1, 2. ¿Llaquicunahuan cajpica pitaj ayudanga?

CAIPI yuyashun, canchari shuj ñanta ricungui. Ñapish mana yuyashcapi jahua cielo amsayashpa, achcata cꞌulun nishpa, rayocuna achij nishpa tamyai callarijpica ¿imatataj ruranguiman? Chashna tamyajpica shuj miticuna lugartami mashcanguiman. Maipi miticunaman chayashpaca ¿manachu tranquilo sintiringui?

² Cunan punllacunapish amsayashpa caticuj shinami achca llaquicunahuan causanchij. Tal vez canca: “¿Llaquicunahuan cashpaca maipitaj miticusha?” nishpachari tapurishcangui. Bibliata escribij shuj runaca: “Chaimantami ñucaca Mandaj Diostaca: ‘Quiquinca ñuca shuyana, ñuca miticunami cangui. Ñuca shunguta churana Dioslla’” nircami (Salmo 91:2). Cunan punllapipish Jehová Diosmi ñucanchij problemacunata ahuantachun ayudai tucun. Shamuj punllapipish huiñai causaitami cusha nin.

3. ¿Jehová Dios ayudachunca imatataj rurana canchij?

³ ¿Ima shinallataj Jehová Diosca ñucanchijta cuidan? Diosca problemacunata ahuantachunmi ñucanchijta ayudan. Paica ñucanchijta llaquichisha nijcunamanta yallimi tucui poderta charin. Cunan punllacunapi charishca llaquicunataca shamuj punllacunapimi Diosca tucuchinga. Bibliapica: “Diospaj cꞌuyaipi catiraichij” ninmi (Judas 21). Chaimantami Jehová Dios ayudachunca paimanta manataj caruyana canchij.

4, 5. ¿Diosca ñucanchijta cꞌuyashcataca ima shinataj ricuchishca?

⁴ Diosmanta manataj caruyangapajca pai cꞌuyashcatami intindina canchij. Pai ñucanchijpaj imallata rurashcatapishmi yuyarina canchij. Cai Allpata, sumaj animalcunata, plantacunatami cushca. Shinallataj alaja micunata, achca yacutami cushca. Diosca paipaj shuti maijan cashcata, pai ima shina cashcataca Bibliapimi yachachishca. Ashtahuancarin ñucanchijta cꞌuyashcamantami paipaj Churita cai Allpaman cacharca (Juan 3:16). Jehová Dios paipaj Churita cushcamantami shamuj punllapipish huiñai causaita charishun.

⁵ Jehová Diosca jahua pachapimi shuj gobiernota churashca. Cai gobiernoca ñallami tucui llaquicunata tucuchinga. Chai qꞌuipami cai Allpataca sumaj paraisota ruranga. Chaipica tranquilo, cushillami causashun (Salmo 37:29). Shinallataj Diosca alli causachun yachachishpami ñucanchijta cꞌuyashcata ricuchin. Ashtahuancarin ñucanchij mañashcacunata uyashpaca utcami cutichin.

6. ¿Jehová Dios canta cꞌuyashcata yachashpaca imatataj rurana cangui?

⁶ ¿Jehová Dios canta cꞌuyashcata yachashpaca imatataj rurana cangui? Yaya Dios, cambaj imallata rurashcamantami shungumanta agradicina cangui. Cunan punllacunapica mana agradicij gentecunami tiyan. Jesuspaj punllacunapipish mana agradicij gentecunami tiyarca. Jesusca leprahuan caj 10 runacunatami jambirca. Paicunamantaca shujllami agradicirca (Lucas 17:12-17). Ñucanchijpish agradicij runa layami Diosta agradicina canchij.

7. ¿Jehová Diostaca ima shinataj cꞌuyana canchij?

⁷ Jehová Diostaca shungumantami cꞌuyashcata  ricuchina canchij. Jesusca paita catijcunataca ‘Jehová Diosta tucui shunguhuan, tucui almahuan, tucui yuyaihuan cꞌuyanguichij’ nircami (Mateo 22:37-ta liyipai).

8, 9. ¿Jehová Diosta cꞌuyashcataca ima shinataj ricuchinchij?

⁸ Jehová Diostaca cꞌuyanimi nishpallaca mana saquirinachu canchij. Paita tucui shunguhuan, tucui almahuan, tucui yuyaihuan cꞌuyashcataca ruraicunahuanmi ricuchina canchij (Mateo 7:16-20). Bibliapi nishca shinaca Diosta cꞌuyashpaca paipaj mandashcacunatami cazuna canchij. Diospaj “mandashcacunata cazunaca mana sinchichu” can (1 Juan 5:3-ta liyipai).

⁹ Jehová Diosta cazushpaca mana yangamanta causashunchu. Ashtahuanpish cushillami causashun (Isaías 48:17, 18). Pero Diosmanta amataj caruyangapaj imata rurana cashcata yachashun.

10. ¿Imamantataj Diosmanta yachashpa catina cangui?

¹⁰ Bibliata estudiashpami Diospaj amigo tucurcangui. Pero Diosmanta ama caruyangapajca ¿imatataj ashtahuan rurana cangui? Caipi yuyai, nina ama huañuchunca yantatami churanchij. Chashnallatajmi Diosmanta ama caruyangapajca paimanta yachashpa catina cangui (Proverbios 2:1-5).

11. ¿Punllanta Bibliata estudiajpica mushuj yuyaicunaca maimantaj chayanga?

¹¹ Punllanta Bibliata estudiajpica mushuj yuyaicunaca cambaj shungumanmi chayanga. Jesús, ishqui discipulocunaman pai ima tucuna cashcata yachachijpica paicunaca: ‘Dios Quillcachishcata ñanpi ñucanchijta pai yuyachishpa rimashpaca, ¿manachu ñucanchijtaca shunguman yaicujta yachachirca?’ nircacunami (Lucas 24:32, QC, 1989).

12, 13. a) ¿Diosta cꞌuyashpa catingapaj mana esforzarishpaca imataj tucungui? b) ¿Diosta cꞌuyanata amataj saquingapajca imatataj rurana cangui?

 ¹² Jesús yachachishcacunata uyashpaca chai ishqui discipulocunaca cushillami sintirircacuna. Bibliamanta mushuj yuyaicunata yachashpaca canpish cushillami sintirishcangui. Chaimantami Diosta ashtahuan rijsishpa paita cꞌuyai callarishcangui. Pero Diosta cꞌuyashpa catingapajmi esforzarina cangui. Caita mana rurashpaca Diosmantami caruyangui (Mateo 24:12).

¹³ Diosta cꞌuyanata amataj saquingapajca Jehová Diosmanta, Jesusmantami ashtahuan yachana cangui. Shinallataj imata yachashcatami cambaj causaipi ima shina pajtachinata ricuna cangui (Juan 17:3, QC, 1989). Bibliata liyishpaca: “¿Diosmantaca imatataj yachacuni? ¿Imamantataj tucui shunguhuan, tucui almahuan Diostaca cꞌuyana cani?” nishpami tapurina cangui (1 Timoteo 4:15).

14. ¿Diosta ashtahuan cꞌuyangapajca imatataj rurana canchij?

 ¹⁴ Shuj amigohuan punllanta parlanacushpaca paitami ashtahuan cꞌuyanchij. Shinallataj Diosta cutin cutin mañashpaca paitami ashtahuan cꞌuyashun (1 Tesalonicenses 5:17-ta liyipai). Diosta mañanaca shuj valishca regalomi can. Chaimantami Diosta mañacushpaca mana chaillatataj chaillatataj nishpa mañana canchij. Chaipaj randica shungumantami mañana canchij (Salmo 62:8). Punllanta Bibliata estudiashpa, shungumanta Diosta mañashpaca paita cꞌuyanataca manataj saquishunchu.

15, 16. ¿Canca predicanamantaca imatataj yuyangui?

¹⁵ Jehová Diosmanta amataj caruyangapajca Bibliamantami predicana canchij. Jehová Diosmanta predicanaca sumaj bendicionmi can (Lucas 1:74). Ashtahuancarin Jesusca tucui paita catijcunatami predicachun mandarca. Chaimantami Diospaj gobiernomanta huillana canchij. ¿Canca ñachu shujtajcunaman Bibliamanta huillashcangui? (Mateo 24:14; 28:19, 20).

¹⁶ Apóstol Pabloca predicanataca shuj “valishca curita” shinami ricuj carca (2 Corintios 4:7, NM). Jehová Dios imata rurasha nishcata shujtajcunaman predicanami tucuimanta yalli valishca can. Diosta alli sirvingapajca paimantami predicana canchij. Yaya Diosca caita rurashcamantaca manataj cungaringachu (Hebreos 6:10). Diosmanta predicashpaca gentecuna Diospaj amigo tucuchun, quishpirichunmi ayudashun. Shinallataj caita rurashpaca Dioshuanmi alli apanacushun, huiñai causaitapishmi charishun (1 Timoteo 4:16-ta liyipai).

17. ¿Imamantataj Bibliamanta huillana canchij?

 ¹⁷ Bibliapica: “Diospaj Shimitaca huillana horaspipish mana huillana horaspipish huillacuilla” ninmi (2 Timoteo 4:2). Gentecunaca Dios cushca alli huillaicunata yachanatami minishtincuna. Shinallataj Bibliapi nishca shinaca, “Mandaj Dios jatunta llaquichina punllaca ñallamari chayamucun”, ‘manataj uniyangachu’ (Sofonías 1:14; Habacuc 2:3). Jehová Diosca ñallami Diablopaj ruraicunata tucuchinga. Manaraj chai punlla chayamujpimi gentecunapish Diosta sirvinata agllachun huillana canchij.

18. ¿Diosta adorangapajca imamantataj tandanacuna canchij?

¹⁸ Jehová Diosca paita sirvijcuna tandanacuicunapi paita adorachunmi munan. Bibliapica: “Caishujmanta chaishujmanta ayudanacushpa, allicunata rurangapaj cꞌuyaihuan yuyachinacushunchij. Ñucanchij tandanacuiman rina cashcallamanta puricujcuna, ña mana rij shinaca ama rurashunchijchu. Chaipaj randica, Jesucristo shamuna punlla ñalla chayamucushcata yachashcamantacarin, ashtahuan yuyachinacushunchij” ninmi (Hebreos 10:24, 25). Chaimantami tucui tandanacuicunaman ringapaj esforzarina canchij. Chai tandanacuicunapimi caishujmanta chaishujmanta animanacunchij.

19. ¿Huauqui panicunata cꞌuyangapajca imatataj rurana canchij?

¹⁹ Tandanacuicunapimi alli amigocunata tarinchij. Paicunami Jehová Diosta alli sirvichun ayudancuna. Shinallataj chꞌican chꞌican huauqui panicuna Diosta sirvingapaj esforzaricujtami rijsinchij. Pero paicunapish juchayujcuna cashcamantami maipica pandarincuna. Paicuna pandarijpica shungumantami perdonana canchij (Colosenses 3:13-ta liyipai). Huauqui panicuna allita rurajtami siempre ricuna canchij. Chashna rurashpaca paicunatapish, Jehová Diostapishmi ashtahuan cꞌuyashun.

20, 21. ¿“Huiñai causaica” ima shinataj canga?

²⁰ Jehová Diosca paipaj amigocuna sumaj causaita charichunmi munan. Bibliapica shamuj punllapica mana cunan punllacunapi shina causashunchu nishpami yachachin.

²¹ Shamuj punllacunapica huiñai causaitami charishun. Chaipica 70 o 80 añosllataca mana causashunchu. Ashtahuanpish paraíso Allpapica, ungüi illajmi huiñai huiñaita cushilla causashun. Caitami Bibliapica “huiñai causai” nishpa rijsichin. Jehová Diosca cai laya causaitami cusha nin. Chaita chasquingapajmi achcata esforzarina canchij (1 Timoteo 6:12, 19).

22. a) ¿“Huiñai causaita” charingapajca imatataj rurana canchij? b) ¿Imamantataj huiñai causaita chasquishun?

²² ¿“Huiñai causaita” charingapajca imatataj rurana canchij? ‘Allicunata rurashpami’ causana canchij (1 Timoteo 6:18). Bibliamanta yachachishcacunatapish ñucanchij causaipimi pajtachina canchij. Pero huiñai causaitaca ñucanchij munashcallamantaca mana chasquishunchu. Ashtahuanpish Jehová Dios paita sirvijcunata “jatunta cꞌuyashcamantami” huiñai causaita chasquishun (Romanos 5:15, NM). Ñucanchij Yayitu Diosca cai sumaj regalotami cusha nin.

23. ¿Cunan punllacunapi allita ruranataca imamantataj utca agllana canchij?

²³ Cashna tapuri: “¿Diostaca pai munashca shinachu adoracuni?”. Dios munashca shina manaraj adoracushpaca cambaj causaipimi utca cambiana cangui. Jehová Diospi tucui shunguhuan confiashpa paita cazujpica, paica ñucanchij miticuna shinami canga. Tucuri punllacunapipish paita sirvijcunatami cuidanga. Chai qꞌuipaca Yaya Dios munashca shinami paraíso Allpapi  causashun. Cunan punllacunami allita ruranataca utca agllana canchij. Chaita rurashpaca huiñai huiñaitami causashun.