1, 2. Кате ащи те аракхас защита авдиес?

ПРЕДСТАВИНЕ ТУКЕ, кай синян нааври йекхе бришимдале диесесте. О небес кальол, дикхес светкавицес тай шунес гръмотевицес. Сиго започнинел те дел бришим андар баяте. Родес кате те гаравес тут. Кана аракхес шуко тай безопасно тхан, бут лошанес!

² Амаре диесенде ачшол варесо подобно. О животос далкхе светосте ачшол са по–пхаро. Ащи те пучес тут: „Кате ащи те аракхав защита?“ Анди Библия о псалмисти пишингяс: „Ка пхенав е Йеховаске: ‘Ту синян мо гаравдуно тхан тай ми крепост, моро Дел, колесте надинав ман’“ (Псалм 91:2) Ва, о Йехова ащи те пазинел амен далкхе светосте, ковато си пхердо проблемиенца, тай те дел амен шукар надежда за ко бъдеще.

3. Сар ащи о Йехова те овел амаро гаравдуно тхан?

³ Сар ащи те пазинел амен о Йехова? Ов ащи те помагинел аменге те справинас амен амаре проблемиенца тай си бут по–зорало секоне йекхестар, ковато мангел те керел аменге кханилипе. Даже ако ачшол варесо кханило аменца акана, ащи те овас сигурна, кай андо бъдеще о Йехова ка махнинел о букя, колато анен аменге дукх. И Библия насърчинел амен: „Ачшовен анде Девлескоро дехиба.“ (Юда 21) За те помагинел аменге о Йехова, кана авен пхаре диеса, требе те ачшовас паше жи лесте. Ама сар ащи те керас давкха?

4, 5. Сар о Йехова сикавел, кай дехел амен?

⁴ За те ачшовас паше жи ко Йехова, требе те ахальовас кизом бут дехел амен ов. Мислине саворе букиенге,  колато о Йехова кергяс аменге. Ов кергяс аменге и пхув, която си зомкха шукар, тай лате кергяс те овен бут шукар растения тай животна. Също диняс амен шукар хабе тай шужо пани. Анди Библия о Йехова пхенгяс аменге поро алав тай саве шукар качества иси лес. Ама ов сикавгяс о най–баро дехиба кариг аменде, кана бичшалгяс ки пхув пе дехиме Чшавес, е Исусес, те дел по животос аменге. (Йоан 3:16) Ашал далкхе жертваке иси амен шукар надежда за ко бъдеще.

⁵ О Йехова ваздингяс поро Тхагарипе ко небес. Давкха правителство сиго ка махнинел о страдания тай ка керел и пхув рай, колесте саворен ка овел мири, щастие тай вечно животос. (Псалм 37:29) Също о Йехова сикавел, кай дехел амен, като помагинел аменге те овел амен о най–лачшо животос акана. Ов пхенел аменге те молинас амен леске тай винаги си готово те шунел амаре молитвес. О Йехова ясно сикавгяс, кай дехел секоне йекхес амендар.

6. Со требе те керес, като дикхес кизом дехел тут о Йехова?

⁶ Со требе те керес, като дикхес кизом дехел тут о Йехова? Сикав, кай синян благодарно саворе букиенге, колато ов кергяс туке. Холяке си, кай авдиес бут мануша си неблагодарна. Чука сине, кана о Исусес уло ки пхув. Йекхвар о Исусес саскяргяс деше насвале манушен, колен сине проказа, ама само йекх лендар благодарингяс леске. (Лука 17:12–17) Аме мангас те овас сар о мануш, ковато благодарингяс е Исусеске. Винаги мангас те овас благодарна е Йеховаске.

7. Кизом баро требе те овел амаро дехиба кариг о Йехова?

⁷ Също требе те сикавас амаро дехиба кариг о Йехова. О Исусес пхенгяс пе ученикиенге, кай требе те дехен е Йеховас пе целоне илеса, пе целоне вогиеса тай пе целоне гогяса. (Четине Матей 22:37.) Со означинел давкха?

8, 9. Сар ащи те сикавас е Йеховаске, кай дехас лес?

 ⁸ Ресел ли само те пхенас, кай дехас е Йеховас? На–а. Ако дехас е Йеховас амаре целоне илеса, амаре целоне вогиеса тай амаре целоне гогяса, ка сикавас амаро дехиба кариг лесте далкхеса со керас. (Матей 7:16–20) И Библия сикавел, кай ако дехас е Девлес, ка керас давкха со мангел ов. Трудно ли си давкха? На–а, соскето „давкха со мангел амендар [о Йехова] нанай пхаро“. (Четине 1 Йоан 5:3.)

⁹ Кана шунас е Йеховас, ка овел амен шукар тай щастливо животос. (Исаия 48:17, 18) Ама со ка помагинел аменге те ачшовас паше жи ко Йехова? Нека те дикхас.

10. Соске требе те продължинес те сикльовес е Йеховаске?

¹⁰ Сар ачшилян е Йеховаскоро амал? Бискай изучинесас и Библия, запенжаргян тут по–лачшес е Йеховаса тай ачшилян лескоро амал. Давкха амалипе си сар яг, която мангес те продължинел те тхабльол. Сарто за те тхабльол и яг требен кашта, ачука за те овел зорало то амалипе е Йеховаса, требе те продължинес те сикльовес леске. (Притчи 2:1–5)

11. Сар ка влияинел туке давкха со сикльовес тари Библия?

¹¹ Кана продължинес те изучинес и Библия, ка сикльовес букя, колато ка ден те илесте. Дикх сар почувствисайле дуй таро ученикя е Исусескере, кана ов сикавгяс ленге со означинен десаве пророчества тари Библия. Он пхенде: „На тхабльонас ли амаре ила, бискай хоратинелас аменге ко дром тай сикавелас аменге со означинел о Писание?“ (Лука 24:32)

12, 13. а) Со ащи те ачшол амаре дехимнаса кариг о Дел? б) Сар ащи те барярас амаро дехиба кариг о Йехова?

¹² Кана о ученикя ахалиле о Писания, ленгере ила пхердиле лошаляса. Ту–да сигурно чувствингян  о също, кана започнингян те ахальовес и Библия. Давкха помагингяс туке те пенжарес е Йеховас тай те дехес лес. На мангес торо дехиба кариг лесте те шудрьол. (Матей 24:12)

¹³ Кана ачшос е Девлескоро амал, требе те дес всичко тутар, за те пазинес то амалипе леса. Требе те продължинес те сикльовес леске тай е Исусеске, тай те мислинес далкхеске со сикльовес тай сар те керес давкха тере животосте. (Йоан 17:3) Кана четинес тай изучинес и Библия, пуч тут: „Со сикльовав далкхестар е Йеховаске? Соске требе те дехав лес ме целоне илеса тай ме целоне вогиеса?“ (1 Тимотей 4:15)

14. Сар и молитва помагинел те ачшовел зорало амаро дехиба кариг о Йехова?

¹⁴ Кана иси тут лачшо амал, хоратинес често леса тай чука тумаро амалипе ачшовел зорало. Ачука, кана често хоратинас е Йеховаске, като молинас амен  леске, амаро дехиба кариг лесте ка ачшовел зорало. (Четине 1 Солунци 5:17.) И молитва си шукар подаръки амаре небесноне Дадестар. Винаги требе те хоратинас леске вогиестар. (Псалм 62:8) На требе те пхенас йекх тай съща букя амаре молитвенде, а те хоратинас далкхеске со си наистина амаре гогяте. Ако продължинас те изучинас и Библия тай те молинас амен вогиестар, амаро дехиба кариг о Йехова ка ачшовел зорало.

15, 16. Со мислинес е проповедноне службаке?

¹⁵ Ако мангас те ачшовас паше жи ко Йехова, требе също те хоратинас околенца далкхеске со сикльовас тари Библия. Те хоратинас околенца е Йеховаске си бари привилегия. (Лука 1:74) Ама също си отговорност, която о Исусес диняс саворен, колато си истинска християня. Секо йекх амендар требе те проповединел и лачши новина е Девлескере Тхагарипнаске. Дали вече керес давкха? (Матей 24:14; 28:19, 20)

¹⁶ О апостол Павел бут ценинелас и проповедно служба тай пхенгяс, кай ой си „барвалипе“. (2 Коринтяни 4:7) Те хоратинес околенца е Йеховаске тай далкхеске со обещинел те керел ов, си о най–важно варесо, ковато ащи те керес. Ачука служинес е Йеховаске тай ов бут ценинел давкха. (Евреи 6:10) И проповедно служба ащи те анел полза сарто туке, ачука далкхенге–да, колато шунен тут, соскето давкха помагинел туке, а също ленге–да, те овен паше жи ко Йехова тай те живинен вечно. (Четине 1 Коринтяни 15:58.) Иси ли авер варесо, ковато ащи те анел туке по–бари лошали?

17. Соске и проповедно служба си варесо бут важно, ковато требе те керас акана?

¹⁷ И проповедно служба си варесо бут важно, ковато  требе те керас акана. Требе те „проповединас о слово“ тай требе те керас давкха „пламенно“. (2 Тимотей 4:2, бележка телал и линия) О мануша требе те шунен е Девлескере Тхагарипнаске. И Библия пхенел: „Е Йеховаскоро баро диес си паше. Паше си тай бут сигярел.“ О крайос „нанай те закъснинел!“ (Софония 1:14; Авакум 2:3) Ва, бут сиго о Йехова ка унищожинел е Бенгескоро кханило светос. Англал те ачшол давкха, требе те пхенас е манушенге, за те ащи те избиринен те служинен е Йеховаске.

18. Соске требе те поклонинас амен е Йеховаске заедно авере истинсконе християниенца?

¹⁸ О Йехова мангел те поклонинас амен леске заедно авере истинсконе християниенца. И Библия пхенел: „Нека мислинас йекх авереске, за те традас йекх аверес те сикавас дехиба тай те керас лачше букя, без те измукас амаре събирания, сарто керен десаве мануша, ама те насърчинас амен йекх аверес, тай те керас давкха са по–бут, като дикхас, кай авел о диес.“ (Евреи 10:24, 25) Требе те дас о най–лачшо амендар, за те жас саворе събраниенде. Ко събрания иси амен и възможност те насърчинас амен тай те укрепинас амен йекх аверес.

19. Со ка помагинел аменге те дехас амаре пхрален тай амаре пхениен?

¹⁹ Кана жас ко събрания, ка аракхес лачше амален, колато ка помагинен туке те служинес е Йеховаске. Отхе ка запенжарес тут различноне пхраленца тай пхениенца, колато сар туте ден всичко пестар, за те служинен е Йеховаске. Он–да си безехале сар туте тай керен грешкес. Кана ачшол давкха, ов готово те простинес ленге. (Четине Колосяни 3:13.) Винаги дикх о шукар качества, колато иси те пхрален тай те пхениен, соскето давкха ка помагинел туке те дехес лен тай те ачшос са по–близко е Йеховаса.

20, 21. Со си „о истинско животос“?

²⁰ О Йехова мангел о най–шукар животос пе саворе амаленге. И Библия сикавел, кай о животос андо бъдеще ка овел бут различно таро животос авдиес.

²¹ Андо бъдеще ка живинас вечно, а ма само 70 или 80 бреша. Ка овел амен „вечно животос“, съвършено састипе, мири тай щастие андо рай ки пхув. Далкхеске анди Библия пхенел пес „истинско животос“. О Йехова обещинел те дел амен о истинско животос, ама требе те дас всичко амендар авдиес, за те „долас амен зоралесте“ далкхе животосте. (1 Тимотей 6:12, 19)

22. а) Сар ащи те „долас амен зоралесте ко истинско животос“? б) Соске нащи те заслужинас о истинско животос?

²² Сар ащи те „долас амен зоралесте ко истинско животос“? Требе те „керас лачшипе“. (1 Тимотей 6:18) Давкха означинел, кай требе те керас амаре животосте давкха со сикльовас тари Библия. Ама давкха те овел амен истинско животос на зависинел далкхестар саве усилия керас. Нисар нащи те заслужинас о вечно животос. Ов си подаръки таро Йехова лескере верноне служителенге. Чука ов сикавел пери незаслужено милост кариг ленде. (Римляни 5:15) Амаро небесно Дад бут мангел те дел пе верноне служителен давкха подаръки.

23. Соске требе те лес о правилно решение акана?

²³ Пуч тут: „Служинав ли е Девлеске, сарто ов мангел?“ Ако ахальовес, кай требе те керес десаве променес, кер давкха веднага. Ако мукас амен е Йеховаске андо васта тай керас всичко со ащи, за те шунас лес, о Йехова ка овел амаро гаравдуно тхан. Ов ка пазинел пе верноне служителен презал о последна диеса таре Бенгескоро кханило светос. Палал далкхесте о Йехова  ка дел амен вечно животос андо рай, сарто обещингяс. Ва, ако лес о правилно решение акана, ка ащи те овел тут о истинско животос!