1, 2. Ni nkahi ei turikubaasa kwiha oburinzi ebiro ebi?

KA TUGIRE ngu ori omu ruguuto noogyenda, hariho eihunga ry’amaani. Okiba noogyenda, habaho omwirima, kandi hatandika kubaho emirabyo n’enkuba. Ahonaaho hagwa enjura nyingi. Otandika kusherura obwegamo. Ka nikikuhuumuriza waabona omwanya murungi gw’okwegamamu!

² Turi omu mbeera nk’egyo obunaku obu. Embeera omu nsi nizeeyongyera kuba mbi munonga. Noobaasa kwebuuza oti: ‘Nimbaasa kwiha nkahi oburinzi?’ Omuhandiiki w’ekitabo kya Zaaburi akagira ati: “Aryagira Mukama ati: Niiwe buhungiro bwangye, kandi orugo rwangye orugumire, Ruhanga wangye ou ndikwesiga.” (Zaaburi 91:2) Eego, Yehova naabaasa kutuhuumuriza omu bureemezi bwaitu hati, kandi naatuha n’amatsiko g’ebiro by’omumaisho.

3. Nitubaasa kuhindura tuta Yehova obuhungiro bwaitu?

³ Yehova naabaasa kuturinda ata? Naabaasa kutuhwera kusingura oburemeezi obu turikuba twine, kandi aine amaani maingi kukira buri omwe orikuba naayenda kutukora kubi. N’obu twakuhikwaho akabi hati, nitubaasa kuhamya ngu buri kimwe ekyasiisikaire Yehova naija kukigarura omu buteeka, omu biro by’omumaisho. Baibuli neetuhiga eti: “Mwerindire omu kukunda kwa Ruhanga.” (Yuda 21) Twine kuguma haihi na Yehova kubaasa kutunga obuhwezi bwe omu bwire bugumire. Kwonka shi, nitubaasa kukikora tuta?

4, 5. Yehova ayorekire ata ngu naatukunda?

⁴ Kubaasa kuguma haihi Yehova, twine kumanya ngu  naatukunda munonga. Teekateeka ahari byona ebi Yehova atukoreire. Atuhaire ensi nungi erimu ebimera n’enyamaishwa nungi munonga. Yehova kandi atuhaire eby’okurya binuzire n’amaizi marungi g’okunywa. Kurabira omu Baibuli, atwegyeise eiziina rye n’emitwarize ye mirungi. Okukira byona, akatworeka ngu naatukunda obu yaayohereza omu nsi Yesu Omwana we ou arikukunda munonga kutufeera. (Yohaana 3:16) Kandi ahabw’ekitambo ekyo, twine amatsiko g’omuhendo aha biro by’omumaisho.

⁵ Yehova akataho gavumenti omu iguru, nibwo Bukama bwa Mesia oburikwija kuhezaho okubonabona kwona. Obukama obwo nibwija kuhindura ensi paradiso, ahu buri omwe arikwija kutuura aine obusingye n’okushemererwa ebiro byona. (Zaaburi 37:29) Omuringo ogundi ogu Yehova ayorekire ngu naatukunda, n’okutwegyesa oku twine kutwaza gye hati. Naatuhiga kumushaba, kandi butoosha naaba ayeteekateekire kuhurira okushaba kwaitu. Yehova ayorekire ngu naakunda buri omwe ahariitwe.

6. Noobaasa kworeka ota ngu noosiima Yehova ahabw’okukukunda?

⁶ Noobaasa kworeka ota ngu noosiima Yehova ahabw’okukukunda? Yoreka ngu noosiima byona ebi akukoreire. Eky’obusaasi, abantu baingi ebiro ebi n’entasiima. Nikwo kyabaire kiri obu Yesu yaabaire ari omu nsi. Eizooba rimwe, Yesu akatambira ababembe ikumi, kwonka omwe wenka niwe yaagarukire kumwebaza. (Luka 17:12-17) Nitwenda kuba nk’omushaija owaagarukire kwebaza Yesu. Tushemereire kuguma nitusiima Yehova.

7. Tushemereire kukunda Yehova kirikwingana ki?

⁷ Kandi naitwe twine kworeka ngu nitukunda Yehova. Yesu akagambira abeegi be ngu baine kukunda Yehova n’omutima  gwabo gwona, n’amagara gaabo goona, n’obwengye bwabo bwona. (Shoma Matayo 22:37.) Ekyo nikimanyisa ki?

8, 9. Nitubaasa kworeka tuta ngu nitukunda Yehova?

⁸ Mbwenu shi nikimara kugira ngu nitukunda Yehova? Ngaaha. Twaba nitukunda Yehova n’omutima gwaitu gwona, n’amagara gaitu goona, n’obwengye bwaitu bwona, ekyo nitwija kukyoreka omu bikorwa. (Matayo 7:16-20) Baibuli neeyoreka gye ngu twaba nitukunda Ruhanga, nitwija kworobera ebiragiro bye. Mbwenu shi ekyo kigumire? Ngaaha, ahabw’okuba “ebiragiro bye tibirusya.”—Shoma 1 Yohaana 5:3.

⁹ Twayorobera Yehova, nitutunga okushemererwa n’okumarwa. (Isaaya 48:17, 18) Kwonka shi niki ekirikwija kutuhwera kuguma haihi na Yehova? Ka tureebe.

10. Ahabw’enki oshemereire kugumizamu nooyega ahari Yehova?

¹⁰ Obaasize kuba ota munywani wa Yehova? Kurabira omu kwega Baibuli, omanyire gye Yehova kandi waaba munywani we. Obunywani obu buri nk’omuriro ogu orikuba nooyenda ngu gugume nigwaka. Nk’oku omuriro gwine kuteebwamu enku kubaasa kuguma nigwaka, oine kuguma nooyega ebirikukwata ahari Yehova, obunywani bwanyu kubaasa kuguma buri obw’amaani.—Enfumu 2:1-5.

11. Ebi orikwega omu Baibuli nibiija kukukwataho bita?

¹¹ Waagumizamu nooyega Baibuli, noija kwega ebintu ebirikukuhika aha mutima. Yetegyereze oku abeegi babiri ba Yesu baayehuriire obu Yesu yaabashoboororera obunabi. Bakagira bati: “Emitima yaitu tiyaashashaanuka, obu yaaba naagamba naitwe omu muhanda, naatushuuruurira Ebyahandiikirwe?”—Luka 24:32.

12, 13. (a) Niki ekirikubaasa kuhika ahari rukundo ei twiniire Ruhanga? (b) Nitubaasa kuguma twiniire tuta Yehova rukundo?

 ¹² Nk’oku baashemereirwe obu baayetegyereza Ebyahandiikirwe, noobaasa kuba waatungire omuhimbo nigwo gumwe obu waatandika kwetegyereza Baibuli. Eki kikakuhwera kumanya Yehova n’okumukunda. Toshemereire kwikiriza okukunda oku kukahora.—Matayo 24:12.

¹³ Waaheza kuba munywani wa Ruhanga, oine kukora munonga kwongyera kuhamya omukago gwanyu. Oine kugumizamu nooyega ebirikukwata ahari Yehova Ruhanga na Yesu Kristo kandi okateekateeka aha bi orikwega n’oku orikubaasa kubigyenderaho. (Yohaana 17:3) Waaba nooshoma Baibuli nari noogyega, yeebuuze oti: ‘Eki nikinyegyesa ki ahari Yehova Ruhanga? Ahabw’enki nyine kumukunda n’omutima gwangye gwona, n’amagara gangye goona?’—1 Timoseo 4:15.

14. Okushaba nikutuhwera kuta kuguma twiniire Yehova rukundo y’amaani?

 ¹⁴ Waaba oine munywani waawe ou orikukunda munonga, nooba nookira kugaaniira nawe, kandi ekyo nikihamya omukago gwanyu. Omu muringo nigwo gumwe, twaba nitukira kugaaniira na Yehova omu kushaba, rukundo ei tumwiniire neeguma ehami. (Shoma 1 Abatesalonika 5:17.) Okushaba n’ekiconco ky’omuhendo kuruga ahari Tataitwe ow’omu iguru. Tushemereire kumushaba twihire aha mutima. (Zaaburi 62:8) Titwine kushaba ebintu ebi tukwatsire omu mutwe, beitu twine kworeka ngu buzima ebi turikushaba nitubimanyisa. Buzima, twagumizamu nitwega Baibuli kandi turikushaba kuruga aha mutima, nitwija kuguma twiniire Yehova rukundo y’amaani.

15, 16. Nootwara ota omurimo gw’okubuurira?

¹⁵ Twaba nitwenda kuguma haihi na Yehova, nituba twine kugambira abandi ebi turikwikiriza. Okugambira abandi ebirikukwata ahari Yehova, n’omugisha gw’amaani. (Luka 1:74) Kandi n’obujunaanizibwa obu Yesu yaahaire Abakristaayo boona. Buri omwe ahariitwe ashemereire kubuurira amakuru marungi g’Obukama bwa Ruhanga. Eki waakikozire?—Matayo 24:14; 28:19, 20.

¹⁶ Entumwa Paulo akaba naatwara omurimo gw’okubuurira nka mukuru, ahakuba akagweta ‘eky’obutungi.’ (2 Abakorinso 4:7) Okugambira abandi ahari Yehova n’ebigyendererwa bye nigwo murimo ogurikukirayo obukuru ogu orikubaasa kukora. Nikwo orikubaasa kuheereza Yehova otyo, kandi naatwara ebi orikukora nka bikuru. (Abaheburaayo 6:10) Okubuurira nikubaasa kukugasira hamwe n’abo abarikukuhurikiza, ahakuba noirira haihi na Yehova kandi ohwera n’abandi kumwirira haihi, n’okwija  kutunga amagara agatahwaho. (Shoma 1 Abakorinso 15:58.) Mbwenu shi hariho omurimo ogurikubaasa kukureetera okumarwa okukira ogu?

17. Ahabw’enki omurimo gw’okubuurira gwine kukorwa ahonaaho?

¹⁷ Omurimo gw’okubuurira gwine kukorwa ahonaaho. Tushemereire kubuurira “ekigambo,” kandi tushemereire kukibuurira “n’obweziriki.” (2 Timoseo 4:2) Abantu baine kuhurira ebirikukwata aha Bukama bwa Ruhanga. Baibuli neegira eti: “Eizooba rya Mukama erikuru riri haihi; riri haihi kandi nirirahuka munonga.” Emperu terikwija ‘kukyerererwa!’ (Zefania 1:14; Habakuuki 2:3) Buzima, obwire butari bwa hare, Yehova naija kucwekyereza ensi ya Sitaane embi. Ekyo kitakabaireho, abantu baine kuraburwa kugira ngu bacwemu kuheereza Yehova.

18. Ahabw’enki tushemereire kuramya Yehova turi hamwe n’Abakristaayo ab’amazima?

¹⁸ Yehova naayenda ngu tumuramize hamwe n’Abakristaayo ab’amazima. Baibuli neegira eti: “Ka tuteekateekye oku twakwezirikisana kukundana n’okukora ebirungi, tutarikureka kuteeranira hamwe nk’oku abamwe bagira, kureka tugumyane, kandi nk’oku murikureeba ngu ekiro ekyo kiri haihi n’okuhika.” (Abaheburaayo 10:24, 25) Tushemereire kuteeraho kuza omu nteerane zoona. Enteerane nizitubaasisa kutunga omugisha gw’okugumyana n’okugaruranamu amaani.

19. Niki ekirikubaasa kutuhwera kukunda ab’eishe-emwe?

¹⁹ Ku orikuza omu nteerane, nooshangayo abanywani barungi abaraakuhwere kuramya Yehova. Noija kushangayo ab’eishe-emwe abarikuteeraho kumuramya. Kandi nabo bari nkaiwe, tibahikiriire kandi nibakora enshobe. Ku baraakushobeze, ba oyeteekateekire kubasaasira. (Shoma Abakolosai 3:13.) Butoosha ta omutima aha mitwarize mirungi  y’ab’eishe-emwe, ahakuba waakora ekyo nikiija kukuhwera kubakunda n’okwirira haihi Yehova.

20, 21. “Amagara agaabuzima” niki?

²⁰ Yehova naayenda ngu banywani be batungye amagara agarikukirayo oburungi. Baibuli neeyegyesa ngu omu biro by’omumaisho nitwija kuba twine amagara agarikutaanira kimwe n’agu twine hati.

²¹ Omu biro by’omumaisho, nitwija kutuuraho ebiro byona beitu kutari kumara emyaka 70 nari 80. Nitwija kutunga “amagara agaabuzima” tutarikurwara, twine obusingye, n’okushemererwa omu paradiso nungi. Ekyo nikyo Baibuli erikweta “amagara agaabuzima.” Yehova naaraganisa kutuha amagara agaabuzima, kwonka hati twine kukora kyona ekirikubaasika kugatunga.—1 Timoseo 6:12, 19.

22. (a) Noobaasa kutunga ota “amagara agaabuzima”? (b) Ahabw’enki tutarikubaasa kukoreerera amagara agatahwaho?

²² Nitubaasa “kutunga amagara aga buzima” tuta? Twine ‘kukora ebirungi’ kandi tukaba “abatungi omu micwe mirungi.” (1 Timoseo 6:18) Eki nikimanyisa ngu twine kugyendera aha bi turikwega omu Baibuli. Kwonka, okutunga amagara agaabuzima tikurikurugiirira aha kuteeraho kwaitu. Titurikubaasa kutunga amagara agatahwaho ahabwaitu. N’ekiconco kuruga ahari Yehova eki arikuha abaheereza be abeesigwa, ahabw’embabazi ze. (Abarooma 5:15) Tataitwe ow’omu iguru buzima naayenda kuha abaheereza be abeesigwa ekiconco eki.

23. Ahabw’enki oine kucwamu gye hati?

²³ Yebuuze oti: ‘Nindamya Ruhanga omu muringo ogu arikusiima?’ Waashanga ngu oine kukora empindahinduka, oshemereire kuzikora ahonaaho. Twayesiga Yehova kandi tukakora buri kimwe ekirikubaasika kumworobera,  naija kuba obuhungiro bwaitu. Naija kurinda abantu be abeesigwa omu biro by’emperu eby’ensi ya Sitaane egi embi. Kandi Yehova naija kuhamya ngu twatuura omu Paradiso ebiro byona, nk’oku yaaraganiise. Buzima, noobaasa kwija kutunga amagara agaabuzima waacwamu gye hati!