1, 2. ¿Pitaq amparawachwan?

KAYPI yuyaymanay: Ñanninta richkaptikim qunqayllamanta yana puyu huntaramun hinaspam rayokunapas llipityaspan tunrututuyta qallaykamun chaymantam parakamuyta qallaykun. Chaymi qamqa amparakunaykipaq imatapas maskanki. ¡Mayna kusisqam tarikunki amparakunaykipaq imatapas tariruspaykiqa!

² Kunanpas yaqa chaynam yachachkanchik. Kay pachapiqa imapas llumpay mana allinllañam. Chayrayku ichapas tapukunki: “¿Pitaq amparawanman?”, nispa. Bibliata qillqaq runam nirqa: ‘[Jehova] Diostam nini: Pakakuna wasi hinam qamqa kanki, nispa. Amparakuna wasi hinam qamqa kanki, nispa. Diosnilláy, ñuqaqa qampim confiakusaq’, nispa (Salmo 91:2). Jehova Diosqa kunanpas sasachakuyninchikkunapim yanapawanchik hinaspam hamuq tiempopaqpas sumaq suyakuyta quwanchik.

3. ¿Imatam ruwananchik Jehova Dios yanapawananchikpaq?

³ ¿Imaynatam Jehova Diosqa amparawanchik? Payqa imapas sasachakuyninchikta atipanapaqmi yanapawasunchik. Chaymantapas, payqa tukuy atiyniyuqmi. Kay tiempopi imapas mana allinkuna pasawaptinchikqa, manam iskayrayachwanchu  chaykunata hamuq tiempopi Jehova Dios allichananmantaqa. Bibliam kallpanchawanchik ‘Dioswan hinalla kuyachikunanchikpaq’ (Judas 21). Sasachakuyninchikpi Jehova Dios yanapawananchikpaqqa, paywanmi hinalla kuyachikunanchik. Ichaqa, ¿imatam chaypaq ruwananchik?

4, 5. ¿Imaynatam Jehova Diosqa kuyawasqanchikta qawachiwarqanchik?

⁴ Jehova Dioswan hinalla kuyachikunanchikpaqqa, entiendenanchikmi pay anchata kuyawasqanchikta. Yuyaymanay ñuqanchikpaq Jehova Diospa tukuy ima ruwasqanpi. Quwarqanchikmi kay allpa pachata tukuy imayuqta, kachkanmi sumaqllaña plantakuna hinaspa animalkunapas. Quwarqanchiktaqmi miski mikuykunata hinaspa achka yakutapas. Chaymantapas Jehova Diosqa yachachiwarqanchikmi sutin ima kasqanta hinaspa imayna Dios kasqantapas. Ichaqa astawan kuyawasqanchiktam qawachiwarqanchik ñuqanchikrayku wañunanpaq kuyasqan churinta kachamuspan (Juan 3:16). Chayraykum hamuq punchawkunapi wiñaypaq kawsakuyta atisunchik.

⁵ Jehova Diosmi akllasqan runata hanaq pachapi churarun kamachinanpaq. Paymi tukuchinqa ñakariykunata hinaspapas kay allpa pachatam sumaqta huertayachinqa, chaypiqa hawka hinaspa kusisqam kawsakusunchik (Salmo 37:29). Jehova Diosqa kuyawasqanchiktam qawachiwarqanchik imayna  kawsakunanchikpaq yachachiwaspanchik. Chaymantapas niwanchikmi mañakunanchikpaq, payqa haykapipas uyariwasunmi. Yachamusqanchikman hinam, Jehova Diosqa llapanchikta kuyawanchik.

6. ¿Imaynatam Jehova Diosta kuyawasqanchikmanta agradecekuchwan?

⁶ ¿Imaynatam Jehova Diosta kuyawasqanchikmanta agradecekuwaq? Qampaq tukuy ima ruwasqanta chaninchaspaykim. Llakikuypaqmi runakunaqa mana agradecekuq kanku. Jesuspa tiemponpipas chaynam karqaku. Huk kutipim, leprawan unquq chunka runakunata Jesus hampirurqa, ichaqa chullallam Jesusta agradecekurqa (Lucas 17:12-17). Ñuqanchikqa chay agradecekuq runa hinam kayta munanchik hinaspam Jehova Dios agradecekuytaqa mana qunqananchikchu.

7. ¿Imaynatam Jehova Diosta kuyananchik?

⁷ Ñuqanchikpas Jehova Dios kuyasqanchiktam qawachinanchik. Jesusmi qatiqninkunata nirqa tukuy sunqunkuwan, tukuy vidankuwan hinaspa tukuy yuyayninkuwan Jehova Diosta kuyanankupaq (qaway Mateo 22:37). ¿Ima ninantaq chayqa?

8, 9. ¿Imaynatam Jehova Dios kuyasqanchikta qawachinchik?

⁸ ¿Jehova Diostaqa kuyanim niyllachu-ninanchik? Manam. Jehova Diosta tukuy sunqunchikwan, tukuy vidanchikwan hinaspa tukuy yuyayninchikwan kuyasqanchiktaqa ruwasqanchikwanmi qawachisunchik (Mateo 7:16-20). Bibliam sutillata niwanchik Diosta kuyaspanchikqa kamachikuyninkunata  kasukunanchikmanta. Chayqa ¿sasachu? Manam, Jehova Diospa kamachikuyninkunata kasukuyqa manam llumpay sasachu (qaway 1 Juan 5:3).

⁹ Jehova Diosta kasukuspanchikqa kusisqam kawsakusunchik (Isaias 48:17, 18). Ichaqa, ¿imataq yanapawasunchik Jehova Dioswan hinalla kuyachikunanchikpaq? Yachasunyá.

10. ¿Imanasqam Jehova Diosmanta hinalla yachanayki?

¹⁰ ¿Imaynatam Jehova Diosta kuyayta qallaykurqanki? Bibliata estudiaspaykim Jehova Diosmanta astawan yacharqanki hinaspa kuyayta qallaykurqanki. Chaytaqa tupachichwanmi ninawan. Nina hinalla ratananpaqqa yantatam yapana. Chaynam Jehova Diosta hinalla kuyananchikpaqpas paymanta hinalla yachananchik (Proverbios 2:1-5).

11. Bibliapi yachasqaykikunaqa, ¿imapaqmi yanapasunki?

¹¹ Bibliamanta yachasqaykiman hinam, yachasqaykikunaqa sunquykiman chayanqa. Chaynam Jesuspa iskay qatiqninkunapas tarikurqaku wakin willakuykunamanta Jesus yachachiptin. Paykunam nirqaku: “¿Manachu ñanta hamuchkaptinchik sunqunchikpas ruparirqaraq Diospa qillqanmanta suma-sumaqta entiendechiwachkaptinchik?”, nispa (Lucas 24:32).

12, 13. (1) Diosta kuyayninchikwanqa, ¿imam pasarunman? (2) Jehova Diosta astawan kuyananchikpaq, ¿imatam ruwananchik?

¹² Jesuspa yachachisqanqa iskay qatiqninkunapa  sunqunmanmi chayarurqa. Ichapas qampas bibliamanta yachayta qallaykuspaykiqa kusisqa tarikurqanki. Chayraykum Jehova Diosta riqsiyta atirqanki hinaspa kuyaytapas qallaykurqanki. Manachá munankichu chay kuyakuyniki chiriyarunantaqa ¿aw? (Mateo 24:12).

¹³ Kunanqa ñam Jehova Diostaqa kuyankiña, chaymi hinalla kallpanchakunayki astawan kuyanaykipaq. Chaypaqqa, hinallam Jehova Diosmanta hinaspa Jesusmantapas yachanayki. Chaymantapas yuyaymananaykim yachasqaykikunapi, chaynapi yachasqaykiman hina ruwanaykipaq (Juan 17:3). Bibliata ñawinchaspayki utaq estudiaspayki tapukuy: “¿Imatam kayqa Jehova Diosmanta yachachiwan? ¿Imanasqam Jehova Diosta kuyanay tukuy  sunquywan hinaspa tukuy vidaywan?”, nispa (1 Timoteo 4:15).

14. ¿Imapaqmi Diosta mañakuyqa yanapawanchik?

¹⁴ Allin amistadniki kaptinqa, sapa kutichá paywanqa rimanki. Chaymi astawan yanapasunkichik kuyanakunaykichikpaq. Chaynallataqmi Jehova Diostapas astawan kuyanchik sapa kuti payta mañakuspanchik (qaway 1 Tesalonicenses 5:17). Diosqa munanmi mañakunanchikta, chaymi sunqumanta haykapipas mañakunanchik (Salmo 62:8). Manam umallanchikmantachu kuti-kutirispa mañakunanchik, aswanqa sunqumantam mañakunanchik. Bibliamanta hinalla yachaspanchikqa hinaspa sunqumanta mañakuspanchikqa, Jehova Diostam astawan kuyasunchik.

15, 16. ¿Imaynatam Diosmanta willakuyta qawanki?

¹⁵ Jehova Diosta hinalla kuyananchikpaqqa, bibliapi yachasqanchikkunamantam huk runakunaman willakunanchik. Jehova Diosmanta willakuyqa ancha kusikunapaqmi (Lucas 1:74). Chaymantapas, Jesusmi chayta ruwanankupaq Diospa chiqap yupaychaqninkunata kamachirqa. Chaynaqa llapanchikmi Diosmanta runakunaman willakamunanchik. Qamqa ¿willakamuchkankiñachu? (Mateo 24:14; 28:19, 20).

¹⁶ Apostol Pabloqa anchatam chanincharqa utaq ‘qurita’ hinam qawarqa Diosmanta willakuytaqa (2 Corintios 4:7). Jehova Diosmanta hinaspa munayninmanta  huk runakunaman willakuymi imamantapas aswan allinqa. Diosmanta willakuspaykiqa paypa munaynintam ruwachkanki, chay ruwasqaykitam Diosqa anchata chaninchan (Hebreos 6:10). Diosmanta willakuspaykim hukkunata yanapanki Diosta kuyanankupaq hinaspam qampas Diosta astawan kuyanki. Diosmanta willakuy apakusqanraykum, qampas hinaspa uyarisuqnikikunapas wiñaypaq kawsakuyta atinkichik (qaway 1 Corintios 15:58). ¿Yaqachu huk ruway chaynata kusichisunkiman?

17. ¿Imanasqam astawan Diosmanta willakunanchik?

¹⁷ Astawanraqmi Diosmanta willakunanchik. Bibliam nin: “Diospa palabrantayá willakuy hinaspa chay ruwayman qukuy”, nispa (2 Timoteo 4:2). Runakunaqa uyarinankum Diospa munaychakuyninmanta sumaq willakuykunata. Bibliam nin: “[Jehova] Diospa punchawninmi hichpamuchkanña, chayamuchkanñam, utqaymanmi kallpamuchkan”, nispa. “Chayamunqapunim chay punchawqa” (Sofonias 1:14; Habacuc 2:3). Ñam Jehova Diosqa satanaspa munaychakusqan mana allinkunataqa chinkachinqaña. Manaraq chay punchaw chayamuchkaptinmi runakunaman willakunanchik Jehova Diosta yupaychanankupaq.

18. ¿Imanasqam huñunakunanchik Jehova Diosta yupaychananchikpaq?

¹⁸ Jehova Diosqa munanmi huñunakuspa payta yupaychananchikta. Bibliam nin: “Sunqumanta kuyanakuspayá llapallanchik kallpanchanakusun  kuyakuq hinaspa allin ruwaq kananchikpaq, wakinkunapa costumbrasqanman hinaqa amayá huñunakuyman riytaqa saqisunchu, aswanqa Diospa punchawnin chaylla chayamunanta yachaspayá llapallanchik astawan kallpanchanakusunchik”, nispa (Hebreos 10:24, 25). Anchatam kallpanchakunanchik llapan huñunakuyninchikkunaman rinanchikpaq, chaypim yanapanakuspa kallpanchanakunchik.

19. ¿Imataq yanapawasun iñiqmasinchikkunata kuyananchikpaq?

¹⁹ Huñunakuykunapiqa allin amistadkunatam tarinki. Paykunam yanapasunki Jehova Diospa munayninta ruwanaykipaq. Riqsinkitaqmi Diosta yupaychanankupaq kallpanchakuq tukuy rikchaq iñiqmasinchikkunatapas. Paykunaqa qam hinam pantaq runakuna kanku. Chaymi pantaptinkuqa pampachaykunayki (qaway Colosenses 3:13). Paykunapa allinkuna ruwasqantam qawanayki, chaymi yanapasunki paykunata hinaspa Diostapas astawan kuyanaykipaq.

20, 21. ¿Imaynataq chiqap kawsakuyqa?

²⁰ Jehova Diosqa munanmi llapallan yupaychaqninkuna kusisqa kawsakunanchikta. Bibliam yachachin hamuq punchawkunapi kawsakuyninchikqa sumaq kananmanta.

²¹ Hamuq punchawkunapiqa wiñaypaqmi kawsakusunchik, manam 70 utaq 80 watakunallachu. Sumaq huertapim wiñaypaq kawsakusunchik, manaña  unquspam hawka hinaspa kusisqa kawsakusunchik. Chaytam bibliaqa sutichan: “Chiqap kawsakuy”, nispa. Jehova Diosqa niwanchikmi wiñaypaq kawsakuyta quwananchikmanta, ichaqa ñuqanchikmi chayta chaskinanchikpaq anchata kallpanchakunanchik (1 Timoteo 6:12, 19).   

22. (1) ¿Imatam ruwananchik chiqap kawsakuyta chaskinanchikpaq? (2) ¿Imanasqam mana wiñay kawsayta chaskinanchikpaq hinachu kanchik?

²² ¿Imatam ruwananchik chiqap kawsakuyta chaskinanchikpaq? Allin kaqkunata ruwanapaqmi kallpanchakunanchik hinaspam ‘allin ruwaykunapi apu kananchik’ (1 Timoteo 6:18). Kaywanqa nichkanmi bibliapi yachasqanchikkunata ruwayman churananchikpaq. Ñuqanchikqa maynataña kallpanchakuspapas manam wiñay kawsayta chaskinanchikpaq hinachu kanchik. Ichaqa Jehova Diosmi anchata kuyawasqanchikrayku chaytaqa yupaychaqninkunaman quwasun (Romanos 5:15). Chaytam hanaq pachapi taytanchikqa sunqumanta munachkan.

23. ¿Imanasqam allin kaqta ruwanaykipaq tanteakunayki?

²³ Tapukuy: “Ñuqaqa, ¿Diospa munasqanman hinachu yupaychani?”, nispa. Imatapas mana allinta ruwasqaykimanta musyakuspaqa, chayta saqinaykipaq kallpanchakuy. Jehova Diospi hapipakuspa kasukunanchikpaq kallpanchakuptinchikqa, payqa amparakunanchik wasi hinam kanqa. Jehova Diosqa payman sunqu yupaychaqninkunatam kay mana allin tukupay punchawkunapi  waqaychawasun. Chaymantaqa niwasqanchikman hinam wiñaypaq sumaq huertapi kawsakusunchik. Allin kaqta ruwananchikpaq tanteakuspaqa, wiñaypaqmi kawsakuyta atisunchik.