Fai gahua foki nakai ka foaki ki a koe e fiafia lahi?

17. Ko e ha kua mafiti e gahua fakamatala?

 ¹⁷ Ko e gahua fakamatala kua mafiti. Lata a tautolu ke “fakamatala atu e . . . kupu,” mo e “fakamalolo” ke taute fakamafiti ai. (2 Timoteo 4:2) Lata e tau tagata ke logona hagaao ke he Kautu he Atua. Pehē e Tohi Tapu: “Kua tata mai e aho lahi a Iehova, kua tata mai ni, kua fakaave mai ni.” Ko e fakaotiaga to “nakai mule mai.” (Sefanaia 1:14; Hapakuka 2:3) Ē, nakai leva to moumou e Iehova e lalolagi kelea ha Satani. Ato hoko e mena ia, lata ke hataki e tau tagata ke maeke a lautolu ke fifili ke fekafekau ki a Iehova.

18. Ko e ha kua lata a tautolu ke tapuaki ki a Iehova fakalataha mo e falu Kerisiano mooli?

¹⁸ Manako a Iehova ki a tautolu ke tapuaki ki a ia fakalataha mo e falu Kerisiano mooli. Pehē e Tohi Tapu: “Kia manatu foki a tautolu ko e taha ke he taha, ke fakalagalaga ai e fakaalofa mo e tau gahua mitaki; Aua neke tiaki e fakapotopotoaga ha tautolu tuga ne mahani he falu, ka kia fefakamafanaaki; kia au atu ai foki he pihia ha kua kitia e mutolu kua tata tuai e aho.” (Heperu 10:24, 25) Lata a tautolu ke taute e tau mena oti ke maeke ke o atu ke he tau feleveiaaga takitaha. Ko e tau feleveiaaga kua foaki ki a tautolu e magaaho ke fefakamafanaaki.

19. Ko e heigoa ka lagomatai a tautolu ke fakaalofa ke he tau matakainaga Kerisiano ha tautolu?

¹⁹ Ka fina atu a koe he tau feleveiaaga, to moua e koe e tau kapitiga mitaki ka lagomatai a koe ke tapuaki ki a Iehova. To kehekehe e tau matakainaga ka feleveia mo koe, kua taute foki e lautolu e tau mena oti ke tapuaki ki a Ia. Ti tuga a koe, nakai mitaki katoatoa mo e taute e lautolu e tau hepehepe. Ka pihia a lautolu, kia mautali ke fakamagalo a lautolu. (Totou Efeso 4:32.) Hagaaki tumau ke he tau mahani mitaki he tau matakainaga Kerisiano haau, he taute pihia ka lagomatai a koe ke fakaalofa ki a lautolu mo e fakatata lahi tumau ki a Iehova.

20, 21. Ko e heigoa e “moui tukulagi”?

²⁰ Manako a Iehova ke he tau kapitiga oti haana ke moua e moui kua mitaki lahi mahaki. Fakaako he Tohi Tapu ki a tautolu ko e moui ha tautolu he vahā anoiha kua kehe katoatoa mai he moui ha tautolu mogonei.

²¹ He vahā anoiha, to momoui tukulagi a tautolu he nakai ni ke 70 po ke 80 e tau tau. To moua e tautolu e “moui tukulagi” kua mitaki katoatoa e malolō tino, mafola, mo e fiafia he parataiso fulufuluola. Ko e mena ia ne fakahigoa he Tohi Tapu ko e “moui tukulagi,” po ke moui mooli. Mavehe a Iehova ke foaki mai ki a tautolu e moui mooli, ka e lata a tautolu ke eketaha mogonei ke “toto atu” ki ai.​—1 Timoteo 6:12, 19.

22. (a) Maeke fēfē a tautolu ke totō atu ke he moui mooli? (e) Ko e ha kua nakai maeke a tautolu ke moua noa e moui tukulagi?

²² Maeke fēfē a tautolu ke totō atu ke he moui mooli? Lata a tautolu ke “mahani mitaki” mo e “maukoloa . . . ke he tau gahua mitaki.” (1 Timoteo 6:18) Kakano e mena nei kua lata a tautolu ke fakagahua e tau mena kua fakaako e tautolu mai he Tohi Tapu. Ka e nakai fakavē e moui mooli ke he tau laliaga ni ha tautolu. Nakai maeke noa a tautolu ke moua e moui tukulagi. Ko e mena fakaalofa kua moua mai ia Iehova ke he tau fekafekau fakamooli haana, ko e fakakiteaga he haana a “fakaalofa noa.” (Roma 5:15) Manako mooli ha tautolu a Matua he lagi ke foaki ke he tau fekafekau tua fakamooli haana e mena fakaalofa nei.

23. Ko e ha kua lata a koe ke taute e tau fifiliaga hako mogonei?

²³ Hūhū ki a koe ni, ‘Tapuaki nakai au ke he Atua he puhala ne talia e ia?’ Ka lata a koe ke taute falu hikiaga, ti taute he magaaho tonu nei. Ka falanaki a tautolu ki a Iehova mo e taute e tau mena oti ke maeke ke omaoma ki a ia, to eke a Iehova mo huaga ha tautolu. To puipui e ia e  tau tagata tua fakamooli haana he tau aho fakamui he lalolagi kelea ha Satani. To mauokafua a Iehova ke momoui tukulagi a tautolu he Parataiso, tuga he mavehe mai e ia. Ē, maeke a koe ke moua e moui tukulagi ka taute e koe e tau fifiliaga hako mogonei!