1, 2. Cunan punchau, ¿maypi arcacuyta atíysh?

 PÉNSAY ʼrisckayquita suj huelláp y ckonckayllamanta cielo puyucun y tutayacun. Relampaguian, truenus uyaricun y ckallarin ashcát parayta. Y Ckam mascanqui suj lugar maypi cutiyta mana ockocúypaj. ¡Aliviu sentinqui áicap tarinqui suj lugar maypi cutiyta!

² Cunan punchau, quiquin imastis causáysh. Mundu sapa punchau astaan mana alli tían. Nacha ckam tapunacunqui: «¿Maypi arcacuyta atíysh?». Suj escritor Bibliamanta nera: «Jehovát nipúsaj: Ckam arcáyniy canqui y cáshpay Tata Yáyay, píp confiani» (Salmo 91:2). Jehová cunan problemasniyshuan yanapaayshta atin, y ckoáysh suj súmaj suyana ámoj pachápaj.

3. ¿Imát ʼruanáysh tían Jehová yanapaanáyshpaj?

³ ¿Imaina Jehová arcaáysh? Pay yanapaayshta atin máyckanp cachun problemaan ima apíysh. Nátaj, astaan ashca atiyníyoj can, máyckanp cachun persunamanta ima dañu ʼruaayshta munachun. Nátaj, si cunan mana alli imastis sucedeaycu, atiycu segurus tiayta ima Jehová cá dañu ámoj pachapi allichancka. Biblia animaáysh «Tata Yáyap munayninpi tiáypaj» (Judas 21). Jehová yanapaanáyshpaj problemasniyshuan, suj alli amistar payuan apináysh tían. Pero, ¿imát ʼruayta atíysh chá amistar apináyshpaj?

4, 5. ¿Imaina Jehová ckaachera munaasckayshta?

⁴ Seguíypaj Jehóvap yanasusnin cas, unanchanáysh tían pay ashcát munaáysh. Pénsay Jehová túcuy  ʼruasckanpi nockayshraycu. Ashpát ckoaráysh, suj ancha súmaj lugar ancha ashca tackosníyoj y uyuas. Ckoarayshpas súmaj micunas y ancha ashca yacu. Nátaj, Jehová Bibliapi yachachiaráysh mayckan can sutin, ima laya Tata Yaya can. Pero, ckaachera astaan atun múnay cachas munascka huaanta, Jishút, ckonánpaj causayninta nockayshraycu (Juan 3:16). Payraycu, suj ancha súmaj suyana ámoj pachápaj apíysh.

⁵ Jehová Mesiaspa gobiernunta cielupi churara. Cá gobiernu mana unas puchucancka usuyuan y Ashpát suj jardín ina ʼrúaj ʼrin, maypi paspi causasúysh y cusisckas caj ʼríysh (Salmo 37:29). Jehová ckaachiarayshpas munaasckayshta yachachis imaina allít causayta. Nátaj, invitaáysh orapunayshta y siempre dispuestu tían uyariayshta. Imaina ckaáysh, Jehová dejuru tucuycunát munaáysh.

6. ¿Imaina ckam ckaachiyta atinqui Jehóvap munayninta agradecesckayquita?

⁶ ¿Ckaas Jehová túcuy ckamraycu ʼruasckanta y ashcát munasusckanta?, ¿imaina senticunqui? ¿Manachu agradecescka tianqui? Ckaachipunayqui tían. Mundupi ancha ashca persunas desagradecesckas tían. Y quiquin cara Jíshup punchausninpi. Suj punchau Jishu chunca leprosostas ampera, pero sujlla agradecepora (Lucas 17:12-17). Nockáysh cháckay ckari ina cayta munáysh y Jehovát siempre ckaachiyta agradecesckas tiasckayshta.

7. ¿Imaina Jehovát munanáysh tían?

⁷ Astaanpas ckaachináysh tían Jehovát munasckayshta. Jishu discipulusninta nipucora Jehovát munanancu tiara túcuy sonckoncuan, ánima y pensamientu (Mateo 22:37 léey). Cá, ¿imát niyta munan?

8, 9. ¿Imaina Jehovát ckaachíysh munasckayshta?

⁸ Manalla ninaycu tían ima Jehovát munaycu.  Si Jehovát munáysh túcuy sonckoyshuan, ánima y pensamientu, ʼruasckayshuan ckaachisúysh (Mateo 7:16-20). Biblia ancha alli yachachin Tata Yayát munaspá mandamientusninta casucunáysh tían. ¿Cay chaynalla can? Mana, imaraycu Jehóvap mandamientusnin casucúypaj mana difíciles cancu (1 Juan 5:3 léey).

⁹ Áicap Jehovát casucúysh, suj cusiscka cáusay y proposituan apíysh (Isaías 48:17, 18). Pero, ¿ima yanapaasúysh yanasusnin cas seguiyta? Ckáaj ʼríysh.

10. ¿Imajchus ckam Jehovamanta aprendes seguinayqui tían?

¹⁰ ¿Imaina ckam chayaranqui Jehóvap yanasun cayta? Bibliát estudias, allít Jehovát ʼrejseranqui y suj alli amistar payuan ʼruaranqui. Cá amistar suj nina ina can. Mana huañunánpaj yantát churapus seguinayqui tían lauranánpaj. Cay niyta munan ckam aprendes seguinayqui tían Jehovamanta y payuan apiyta suj alli amistar (Proverbios 2:1-5).

11. ¿Imajchus Bibliamanta aprendes seguinayqui tían?

¹¹ Bibliamanta aprendes seguispá, ckam apréndej ʼrinqui imastis ima sonckoyquiman chayásoj ʼrincu. Ckáay imaina senticorancu íshcay Jíshup discipulusninmanta áicap pay esplicapucora niyta munasckanta huaquin profecías. Paycuna nerancu: «¿Manachu ʼrupaaraycu sonckoycu, áicap pay amus huellapi ʼrimaaraycu, áicap quichariaraycu túcuy escriturasta?» (Lucas 24:32).

12, 13. a) ¿Ima sucedeyta atin munayuan ima Jehovaraycu apíysh? b) ¿Ima ʼruayta atíysh munayníysh Jehovaraycu sinchi canánpaj túcuy tiempu?

¹² Jishu yachachicusckan cháckay íshcay discipulusta sonckoncuman chayapucora. Nacha, ckampas  ancha cusiscka churacoranqui áicap ckallareranqui Bibliamanta unanchayta. Chayna Jehovát ʼrejseranqui y payta munayta ckallareranqui. Dejuru mana munanqui chá múnay huañuchun (Mateo 24:12).

¹³ Cunan ima ckam na Tata Yáyap yanasun canqui, afanacunayqui tían cá amistar sinchi canánpaj túcuy tiempu. Cháypaj, Jehovamanta y Jishumanta aprendes seguinayqui tían. Nátaj, meditanayqui tían aprendesckayquipi y pensayta imaina causayniyquipi practicapi churayta (Juan 17:3). Ckam Bibliát leeptiyqui o estudiaptiyqui, tapunácuy: «¿Cay Jehovamanta imát yachachian? ¿Ima rasones apini munáypaj túcuy sonckoyuan ánima y pensamientu?» (1 Timoteo 4:15).

14. Oracioncka, ¿imaina yanapaáysh munayniyshta Jehovaraycu sinchi canánpaj?

¹⁴ Ckam suj alli yanasu apispá, dejuru payuan túcuy punchaus ʼrimanqui. Cá ʼruan amistarniyqui payuan  astaan sinchi cachun. Quiquin layamanta, munayníysh Jehovaraycu sinchi ʼruacun túcuy punchaus orapuptíysh (1 Tesalonicenses 5:17 léey). Oracioncka can suj súmaj regalu Tata Yayayshmanta. Orapuptíysh, sonckoyshmantapacha ʼrimapunáysh tían (Salmo 62:8). Oraciunesta mana nináysh tían de memoria, manapé sentisckayshta nipunáysh tían. Si Bibliát estudias seguíysh y oras sonckoyshmantapacha, munayníysh Jehovaraycu túcuy tiempu sinchi caj ʼrin.

15, 16. Ckam predicaciunmanta, ¿imát pensanqui?

¹⁵ Jehóvap yanasun cas seguíypaj, Bibliamanta aprendesckayshta sujcuna persunasuan ʼrimanáysh tían. Sujcuna persunasta Jehovamanta ʼrimapucuyta nockáyshpaj suj atun honor can (Lucas 1:74). Nátaj, suj mandatu can ima Jishu túcuy cristianus verdaderusta ckopucora. Chayraycu tucuycuna predicanáysh tían alli noticias Tata Yáyap Reinunmanta. Ckam, ¿ckallareranqui chayta ʼruayta? (Mateo 24:14; 28:19, 20).

¹⁶ Apóstul Pablu predicaciunta ancha valóraj cara chayraycu pay nera suj «tesoru» can (2 Corintios 4:7). ʼRimapucuyta sujcunasta Jehovamanta y propositunmanta astaan importante can, chayta ckam ʼruayta atinqui. Predicaciún can parte serviciuyquimanta ima Tata Yayát ckonqui, y pay ashcát valoran ʼruasckayqui siruiypúypaj (Hebreos 6:10). Predicaptiyqui ckam sujcunasta yanapashcanqui Tata Yáyap yanasusnin canancunápaj y sinchiyachinqui amistarniyquita ima payuan apinqui. Chayta ʼruas, ckam apiyta atinqui cáusay únay unáypaj y picunaspas uyarisuncu  (1 Corintios 15:58 léey). ¿Tiayta atin suj llámcay ashca cusiyta ckosuchun?

17. ¿Imajchus urgente can predicayta?

¹⁷ Predicayta urgente can. Biblia nin: «Palabrát predícay, urgenciaan ʼrúay» (2 Timoteo 4:2). Persunas alli noticiasta Tata Yáyap Reinunmanta uyariyta precisancu. Nátaj, Biblia nin: «¡Jehóvap punchaun ckaylla tían! ¡Ckaylla tían y utcka ckayllanchacun!». Fin «mana tarde cháyaj ʼrin» (Sofonías 1:14; Habacuc 2:3). Mana unas, Jehová Supaypa mana alli mundunta amchi ʼruancka. Manáraj chayta ʼruaptin, persunasta huillanáysh tían decidiyta atinancunápaj Jehovát siruiyta.

18. ¿Imajchus picunas Jehovát siruipúysh tantacunáysh tían adoráypaj?

¹⁸ Jehová munan picunas siruipúysh tantanacunayshta payta adoranáyshpaj. Biblia nin: «Y sujcuna sujcunamanta pendientes tianáysh tían animanacúypaj múnay ckaachíypaj y alli ʼruanas ʼruas, mana tantanacuyta sackes, imaina huaquincuna costumbre apincu. Manapé, animanacus sujcuna sujcunaan, ckaas ima punchau ckayllanchacun» (Hebreos 10:24, 25). Ashcát afanacunáysh tían túcuy tantacunasman ʼríypaj. Chaypi atíysh sujuan sujuan animanacuyta y sinchiyanacuyta.

19. ¿Ima yanapáaj ʼríysh huauckesniyshtas munacuyta?

¹⁹ Tantacunaspi, ckam alli yanasusta tárej ʼrinqui. Paycuna yanapasonckancu Jehovát siruinayquípaj. ʼRéjsej ʼrinqui huauckes mana quiquin geniumanta y antecedentesmanta ima afanacuncu Jehovát siruinaas. Pero, ckam ina, paycuna defetus apincu y huaquin imastista mana alli ʼruayta atincu. Chay sucedeptencka, dispuestu tianayqui tían perdonayta (Colosenses 3:13 léey). Ckaanayqui tían alli cualidares huauckesmanta. Cay yanapasoncka paycunát munacuyta y amistarniyquita Jehovaan sinchiyáchej ʼrin.

20, 21. «Ancha súmaj cáusay casckanta», ¿imátaj can?

²⁰ Jehová munan túcuy yanasusnin suj ancha súmaj cáusay apinancuta. Biblia yachachin ámoj pachapi cáusay mana cancka quiquin cunan ina.

²¹ Ámoj pachapi, únay unáypaj cáusaj ʼríysh, manalla 70 u 80 huatas. Disfrutasúysh «cáusay únay unáypaj» Ashpapi suj jardín ina ʼruascka, maypi apisúysh alli salur, paspi causasúysh y cusisckas caj ʼríysh. Biblia chayta huajyan «cáusay ima checkamanta cáusay can». Jehová prometeáysh cá cáusay ckoayshta, pero nockáysh ashcát afanacunáysh tían apináyshpaj (1 Timoteo 6:12, 19).

22. a) «Ancha súmaj cáusay casckanta», ¿imaina apiyta atíysh? b) ¿Imajchus cáusay únay unáypaj ni aicappas merecesajcu?

²² ¿Imaina apiyta atíysh «cáusay ima checkamanta cáusay can»? Llamcanáysh tían «alli casckanpi» y cayta «ricos alli ʼruanaspi» (1 Timoteo 6:18). Cay niyta munan ʼruanáysh tían Bibliapi aprendesckayshta. Pero, cáusay únay unáypaj mana apiyta atíysh afanacusckaycuraycu. Ashcát afanacuyta atíysh, pero ni aicappas merecesajcu. Suj regalu can ima Jehová siervusnin fielesta ʼruapucun ckaachicúypaj «bondarnin inmerecida» (Romanos 5:15). Tata Yayáysh túcuy sonckonuan siervusninta ckopucuyta munan cá ancha súmaj regalu.

23. ¿Imajchus ckam cunan allít decidinayqui tían?

²³ Tapunácuy: «Y nocka, ¿Tata Yayát adorani imaina pay munan?». Si cuentát ckocunqui huaquin cambiusta ʼruanayqui tían, utcka ʼrúay. Áicap Jehovapi confiáysh y afanacúysh casucunaas, pay protectorníysh cayta chayan. Jehová cá ckepas punchauspi cá mana alli mundumanta siervusnin fielesta árcaj ʼrin. Y chaymantá ʼrúaj ʼrin causanayshta únay unáypaj Ashpapi suj jardín ina  ʼruascka, imaina pay prometera. Si ckam cunan allít decidinqui, únay unáypaj causayta atinqui.