1, 2. Háadi lá bineʼ adadíníichéłígíí hólǫ́?

AYÓÓ átʼéego nidaʼdiʼníʼgo yinááł lá jiní. Kʼos diłhiłgo yildoh áádóó ńjiilgish. Ńtʼééʼ ayóó átʼéego ahoʼniiłtą́. Biyaa aʼdínóochéłígíí hádíníʼı̨́įʼgo hóółtseii léiʼgi bikʼííníyáago baa nił hóózhǫǫd!

² Dííshjı̨́įdi ákótʼé nahalingo nihił hazʼą́. Doo yáʼátʼééhgóó nihił hodeeyá. Kwíinínízin shı̨́ı̨́, ‘Haʼátʼíí lá bineʼ adínéeshchééł?’ Psalm ání: “Bóhólníihii éí bineʼ ahinishchéehii áádóó bineʼ yisdziihii, shiDiyin God baa jííníshłíii nilı̨́.” (Psalm 91:2) Jiihóvah baʼííníidlíigo bineʼ anánííchéego nihaa áhályą́. Baa hózhǫ́ǫgo ił chohooʼı̨́ nihichʼįʼ kwííłʼı̨́.

3. Haitʼéego éí Jiihóvah bineʼ anánííchéehgo ádaʼdííníilzin doo?

³ Jiihóvah éí haitʼéego nihaa áhályą́? Bee nihichʼįʼ anáhóótʼiʼígíí bíniildzil dooígi yee nihíká adoolwoł. Jiihóvah éí ayóó ábóodziil áko łaʼda atínihizhdoolíłígíí éí doo bíjíighah da. Doo yáʼátʼéhígi ánihiʼdiilyaa ndi, Jiihóvah éí níléí náasdi nihá hashtʼéédoodlííł. Jiihóvah áhánígo bił niidlı̨́įgo éí nihichʼįʼ hodiiʼnáahgo nihíká análwoʼ. Diyin Bizaad ání: “Diyin God bibee ayóóʼóʼóʼniʼ biiʼ dahonohłǫ́ǫgo ádaʼdííʼnółzin.” (Jude 21) Éí haitʼéego ákódíínííł?

4, 5. Jiihóvah bibee ayóóʼóʼóʼniʼ haitʼéego ííshjání áyiilaa?

⁴ Jiihóvah áhánígo bił niidlı̨́įgo éí ayóóʼánihóʼníigi  baa ákoniidzin. Tʼáá ałtsoní Jiihóvah nihá átʼı̨́įgi baa nitsíikees. Nahasdzáán ayóó ánoolingo, chʼil dóó naaldlooshii ałʼąą ádaatʼéego, chʼiyáán daalkango índa tó niłtólígo doodlı̨́įłgo nihá niinílá. Diyin Bizaad éí Jiihóvah yee átʼéii índa bízhiʼ yee naʼnitin. Tsʼídá aláahdi bibee ayóóʼóʼóʼniʼ yee ííshjání áyiilaaígíí éí biYeʼ Jesus. Éí nahasdzáán bikáaʼjįʼ yiníłʼaʼgo bibeʼiinaʼ nihá ninéidiníʼą́. (John 3:16) Áko Jesus nináʼádeetʼą́ągo ił chohooʼı̨́ nihá áyiilaa.

⁵ Jiihóvah biNahatʼaʼ éí achʼįʼ nahwiiʼná ałtso niidoołtʼih. Éí nahasdzáán bikááʼ hózhónígo íidoolííł, ákwii tʼáá ałtso bił dahózhǫ́ǫgo kéédahatʼı̨́į doo. (Psalm 37:29) Náánáłahgo Jiihóvah bibee ayóóʼóʼóʼniʼ nihił ííshjání ánááyiidlaaígíí éí yáʼátʼéehgo iiná yiltʼih dooleełígi yee nanihinitin. Áádóó shichʼįʼ sodadołzin nihiłní, háálá nihisodizin yididootsʼı̨́įłgo yibaʼ átʼé. Tʼááłáʼí niitínígo Jiihóvah bibee ayóóʼóʼóʼniʼ nihichʼįʼ ííshjání áyiilaa.

6. Haitʼéego Jiihóvah bibee ayóóʼóʼóʼniʼ baa ahééh díníízįįł?

⁶ Haitʼéego Jiihóvah bibee ayóóʼóʼóʼniʼ baa ahééh díníízįįł? Tʼáá ałtsoní nihá áyiilaaígíí baa ahééh niidzin doo. Ląʼí diné doo ahééh danízin da. Jesus nahasdzáán yikááʼ naagháhą́ądą́ą́ʼ diné tʼáá ákódaatʼéé ńtʼééʼ. Łah éí neeznájíltʼéego łóód bee hąąh dah nahazʼą́ągo Jesus éí hadaazhdíłtʼéego ánáhoodlaa. Ndi tsʼídá tʼááłáʼí ahééh niizı̨́ı̨́ʼ. (Luke 17:12-17) Áko nihí ałdóʼ díí hastiin ahééh niizı̨́ʼígíí átʼéego ahééh daniidzin doo. Tʼáá áłahájįʼ Jiihóvah bichʼįʼ ahééh daniidzin doo.

7. Haitʼéego éí Jiihóvah ayóóʼádeíyíníiʼníi doo?

⁷ Jiihóvah ayóóʼííníiʼní. Jesus ání, nihijéí, tʼáá nisoozı̨́ı̨́  ńtʼééʼ, índa nihíniʼ tʼáá átʼé bee Jiihóvah ayóóʼádeíyínóhʼníi doo. (Matthew 22:37 yíníłtaʼ.) Díí haʼátʼíí níigo ání?

8, 9. Jiihóvah ayóóʼííníiʼníigi haitʼéego ííshjání ádiilnííł?

⁸ Jiihóvah ayóóʼííníshʼní, tʼóó diiʼníigoósh bíighah? Ndagaʼ. Nihijéí, tʼáá siidzı̨́ı̨́ ńtʼééʼ, dóó nihíniʼ tʼáá átʼé bee Jiihóvah ayóóʼííníiʼníigo éí íitʼįįłgi bee bééhózin. (Matthew 7:16-20) Diyin Bizaad ání, God ayóóʼííníiʼníigo éí bibee hazʼáanii bikʼeh honiilʼı̨́į doo. Éísh nanitłʼah? Ndagaʼ. Jiihóvah “yee hasʼáanii doo ade átʼée da.”​—1 John 5:3 yíníłtaʼ.

⁹ Jiihóvah bikʼeh honiilʼı̨́įgo éí nihił hózhǫ́. (Isaiah 48:17, 18) Áko haʼátʼíí bee Jiihóvah áhánígo bił niidlı̨́į doo? Kodóó éí baa íhwiidiilʼááł.

10. Haʼátʼíí biniyé Jiihóvah baa íhoołʼaahgi hánítʼı̨́į doo?

¹⁰ Haitʼéego éí Jiihóvah bikʼis sínílı̨́ı̨́ʼ? Éí Diyin Bizaad baa íhoołʼaahgo, hazhóʼó bił áhééhosínílzįįdgo nikʼis íinilaa. Kǫʼ tʼáá dookʼą́ął dooleeł nínízinígi átʼéego, Jiihóvah bił ałkʼis sínílı̨́įʼgi ałdóʼ tʼáá ákótʼéego doo dínóotsis da nínízin doo. Kǫʼ éí bikʼi déézhdíłjahgo tʼáá dookʼą́ął łeh, tʼáá ákótʼéego Jiihóvah baa íhoołʼaahgo éí bikʼi déédíłjah nahalin. Áko ałkʼis nohłı̨́įgi bidziilgo diltłiʼ doo.​—Proverbs 2:1-5.

11. Diyin Bizaad bee naʼnitingi haitʼéego baa nił hózhǫ́ǫ doo?

¹¹ Diyin Bizaad baa íhoołʼaahgo éí baa hózhónígíí bíhwiidííłʼááł. Jesus łaʼ bóhoołʼaahii ííłní: “Diyin God bizaad bee akʼedaʼashchínígíí nihił ííshją́ą́ ííléehgo, nihiyiʼdi dooládóʼósh nihijéí dookʼą́ą́ł nahalin da nítʼééʼ.”​—Luke 24:32.

12, 13. (a) Jiihóvah ayóóʼííníiʼníigi nihitsʼą́ą́ʼ haa doonííł? (b) Haitʼéego bidziilgo ííníilzin doo?

 ¹² Jesus bóhoołʼaahii łaʼ Diyin Bizaad yikʼiʼdiitą́ągo bijéí bidiisnááʼ yę́ęgi átʼéego, ni shı̨́ı̨́ ałdóʼ Diyin Bizaad bikʼiʼdiyiitįįhgo tʼáá ákónítʼé. Tʼáá ákótʼéego nániiłnáago Jiihóvah bééhodíísįįł dóó ayóóʼííníʼníigi níká análwoʼ doo. Jiihóvah ayóóʼííníʼníigi éí doo nitsʼą́ą́ʼ dínóokʼas da nínízin doo.​—Matthew 24:12.

¹³ Jiihóvah nikʼis silı̨́įʼgi yéigo bidziilgo íinisin. Jiihóvah dóó Jesus yéigo baa íhoołʼaah, áádóó baa íhoołʼaahígíí hazhóʼó baa nitsíníkeesgo bikʼehgóó ánítʼé. (John 17:3) Diyin Bizaad bóhoołʼaahgo, díí baa nitsíníkees: ‘Díí yíłtaʼígíí haitʼéego Jiihóvah yee nashinitin? Haʼátʼíí biniyé shijéí índa tʼáá sezı̨́ı̨́ ńtʼééʼ bee Jiihóvah ayóóʼííníshʼníi doo?’​—1 Timothy 4:15.

14. Sodiilzingo, haitʼéego Jiihóvah ayóóʼííníiʼníigi bidziil doo?

 ¹⁴ Hakʼis hólǫ́ǫgo éí tʼáá ahą́ą́h bił ałchʼįʼ yájíłtiʼgo ałkʼis jílı̨́įgi bidziil łeh. Tʼáá ákótʼé, tʼáá ahą́ą́h Jiihóvah bichʼįʼ sodiilzingo éí ayóóʼííníiʼníigi bidziil doo. (1 Thessalonians 5:17 yíníłtaʼ.) Nihizhéʼé yáʼąąshiidi hólóonii éí sodizin nihainílá. Tʼáá aaníí ádiiʼníigo bichʼįʼ yéiiltiʼ doo. (Psalm 62:8) Sodilzingo éí doo tʼááłáʼíígíí hááhiiłtʼéeh da doo. Diyin Bizaad bóhoołʼaahgo índa tʼáá aaníí ádiiʼníigo sodilzingo éí Jiihóvah ayóóʼííníiʼníigi bidziil doo.

15, 16. Nahaneʼgi haitʼéego baa nitsíníkees?

¹⁵ Áhánígo Jiihóvah íinisin doo niidzingo, neʼoodląʼ diné bee bił nahólneʼ doo. Jiihóvah baa nahwiilneʼgo éí baa hózhǫ́ǫgo nihaidiníʼą́. Díí éí naanish átʼéego Jesus bídahoołʼaahii tʼáá átʼé yąąh niinílá. Tʼáá áníiltso éí God biNahatʼaʼ nizhónígo baa haneʼígíí baa nahwiilneʼ doo. Niísh tʼáá íídą́ą́ʼ ákónítʼı̨́?​—Matthew 24:14; 28:19, 20.

¹⁶ Paul éí díí nahaneʼ binaʼanishgi ílı̨́įgo yaa nitsíkees ńtʼééʼ, áko “tʼáá íiyisí ílíinii” yiłníigo yee yiyíízhiʼ. (2 Corinthians 4:7) Jiihóvah índa biNahatʼaʼ baa haneʼgi éí naanish ílíinii ádíílíłígíí átʼé. Jiihóvah bá nahólneʼ índa bá nanilʼaʼgo yaa bił hózhǫ́. (Hebrews 6:10) Nahólneʼgo éí ni índa daníistsʼą́ąʼii Jiihóvah áhánígo áyósin doo, índa iiná doo ninítʼiʼii nihaa doolyééł. (1 Corinthians 15:58 yíníłtaʼ.) Náánáłahdę́ę́ʼ naanish ił hózhǫ́ǫ́sh neidoolééł?

17. Nahaneʼgi haʼátʼíí biniyé baa tsı̨́ı̨́ł hwiindzin?

¹⁷ Díí nahaneʼgi baa tsı̨́ı̨́ł hwiindzin. Haleebee ádeiitʼı̨́įgo haneʼ yáʼátʼéehii baa nidahwiilneʼ doo.  (2 Timothy 4:2) Diné éí God biNahatʼaʼ deididootsʼı̨́ı̨́ł hwiindzin. Diyin Bizaad ání: Jiihóvah “beidoołkáłígíí baa hoolzhíísh. Koshídę́ę́ʼ hoolzhish, áádóó tʼáadoo hodinaʼí ayóó áhodoonííł.” Nihodoogááł doo bilááhgóó iidoołkał da. (Zephaniah 1:14; Habakkuk 2:3) Séítan doo yáʼáshǫ́ǫ́góó bił hazʼánígíí God íidoołdįįłgo áhą́dídę́ę́ʼ hoolzhish. Díí tʼah doo áhánééhdą́ą́ʼ, tʼah kodą́ą́ʼ diné bił dahodoonih, áko Jiihóvah bikʼeh óʼoolʼįįłii nídeididoolééł.

18. Haʼátʼíí biniyé Jiihóvah bikʼeh óʼoolʼįįłii ádaʼiilʼı̨́į doo?

¹⁸ Jiihóvah bá dahalneʼé bił, Jiihóvah bikʼeh óʼoolʼįįłii bikʼeh ániitʼée doo nihóʼní. Diyin Bizaad ání: “Haaʼíshąʼ ayóóʼádaʼííníiʼníigo índa naanish yáʼátʼéehii baa neiikaigo ałkʼi nideiildzilgo ahídaniidlı̨́į doo. Áłah néiidleehígíí łaʼ nidayiisííh, nidi haaʼíshąʼ nihí tʼáadoo nidahiilzíhí doo. Bóhólníihii nídoodááł beidoołkáłígíí koshídę́ę́ʼ bichʼįʼ hoolzhishgo baa ákodanoohsįįh, haaʼíshąʼ hózhǫ́ yéego ahił yadahoniidlįįh doo.” (Hebrews 10:24, 25) Jiihóvah Yá Dahalneʼé áłah nádleehgi tʼáadoo nidahiilzíhí doo. Ákweʼé neidáahgo éí ahee daniildzil.

19. Haitʼéego ayóóʼádaʼahííníiʼníi doo?

¹⁹ Jiihóvah Yá Dahalneʼé áłah nádleehgi nánídáahgo, akʼis yáʼátʼéehii Jiihóvah bikʼeh óʼoolʼįįłgi yee níká anájah doo. Ákweʼé yá anájahígíí ałʼąą ádaatʼé, tʼáá nigi átʼéego, wołí bee ádaatʼı̨́įgo Jiihóvah yikʼehgóó ádaatʼé. Tʼáadoo leʼé yiʼoh nídadinidleeh índa nidaʼiisííh. Áko éí bąą tʼáá ákǫ́ǫ́ bił kʼé nídaʼahidiʼní. (Colossians 3:13 yíníłtaʼ.) Yáʼátʼéehgo ádaatʼéhii bee ádaa ákodanohsin. Áko éí ayóóʼádaʼahííníiʼníi doo índa áhánígo Jiihóvah bił ídlı̨́į doo.

20, 21. “Tʼáá aaníí iináanii,” haʼátʼíí átʼé?

²⁰ Jiihóvah éí tʼáá ałtso bikʼis iiná yáʼátʼéhígíí bee dahólǫ́ǫ doo nízin. Diyin Bizaad yee naʼnitingo éí kʼad kéédahoniitʼínígi átʼéego níléí náasdi doo ákóhootʼée da doo.

²¹ Níléí náasdi éí hoolʼáágóó dahiniiʼnáa doo, 70 doodaiiʼ 80 nááhaijįʼ éí ndagaʼ. Nihitsʼíís hadíłtʼéego “iiná doo ninítʼiʼii” nihee hólǫ́ǫ doo, hodéezyéel doo índa ił hózhǫ́ǫgo nihinaagóó hózhǫ́ náhásdlı̨́įʼ doo. Kótʼéego iiná éí Diyin Bizaad “tʼááʼaaníí iináanii” yiłníigo yózhí. Jiihóvah éí díí átʼéego iiná nihaa deeshłééł níigo yee haadziih, áko díí yéego deiyíníitąʼ doo.​—1 Timothy 6:12, 19.

22. (a) “Tʼáá aaníí iináanii” haitʼéego yéego deiyíníitąʼ doo? (b) Iiná doo ninítʼiʼii haʼátʼíí biniyé ádeenáago doo aa doolyéeł da?

²² “Tʼáá aaníí iináanii” haitʼéego yéego deiyíníitąʼ doo? “Yáʼátʼéehgo óʼooʼnííł ląʼígo baa nidaakai” doo. (1 Timothy 6:18) Díí áhyiłníigo éí Diyin Bizaad biiʼdóó bíhwiilʼą́ą́ʼígíí bikʼeh ániitʼée doo. Tʼáá nihí ániitʼéego bineiilnishgo bikʼeh ániitʼée doo, ndi iiná doo ninítʼiʼii éí ádeenáago doo aa doolyéeł da. Háálá Jiihóvah bikʼeh dahółʼínígíí tʼóó yeidoolééł, díí Jiihóvah bibee ajoobaʼii átʼé. (Romans 5:15) Jiihóvah éí iiná doo ninítʼiʼii aa deeshłééł nízin.

23. Tʼáá ní ánítʼéego, haʼátʼíí biniyé kʼad ádá nahóʼá?

²³ ‘God bikʼeh óʼoolʼįįłgi, éísh bikʼeh ááshnííł?’ Łahgóó doo ákótʼéégóó éʼéshʼı̨́ı̨́ lá ninzı̨́įʼgo, tʼáá ákǫ́ǫ́ hashtʼedíílííł. Jiihóvah baʼííníidlíigo áádóó bikʼeh ániitʼéego, éí bineʼ anániichéehii nilı̨́. Séítan hooʼááłígíí biyaagi Jiihóvah bidineʼé bikʼeh dahółʼínígíí  yaa áhályą́. Jiihóvah yee haadziih yę́ęgi átʼéego nahasdzáán bikááʼ hózhǫ́ náhásdlı̨́įʼgo ákwii atah kééhoniitʼı̨́į doo nízin. Aooʼ, tʼáá ní ánítʼéego éí tʼáá aaníí iináanii naa doolyééł!