1, 2. Maibita miticuna pistuta shina tupashun.

YUYAI, can ñambita riushcaibi cungaimanda ansayasha, rayu uyarisha, sinzhita tamiangahua callarinma. Chita ricusha miticuna pistuta ucta mascanguima. Miticuna pistuta tupashaga alitami sintiringui.

² Cunanga chasna shina timpuibi causanchi. Cai munduibiga yapa llaquiguna tiyasha catiun. Caita ricusha tapurishcanguichari: “Maibita miticuna pistuta shina tupashun” nisha. Bibliata quillcac runa casna nira: “Jehovata casnami nisha: ‘Canga ñuca miticuna shina mangui, sinzhi atun huasi shina mangui, ñuca Dios, candami shungumanda quirisha’ ” (Salmo 91:​2). Cunan ñucanchi problemagunata binsingahua Jehova yanapan. Chasnallata, shamuc punzhaibi alita causanguichimi nin.

3. Jehova yanapachun nishaga imata rana anchi.

³ Jehovaga imasata cuirai tucunchi. Paiga ima llaquigunata charicpihuas ahuantangahua ursata cusha yanapan. Chimandas, Jehovaga maican mana ali runamandas mas yali ushaiyuc man. Cunan llaquigunata charicpihuas, Jehova nallami alichingaraun. Bibliaga caita raichi nin: “Yaya Dios cangunata llaquishcata yuyarisha causaichi” (Judas 21). Ñucanchi llaquigunata binsingahua Jehova yanapachunga, paimanda mana caruyana chanchi.

4, 5. Jehovaga imasata ñucanchita llaquishcata ricuchishca.

⁴ Diospa amigo tucusha catingahuaga, pai ñucanchita llaquishcata quirina manchi. Jehova ñucanchita llaquisha rashcata yuyari. Tucui Allpata gustu ricuricta rasha, animalgunatas churasha cui tucushcanchi. Chasnallata, ali gustu micunagunata cusha, ashca yacuta saqui tucushcanchi. Chimandas, Bibliaibi ima shuti, ima tunu Dios ashcata quillcasha saquishca. Chasna ashahuas, paiba Churi Jesusta ñucanchita quishpichingahua cachasha yapa llaquishcata ricuchi tucuranchi (Juan 3:16). Chimandami, shamuc punzhaibi ali causaita charishun.

⁵ Jehovaga cieloibi shuc gubirnuta churashca. Cai gubirnuga huin turmintugunata tucuchisha gustu paraiso Allpata rangaraun. Chibiga tucui uras cungailla, cushilla causashun (Salmo 37:29). Chasnallata, Jehovaga ali causanata yachachisha ñucanchita llaquishcata ricuchishca. Chimandas, Jehovaga paita mañachun munan. Paita mañacpiga uyanllami. Jehovaga tucuigunata llaquinmi.

6. Jehova canda llaquishcamanda imata rana angui.

⁶ Jehova canda llaquishcamanda imata rana angui. Jehova canmanda huin rashcata balichisha paita pagrachuna angui. Cunan timpuibi ac runagunaga mana pagrachunaunzhu. Jesus cai Allpai aushcaibiga chasnallata manaura. Chi timpuibiga, Jesusca 10 lepra ungüita charic runagunata ambira. Chi runagunamandaga shuclla pagrachungahua bulltiara (Lucas 17:​12-17). Ñucanchiga cai pagrachungahua bulltiac runa shinami, Jehovata tucui uras pagrachuna anchi.

7. Jehovataga imasata llaquina anchi.

 ⁷ Chasnallata Jehovata llaquishcata ricuchina anchi. Jesusca paiba discipulogunata tucui shunguhuan, tucui almahuan, tucui yuyaihuan Jehovata llaquinguichi nira (Mateo 22:37 leipai). Imahuata chasna nira.

8, 9. Imasata Jehovata llaquishcata ricuchishun.

⁸ Jehovata llaquinimi ninalla chanchi. Mana. Jehovata tucui shunguhuan, tucui almahuan, tucui yuyaihuan llaquishaga alita rasha causashun (Mateo 7:​16-20). Bibliaga yachachinmi Diosta llaquishaga, pai mandashcata casuna manguichi nisha. Chiga pactachibaglla man. Dios munashcata pactachinaga mana sinzhi chan (1 Juan 5:​3 leipai).

⁹ Jehovata casushaga cushilla, ali causaita charishun (Isaias 48:​17, 18). Chasna acpihuas, Jehova Diosmanda mana caruyangahua imata ranata yachashun.

10. Canga imahuata Jehovamanda mas yachasha catina angui.

¹⁰ Canga Bibliata estudiasha Diosta mas ricsisha paiba amigo tucurangui. Jehovahua amigo anaga shuc nina tullpa shina man. Nina mana huañuchun nishaga yandata mas chuntina an. Chasna shinami, Jehovahua amigo tucusha catingahua paimanda mas yachasha catina mangui (Proverbios 2:​1-5).

11. Bibliamanda mas yachashaga imata rana yuyaita charingui.

¹¹ Bibliata can mas yachasha caticpiga Diosta cushiyachina yuyaita charingui. Jesuspa ishcai discipulogunaga profeciagunamanda Jesus cuintacpi casna sintirinaura: “Ñambibi shamushcai pai ñucanchita cuintausha Diospa shimita yachachiushcai manachu ñucanchi shungu ucuibi yapa ashcata cushiyaranchi” (Lucas 24:32).

12, 13. a) Jehovamanda mana caruyangahua imata rana anchi. b) Diosta mas llaquingahuaga imata rana anchi.

 ¹² Jesus cai ishcai discipulogunata yachachicpiga paiguna shungu ucuibi cushi sintirinaura. Canbas, Bibliata estudiasha intindishaga chasnallatachari sintirirangui. Astahuanbas, Jehovata mas ricsisha paita mas llaquishcangui. Diosta astahuan llaquisha catinatas munangui (Mateo 24:12).

¹³ Cunanga Jehovahua mas ali amigo tucusha catingahua esforzarina angui. Paiba amigo tucusha catingahuaga Jehovamanda, Jesusmanda yachasha catina angui. Chimandas, yachashcata yuyarisha canba causaibi imasa pactachinata yuyana angui (Juan 17:​3). Bibliata leisha, estudiaushaga Jehovamanda imata yachashcata yuyai. Chihuasha, can imata yachashca, Diosta mas llaquingahua imasa yanapanata yuyai (1 Timoteo 4:15).

14. Diosta mañanaga imasata yanapan.

 ¹⁴ Canga canba amigohuan caran uraschari cuintanacungui. Paihuan mas cuintanacushaga mas ali amigo tucungui. Chasna shinallata, Jehovata caran uras mañashaga paita mas llaquishun (1 Tesalonicenses 5:17 leipai). Jehovaga ñucanchita llaquishami paita mañachun saquishca. Caiga shuc bendicion man. Chiraicumi, shungumanda Diosta cuintana anchi (Salmo 62:​8). Yangalla chillatata chillatata rimasha Diosta mañana randiga, imasa sintirishcata Diosta huin cuintana anchi. Bibliata estudiasha, shungumanda Diosta mañasha catishaga paita tucui shunguhuan llaquishunmi.

15, 16. Imahuata Bibliamanda cuintana angui.

¹⁵ Jehovahua amigo tucusha catingahuaga, ñucanchi quirishcata shuccunata cuintana anchi. Jehovamanda shuccunata cuintanaga shuc atun bendicion man. Chimandas, Jesus mandashcata casushaga, tucuigunatami Diospa Reinomanda gustu cuintaigunata yachachina anchi. Canga shuccunata Bibliamanda cuintaunguichu (Mateo 24:14; 28:​19, 20).

¹⁶ Apostol Pabloga Bibliamanda cuintanata “Dios shuc gustu cushcata charinchi” nisha balichic ara (2 Corintios 4:​7). Jehovamanda, pai imata rangaraushcata cuintanaga balishca man. Diosta sirvisha Bibliamanda shuccunata cuintacpiga, Yaya Dios canda balichingami (Hebreos 6:10). Bibliamanda runagunata cuintashaga, Diospa amigo tucungahua yanapangui. Canbas paiba ali amigo tucungui. Runagunata Bibliamanda cuintacpiga, canbas canda uyaccunas  quishpiringaunami (1 Corintios 15:58 leipai). Diospa shimimanda yachachishaga cushilla sintiringui.

17. Imaraicuta Bibliamanda uctalla yachachina anchi.

¹⁷ Bibliamanda uctalla yachachina manchi. Bibliaga ninmi: ‘Runa uyacpi, runa mana uyacpihuas Diospa shimita camachisha causai’ (2 Timoteo 4:​2). Runagunaga Diosmanda gustu cuintaigunata yachana manaun. Chimandas, Bibliaga nin, “Jehova Dios shamuna punzha pactarimunmi”. Cai punzhaga “mana unayangachu” (Sofonias 1:14; Habacuc 2:​3). Jehovaga nallami, Supai munduta tucuchingaraun. Chi mana pactarigllaita, runaguna Jehovata sirvina munaita charichun nisha yachachina anchi.

18. Imahuata Jehovata adorangahua tandarina anchi.

¹⁸ Jehovaga paita adorangahua tandarichun munan. Bibliaga ninmi: “Ñucanchipura llaquinacusha alita rasha pariumanda yanapanata yuyarinacushunchi. Tucui uras Diospa runagunahuan paihua huasibi tandarinata mana saquina chanchi. Maicanguna saquirigllaita ñucanchiga pariu tandarisha sinzhi tucungahua yanapanacuna manchi Cristo bulltiamuna punzha pactarimucta yachashcamanda” (Hebreos 10:​24, 25). Tandarinama mana pishisha rina manchi. Tandarinaibiga pariumanda yanapanacusha cushilla sintirishun.

19. Imasata huauqui panigunata llaquishcata ricuchishun.

¹⁹ Tandarinaibiga ali amigogunata tupangui. Paigunami Jehovata mas sirvisha catingahua yanapai tucungui. Tucui partimanda, tucui sami huauqui panigunata ricsingui. Paigunas can shinallata Jehovata sirvingahua esforzarinaun. Astahuanbas, uchayuc asha imasaibi pandarinaun. Chasna tucucpiga,  perdonailla (Colosenses 3:13 leipai). Chasnallata huauqui, paniguna alita rashcata ricui. Chasna rasha, Jehovata mas llaquisha paiba mas ali amigo tucushun.

20, 21. ‘Mana tucurina sirtu huiñai causai’ nishcaga ima tan.

²⁰ Jehovaga tucui paiba amigoguna ali causaita charichun munan. Bibliaga shamuc punzhaibi ali causai tiyanga nin.

²¹ Shamuc punzhaibiga mana 70, 80 huatallata causashunzhu, randi huiñai causashun. Paraiso gustu Allpaibiga “huiñai causashun”, mana ungushunzhu, cungailla, cushi causashun. Casna causaita Bibliaga nin, ‘mana tucurina sirtu causai’ man nisha. Jehovaga ali causaita cusha ninmi, cai causaita charingahuaga tucui shunguhuan esforzarina manchi (1 Timoteo 6:​12, 19).

22. a) Imasata ‘mana tucurina sirtu huiñai causaita charishun’. b) Imahuata huiñai causaita ñucanchi ushaihuan mana charina ushanchi.

²² Imasata ‘mana tucurina sirtu huiñai causaita’ charishun. Tucui uras “aligunata rasha” causana anchi (1 Timoteo 6:18). Biblia nishcata ñucanchi causaibi pactachisha causana anchi. Chasna ashas, huiñai causaitaga mana ñucanchi ushaihuanzhu charishun. Imata rashahuas, ñucanchillaga mana huiñai causaita charishunzhu. Jehova Diosmi paita sirvic runagunata “yapa llaquisha” huiñai causaita cuna ushan (Romanos 5:15). Ñucanchita llaquisha Jehova Dios cai ali huiñai causaita cungaraun.

23. Imahuata cunanllata alita rasha causana angui.

²³ Tapuri: “Ñucaga Dios munashca shinachu sirviuni”. Mana alita raushcata musiashaga uctalla cambiana mangui. Jehovata tucui shunguhuan quirisha,  paita casusha sirvicpiga cai mana ali mundumanda cuirai tucushunmi. Chihuasha, Jehova nishca shina Paraiso gustu Allpaibi huiñai causashun. Cunan alita rasha causashaga huiñaimi causangui.