1, 2. Абони римӕхсӕн бунат кӕми ес иссерӕн?

ДӔ ЦӔСТИТӔБӔЛ рауайун кӕнӕ, цума кумӕдӕр фӕццӕуис ӕма тухдунгӕ исистадӕй. Бӕстӕ ниттар ӕй, арв ӕрттевун ӕма гӕбар-губур кӕнун райдӕдта. Нуртӕккӕ хъӕбӕр никкалдзӕй. Гъема дӕхецӕн римӕхсӕн бунат агорун райдӕдтай, ӕма ’й ку иссирдтай, уӕд исуолӕфтӕ.

² Абони дӕр, зӕгъӕн ес, ӕма уӕхӕн уавӕри ан. Дуйней уавӕр фуддӕрӕй-фуддӕр кӕнуй. Ӕма, ӕвӕдзи, сагъӕс кӕнис, дӕхе ци фӕккӕнай, уобӕл. Библий еу псаломи финст ӕй: «Ӕз зӕгъдзӕн Йеговӕн: „Ду дӕ мӕ римӕхсӕн бунат ӕма мӕ федар мӕсуг, ду дӕ мӕ Хуцау, дӕубӕл дардзӕн мӕ зӕрдӕ“» (Псалом 91:2). Зиндзийнӕдтӕбӕл ку ӕмбӕлӕн, уӕд нин Йеговӕ ӕнхус кӕндзӕй. Уомӕй уӕлдай ба ма нин зӕрдӕ ӕвӕруй, федӕни нӕмӕ дессаги цард ке ӕнгъӕлмӕ кӕсуй.

3. Цӕмӕй Йеговӕ нӕ римӕхсӕн бунат исуа, уой туххӕй нӕ ци кӕнун гъӕуй?

³ Йеговӕ нӕ римӕхсӕн бунат ке уодзӕй, е куд лӕдӕргӕ ’й? Ӕ бон нин ӕй цийфӕнди зин уавӕри дӕр банхус кӕнун. Удта нин зиан ракӕнунмӕ ка гъавуй, уонӕй кӕмӕйфӕндидӕр хъаурӕгиндӕр ӕй. Нур нӕбӕл лӕгъузӕй ести ку ’рцӕуа, уӕддӕр Йеговӕ  федӕни уотӕ бакӕндзӕй, ӕма ’й гъуди дӕр нӕбал ӕркӕндзиан. Цӕмӕй нин Йеговӕ зин рӕстӕгути ӕнхус кӕна, уой туххӕй имӕ гъӕуама хӕстӕг уӕн. Библи нин зӕгъуй: «Хуцауи уарзтӕй уӕхе ӕнӕхай ма фӕккӕнтӕ» (Иуди 21). Цӕмӕй Хуцаумӕ алкӕддӕр хӕстӕг уӕн, уой туххӕй нӕ ци кӕнун гъӕуй?

4, 5. Йеговӕ нӕ ке уарзуй, е цӕмӕй бӕрӕг ӕй?

⁴ Цӕмӕй Йеговӕмӕ алкӕддӕр хӕстӕг уӕн, уой туххӕй ӕй гъӕуама лӕдӕрӕн, куд берӕ нӕ уарзуй, уой. Расагъӕс кӕнӕ Йеговӕн е ’гас хуарздзийнӕдтӕбӕл. Е нин балӕвар кодта дессаги рӕсугъд зӕнхӕ. Ӕма ибӕл цинӕхузи зайӕгойтӕ ӕма цӕрӕгойтӕ ес! Равардта ма нин хуӕрзадӕ хуӕруйнӕгтӕ ӕма кӕдзос дон. Йеговӕ нин Библий раргом кодта ӕ ном ӕма ӕ дессаги менеугутӕ. Тӕккӕ хъӕбӕрдӕр ба ӕ уарзондзийнадӕ бавдиста, ӕ хъазар Фурт Йесой мах туххӕй нивондӕн ке равардта, уомӕй (Иоанни 3:16). Ӕма нин еци нивонди фӕрци ес дессаги нифс федӕнӕй.

⁵ Йеговӕ ӕрфедар кодта, ӕ сӕргъи Мессийӕ кӕмӕн ӕй, еци Паддзахадӕ. Е ӕй уӕларвон хецауадӕ. Еци хецауадӕ тагъд ӕгас зиндзийнӕдтӕн ӕма гъезӕмӕрттӕн кӕрон искӕндзӕй. Удта зӕнхӕй рауайун кӕндзӕй дзенет ӕма си адӕн ӕносмӕ фӕрнӕй ӕма амондгунӕй цӕрдзӕнцӕ (Псалом 37:29). Йеговӕ ма нӕ ахур кӕнуй уотӕ цӕрун, цӕмӕй нур дӕр нӕ цардӕй нӕ зӕрдӕ рохс кӕна.  Уомӕй уӕлдай ма нӕ разӕнгард кӕнуй, цӕмӕй имӕ ковӕн. Е алкӕддӕр цӕттӕ фӕууй нӕ кувдтитӕмӕ байгъосунмӕ. Бӕрӕг ӕй, Йеговӕ ни алкедӕр ке уарзуй.

6. Дӕ бон куд ӕй, Йегови уарзондзийнадӕн ке аргъ кӕнис, уой ӕвдесун?

⁶ Йегови уарзондзийнадӕн ке аргъ кӕнис, уой дӕ бон куд ӕй ӕвдесун? Ӕ хуарздзийнӕдти туххӕй си боз уо. Гъигагӕн, абони беретӕ хуарздзийнадӕн аргъ кӕнун нӕ зонунцӕ. Йесой рӕстӕги дӕр уӕхӕн адӕн берӕ адтӕй. Еухатт дӕс хъотургин лӕги ку исдзӕбӕх кодта, уӕд си райарфӕ кӕнунмӕ ӕрмӕстдӕр еунӕг раздахтӕй (Лукай 17:12–17). Мах дӕр фӕндуй еци боззӕрдӕ адӕймаги хузӕн ун ӕма Йеговӕн ӕ хуарздзийнӕдти туххӕй арфӕ кӕнун.

7. Йесо куд загъта, уомӕ гӕсгӕ Йегови куд гъӕуама уарзӕн?

⁷ Уомӕй уӕлдай ма гъӕуама Йегови уарзӕн. Йесо ӕ ахуркӕнуйнӕгтӕн загъта, Йегови ӕгас зӕрдӕй, ӕгас уодӕй ӕма ӕгас зундӕй ке гъӕуама уарзонцӕ. (Бакӕсӕ Матфеййи 22:37.) Цума е куд лӕдӕргӕ ’й?

8, 9. Нӕ бон куд ӕй бавдесун, Йегови ке уарзӕн, уой?

⁸ Цума уотид дзорун, ӕз Йегови уарзун зӕгъгӕ, фагӕ ’й? Нӕй. Йегови ӕгас зӕрдӕй, ӕгас уодӕй ӕма ӕгас зундӕй ку уарзӕн, уӕд уой нӕ гъуддӕгтӕй дӕр ӕвдесдзиан (Матфеййи 7:16–20). Библи ӕргом зӕгъуй, Хуцауи ку уарзӕн уӕд ин ӕ фӕдзӕхститӕ дӕр ке ӕнхӕст кӕндзиан. Цума е зин ӕй? Нӕй, уомӕн ӕма Йегови «фӕдзӕхститӕ...  зинӕнхӕстгӕнӕн нӕ ’нцӕ». (Бакӕсӕ 1 Иоанни 5:3.)

⁹ Йеговӕ Хуцаумӕ ку игъосӕн, уӕд уодзиан амондгун (Исай 48:17, 18). Фал нин ци банхус кӕндзӕй, цӕмӕй алкӕддӕр е ’мбӕлттӕ уӕн? Ӕркӕсӕн аци фарстамӕ.

10. Йегови ӕмбал цӕй фӕрци исдӕ?

¹⁰ Йегови ӕмбал цӕй фӕрци исдӕ? Библи ахур кӕнгӕй Йегови хуӕздӕр ке базудтай, уой фӕрци. Еци лимӕндзийнадӕ рабарӕн ес арти хӕццӕ. Цӕмӕй арт содза, уой туххӕй имӕ согтӕ калун гъӕуй. Мадта дин Йегови хӕццӕ ци лимӕндзийнадӕ ес, е цӕмӕй федардӕр кӕна, уой туххӕй гъӕуама идарддӕр дӕр Йегови туххӕй фулдӕр базонунбӕл архайай (Ӕмбесӕндтӕ 2:1–5).

11. Библий ахурӕдтӕ дӕ цардбӕл куд бӕрӕг кӕндзӕнцӕ?

¹¹ Библи идарддӕр ку ахур кӕнай, уӕд ма берӕ цидӕртӕ базондзӕнӕ, ӕма ци базонай, е дӕ зӕрдӕмӕ гъардзӕй. Йесо ӕ ахуркӕнуйнӕгтӕй дууемӕн Библий пахампарӕдтӕ ку балӕдӕрун кодта, уӕд уой фӕсте загътонцӕ: «Ӕцӕгӕйдӕр, нӕ хӕццӕ надбӕл ку дзурдта ӕма нин Финстадӕ ку лӕдӕрун кодта, уӕд нӕ зӕрдитӕ нӕ реуи нӕ сугъдӕнцӕ?» (Лукай 24:32).

12, 13. а) Кӕд Хуцауи уарзӕн, уӕддӕр нӕ уарзондзийнадӕн тӕссаг цӕмӕй ӕй? б) Нӕ бон ци ӕй кӕнун, цӕмӕй Йегови алкӕддӕр уарзӕн?

¹² Еци дууӕ ахуркӕнуйнаги Финстадӕ ку балӕдӕрдтӕнцӕ,  уӕд сӕ зӕрдитӕ цийнӕй байдзаг ӕнцӕ. Ӕма ду дӕр, ӕвӕдзи, хъӕбӕр цийнӕ кодтай, Библи лӕдӕрун ку райдӕдтай, уӕд. Уой фӕрци Йегови базудтай ӕма ’й бауарзтай. Ӕма дӕ, ӕвӕдзи, нӕ фӕндуй, цӕмӕй еци уарзт ӕруазал уа (Матфеййи 24:12).

¹³ Кӕд Хуцауи ӕмбал исдӕ, уӕд дӕ идарддӕр дӕр архайун гъӕуй, цӕмӕй еци лимӕндзийнадӕ федардӕр кӕна. Идарддӕр архайӕ Хуцауи ӕма Йесой туххӕй фулдӕр базонунбӕл. Ци базонай, уобӕл лӕмбунӕг сагъӕс кӕнӕ, ӕма е дӕ цардбӕл бӕрӕг кӕнӕд (Иоанни 17:3). Библи ку фӕккӕсис ӕма ’й ку фертасис, уӕд дӕхе бафӕрсисӕ: «Аци скъуддзагӕй Йегови туххӕй ци базудтон  ӕма ’й ӕгас зӕрдӕй цӕмӕн гъӕуама уарзон?» (1 Тимофеймӕ 4:15).

14. Йеговӕмӕ ке фӕкковӕн, е нин куд фенхус кӕнуй, цӕмӕй нӕ уарзондзийнадӕ ма ӕруазал уа?

¹⁴ Адӕймаг ӕ хуарз ӕмбали хӕццӕ арӕх ке фӕдздзубандитӕ кӕнуй, уой фӕрци кӕрӕдземӕ ӕнгомдӕр фӕуунцӕ. Уотӕ Йеговӕмӕ дӕр арӕх ку ковӕн ӕма ӕ хӕццӕ ку дзорӕн, уӕд имӕ бонӕй-бонмӕ хӕстӕгдӕр кӕндзиан. (Бакӕсӕ 1 Фессалоникӕгтӕмӕ 5:17.) Нӕ уӕларвон Фидӕмӕ нӕ бон ковун ке ӕй, е устур лӕвар ӕй. Ӕма гъӕуама алкӕддӕр зӕрдӕй ковӕн (Псалом 62:8). Нӕ кувдтитӕ гъӕуама еци-еухузи ма уонцӕ, фал ци дзорӕн, е гъӕуама зӕрдӕй цӕуа. Мадта Библи идарддӕр дӕр ку ахур кӕнӕн ӕма Хуцаумӕ зӕрдӕй ку ковӕн, уӕд Йегови алкӕддӕр уарздзиан ӕма нӕ уарзондзийнадӕ некӕд ӕруазал уодзӕй.

15, 16. Игъосун кӕнуни гъуддагмӕ ци цӕстӕй кӕсис?

¹⁵ Кӕд нӕ фӕндуй, цӕмӕй Йегови ӕмбӕлттӕ уӕн, уӕд ма гъӕуама иннетӕн дӕр дзорӕн, Библийӕй ци базудтан, уой. Иннетӕн Йегови туххӕй дзорун устур кадӕ ’й (Лукай 1:74). Удта е алли ӕцӕг киристони ихӕс ӕй. Еци ихӕс нин нӕ барӕ бакодта Йесо Киристе. Мадта ни алкедӕр гъӕуама игъосун кӕна хуарз хабар Хуцауи Паддзахади туххӕй. Ду дӕр архайис еци гъуддаги? (Матфеййи 24:14; 28:19, 20).

¹⁶ Апостол Павел устур аргъ кодта, ӕ бон хуарз  хабар игъосун кӕнун ке адтӕй, уомӕн. Еци гъуддаг худта «хӕзна» (2 Коринфӕгтӕмӕ 4:7). Адӕнӕн Йегови ӕма ӕ фӕндти туххӕй дзорунӕй ӕхсидзгӕдӕр гъуддаг нӕййес. Еци гъуддаги ку архайай, уӕд е уобӕл дзорӕг уодзӕй, ӕма Йеговӕн лӕггадӕ кӕнис. Йеговӕ ба нӕ лӕггадӕн устур аргъ кӕнуй (Дзиуиттӕгтӕмӕ 6:10). Хуарз хабар ку игъосун кӕнай, уӕд е пайда хӕсдзӕй дӕхецӕн дӕр ӕма дӕмӕ ка игъосуй, уонӕн дӕр. Уой фӕрци дӕхуӕдӕг дӕр Йеговӕмӕ хӕстӕг кӕндзӕнӕ ӕма иннетӕн дӕр еци гъуддаги ӕнхус уодзӕнӕ. Удта уонӕн дӕр фӕззиндзӕй ӕносон царди нифс. (Бакӕсӕ 1 Коринфӕгтӕмӕ 15:58.) Игъосун кӕнунӕй устурдӕр цийнӕдзийнадӕ неци хӕссуй!

17. Игъосун кӕнуни гъуддаги фӕстӕтӕрӕ кӕнӕн цӕмӕннӕ ес?

¹⁷ Игъосун кӕнуни гъуддаги фӕстӕтӕрӕ кӕнӕн нӕййес. Библий финст ӕй: «Игъосун кӕнӕ Хуцауи дзурд, еци гъуддаг кӕнӕ ӕвӕстиатӕй» (2 Тимофеймӕ 4:2). Адӕнӕн гъӕуй Хуцауи Паддзахади туххӕй фегъосун кӕнун. Библи зӕгъуй: «Йегови устур бон хӕстӕг ӕй. Хӕстӕг ӕй ӕма хъӕбӕр тагъд кӕнуй». Кӕрон «нӕ байрӕгӕмӕ кӕндзӕй»! (Софони 1:14; Аввакум 2:3). Хъӕбӕр тагъд Йеговӕ Сайтани фуддуйне фесафдзӕй. Фал бал уӕдмӕ гъӕуй адӕнӕн игъосун кӕнун, цӕмӕй сӕ бон уа Йегови фарс ислӕуун.

18. Йеговӕн ӕцӕг киристӕнтти хӕццӕ еумӕ цӕмӕн гъӕуама лӕггадӕ кӕнӕн?

¹⁸ Йегови фӕндуй, цӕмӕй ин лӕггадӕ кӕнӕн ӕцӕг киристӕнтти хӕццӕ еумӕ. Библий финст  ӕй: «Нӕ кӕрӕдзебӕл сагъӕс кӕнӕн, цӕмӕй кӕрӕдзей разӕнгард кӕнӕн уарзондзийнадӕмӕ ӕма хуарз гъуддӕгтӕмӕ, еуӕй-еуетӕ куд ахур ӕнцӕ, уотӕ не ’мбурдтӕ ма цох кӕнӕн, фал кӕрӕдзей нифсбӕл нифс ӕфтауӕн, ӕма, еци бон куд хӕстӕг кӕнуй, уой цӕйбӕрцӕбӕл хуӕздӕр уинӕн, уойбӕрцӕ никки хъӕбӕрдӕр» (Дзиуиттӕгтӕмӕ 10:24, 25). Ӕмбурдти нӕ бон фӕууй кӕрӕдзей федар кӕнун, ӕма гъӕуама архайӕн, цӕмӕй алли ӕмбурдмӕ дӕр цӕуӕн.

19. Ци нин ӕнхус кӕндзӕй нӕ киристон хуӕртӕ ӕма ӕнсувӕрти уарзунмӕ?

¹⁹ Ӕмбурди хуарз ӕмбӕлттӕ иссердзӕнӕ, ӕма дин етӕ Йеговӕн лӕггадӕ кӕнунмӕ ӕнхус кӕндзӕнцӕ. Базонгӕ си уодзӕнӕ аллихузи хуӕртӕ ӕма ӕнсувӕрти хӕццӕ. Етӕ дӕр дӕу хузӕн Йегови гъуддаги, сӕ бон ци ӕй, уой кӕнунцӕ. Фал етӕ дӕр ӕнцӕ ӕнӕнхӕст ӕма рӕдуйунцӕ. Уомӕ гӕсгӕ син сӕ рӕдудтитӕ зӕрдӕй хатир кӕнӕ. (Бакӕсӕ Колоссӕгтӕмӕ 3:13.) Дӕ киристон хуӕртӕ ӕма ӕнсувӕртӕн алкӕддӕр сӕ хуарз менеугутӕ ку уинай, уӕд дин е ӕнхус кӕндзӕй, цӕмӕй сӕ уарзай ӕма Йеговӕмӕ никки хӕстӕгдӕр кӕнай.

20, 21. «Ӕцӕг цард» ци ӕй?

²⁰ Йегови фӕндуй, цӕмӕй е ’мбӕлттӕ ӕгасӕйдӕр амондгун уонцӕ. Библи куд зӕгъуй, уомӕ гӕсгӕ нӕмӕ федӕни ци цард ӕнгъӕлмӕ кӕсуй, е нури царди хузӕн нӕ уодзӕй.

 ²¹ Адӕн федӕни 70–80 анзи нӕ цӕрдзӕнцӕ, фал цӕрдзӕнцӕ ӕносмӕ зӕнхӕбӕл дзенети ӕма уодзӕнцӕ ӕнӕнез, фӕрнӕйдзаг ӕма амондгун. Еци цард Библи хонуй «ӕцӕг цард». Ӕма нин уомӕй зӕрдӕ ӕвӕруй Йеговӕ. Фал нур гъӕуама ӕгас хъауритӕй архайӕн, цӕмӕй еци цардбӕл «федар ниххуӕцӕн» (1 Тимофеймӕ 6:12, 19).

22. а) Нӕ бон куд ӕй «ӕцӕг цардбӕл» федар ниххуӕцун? б) Уотӕ зӕгъӕн цӕмӕннӕ ес, ӕма ӕносмӕ цӕрдзиан ӕви нӕ, е цӕйбӕрцӕ кӕнӕн, уомӕй кӕнгӕ ’й?

²² Нӕ бон куд ӕй «ӕцӕг цардбӕл» федар ниххуӕцун? Уой туххӕй гъӕуама «хуарздзийнадӕ кӕнӕн» ӕма «гъӕздуг уӕн хуарз гъуддӕгтӕй» (1 Тимофеймӕ 6:18). Ӕндӕр загъдӕй, гъӕуама цӕрӕн, Библийӕй ци базудтан, уомӕ гӕсгӕ. Фал ӕносон цардӕй исхайгин уодзиан ӕви нӕ, е, цӕйбӕрцӕ кӕнӕн, уомӕй кӕнгӕ нӕй. Уотӕ зӕгъӕн нӕ уодзӕй, ӕма нин Йеговӕ ӕносон цардӕй нӕ хъиамӕттӕбӕл бафиста. Ӕносон цард ӕй Йегови лӕвар ӕ еузӕрдон лӕггадгӕнгутӕн, ӕма син ӕй е «’стур хуарзӕнхӕй» балӕвар кӕндзӕй (Ромӕгтӕмӕ 5:15).

23. Цӕмӕн дӕ гъӕуй абони раст унаффитӕ хӕссун?

²³ Мадта дӕхе бафӕрсӕ: «Хуцауи куд фӕндуй, уотӕ ин лӕггадӕ кӕнун?» Кӕд дӕ дӕ царди ести раййевун гъӕуй, уӕд рӕстӕг ма ивазӕ. Йеговӕ дӕ римӕхсӕн бунат уодзӕй, игъосгӕ имӕ ку кӕнай ӕма уобӕл дӕ зӕрдӕ ку дарай, ӕрмӕстдӕр уӕд. Е ӕ лӕггадгӕнгути гъӕуай кӕндзӕй Сайтани дуйней фӕстаг бӕнтти, удта, зӕрдӕ куд байвардта,  уотӕ син ӕносон цард ратдзӕй. Мадта абони раст унаффитӕ ку хӕссай, уӕд ӕцӕг цардӕй исхайгин уодзӕнӕ!