1, 2. ¿Pitaj kay llakiy tiempopi yanapawasunman?

¹ CAMPOPI kashasqaykipi tʼukuriy. Ñanta purishajtiyki yana phuyus rikhurimun. Phuyuspitaj lliuj lliujkuna rikukun, cielopis “¡qhon!, ¡qhon!” nirin, parataj ujllata jichʼakamun. Maypichus pakakunaykita má yachankichu. Ajinallamanta uj lugarta tarinki, chayman yaykojtiykitaj sonqoykeqa “phaj” nirin.

² Kay tiempo kausayninchejqa, chay sinchʼi paraman rijchʼakun. Kay mundoqa diamanta día astawan sajrayashan. Chayrayku ichapis ninki: “¿Pitaj yanapawanmanri?”, nispa. Diospa ujnin kamachin payman nerqa: “Qan kanki pakakunay, jarkʼachasqa wasiy, Diosniytaj; qampi atienekusaj”, nispa  (Salmo 91:2). Arí, Tatanchej Jehová kay llakiy tiempopi yanapawasunman. Qhepamantaj sumaj kausayta qonawanchejta nin.

3. ¿Imatá ruwananchej kasqa Jehová Diosninchej yanapanawanchejpaj?

³ Jehová Diosninchejpi jarkʼakuyta atisunman. Payqa may atiyniyoj, nitaj mayqen sajra runapis pay jina atiyniyojchu. Jinallamanta ima llakiypi rikhurejtinchejpis,  Jehová Diosqa chay llakiyta qhepaman chinkachenqa. Chayrayku Bibliaqa niwanchej, ‘Diospa munakuyninpi  kanallanchejtapuni’ (Judas 21). Sichus Jehová Diosninchejmanta  mana  karunchakusunchu chayqa, payqa  yanapawasunpuni.

4. ¿Imastataj Jehová Diosninchej munakuwasqanchejrayku qowanchej?

⁴ Jehová Diosmanta mana karunchakunapajqa, ashkhata munakuwasqanchejta yuyarikuna. Imastachus qowasqanchejpi tʼukurina. Payqa kay jallpʼata qowanchej. Chaypitaj tukuy laya plantitasta wiñachipuwanchej, miskʼi mikhunitata, yakutapis churapuwanchej. Chantapis imaymana animalesta ruwapuwarqanchej. Mana chayllachu, Jehová Diosninchejqa sutinta, imaynachus kasqantapis Bibliapi willawanchej. Anchatapuni munakuwasqanchejraykutaj, Wawanta  kachamorqa noqanchejrayku kausayninta qonanpaj (Juan 3:16). Chayta ruwasqanrayku, sumaj kausayta suyakuyta atinchej.

5. ¿Imaspí reparasunman Tatanchej Jehová munakuwasqanchejta?

⁵ Jehová Diosqa munakuwasqanchejrayku, cielopi uj gobiernota sayaricherqa. Chay gobiernotaj pisimantawan tukuy llakiykunata chinkachenqa, kay jallpʼatataj uj paraisoman tukuchenqa. Chaypeqa tukuy tiempo allin kausaylla kanqa, may kusisqataj kasunchej  (Salmo 37:29).  Jehová Diosninchejqa  kay tiempopiña kʼachata kausakunanchejpaj yachachiwanchej. Chantapis uyarinawanchejpaj  wakichisqa kashan, chayrayku paymanta mañakunata niwanchej. Tukuy chay imaspi sutʼita reparanchej, Tatanchej  Jehová  mayta  munakuwasqanchejta.

6. Jehová Diosninchejta munakuspa, ¿imastá ruwasun?

⁶ Yachakunchej jina, Jehová Diosninchejqa mayta munawanchej. Noqanchejrí, ¿imaynatá payta munakusunman? Tukuy imata  qowasqanchejmanta agradecekuna. Kay mundomanta ashkha runasqa, mana agradecekuyta yachankuchu. Jesuspa tiemponpipis, runasqa ajinallataj karqanku. Uj kuti, Jesusqa chunka runasta lepra onqoymanta sanoyacherqa. Jinapis  ujlla  Jesusman  agradecekorqa (Lucas 17:12-17). Noqanchejqa chay agradecekoj runa jina kayta munanchej. Chayrayku tukuy imamanta Diosman “gracias” ninanchej tiyan.

7. ¿Imaynatataj Diosninchejta munakunanchej kasqa?

⁷ Diostaqa mana simillamantachu munakuna tiyan. Jesusqa yachachisqasninman nerqa: “Jehová Diosniykitaqa munakunayki tiyan tukuy sonqoykiwan, tukuy kausayniykiwan, tukuy yuyayniykiwantaj”, nispa  (Mateo 22:37 leey).

8, 9. ¿“Diosta munakuni” nispallachu ninanchej kanman?

⁸ ¿“Diosta munakuni” nispallachu ninanchej tiyan? Mana. Jehová Diosta tukuy sonqonchejwan, tukuy kausayninchejwan, tukuy yuyayninchejwantaj munakusun chayqa, ruwasqasninchejpi rikukonqa (Mateo 7:16-20). Bibliaqa niwanchej, Diosta munakuspaqa payta kasukunanchejta. Paypa “kamachisqasninta juntʼaytaj atina jinalla” (1 Juan 5:3 leey).

 ⁹ Jehová Diosninchejta kasukuspaqa, kusisqa, sonqo juntʼasqataj kausakusunchej (Isaías 48:17, 18). Qhepan parrafospi, yachakusun imastachus ruwanata Diosninchejmanta mana karunchakunapaj.

10. Jehová Diosta munakunallapajpuni, ¿imatá ruwana kasqa?

¹⁰ ¿Imataj yanapasorqa Jehová Diosta munakunaykipaj? Bibliata estudiaspaqa Payta astawan rejserqanki, astawantaj Payta munakorqanki. Diosta  munakusqanchejtaqa, ninawan kikinchasunman. Nina mana wañupunanpajqa, llantʼata yapana tiyan. Ajinallataj Jehová Diosta munakusqanchejwanpis. Payta munakunallapajpuneqa, paymanta yachakunallapuni tiyan (Proverbios 2:1-5).

11. Bibliata estudiallankipuni chayqa, ¿sonqoyki imaynataj karenqa?

¹¹ Bibliata estudiallankipuni chayqa, yachakusqayki sonqoykiman chayanqa. Uj kutipi, Jesusqa iskay yachachisqasninman sutʼincharqa, Diosmanta Qhelqasqapi imatachus nisqanta. Paykunataj ninakorqanku: “¿Manachu sonqonchejqa kʼajarerqa ñanta jamoj jina parlashawajtinchej,  Diosmanta Qhelqasqatataj allinta sutʼinchashawajtinchej?”, nispa (Lucas 24:32).

12. ¿Diosta munakusqanchej chiriyapunmanchu?

¹² Jesuspa sutʼinchasqanqa, yachachisqasninpa sonqonkuman chayarqa. Ichá qanpa sonqoykipis kusirikorqa Bibliaj nisqanta entiendejtiyki. Bibliata  estudiaspaqa Diosta aswan sumajta rejserqanki, munakorqankitaj. Nichá munawajchu chay munakuyniyki chiriyapunanta chayri ilayapunanta (Mateo 24:12).

13. ¿Imatataj ruwana tiyan Diosmanta mana karunchakunapaj?

¹³ Kunanqa Diosninchejpa qayllanpiña kashanki. Paymanta mana karunchakunaykipaj, tukuy atisqaykita ruway. Tatanchej Jehovamanta, Jesusmantawan astawan yachakullaypuni. Chay yachakusqaykipitaj tʼukuriy, imaynatachus chayman jina ruwanaykipipis (Juan 17:3). Bibliata leespa chayri estudiaspa, imatachus Diosmanta yachakusqaykipi piensariy. Chantá tʼukuriy, imaynatachus chay yachakusqayki Diosta astawan munakunaykipaj yanapasusqanpi (1 Timoteo 4:15).

14. Diosmanta mañakuy, ¿yanapawasunmanchu payta astawan munakunapaj?

 ¹⁴ Munasqa amigonchejwanqa sapa kuti parlarikunchej. Ajinata parlarikusqanchejrayku, chay amigonchejta astawan munakunchej. Dioswan ajinata parlarisun chayqa, astawan payta munakusun (1 Tesalonicenses 5:17 leey). Tatanchej Jehovamanta mañakuyta atisqanchejqa, may sumajpuni. Chayrayku sonqonchejpi kajta payman willakuna (Salmo 62:8). Diosmantaqa tukuy sonqo mañakuna tiyan, manataj rezaspa jinachu. Chantapis Bibliata estudianallapuni tiyan. Chay imasta ruwasun chayqa, Jehová Diosta munakusqanchejqa mana chiriyaponqachu.

15, 16. ¿Runasman Diosmanta willamunapunichu kanman?

¹⁵ Jehová Diosmanta mana karunchakuyta munaspaqa, imatachus Bibliapi yachakusqanchejta runasman willarina tiyan. Jehová Diosmanta wajkunaman willariyta atisqanchejqa, ni imawan kikinchakunchu (Lucas 1:74). Chantapis Jesuspuni chayta ruwanata kamachiwarqanchej. Chayrayku Diospa Gobiernonmanta sumaj willaykunataqa, tukuy willamunanchej tiyan. Qanrí, ¿runasman willarishankichu? (Mateo 24:14; 28:19, 20).

¹⁶ Apóstol Pabloqa Diosmanta willamuy, ‘may sumaj llankʼay’ kasqanta nerqa (2 Corintios 4:7). Jehová Diosmanta, munayninmantawan runasman willamoyqa, ni ima ruwasqanchejwanpis  kikinchakunmanchu. Chayta ruwaspaqa Jehová Diosninchejta yupaychanchej, paytaj chay ruwasqanchejta mana qonqaponqachu (Hebreos 6:10). Predicaj rispaqa Diosta astawan munakunki, wajkunatapis Diosman qayllaykunankupaj yanapanki. Chantapis wiñay kausayta japʼiyta atinki, willasqaykita uyarejkunapis salvakuyta atenqanku (1 Corintios 15:58 leey). Runasman willamoyqa, ¡may sumajpuni!

17. 1) ¿Imataj usqhayllata chayamushan? 2) Chay pʼunchay chayamunankama, ¿imatá ruwananchej tiyan?

¹⁷ Ama yuyanachu runasman willamunapajqa, tiempo jinantin kasqanta. Biblia niwanchej: “Diospa palabranta sonqo kʼajaywan willay allin tiempopi, mana allin tiempopipis”, nispa (2 Timoteo 4:2). Runasqa yachanankupuni tiyan Diospa Gobiernonmanta. Biblia niwanchej: “Diospa jatun pʼunchaynenqa qayllamushanña. Qayllapiña kashan, usqhayllatataj chayamushan”, nispa. Arí, kay sajra mundoj tukukuynenqa “chayamonqapuni” (Sofonías 1:14; Habacuc 2:3). Jehová Diosqa sajra Supaypa mundonta chinkachenqaña. Chayrayku runasman usqhayllata willamunanchej tiyan, paykunapis Diosman chimpanankupaj.

18. ¿Diosta yupaychanapaj tantakunapunichu?

¹⁸ Jehová Diosqa munan, cheqan cristianos khuska yupaychanankuta. Bibliaqa nin: “Ujkuna ujkunataj purajmanta qhawarinakunachej, ajinamanta astawan munakuy kananpaj, allin ruwaykunatataj ruwananchejpaj. Amataj  tantakuykunaman riyta saqenachu, imaynatachus wakinkuna yachaykukunku, ajinataqa. Astawanpis purajmanta kallpachanakuna, astawanraj Diospa pʼunchaynin qayllamushasqanta reparaspaqa” (Hebreos 10:24, 25). Tantakuykunapeqa purajmanta kallpachanakunchej. Chayrayku tukuynin tantakuykunaman mana faltakuspa rinanchej tiyan.

19. ¿Imatataj ruwana kasqa hermanosta munakunapaj?

¹⁹ Diosta yupaychanapaj tantakuykunapeqa, sumaj amigosta tarinki. Paykunaqa Jehová Diosta sirvinaykipaj yanapasonqanku. Chantapis imaymana hermanosta, hermanasta ima rejsinki, paykunataj qan jinallataj Diosta sirvinankupaj kallpachakushanku. Jinapis tukuyninchej juchasapas kasqanchejrayku, paykunapis pantallankutaj. Pantajtinkoqa perdonayta yachanayki tiyan (Colosenses 3:13 leey). Hermanosta qhawaranaykimantaqa, allin ruwasqasninkuta qhaway. Ajinamanta paykunata munakunki, Tatanchej Jehovamanpis astawan qayllaykunki.

20, 21. ¿Imatataj Biblia “cheqa kaj” kausay nispa sutichan?

²⁰ Jehová Diosninchejqa, munakusqan runasman sumaj kausayta qoyta munan. Bibliaqa nin kay llakiy kausay tukukunanta, may sumaj kausaytaj kananta.

²¹ Chay tiempopeqa mana 70 watasllatachu, nitaj 80 watasllatachu kausakusun, manachayqa wiñaypaj.  Chantapis manaña onqosunchu, sonqo tiyasqa kausakusun, may kusiytaj kanqa. Bibliaqa chay jina kausayta, “cheqa kaj” kausay nispa sutichan. Chaytataj Tatanchej Jehová qowasun. Chayrayku tukuy atisqanchejta ruwana, chay sumaj kausayta japʼinapaj (1 Timoteo 6:12, 19).

22. 1) ¿Imatá ruwasunman “cheqa kaj” kausayta japʼinapaj? 2) Wiñay kausayta, ¿sapallanchejmanta japʼiyta atisunmanchu?

²² ¿Imatá ruwana tiyan “cheqa kaj” kausayta japʼinapaj? “Allin kajta” ruwana tiyan, “allin ruwanaspipis qhapaj” kananchej tiyan (1 Timoteo 6:18). Chayta ruwasunman Bibliapi yachakusqanchejman jina kausakuspa. Jinapis wiñay kausaytaqa Jehová Diosninchejpa ‘jatun khuyakuyninrayku’ japʼiyta atisun, manataj noqanchej imata ruwasqanchejraykuchu. Imajtinchus Payqa kamachisninman qhasillamanta chay sumaj kausayta qonqa (Romanos 5:15). Tatanchej Jehovaqa paymanta mana karunchakojkunaman wiñay kausayta qoyta munanpuni.

23. ¿Imaraykutaj Diosman chimpapunayki tiyan?

²³ Jehová Diosninchejta munayninman jinachus, manachus yupaychashasqaykipi tʼukurinayki tiyan. Wakin imasta mana ruwanaykichu kasqanta reparanki chayqa, amaña chay imasta ruwaychu. Tatanchej Jehovapi atienekusun chay, kasukusuntaj chayqa, payqa jarkʼachasqa wasi jina noqanchejpaj kanqa. Tatanchej Jehovaqa kay tukukuy tiempopi kasukoj kamachisninta yanapanqapuni. Pisimantawantaj pay niwasqanchejman jina mosoj  jallpʼapi wiñay kausayta qowasun. Kunanpacha Tatanchej  Jehovaman  chimpapunki  chayqa, wiñay kausayta  japʼiyta atinki.