1, 2. ¿Maibira yanapaira tupana ushanchi cunan punzhaunai?

IYARI, shu ñambira riushcai, huaquimbi cungaimanda tutayaun. Limpiangaj callarin, rayoguna uyarin, ashca tamiaun. Chiraigu can mascangui maibi miticunara. ¡Can ña miticuna lugarda tupasha cushiyanguimi!

² Cunan shinallara causanchi. Cai munduga caran huras ña tucurinama riun. Tapuringuichari: “¿Maibira yanapaira tupana ushanchi?”. Shu Bibliara quillcaj nica: “Cierto pacha Jehovara rimasha: ‘Can ñuca miticuna angui, ñuca shinzhi rumi, ñuca Diosmi, cambajpi ciertora quirisha’” (Salmo 91:2). Cunan Jehová ñucanchi problemagunahua yanapana ushanmi, shinallara shamuj punzhai gustu causanara cunga.

3. ¿Imara rurana anchi Jehová ñucanchira yanapachu?

³ ¿Imasnara Jehová ñucanchira cuiran? Ñucanchi ima tunu problemara charijpis, pai yanapana ushanmi. Maicandas turmindachij runamanda Jehová mas ushayujmi an. Shinallara, cuna shu turmindusta charijpi, Jehová chi tucui manalira shamuj punzhai tucuchinga quirina ushanchi. Bibliaga ñucanchira animanmi caita rurangaj: “Dios llaquiushcai tiaichi” (Judas 21). Jehová Dios turmindusgunara ahuantangaj yanapachu, paihua amigo tucusha catinami anchi. Shinajpi ¿imara rurana anchi caita charingahua?

4, 5. ¿Imasnara Jehová Dios ñucanchira llaquishcara ricuchishca?

⁴ Jehová amigo catina munashaga, intindinami anchi pai ñucanchira ashcara llaquishcara. Iyaringui imasna tucuira ñucanchimanda rurashcara. Paiga shu gustu Allpara, sumaj ricurij yuraunahua animalgunahuas cushca. Shinallara ashca gustu micunaunara, yacuras cushca. Jehová Dios Bibliai paihua shutimanda, pai ima tunu Dios ajta yachachishca. Shinajpis mas llaquishcara ricuchishca paihua llaquishca Churi Jesuspa causaira ñucanchimanda cusha (Juan 3:16). Chiraigumanda shamuj punzhai sumaj gustu chapanara charinchi.

⁵ Jehová ahua pachai shu gobierno churashca, ñallami tucui turmindusgunara tucuchinga. Cai gobiernoga cai Allpara mushujyachisha shu paraíso ruranga, chibi cushi ganaslla causaira charishun (Salmo 37:29). Shinallara Jehová ñucanchira llaquishcamanda ali causangahua yachachishcami. Paita mañanuchu cumbiraunmi, tucui huras uyana munanmi. Imasna ricushcanchi Jehová Dios cierto pacha tucuigunara llaquinmi.

6. ¿Imasna rashara Jehová Diosta llaquishcara pagarachuna ushangui?

⁶ ¿Imasna rashara Jehová Dios llaquishcara pagarachuna ushangui? Valichinami angui pai tucui canmanda rurashcara. Shinajpi, cuna cai Allpai ashca mana agrasijcuna tian. Shinallara Jesuspa punzhaunai aca. Shu punzha Jesús chunga llagayuj runaunara alichica, shina ajllaira shujllami pagarachu nica (Lucas 17:​12-17). Ñucanchi chi runa cuinta tucui huras Jehová Diosta pagarachushcara ricuchina munanchi.

7. ¿Imasnara Jehová Diosta llaquina anchi?

⁷ Shinallara Jehovara llaquishcara ricuchinami anchi.  Jesús paita catijcunara Jehová Diosta intiru shunguhua, almahua, iyaihua llaquina anguichi nisha yachachica (leapai Mateo 22:37). Chita ¿imara ricuchin?

8, 9. ¿Imasnara Jehová Diosta llaquishcara ricuchinchi?

⁸ ¿Shimimandalla Jehová Diosta llaquinchi nisha rimana anchi? Mana. Jehová Diosta ñucanchi intiru shunguhua, almahua, iyaihua llaquinchimi nishaga, ñucanchi rurashcaunahua ricuchishun (Mateo 7:​16-20). Bibliaga yachachinmi Diosta llaquishaga paihua mandashcara casungaraunchi. ¿Caiga shinzhichu? Mana, Jehová mandashcaunaga casungahua mana shinzhichu (leapai 1 Juan 5:3).

⁹ Jehová Diosta casushaga, ali gustu causaira charinchi (Isaías 48:​17, 18). Shinajpi ¿imara yanapanga paihua amigoguna tucusha catingaj? Ricushun.

10. ¿Imarasha Jehová Diosmanda mas yachasha catina angui?

¹⁰ ¿Imasna rashara Jehovahua amigo tucucangui? Bibliara estudiasha Jehová Diosta mas ricsicangui, paihua amigo tucucangui. Paihua amigo ana, nina cuintami an. Imasna nina ama huañungaj mas yandara churangui. Shinallara can mas Jehovamanda yachasha catinami angui, paihua amigo tucusha catingaj (Proverbios 2:​1-5).

11. Can Bibliamanda yachasha catisha ¿imara tucunga?

¹¹ Bibliamanda yachasha catisha, sumaj yachachishcara intindisha camba shunguma pactanga. Jesús paita ishqui catijcunara huaquin profeciagunara intindichiushcai, ¿imasna paiguna sintirinuca? Paiguna ninuca: “¿Manzhu sindinauca ñucanchi shunguuna pai ñucanchihua rimaushca huraspi, Quillcaunara ñucanchijma pascaushca ratui?” (Lucas 24:32).

12, 13. a) Diosta llaquinaga ¿imara tucuna ushan? b) ¿Imara rurana ushanchi Jehová Diosta llaquisha catingahua?

 ¹² Jesús yachachishcauna paita ishqui catijcunara shunguma pactaca. Shinallara can cushi sintirishcangui Bibliara estudiangaj callarishcai. Shina ajpi Jehová Diosta ricsicangui, paita llaquingaj callarishcangui. Cierto pacha chi llaquinaga ama tucurichu munangui (Mateo 24:12).

¹³ Cuna ña Diospa amigo asha, mas ursarina angui paihua amigo tucusha catingaj. Chita rurangahua Jehovamanda, Jesusmandas mas yachasha catisha, can yachaushcai iyarina angui, astaun imasna camba causaibi pactachina ushashcara (Juan 17:3). Bibliara leasha, estudiasha imara Diosmanda yachashcangui iyari. Chi huasha iyari imasna can yachashca Jehová Diosta mas llaquingaj yanapan (1 Timoteo 4:15).

14. ¿Imasnara Jehová Diosta mas llaquingahua mañanara yanapan?

 ¹⁴ Can shu ali amigora charisha, paihua caran cuti rimanguichari. Caita yanapan camba amigohuajma mas llutaringaj. Shinallara caran cuti Jehová Diosta mañashaga, paita mas llutaringui mas llaquinguimi (leapai 1 Tesalonicenses 5:17). Oracionga, Diosmanda valij cuyashcami an. Tucui huras shungumanda paita mañanami anchi (Salmo 62:8). Chillarara chillarara mana mañanachu anchi, ñucanchi ima sintirishcara rimanami anchi. Mas Bibliamanda yachasha, shungumanda oracionda rurasha catisha, Jehová Diosta mas llaquingaraunchi.

15, 16. ¿Imara iyangui Bibliara yachachinamanda?

¹⁵ Jehovahua amigo tucusha catingahua, ñucanchi quirinamanda shujcunara rimana anchi. Shujcunara Jehová Diosmanda rimana shu valij tarbanami an (Lucas 1:74). Jesús caita mandacami paita cierto catijcunara. Chiraigu tucuiguna Diospa Reinomanda ali gustu cuintashcauna yachachinami anchi. ¿Can ña ruraunguichu? (Mateo 24:14; 28:​19, 20).

¹⁶ Apóstol Pabloga Diosmanda yachachinara ashcara valichica, “valijta” cuintami ricuca (2 Corintios 4:7). Can mas valij ruranami an Jehovamanda, pai ima rurangaraushcara shujcunaras yachachingaj. Diosta sirvingaj Bibliamanda yachachinami angui, pai ashcara valichinmi can ima rurashcara paita sirvingaj (Hebreos 6:10). Yachachiushcai shujcunara Diospa amigo tucuchu yanapangui, cambas mas Diospa amigo tucungui. Bibliara yachachishcamanda can, canda uyajcunas huiñai causaira charina ushanguichi (leapai 1 Corintios 15:58). ¿Tianzhu mas cushiyachij tarbana?

17. ¿Imarasha ministishca an Bibliamanda yachachingaj?

 ¹⁷ Bibliamanda yachachinaga yapa ministishcami. Biblia nin: “Shimira camachi, shinzhira rimai, huras ajpis mana ajpis” (2 Timoteo 4:2). Runauna ministinunmi Diospa Reinomanda uyangaj. Biblia yachachin “Jehovahuaj atun punzha ña pactamunmi” uctallami shamuun nin. Tucurina punzha “mana unayasha pactamunga” (Sofonías 1:14; Habacuc 2:3). Ñallami Jehová Dios, Satanás milli mundura tucuchinga. Manara tucuriujllaira, runaunara yachachinami anchi, paigunas Diosta sirvinuchu.

18. ¿Imarasha cierto sirvijcuna Jehová Diosta adurangaj tandarina anchi?

¹⁸ Jehová munanmi paihua cierto sirvijcuna tandarinuchu paita adurangaj. Bibliaga nin: “Ñucanchipura parijumanda iyarishunchi, mas mas llaquinausha, alira rausha yanaparingaj; ñucanchi tandarimunara mana saquisha, huaquinguna rashcasna, astaun animarisha rimanausha, shinallara mas mas casna rasha canguna Cristo shamuna punzha mayanllayaushcara ricuusha” (Hebreos 10:​24, 25). Ashcara ursarinami anchi tucui tandarinama ringaj. Chibi parijumanda animarisha shinzhiyana ushanchi.

19. ¿Imara yanapanga huauqui paniunaras llaquingahua?

¹⁹ Tandarinaunai, ali amigogunara tupanguimi. Paiguna Jehová Diosta sirvingaj yanapanunga. Tucui tunu huauqui paniunaras ricsingaraungui, paiguna can cuinta Jehová Diosta sirvingaj ursarinun. Shinajpi can cuinta paiguna uchayujmi anun, pandarinun. Casna tucujpi paigunara perdonana angui (leapai Colosenses 3:13). Tucui huras huauquiuna ima ali rurashcaras ricunami angui. Shina rasha, paigunara mas llaquingui, Jehová Diospajma mas llutaringui.

20, 21. ¿Imara an huiñai causaiga?

²⁰ Jehová munanmi tucui paihua amigoguna ali gustu causaira charinuchu. Bibliaga yachachinmi shamuj punzhaunai cunan cuinta ña mana causashun.

²¹ Shamuj punzhaunai huiñaigama causangaraunchi ña mana 70, 80 huatallara. Cai Allpa shu sumaj paraíso tucujpi “huiñai causaira” charishun, chibi ungüiguna mana tiangachu, ganaslla cushilla causashun. Cai tunu causaira Bibliaga nin cierto causai ajta. Jehová Dios chi causaira cusha ninmi, shinajpi ñucanchi ashcara ursarinami anchi (1 Timoteo 6:​12, 19).

22. a) ¿Imasna rashara “huiñai causaira” charina ushanchi? b) ¿Imarasha masna ashcara ursarishas huiñai causaira mana apina ushanchi?

²² ¿Imasna rashara “huiñai causaira” charina ushanchi? ‘Alira rurasha’, ‘charij tucusha ali ranaunahua’ (1 Timoteo 6:18). Chita ricuchin Biblia yachachishcara ñucanchi causaibi pactachinami anchi. Shinajpi, masna ashcara ursarishas, huiñai causaira mana apinara ushanchichu. Huiñai causaiga, Jehová Dios partimanda sumaj cuyashcami an, paita casuj sirvijcunara “llaquishcamanda” cun (Romanos 5:15). Ñucanchi ahua pachai tiaj Yaya Dios shungumanda cai sumaj cuyashcara cuna munanmi.

23. ¿Imarasha cunan punzhaunai ali ajllana angui?

²³ Tapuringui: “¿Dios munashca cuinta adurani?”. Maicambi turcarina ajpi, uctalla turcaringui. Jehová Diospi quirisha, paita casungaj ursarisha, pai ñucanchi miticuna lugar cuintami anga. Jehová cai puchucai punzhaunai cai mana ali mundumanda paita casuj sirvijcunara cuirangami. Chi huasha, pai rimashca  cuinta gustu Paraisoibi huiñaigama causashun. Cunan punzhaunai can ali ajllashaga, huiñai causaira charingaraungui.