୧, ୨. ଆଜିର କଠିନ ପରିସ୍ଥିତିରୁ ରକ୍ଷା ପାଇବା ପାଇଁ ଆମେ କାହାଠାରୁ ସାହାଯ୍ୟ ପାଇପାରିବା ?

 କଳ୍ପନା କରନ୍ତୁ ଯେ ଆପଣ ରାସ୍ତାରେ ଚାଲି ଚାଲି ଯାଉଛନ୍ତି । ହଠାତ୍‌ ପାଗ ଭୟଙ୍କର ରୂପ ନିଏ । ବିଜୁଳି ଚମକିବାକୁ ଲାଗେ ଏବଂ ପ୍ରଚଣ୍ଡ ଘଡ଼ଘଡ଼ି ହୁଏ । ତାʼପରେ ମୂଷଳ ଧାରାରେ ବର୍ଷା ଆରମ୍ଭ ହୋଇଯାଏ । ଆପଣ ଆଶ୍ରୟ ନେବା ପାଇଁ କୌଣସି ଏକ ଜାଗା ଖୋଜନ୍ତି । ଠିକ୍‌ ସେତିକି ବେଳେ ଆପଣ ଏକ ଘର ଦେଖିବାକୁ ପାʼନ୍ତି । ଆପଣ ଦୌଡ଼ି ଯାଇ ସେଠାରେ ଆଶ୍ରୟ ନିଅନ୍ତି । ଏଭଳି ପରିସ୍ଥିତିରେ ଆପଣ ସେଠାରେ କେତେ ଶାନ୍ତିରେ ନିଃଶ୍ୱାସ ମାରିବେ !

^୨ ଆଜି ଜଗତର ପରିସ୍ଥିତି ମଧ୍ୟ ଠିକ୍‌ ସେହିପରି ଅଟେ । ଏହା ଦିନକୁ ଦିନ ଆହୁରି ଖରାପ ହେବାକୁ ଲାଗିଛି । ଆପଣ ହୁଏତ ଭାବିପାରନ୍ତି, ‘ଏସବୁରୁ ରକ୍ଷା ପାଇବା ପାଇଁ ମୁଁ କେଉଁଠାକୁ ଯିବି ?’ ଗୀତସଂହିତାର ରଚୟିତା ଲେଖିଥିଲେ, “ମୁଁ ସଦାପ୍ରଭୁଙ୍କ ବିଷୟରେ କହିବି, ସେ ମୋହର ଆଶ୍ରୟ ଓ ମୋହର ଦୁର୍ଗ; ମୋହର ପରମେଶ୍ୱର, ମୁଁ ତାହାଙ୍କଠାରେ ନିର୍ଭର ରଖେ ।” (ଗୀତସଂହିତା ୯୧:୨) ଆଜି ଆମେ ଯେତେ ମଧ୍ୟ ସମସ୍ୟାଗୁଡ଼ିକ ଦ୍ୱାରା ଘେରି ରହିଥାଉ ନା କାହିଁକି, ଯିହୋବା ଆମକୁ ନିଶ୍ଚୟ ରକ୍ଷା କରିପାରିବେ । କେବଳ ସେତିକି ନୁହଁ, ସେ ଆମକୁ ଏକ ସୁନ୍ଦର ଭବିଷ୍ୟତର ଆଶା ମଧ୍ୟ ଦେଇଥାʼନ୍ତି ।

୩. ଯିହୋବାଙ୍କଠାରୁ ସାହାଯ୍ୟ ପାଇବା ପାଇଁ ଆମକୁ କʼଣ କରିବାକୁ ହେବ ?

^୩ ଯିହୋବା ଆମକୁ କିପରି ରକ୍ଷା କରନ୍ତି ? ସେ ଆମକୁ ନିଜ ସମସ୍ୟାଗୁଡ଼ିକର ସାମନା କରିବା ପାଇଁ ସାହାଯ୍ୟ କରନ୍ତି । ଏପରି ଯେକେହି ଆମକୁ କ୍ଷତି ପହଞ୍ଚାଇବାକୁ ଚାହେଁ, ତାʼଠାରୁ ଯିହୋବା କାହିଁ କେତେ ଅଧିକ ଶକ୍ତିଶାଳୀ ଅଟନ୍ତି । ଯଦିଓ ବର୍ତ୍ତମାନ କୌଣସି ଦୁଃଖଦ ଘଟଣା ଯୋଗୁଁ ଆମର କିଛି ହାନି ହୁଏ, ତଥାପି ଆମେ ସମ୍ପୂର୍ଣ୍ଣ ଭରସା ରଖିପାରିବା ଯେ ଯିହୋବା ଭବିଷ୍ୟତରେ ଏହାର ନିଶ୍ଚୟ କ୍ଷତିପୂରଣ କରିବେ । ବାଇବଲରୁ ଆମକୁ ଏହି ପ୍ରେରଣା ମିଳେ: “ଈଶ୍ୱରଙ୍କ ପ୍ରେମରେ ଆପଣାମାନଙ୍କୁ ସ୍ଥିର କରି ରଖ ।” (ଯିହୂଦା ୨୧) ଯଦି ଆମେ କଠିନ ପରିସ୍ଥିତିରେ ଯିହୋବାଙ୍କଠାରୁ ସାହାଯ୍ୟ ପାଇବାକୁ ଚାହୁଁ, ତେବେ ଆମକୁ ତାହାଙ୍କ ସହିତ ଘନିଷ୍ଠ ସମ୍ପର୍କ ରଖିବାକୁ ହେବ । ଆମେ ଏହି ସମ୍ପର୍କ କିପରି ରଖିପାରିବା ?

୪, ୫. ଯିହୋବା କିପରି ଦେଖାଇଛନ୍ତି ଯେ ସେ ଆମକୁ ପ୍ରେମ କରନ୍ତି ?

^୪ ଯିହୋବାଙ୍କ ସହିତ ଘନିଷ୍ଠ ସମ୍ପର୍କ ରଖିବା ପାଇଁ ଆମକୁ ଏହା ବୁଝିବା ଜରୁରୀ ଯେ ସେ ଆମକୁ କେତେ ପ୍ରେମ କରନ୍ତି । ଟିକିଏ ଭାବି ଦେଖନ୍ତୁ, ଯିହୋବା ଆମ ପାଇଁ କେତେ କʼଣ କରିଛନ୍ତି ! ସେ ଆମକୁ ଏଇ ସୁନ୍ଦର ପୃଥିବୀ ଦେଇଛନ୍ତି । ସେ ଭିନ୍ନ ଭିନ୍ନ ପ୍ରକାରର ଗଛଲତା ଓ ଜୀବଜନ୍ତୁ ସୃଷ୍ଟି କରିଛନ୍ତି, ଯେଉଁଗୁଡ଼ିକୁ ଦେଖି ଆମେ ଚକିତ ହେଉ । ଆମ ଖାଇବା ପାଇଁ ସେ ନାନା ପ୍ରକାରର ସୁଆଦିଆ ଖାଦ୍ୟ ଏବଂ ପିଇବା ପାଇଁ ପରିଷ୍କାର ପାଣି ଦେଇଛନ୍ତି । ସେ ବାଇବଲ ମାଧ୍ୟମରେ ଆମକୁ ତାହାଙ୍କ ନାମ ଏବଂ ତାହାଙ୍କ ମହାନ ଗୁଣଗୁଡ଼ିକ ବିଷୟରେ ଜଣାଇଛନ୍ତି । ଯିହୋବାଙ୍କ ପ୍ରେମର ସବୁଠାରୁ ବଡ଼ ପ୍ରମାଣ ହେଉଛି, ସେ ଆମର ଉଦ୍ଧାର ପାଇଁ ତାହାଙ୍କ ପ୍ରିୟ ପୁତ୍ର ଯୀଶୁଙ୍କୁ ନିଜ ଜୀବନ ବଳିଦାନ ଦେବାକୁ ଏହି ପୃଥିବୀକୁ ପଠାଇଲେ । (ଯୋହନ ୩:୧୬) ଏହି ବଳିଦାନ ଯୋଗୁଁ ହିଁ ଆମକୁ ଏକ ସୁନ୍ଦର ଭବିଷ୍ୟତର ଆଶା ମିଳିଛି ।

^୫ ଯିହୋବା ଆମ ପାଇଁ ସ୍ୱର୍ଗରେ ତାହାଙ୍କ ରାଜ୍ୟ ମଧ୍ୟ ସ୍ଥାପନ କରିଛନ୍ତି । ଈଶ୍ୱରଙ୍କ ଏହି ରାଜ୍ୟ ଖୁବ୍‌ ଶୀଘ୍ର ଆମର ସମସ୍ତ ଦୁଃଖକଷ୍ଟକୁ ଦୂର କରିଦେବ ଏବଂ ସାରା ପୃଥିବୀକୁ ଏକ ସୁନ୍ଦର ଉଦ୍ୟାନରେ ପରିଣତ କରିବ । ସେଠାରେ ସମସ୍ତେ ଶାନ୍ତି ଓ ଖୁସିରେ ଚିରଦିନ ପାଇଁ ଜୀବନର ଆନନ୍ଦ ନେବେ । (ଗୀତସଂହିତା ୩୭:୨୯) ଯିହୋବାଙ୍କ ପ୍ରେମର ଆଉ ଏକ ଉଦାହରଣ ହେଉଛି, ସେ ଆଜି ଆମକୁ ଶିଖାନ୍ତି ଯେ ଆମେ କିପରି ଏକ ଉତ୍ତମ ଜୀବନ ପାଇପାରିବା । ସେ ଏହା ମଧ୍ୟ କହନ୍ତି ଯେ ଆମେ ତାହାଙ୍କ ସହିତ ପ୍ରାର୍ଥନାରେ କଥା ହୋଇପାରିବା ଏବଂ ସେ ଆମ ପ୍ରାର୍ଥନା ଶୁଣିବା ପାଇଁ ସର୍ବଦା ପ୍ରସ୍ତୁତ ରହନ୍ତି । ଯିହୋବା ସ୍ପଷ୍ଟ ଭାବେ ଦେଖାଇଛନ୍ତି ଯେ ଆମ ମଧ୍ୟରୁ ପ୍ରତ୍ୟେକଙ୍କୁ ସେ ପ୍ରେମ କରନ୍ତି ।

୬. ଯିହୋବାଙ୍କ ପ୍ରେମ ବଦଳରେ ଆପଣ କିପରି ତାହାଙ୍କ ପ୍ରତି ପ୍ରେମ ଦେଖାଇପାରିବେ ?

^୬ ଯିହୋବାଙ୍କ ପ୍ରେମ ବଦଳରେ ଆପଣ କିପରି ତାହାଙ୍କ ପ୍ରତି ପ୍ରେମ ଦେଖାଇପାରିବେ ? ଯିହୋବା ଆପଣଙ୍କ ପାଇଁ ଯାହା କିଛି କରିଛନ୍ତି, ତାʼ ପାଇଁ କୃତଜ୍ଞତା ଦେଖାନ୍ତୁ । ଦୁଃଖର କଥା ଯେ ଆଜି ଅଧିକାଂଶ ଲୋକେ କାହାରି ପ୍ରତି କୃତଜ୍ଞତା ଦେଖାନ୍ତି ନାହିଁ । ଯେତେବେଳେ ଯୀଶୁ ପୃଥିବୀରେ ଥିଲେ, ସେତେବେଳେ ମଧ୍ୟ ଏଭଳି ପରିସ୍ଥିତି ଥିଲା । ଥରେ ଯେତେବେଳେ ସେ ଦଶ ଜଣ କୁଷ୍ଠରୋଗୀଙ୍କୁ ସୁସ୍ଥ କଲେ, ସେମାନଙ୍କ ମଧ୍ୟରୁ କେବଳ ଜଣେ ଆସି ତାହାଙ୍କୁ ଧନ୍ୟବାଦ ଜଣାଇଲା । (ଲୂକ ୧୭:୧୨-୧୭) ଯେଉଁ ଲୋକଟି ଯୀଶୁଙ୍କୁ ଧନ୍ୟବାଦ ଦେଇଥିଲା, ଆମେ ସେହି ବ୍ୟକ୍ତି ପରି ହେବା ଉଚିତ୍‌ । ଆମେ ସର୍ବଦା ଯିହୋବାଙ୍କଠାରେ କୃତଜ୍ଞ ରହିବା ଉଚିତ୍‌ ।

୭. ଯିହୋବାଙ୍କ ପ୍ରତି ଆମ ପ୍ରେମ କେତେ ଗଭୀର ହେବା ଉଚିତ୍‌ ?

 ^୭ ଆମେ ଯିହୋବାଙ୍କୁ ପ୍ରେମ କରିବା ଉଚିତ୍‌ । ଯୀଶୁ ନିଜ ଶିଷ୍ୟମାନଙ୍କୁ କହିଥିଲେ ଯେ ସେମାନେ ନିଜ ସମସ୍ତ ହୃଦୟ, ସମସ୍ତ ପ୍ରାଣ ଓ ସମସ୍ତ ମନ ଦେଇ ଯିହୋବାଙ୍କୁ ପ୍ରେମ କରିବା ଉଚିତ୍‌ । (ମାଥିଉ ୨୨:୩୭ ପଢ଼ନ୍ତୁ ।) ଏହାର ଅର୍ଥ କʼଣ ?

୮, ୯. ଆମେ ଯିହୋବାଙ୍କୁ ପ୍ରେମ କରୁ ବୋଲି ଆମେ କିପରି ଦେଖାଇପାରିବା ?

^୮ ଆମେ ଯିହୋବାଙ୍କୁ ପ୍ରେମ କରୁ ବୋଲି କେବଳ କହିବା ଯଥେଷ୍ଟ କି ? ନା । ଯଦି ଆମେ ସମସ୍ତ ହୃଦୟ, ସମସ୍ତ ପ୍ରାଣ ଓ ସମସ୍ତ ମନ ଦେଇ ଯିହୋବାଙ୍କୁ ପ୍ରେମ କରୁ, ତେବେ ଆମେ ନିଜ କାମଗୁଡ଼ିକରେ ମଧ୍ୟ ଏହି ପ୍ରେମ ଦେଖାଇବା । (ମାଥିଉ ୭:୧୬-୨୦) ବାଇବଲ ସ୍ପଷ୍ଟ ଭାବେ କହେ ଯେ ଯଦି ଆମେ ଯିହୋବାଙ୍କୁ ପ୍ରେମ କରୁ, ତେବେ ଆମେ ତାହାଙ୍କ ଆଜ୍ଞାଗୁଡ଼ିକୁ ପାଳନ କରିବା । କʼଣ ଏପରି କରିବା କଠିନ ଅଟେ ? କଦାପି ନୁହଁ, କାରଣ ଯିହୋବାଙ୍କ “ଆଜ୍ଞାସବୁ ଭାରସ୍ୱରୂପ ନୁହେଁ ।”— ୧ ଯୋହନ ୫:୩ ପଢ଼ନ୍ତୁ ।

^୯ ଯେତେବେଳେ ଆମେ ଯିହୋବାଙ୍କ ଆଜ୍ଞା ପାଳନ କରୁ, ଆମ ଜୀବନ ଖୁସି ଓ ସନ୍ତୋଷରେ ଭରିଯାଏ । (ଯିଶାଇୟ ୪୮:୧୭, ୧୮) କିନ୍ତୁ ଯିହୋବାଙ୍କ ସହିତ ଘନିଷ୍ଠ ସମ୍ପର୍କ ବଜାୟ ରଖିବା ପାଇଁ ଆମକୁ କʼଣ ସାହାଯ୍ୟ କରିବ ? ଆସନ୍ତୁ ଏବିଷୟରେ ଦେଖିବା ।

୧୦. ଆପଣ ଯିହୋବାଙ୍କ ବିଷୟରେ ଶିଖିବା କାହିଁକି ଜାରି ରଖିବା ଉଚିତ୍‌ ?

^୧୦ ଯେଉଁ ଦିନଠାରୁ ଆପଣ ବାଇବଲ ଅଧ୍ୟୟନ କରିବା ଆରମ୍ଭ କଲେ, ସେହି ଦିନଠାରୁ ଆପଣ ଯିହୋବାଙ୍କୁ ଜାଣିବାକୁ ଲାଗିଲେ ଏବଂ ତାହାଙ୍କ ସହିତ ଆପଣଙ୍କ ମିତ୍ରତା ଘନିଷ୍ଠ ହେବାକୁ ଲାଗିଲା । ଏହି ମିତ୍ରତା ଏକ ନିଆଁ ଭଳି ଅଟେ, ଯାହାକୁ ଆପଣ ଜଳାଇ ରଖିବାକୁ ଚାହିଁବେ । ଯେପରି ନିଆଁକୁ ଜଳାଇ ରଖିବା ପାଇଁ କାଠ ଆବଶ୍ୟକ ହୁଏ, ଠିକ୍‌ ସେହିପରି ଯିହୋବାଙ୍କ ସହିତ ମିତ୍ରତା ବଜାୟ ରଖିବାକୁ ହେଲେ ଆପଣଙ୍କୁ ତାହାଙ୍କ ବିଷୟରେ ଶିଖିବା ଜାରି ରଖିବାକୁ ହେବ ।— ହିତୋପଦେଶ ୨:୧-୫.

୧୧. ବାଇବଲର ଶିକ୍ଷାଗୁଡ଼ିକ ଆପଣଙ୍କୁ କିପରି ପ୍ରଭାବ ପକାଇପାରେ ?

^୧୧ ଯେପରି ଆପଣ ବାଇବଲ ଅଧ୍ୟୟନ କରିବା ଜାରି ରଖିବେ, ଆପଣ ଏପରି କଥାଗୁଡ଼ିକ ଶିଖିବେ, ଯାହା ଆପଣଙ୍କ ହୃଦୟକୁ ଛୁଇଁ ଯିବ । ଧ୍ୟାନ ଦିଅନ୍ତୁ, ଯୀଶୁ ଖ୍ରୀଷ୍ଟ ନିଜର ଦୁଇ ଜଣ ଶିଷ୍ୟଙ୍କୁ ବାଇବଲର କିଛି ଭବିଷ୍ୟତବାଣୀଗୁଡ଼ିକ ବିଷୟରେ ବୁଝାଉଥିବା ସମୟରେ ସେମାନଙ୍କୁ କିପରି ଲାଗିଲା । ସେମାନେ କହିଲେ, “ଯେତେବେଳେ ପଥ ମଧ୍ୟରେ ସେ  ଆମ୍ଭମାନଙ୍କ ସାଙ୍ଗରେ କଥାବାର୍ତ୍ତା କରୁଥିଲେ ଓ ଆମ୍ଭମାନଙ୍କୁ ଧର୍ମଶାସ୍ତ୍ର ବୁଝାଉଥିଲେ, ସେତେବେଳେ କଅଣ ଆମ୍ଭମାନଙ୍କ ହୃଦୟ ଉତ୍ତପ୍ତ ହେଉ ନ ଥିଲା ?”— ଲୂକ ୨୪:୩୨.

୧୨, ୧୩. (କ) ଯିହୋବାଙ୍କ ପ୍ରତି ଆମ ପ୍ରେମକୁ ସମୟକ୍ରମେ ହୁଏତ କʼଣ ହୋଇପାରେ ? (ଖ) ଯିହୋବାଙ୍କ ପ୍ରତି ଆମ ପ୍ରେମକୁ ଆମେ କିପରି ବଜାୟ ରଖିପାରିବା ?

^୧୨ ଶାସ୍ତ୍ରପଦଗୁଡ଼ିକୁ ବୁଝିବା ପରେ ଶିଷ୍ୟମାନଙ୍କ ହୃଦୟରେ ଯେପରି ଉତ୍ସାହ ଭରିଯାଇଥିଲା, ଠିକ୍‌ ସେହିପରି ଯେତେବେଳେ ଆପଣ ପ୍ରଥମ ଥର ପାଇଁ ବାଇବଲର ସତ୍ୟଗୁଡ଼ିକୁ ବୁଝିବାକୁ ଲାଗିଲେ, ଆପଣଙ୍କ ହୃଦୟରେ ମଧ୍ୟ ଉତ୍ସାହ ଭରିଯାଇଥିବ । ଏହି ଉତ୍ସାହ ଯୋଗୁଁ ଆପଣ ଯିହୋବାଙ୍କୁ ଜାଣିଲେ ଏବଂ ତାହାଙ୍କୁ ପ୍ରେମ କରିବାକୁ ଲାଗିଲେ । କିନ୍ତୁ ସମୟକ୍ରମେ ଏହି ପ୍ରେମ ହୁଏତ ଥଣ୍ଡା ହୋଇଯାଇପାରେ । (ମାଥିଉ ୨୪:୧୨) ତେଣୁ ଆପଣ ସମ୍ପୂର୍ଣ୍ଣ ଚେଷ୍ଟା କରିବା ଉଚିତ୍‌ ଯେ ଆପଣଙ୍କ ଏହି ପ୍ରେମ କେବେ ମଧ୍ୟ ଊଣା ନ ହେଉ ।

^୧୩ ଥରେ ଯେତେବେଳେ ଆପଣ ଈଶ୍ୱରଙ୍କ ମିତ୍ର ହୋଇଯାʼନ୍ତି, ସେହି ମିତ୍ରତାକୁ ବଜାୟ ରଖିବା ପାଇଁ ଆପଣଙ୍କୁ ପରିଶ୍ରମ କରିବାକୁ ହେବ । ଆପଣଙ୍କୁ ଈଶ୍ୱର ଏବଂ ଯୀଶୁଙ୍କ ବିଷୟରେ ଶିଖିବା ଜାରି ରଖିବାକୁ ହେବ । ଏହା ସହିତ, ଆପଣ ଯାହା ଶିଖନ୍ତି, ତାʼ ଉପରେ ଗଭୀର ଭାବେ ଚିନ୍ତନ କରିବାକୁ ହେବ ଏବଂ ସେଗୁଡ଼ିକୁ ନିଜ ଜୀବନରେ ଲାଗୁ କରିବାକୁ ହେବ । (ଯୋହନ ୧୭:୩) ବାଇବଲ ପଢ଼ିବା କିମ୍ବା ଅଧ୍ୟୟନ କରିବା ସମୟରେ ନିଜକୁ  ପଚାରନ୍ତୁ: ‘ଏଥିରୁ ମୁଁ ଯିହୋବାଙ୍କ ବିଷୟରେ କʼଣ ଶିଖୁଛି ? ମୁଁ କାହିଁକି ଈଶ୍ୱରଙ୍କୁ ନିଜ ସମ୍ପୂର୍ଣ୍ଣ ହୃଦୟ ଏବଂ ସମ୍ପୂର୍ଣ୍ଣ ପ୍ରାଣ ସହିତ ପ୍ରେମ କରିବା ଉଚିତ୍‌ ?’— ୧ ତୀମଥି ୪:୧୫.

୧୪. ପ୍ରାର୍ଥନା କରିବା ଦ୍ୱାରା ଯିହୋବାଙ୍କ ପ୍ରତି ଆମ ପ୍ରେମ କିପରି ଦୃଢ଼ ହୋଇ ରହିବ ?

^୧୪ ଯଦି ଆପଣଙ୍କ କୌଣସି ପ୍ରିୟ ବନ୍ଧୁ ଥାʼନ୍ତି, ତେବେ ଆପଣ ନିଶ୍ଚିତ ଭାବେ ପ୍ରତିଦିନ ତାଙ୍କ ସହିତ କଥା ହେଉଥିବେ । ଆଉ, ଏପରି କରିବା ଜରୁରୀ ମଧ୍ୟ ଅଟେ, କାରଣ ଏହାଦ୍ୱାରା ଆପଣଙ୍କ ବନ୍ଧୁତା ଦୃଢ଼ ହୋଇ ରହିବ । ଠିକ୍‌ ସେହିପରି, ଯଦି ଆମେ ଯିହୋବାଙ୍କୁ ପ୍ରତିଦିନ ପ୍ରାର୍ଥନା କରିବା, ତେବେ ତାହାଙ୍କ ପ୍ରତି ଆମ ପ୍ରେମ ସବୁଦିନ ପାଇଁ ଦୃଢ଼ ହୋଇ ରହିବ । (୧ ଥେସଲନୀକୀୟ ୫:୧୭ ପଢ଼ନ୍ତୁ ।) ପ୍ରାର୍ଥନା ଆମ ସ୍ୱର୍ଗୀୟ ପିତାଙ୍କ ତରଫରୁ ମିଳିଥିବା ଏକ ବିଶେଷ ଉପହାର ଅଟେ । ଯେତେବେଳେ ଆମେ ପ୍ରାର୍ଥନା କରୁ, ଆମେ ମନ ଖୋଲି ତାହାଙ୍କ ସହିତ କଥା ହେବା ଉଚିତ୍‌ । (ଗୀତସଂହିତା ୬୨:୮) ଆମେ ମୁଖସ୍ତ ପ୍ରାର୍ଥନା କରିବା ଉଚିତ୍‌ ନୁହଁ, ବରଂ ହୃଦୟର ସହିତ ନିଜ କଥା ତାହାଙ୍କୁ କହିବା ଉଚିତ୍‌ । ହଁ, ଯଦି ଆମେ ବାଇବଲ ଅଧ୍ୟୟନ ଜାରି ରଖିବା ଏବଂ ହୃଦୟର ସହିତ ପ୍ରାର୍ଥନା କରିବା, ତେବେ ଯିହୋବାଙ୍କ ପ୍ରତି ଆମ ପ୍ରେମ ସବୁଦିନ ପାଇଁ ଦୃଢ଼ ହୋଇ ରହିବ ।

୧୫, ୧୬. ପ୍ରଚାର କାମକୁ ଆପଣ କେଉଁ ଦୃଷ୍ଟିରେ ଦେଖନ୍ତି ?

^୧୫ ଯଦି ଆମେ ଯିହୋବାଙ୍କ ସହିତ ଘନିଷ୍ଠ ସମ୍ପର୍କ ବଜାୟ ରଖିବାକୁ ଚାହୁଁ, ତେବେ ଆମକୁ ନିଜ ବିଶ୍ୱାସ ବିଷୟରେ ଅନ୍ୟମାନଙ୍କୁ କହିବାକୁ ହେବ । ଯିହୋବାଙ୍କ ବିଷୟରେ ଅନ୍ୟମାନଙ୍କୁ କହିବା ଆମ ପାଇଁ ଏକ ସମ୍ମାନର ବିଷୟ ଅଟେ ! କେବଳ ସେତିକି ନୁହଁ, ଏହା ଯୀଶୁଙ୍କ ଦ୍ୱାରା ସମସ୍ତ ସତ୍ୟ ଖ୍ରୀଷ୍ଟିୟାନମାନଙ୍କୁ ଦିଆଯାଇଥିବା ଏକ ଦାୟିତ୍ୱ ମଧ୍ୟ ଅଟେ । ତେଣୁ ଆମ ମଧ୍ୟରୁ ପ୍ରତ୍ୟେକେ ଈଶ୍ୱରଙ୍କ ରାଜ୍ୟର ସୁସମାଚାର ପ୍ରଚାର କରିବା ଉଚିତ୍‌ । କʼଣ ଆପଣ ଏପରି କରୁଛନ୍ତି ?— ମାଥିଉ ୨୪:୧୪; ୨୮:୧୯, ୨୦.

^୧୬ ପାଉଲ ପ୍ରଚାର କାମକୁ ଅତି ମୂଲ୍ୟବାନ ଭାବୁଥିଲେ । ତେଣୁ ସେ ଏହାକୁ ଏକ “ଧନ” ବୋଲି କହିଥିଲେ । (୨ କରିନ୍ଥୀୟ ୪:୭) ଯିହୋବା ଏବଂ ତାହାଙ୍କ ଉଦ୍ଦେଶ୍ୟ ବିଷୟରେ ଅନ୍ୟମାନଙ୍କୁ କହିବା ସବୁଠାରୁ ମହତ୍ତ୍ୱପୂର୍ଣ୍ଣ କାମ ଅଟେ । ଏହି କାମ କରିବା ଦ୍ୱାରା ଆପଣ ଯିହୋବାଙ୍କ ସେବା କରିପାରିବେ ଏବଂ ଆପଣଙ୍କ ଏହି ସେବାକୁ ସେ ବହୁମୂଲ୍ୟ ମନେ କରିବେ । (ଏବ୍ରୀ ୬:୧୦) ପ୍ରଚାର କାମ କରିବା ଦ୍ୱାରା ଆପଣଙ୍କର ଏବଂ ଯେଉଁମାନେ ଆପଣଙ୍କ କଥା ଶୁଣନ୍ତି, ଉଭୟଙ୍କର ଲାଭ ହୋଇପାରିବ । କାରଣ ଏଥିରେ ଆପଣ ନିଜକୁ ଓ ଅନ୍ୟମାନଙ୍କୁ ଯିହୋବାଙ୍କ ନିକଟବର୍ତ୍ତୀ ହେବା ଏବଂ ଅନନ୍ତ ଜୀବନ ପାଇବା ପାଇଁ ସାହାଯ୍ୟ  କରିଥାʼନ୍ତି । (୧ କରିନ୍ଥୀୟ ୧୫:୫୮ ପଢ଼ନ୍ତୁ ।) ଏହି କାମରୁ ଆପଣଙ୍କୁ ଯେଉଁ ଖୁସି ମିଳିବ, ତାହା ଆଉ ଅନ୍ୟ କୌଣସି କାମରୁ ମିଳିପାରିବ ନାହିଁ ।

୧୭. ପ୍ରଚାର କାମ କରିବା କାହିଁକି ଅତି ଜରୁରୀ ଅଟେ ?

^୧୭ ଆଜି ପ୍ରଚାର କାମ କରିବା ଅତି ଜରୁରୀ ଅଟେ । ତେଣୁ ଆମେ “ବାକ୍ୟର ପ୍ରଚାର” କରିବା ଉଚିତ୍‌ ଏବଂ ‘ସମୟରେ ହେଉ କିମ୍ବା ଅସମୟରେ,’ ଏହି କାମରେ ଲାଗି ରହିବା ଉଚିତ୍‌ । (୨ ତୀମଥି ୪:୨) ଆମେ ଲୋକମାନଙ୍କୁ ଈଶ୍ୱରଙ୍କ ରାଜ୍ୟ ବିଷୟରେ କହିବା ଜରୁରୀ ଅଟେ । ବାଇବଲ କହେ, “ସଦାପ୍ରଭୁଙ୍କର ମହାଦିନ ନିକଟବର୍ତ୍ତୀ, ତାହା . . . ଅତି ଶୀଘ୍ର ଆସୁଅଛି ।” ଯୁଗାନ୍ତ ଆସିବାରେ “ବିଳମ୍ବ ହେବ ନାହିଁ ।” (ସିଫନୀୟ ୧:୧୪; ହବକ୍‌କୂକ ୨:୩) ଯିହୋବା ଖୁବ୍‌ ଶୀଘ୍ର ଶୟତାନର ଏହି ଦୁଷ୍ଟ ଜଗତକୁ ବିନାଶ କରିଦେବେ । ସେହି ସମୟ ଆସିବା ପୂର୍ବରୁ ଲୋକମାନଙ୍କୁ ସତର୍କ କରିବା ଜରୁରୀ ଅଟେ, ଯାହାଫଳରେ ସେମାନେ ଯିହୋବାଙ୍କ ସେବା କରିବା ପାଇଁ ନିଷ୍ପତ୍ତି ନେଇପାରିବେ ।

୧୮. ଆମେ କାହିଁକି ଅନ୍ୟ ସତ୍ୟ ଖ୍ରୀଷ୍ଟିୟାନମାନଙ୍କ ସହିତ ମିଶି ଯିହୋବାଙ୍କ ଉପାସନା କରିବା ଉଚିତ୍‌ ?

^୧୮ ଯିହୋବା ଚାହାନ୍ତି ଯେ ଆମେ ଅନ୍ୟ ସତ୍ୟ ଖ୍ରୀଷ୍ଟିୟାନମାନଙ୍କ ସହିତ ମିଶି ତାହାଙ୍କ ଉପାସନା କରୁ । ବାଇବଲ କହେ, “ଆମ୍ଭେ ପରସ୍ପର ବିଷୟରେ ଚିନ୍ତା କରିବା ଏବଂ ପରସ୍ପରକୁ ଭଲ ପାଇବା ଓ ଭଲ କାମ କରିବା ପାଇଁ ଉତ୍ସାହିତ କରିବା ଉଚିତ୍‌ । କିଛି ଲୋକ ଯେପରି ମଣ୍ଡଳୀ ଉପାସନା ପରିତ୍ୟାଗ କରନ୍ତି, ଆମ୍ଭେ ସେପରି ଏକାଠି ମିଳିତ ହେବା ବନ୍ଦ କରିବା ଉଚିତ୍‌ ନୁହେଁ । ତାʼ ପରିବର୍ତ୍ତେ, ସେହି ଦିନଟି ନିକଟତର ହେଉଛି ଦେଖି ଆମ୍ଭେମାନେ ଏକାଠି ମିଳିତ ହୋଇ ପରସ୍ପରକୁ ଅଧିକ ଉତ୍ସାହିତ କରିବା ଉଚିତ୍‌ ।” (ଏବ୍ରୀ ୧୦:୨୪, ୨୫, ଇଜି-ଟୁ-ରିଡ୍‌ ଭର୍ସନ) ଆମେ ସମସ୍ତ ସଭାଗୁଡ଼ିକରେ ନିୟମିତ ଭାବେ ଉପସ୍ଥିତ ହେବା ପାଇଁ ସମ୍ପୂର୍ଣ୍ଣ ଚେଷ୍ଟା କରିବା ଉଚିତ୍‌ । ସଭାଗୁଡ଼ିକରେ ଆମକୁ ପରସ୍ପରର ଉତ୍ସାହ ବଢ଼ାଇବା ଏବଂ ପରସ୍ପରକୁ ମଜବୁତ୍‌ କରିବା ପାଇଁ ସୁଯୋଗ ମିଳିଥାଏ ।

୧୯. ଆମ ଖ୍ରୀଷ୍ଟିୟାନ ଭାଇଭଉଣୀମାନଙ୍କୁ ପ୍ରେମ କରିବାରେ ଆମକୁ କʼଣ ସାହାଯ୍ୟ କରିବ ?

^୧୯ ସଭାଗୁଡ଼ିକରେ ଉପସ୍ଥିତ ହୋଇ ଆପଣ ଭଲ ମିତ୍ର ମଧ୍ୟ ପାଇପାରିବେ, ଯେଉଁମାନେ ଆପଣଙ୍କୁ ଯିହୋବାଙ୍କ ଉପାସନା କରିବାରେ ସାହାଯ୍ୟ କରିବେ । ଆପଣ ଭିନ୍ନ ଭିନ୍ନ ଭାଇଭଉଣୀମାନଙ୍କୁ ଭେଟିବେ, ଯେଉଁମାନେ ଆପଣଙ୍କ ଭଳି ଯିହୋବାଙ୍କ ଉପାସନା କରିବା ପାଇଁ ସର୍ବଦା ଚେଷ୍ଟା କରିଥାʼନ୍ତି । ମନେ ରଖନ୍ତୁ, ଆମେ ସମସ୍ତେ ପାପୀ ଅଟୁ ଏବଂ ଭୁଲ୍‌ କରିଥାଉ । ତେଣୁ ଯଦି ଭାଇଭଉଣୀମାନଙ୍କ ମଧ୍ୟରୁ କେହି କୌଣସି ଭୁଲ୍‌ କରନ୍ତି ଏବଂ ଆପଣଙ୍କ ମନରେ କଷ୍ଟ ଦିଅନ୍ତି, ତେବେ ତାଙ୍କୁ କ୍ଷମା କରିବା ପାଇଁ ପ୍ରସ୍ତୁତ ରହନ୍ତୁ । (କଲସୀୟ ୩:୧୩ ପଢ଼ନ୍ତୁ ।) ସର୍ବଦା ନିଜ ଖ୍ରୀଷ୍ଟିୟାନ ଭାଇଭଉଣୀମାନଙ୍କର ଭଲ ଗୁଣଗୁଡ଼ିକ  ପ୍ରତି ଧ୍ୟାନ ଦିଅନ୍ତୁ । ଏପରି କରିବା ଦ୍ୱାରା ଆପଣ ସେମାନଙ୍କୁ ପ୍ରେମ କରିପାରିବେ ଏବଂ ଯିହୋବାଙ୍କ ଆହୁରି ନିକଟବର୍ତ୍ତୀ ହୋଇପାରିବେ ।

୨୦, ୨୧. “ପ୍ରକୃତ ଜୀବନ” କʼଣ ଅଟେ ?

^୨୦ ଯିହୋବା ଚାହାନ୍ତି ଯେ ତାହାଙ୍କ ସମସ୍ତ ମିତ୍ରମାନେ ଉତ୍ତମ ଜୀବନ ପାଆନ୍ତୁ । ବାଇବଲ ଆମକୁ ଶିଖାଏ ଯେ ଭବିଷ୍ୟତରେ ଆମ ଜୀବନ ଆଜିର ଜୀବନଠାରୁ ସମ୍ପୂର୍ଣ୍ଣ ଭିନ୍ନ ହେବ ।

^୨୧ ଭବିଷ୍ୟତରେ ଆମେ କେବଳ ୭୦ କିମ୍ବା ୮୦ ବର୍ଷ ପର୍ଯ୍ୟନ୍ତ ବଞ୍ଚିବା ନାହିଁ, ବରଂ ଆମେ ଚିରଦିନ ପାଇଁ ଜୀବିତ ରହିବା । ଏହି ପୃଥିବୀକୁ ଏକ ସୁନ୍ଦର ପାରଦୀଶରେ ପରିଣତ କରାଯିବ । ଚାରିଆଡ଼େ ଖୁସି ଓ ଶାନ୍ତି ଭରିଯିବ । ଆମେ ଉତ୍ତମ ସ୍ୱାସ୍ଥ୍ୟରେ ‘ଅନନ୍ତ ଜୀବନର’ ଆନନ୍ଦ ନେବା । ଏହି ଜୀବନକୁ ବାଇବଲ “ପ୍ରକୃତ ଜୀବନ” ବୋଲି କହିଥାଏ । ଯିହୋବା ପ୍ରତିଜ୍ଞା କରନ୍ତି ଯେ ସେ ଆମକୁ ଏହି ପ୍ରକୃତ ଜୀବନ ଦେବେ । କିନ୍ତୁ ଏହି ପ୍ରକୃତ ଜୀବନକୁ ଦୃଢ଼ ଭାବରେ ‘ଧରି ରଖିବା’ ପାଇଁ ଆମକୁ ନିଜ ତରଫରୁ ସମ୍ପୂର୍ଣ୍ଣ ଚେଷ୍ଟା କରିବାକୁ ହେବ ।— ୧ ତୀମଥି ୬:୧୨, ୧୯.

୨୨. (କ) ଆମେ ‘ପ୍ରକୃତ ଜୀବନକୁ’ କିପରି ଦୃଢ଼ ଭାବରେ ‘ଧରି ରଖିପାରିବା’ ? (ଖ) ଆମେ କାହିଁକି ଅନନ୍ତ ଜୀବନ ନିଜେ ହାସଲ୍‌ କରିପାରିବା ନାହିଁ ?

^୨୨ ଆମେ ‘ପ୍ରକୃତ ଜୀବନକୁ’ କିପରି ଦୃଢ଼ ଭାବରେ ‘ଧରି ରଖିପାରିବା’ ? ଆମେ “ପରୋପକାର କରି ସମସ୍ତ ସତ୍କର୍ମରେ ଧନୀ” ହେବା ଉଚିତ୍‌ । (୧ ତୀମଥି ୬:୧୮) ଏହାର ଅର୍ଥ ହେଉଛି, ଆମେ ବାଇବଲରୁ ଯାହା ଯାହା ଶିଖୁ, ସେଗୁଡ଼ିକୁ ଲାଗୁ କରିବା ଜରୁରୀ ଅଟେ । କିନ୍ତୁ ଆମେ କେବଳ ନିଜ ପରିଶ୍ରମ ଦ୍ୱାରା ପ୍ରକୃତ ଜୀବନ ପାଇପାରିବା ନାହିଁ । ବାସ୍ତବରେ କହିବାକୁ ଗଲେ, ଆମେ ଅନନ୍ତ ଜୀବନ ନିଜେ ହାସଲ୍‌ କରିପାରିବା ନାହିଁ । ଏହା ତ ଯିହୋବାଙ୍କର “ଅନୁଗ୍ରହ” ଅଟେ । ସେ ଭବିଷ୍ୟତରେ ନିଜ ବିଶ୍ୱସ୍ତ ସେବକମାନଙ୍କୁ ଏହି ଦାନ ଦେବେ । (ରୋମୀୟ ୫:୧୫) ହଁ, ଆମ ସ୍ୱର୍ଗୀୟ ପିତା ନିଜ ବିଶ୍ୱସ୍ତ ସେବକମାନଙ୍କୁ ପ୍ରକୃତରେ ଏହି ଦାନ ଦେବା ପାଇଁ ଚାହାନ୍ତି ।

୨୩. ବର୍ତ୍ତମାନ ଆପଣ ସଠିକ୍‌ ନିଷ୍ପତ୍ତି ନେବା କାହିଁକି ଜରୁରୀ ଅଟେ ?

^୨୩ ଆପଣ ନିଜକୁ ପଚାରନ୍ତୁ, ‘ମୁଁ ଈଶ୍ୱରଙ୍କ ଉପାସନା କʼଣ ଏପରି ପଦ୍ଧତିରେ କରୁଛି, ଯାହା ସେ ମଞ୍ଜୁର କରନ୍ତି ?’ ଯଦି ଆପଣ ଜାଣିବାକୁ ପାଆନ୍ତି ଯେ ଆପଣଙ୍କୁ କିଛି ପରିବର୍ତ୍ତନ କରିବା ଆବଶ୍ୟକ, ତେବେ ସେଗୁଡ଼ିକୁ ତୁରନ୍ତ କରନ୍ତୁ । ଯଦି ଆମେ ଯିହୋବାଙ୍କଠାରେ ଭରସା ରଖିବା ଏବଂ ତାହାଙ୍କ ଆଜ୍ଞା ପାଳନ କରିବା ପାଇଁ ସମ୍ପୂର୍ଣ୍ଣ ଚେଷ୍ଟା କରିବା, ତେବେ ଯିହୋବା ଆମ ପାଇଁ ଆଶ୍ରୟସ୍ଥଳ ହେବେ । ସେ ନିଜ ବିଶ୍ୱସ୍ତ ଲୋକମାନଙ୍କୁ ଶୟତାନର ଜଗତର ଏହି  ଶେଷକାଳରେ ସୁରକ୍ଷିତ ରଖିବେ । ସେ ଏହା ପ୍ରତି ସମ୍ପୂର୍ଣ୍ଣ ଧ୍ୟାନ ଦେବେ ଯେ ଆମେ ପାରଦୀଶରେ ପରିଣତ ସୁନ୍ଦର ପୃଥିବୀରେ କିପରି ଚିରଦିନ ପାଇଁ ଜୀବିତ ରହିବା, ଠିକ୍‌ ଯେପରି ସେ ଆରମ୍ଭରୁ ପ୍ରତିଜ୍ଞା କରିଥିଲେ । ହଁ, ଯଦି ଆପଣ ବର୍ତ୍ତମାନ ସଠିକ୍‌ ନିଷ୍ପତ୍ତି ନେବେ, ତେବେ ଆପଣ ପ୍ରକୃତ ଜୀବନ ପାଇପାରିବେ !