1, 2. Kisa i pe protèj a nou koméla ?

MAJINN in kou : ou lapou marché deor in jour ousa néna siklonn. Le sièl lé antrèn noirsi. Néna zéklèr èk loraj, é la plui i tonm gro gout. Ou rod in landroi pou anpar a ou. Pou fini, ou trouv inn : out keur lé trankil !

² Sak nou lé antrèn viv lé in pe parèy. Bann zafèr lapou devnir ankor plu mové dan le monn. Somanké ou demann a ou : « Kèl koté mi pe alé pou gingn protéksion ? » In sèrviteur Bondieu la ékri : « Mi ve di Jéova : “Ou lé in kachièt pou moin é in protéksion pou moin, mon Bondieu an ou mi na konfians” » (Psom 91:2). Jéova i aport a nou in soulajman é li donn a nou in gayar léspoir pou lavnir.

3. Kosa nou doi fé pou ke Jéova i protèj a nou ?

³ Koman Jéova i protèj a nou ? Li pe èd a nou sobat kont ninport kèl problèm. Épimèm, li néna in plu gran puisans par rapor tout sak i voudré fé souf a nou. Mèm si in maleur i tonm su nou, nou pe èt sur ke, dan lavnir, Jéova va géri tout nout bann soufrans. La Bib i ankouraj a nou rès « dan lamour Bondieu » (Jud 21). Pou gingn lèd Jéova kan nou néna bann gro traka, nou doi rès son gran kamarad. Mé koman nou gingn fé sa ?

4, 5. Koman Jéova i amont ke li ièm a nou ?

⁴ Pou rès gran kamarad Jéova, nou doi konprann  ke li ièm a nou in bonpe mèm. Kalkul tout sak li fé pou nou. Li la donn a nou la Tèr, ke lé vréman joli mèm, é li la ranpli èk bann zanimo é tout kalité gayar zafèr ki pous dan la tèr. Li la donn a nou osi bann bon zafèr ki aranj la bouch pou manjé é do lo prop pou boir. Li ansèrv la Bib pou fé konèt a nou son non é son karaktèr ke lé inkroiyab. É plus tousala, li la amont ke li ièm a nou kan li la anvoiy Jézu su la tèr, son Garson la ke li té i ièm in ta, pou ke li donn son vi pou nou (Jan 3:16). Avèk se sakrifis la, nou na in gayar léspoir pou lavnir.

⁵ Jéova la mèt an plas le Roiyom mésianik, in gouvèrnman ke le Mési i dirij. Se Roiyom la, ke lé dann sièl, va pa tardé pou fé disparèt tout bann soufrans é li va chanj la tèr an paradi. Dann Paradi, tout domoun va viv pou toultan, zot i sra ereu é an pé (Psom 37:29). Jéova i amont osi ke li ièm a nou parske li ésplik a nou koman avoir le pluméyeur vi posib. An plus ke sa, li ankouraj a nou pri a li, é li lé toultan paré pou ékout a nou. Jéova i amont in fason klèr ke li ièm chakèn d’nou.

6. Kosa ou devré fé kan ou voi lamour ke Jéova néna pou ou ?

⁶ Kosa ou devré fé kan ou voi lamour ke Jéova néna pou ou ? Mont a li ke ou ièm tout sak li fé pou ou. Koméla, in bonpe domoun i majinn mèm pa di mèrsi. Kan Jézu lété su la tèr, lété komsa osi. Lavé in jour, li la géri 10 moun ke lavé la lèp, mé rienk inn touseul la di a li mèrsi (Luk 17:12-17). Nou ve èt kom se bonom la. Nou ve toultan mont nout rekonésans anvèr Jéova.

7. Kèl fason nou doi èm Jéova ?

 ⁷ Nou doi osi montré ke nou ièm Jéova. Jézu la di èk son bann disip ke zot té i doi èm Jéova « èk zot keur an antié », « èk zot lam an antié » é « èk zot pansé an antié » (lir Matieu 22:37). Kosa sa i ve dir ?

8, 9. Koman mont Jéova ke nou ièm a li ?

⁸ Èske i fo kontant a nou di ke nou ièm Jéova ? Non. Si nou ièm a li « èk nout keur an antié », « èk nout lam an antié » é « èk nout pansé an antié », nou va mont tousala dan tout sak nou fé (Matieu 7:16-20). La Bib i di klèrman ke, si nou ièm Bondieu, nou va obéi son bann komannman. Èske lé dur obéi son bann komannman ? Non, parske tousala « lé pa in fardo » (lir 1 Jan 5:3).

⁹ Si nou obéi Jéova, nou va viv ereu (Izai 48:17, 18). Mé kosa va èd a nou rès son gran kamarad ?

10. Pou kosa ou doi kontinué aprann konèt Jéova ?

¹⁰ Koman ou la ni gran kamarad Jéova ? Kan ou la étudié la Bib, ou la aprann konèt a li, é out lamitié èk li la grandi. Se lamitié la, lé kom in fe. Pou ke in fe i kontinué flanbé, i fo mèt do boi dedan. Lé parèy pou out lamitié èk Jéova, pou ke li rès for, ou doi kontinué aprann konèt a li (Provèrb 2:1-5).

11. Kèl léfé bann zansègnman la Bib nora su ou ?

¹¹ Afors ou va étudié la Bib, ou va aprann bann zafèr ke va fé nèt bann santiman dan out keur. Agard sak deu disip Jézu la resanti, kan li la ésplik a zot bann profési la Bib. Zot la di : « Èske nout keur té i brul pa anndan kan li té i koz èk nou dann chemin,  kan li té i ésplik a nou in fason klèr bann Zékritur ? » (Luk 24:32).

12, 13. a) Kosa i pouré arivé nout lamour pou Bondieu ? b) Kosa nou doi fé pou ke nout lamour pou Bondieu i rès for ?

¹² Kan bann disip Jézu la konpri sak lété ékri dan bann Zékritur, alor sa la fé nèt bann santiman dan zot keur. Lé sur, ou la resanti le mèm kontantman, kan ou la komans konprann la Bib. Sa la èd a ou konèt Jéova é èm a li. Lès pa lamour ke ou resan pou li, étèn oubien fébli (Matieu 24:12).

¹³ Pou ke out lamitié avèk Bondieu i rès for, ou doi fé bann gro zéfor. Kontinué aprann bann zafèr su li é su Jézu. Kalkul koman ou sar mèt an pratik sak ou aprann (Jan 17:3). Kan ou lir la Bib oubien kan ou étudié a li, poz a ou bann késtion la : « Kosa sa i  aprann a moin su Jéova ? Dan bann vèrsé la, kosa i pous a moin èm a li èk mon keur an antié é èk mon lam an antié ? » (1 Timoté 4:15).

14. La priyèr i èd a nou gard in lamour for pou Jéova. Pou kosa ?

¹⁴ Kan ou néna in kamarad ke ou éstim bien, ou koz souvan èk li. Sé komsa mèm ke out lamitié èk li i rès for. Lé parèy, kan nou pran labitud koz èk Jéova dan la priyèr, nout lamour pou li i rès for mèm (lir 1 Tésalonisien 5:17). La priyèr lé vréman in joli kado ke nout Papa dann sièl la donn a nou. Nou doi toultan di èk li, sak nou resan o fon nout keur (Psom 62:8). Nou doi pa résit bann priyèr ke nou la aprann par keur, mé sak nou di, i doi sort vréman dan nout keur. Pou ke nout lamour pou Jéova i rès for, nou doi kontinué étudié la Bib é pri a li avèk in keur antié.

15, 16. Kosa ou pans konsèrnan la prédikasion ?

¹⁵ Pou rès gran kamarad Jéova, nou doi osi koz de nout foi èk lé zot. Sé in gran loneur koz èk lé zot pou fé konèt kisa i lé Jéova (Luk 1:74). É sé in résponsabilité ke Jézu la donn tout bann krétien. Nou tout, nou doi préché la bonn nouvèl le Roiyom Bondieu. Èske ou la finn komans fé sa ? (Matieu 24:14 ; 28:19, 20).

¹⁶ Alé préché lété kékchoz ke lavé in bonpe la valeur pou lapot Pol. Li la di ke sa lété in « trézor » (2 Korintien 4:7). Fé konèt lé zot kisa i lé Jéova é son projé, sa sé le zafèr le plus inportan ke ou pe fé. Sé in fason sèrv Jéova. É li ièm in bonpe sak ou fé pou li (Ébreu 6:10). An plus ke sa, alé préché i aport bann bienfé pou tout domoun ki ékout a ou é pou ou mèm. Kan  ou prèch, ou èd lé zot é ou mèm raproch koté Jéova é gingn la vi pou toultan (lir 1 Korintien 15:58). Èske néna in not zafèr ki pouré kontant a ou plus ke sa ?

17. Pou kosa la prédikasion i doi èt fé san tardé ?

¹⁷ La prédikasion sé kékchoz i doi èt fé san tardé. Nou doi « prèch la parol, kontinué fé sa ankor » (2 Timoté 4:2). Bann domoun i doi antann parlé le Roiyom Bondieu. La Bib i di : « Le gran jour Jéova i tard pa pou arivé. Li tard pa pou arivé é li ariv vréman vitman. » La fin « sra pa an retar » (Sofoni 1:14 ; Abakuk 2:3). I tard pa, Jéova va détrui le monn Satan. Mé avan sa, bann domoun i doi konèt sak i doi arivé, pou ke zot i gingn fé le choi ador Jéova.

18. Pou kosa nou doi ador Jéova ansanm dot vré krétien ?

¹⁸ Jéova i ve ke nou ador a li ansanm dot vré krétien. La Bib i di : « Alon fé in kont ansanm inn é lot pou pous a nou pou émé é fé bann bon zaksion, san larg nout bann rénion, kom detroi na labitud fé, mé alon ankouraj a nou inn é lot, é sa ankor plus parske zot i voi le jour i aproch » (Ébreu 10:24, 25). Nou doi fé tout nout posib pou èt la tout bann rénion. Sa i pèrmèt a nou ankouraj a nou inn é lot.

19. Kosa i pe èd a nou èm nout bann frèr é seur ?

¹⁹ Kan ou asis bann rénion krétien, ou va fé a ou bann kamarad ke va èd a ou ador Jéova. Ou va kroiz in paké frèr é seur ki fé zot posib pou ador Bondieu, parèy ou mèm. Mé kom ou mèm, banna lé pa parfé é zot i fé bann zéreur. Donk, i fo ou lé paré pou pardonn a zot (lir Kolosien 3:13). Rès bien kalé toultan su zot bann kalité. Sa va èd a ou, èm a zot é raproch a ou ankor plus koté Jéova.

20, 21. Kosa i lé la « vi pou toultan é san traka » ?

²⁰ Jéova i ve ke son bann kamarad néna in pluméyeur vi posib. La Bib i ansègn a nou ke, dan lavnir, nout vi sra vréman pu parèy dutou.

²¹ Nou sar pa viv rienk 70 ou 80 zan. Nou nora la « vi pou toultan ». Dann Paradi, nou va viv an bonn santé é dan la pé. La Bib i parl la vi la, kom la « vi pou toultan é san traka ». Jéova i promèt ke li va donn a nou in vi komsala. Mé koméla mèm, nou doi fé tout nout posib pou « fé zéfor pou gout » la vi la (1 Timoté 6:12, 19).

22. a) Koman nou pe « fé zéfor pou gout la vi pou toultan é san traka » ? b) Nou pe pa ganié par nou mèm la vi pou toultan. Pou kosa ?

²² Koman nou pe « fé zéfor pou gout la vi pou toultan é san traka » ? Nou doi « fé zéfor pou fé le bien » é « fé bann bon zaksion an kantité » (1 Timoté 6:18). Sa i ve dir ke nou doi mèt an pratik sak nou aprann dan la Bib. Mé lé pa rienk avèk nout bann zéfor ke nou va gingn la vré vi. La vi pou toultan, sé in nafèr ke nou pe pa ganié par nou mèm. Sa lé in kado ke Jéova i fé a nou, sa lé in « gran faveur ke nou mérit pa » (Romin 5:15). Nout Papa ke lé dann sièl i ve vréman donn se kado la son bann sèrviteur.

23. Akoz ou doi prann le bann bon désizion san tardé ?

²³ Poz a ou se késtion la : « Èske mi ador Bondieu la fason i plé a li ? » Si ou doi fé detroi chanjman dan out vi, fé a li koméla mèm. Si nou fé tout nout posib pou obéi Jéova é si nou na konfians an li, nou nora son protéksion. Li va protèj son bann sèrviteur, alor ke zot i viv bann dèrnié jour le monn Satan. Aprésa,  li va fé an sort ke nou viv dann Paradi pou toultan, kom li la promèt. Si ou tard pa é ke ou pran le bann bon désizion, ou poura profit la vi pou toultan é san traka !