1, 2. Kuri šaj te garavamen?

ZAMISLIN so hijan avri, a o vakti tano but lošno. O oblakija kaljona hem čhinela muj. Šuneja so grmini hem počmini te džal baro boršim. Tu rodeja than kuri šaj te garavetu. Kobor tano šukar ked arakheja asavko than!

² Amen isto avdije roda kuri šaj te garavamen. O sveto tano sa pološno hem pološno. Šaj pučejatu: Kuri šaj te garavama? Ki Biblija pisini: „Ka vačerav e Jehovase: ’Tu hijan mo than kuri šaj te garavama, mi tvrđava, mo Devel, upro kaste ka mukama‘“ (Psalam 91:2). Čače, o Jehova šaj te pomožini amendže te ikljova ko krajo e problemenca hem delamen šuži nada ko vakti so avela.

3. Sar šaj te pomožinimen o Jehova?

³ Sar šaj o Jehova te arakhimen? Ov šaj te delmen godi te šaj te džana so te čera e problemenca kola isimen. O Jehova tano pozoralo kotar sa avera kola mangena te čeren amendže lošnipe. Ako akana isimen disavo problemi, šaj te verujina so o Jehova ka čhinavi odova problemi ko vakti so avela. I Biblija phenela amendže: „Ačhoven ko Devljeso mangipe“ (Judaso 21). Valjani te ačhova paše uzo Jehova te šaj te pomožinimen ked isimen pharipa. Ama, sar šaj te čera odova?

4, 5. Sar o Jehova mothodža so mangela amen?

⁴ Te šaj te ačhova paše e Jehova, amen valjani te razmislina odoljestar kobor but mangela amen. Razmislin  ando sa o buča so o Jehova čerdža amendže. Ov dijamen šuži Phuv koja tani pherdi kaštenca, luludženca hem životinjenca. Isto adžahar, ov dijamen šukar habe hem čisto pani. Prekalji Biblija o Jehova vačerdža amendže poklo nav hem peklje šuže osobine. Ama, najbaro mangipe mothodža ked bičhaldža ki Phuv pe manglje Čhave, e Isuse, te merel amendže (Jovan 3:16). Sebepi so o Isus dija po dživdipe, amen adžičeri šukar dživdipe ko vakti so avela.

⁵ O Jehova čerdža o Mesijansko Kraljevstvo, jekh nebesko vlada, koja pana hari ka čhinavi sa o muke. O Kraljevstvo ka čerel i Phuv te ovel raj, kuri sa o manuša ka živinen večno ko rahati hem ko bahtaljipe (Psalam 37:29). Isto adžahar, o Jehova mothovi so mangela amen adžahar so sikavimen sar šaj avdije te ovelmen najšukar dživdipe. Ov phenela amendže te moljinamen oljese hem uvek mangela te šunel amare molitve. O Jehova čače mothodža baro mangipe sarinendže.

6. Sar šaj te mothove so cenineja e Jehovaso mangipe?

⁶ Sar šaj te mothove so cenineja e Jehovaso mangipe? Adžahar so ka ove zahvalno ko sa o buča so čerdža tuče. But manuša avdije nane zahvalna. Asavke manuša živije hem ko Isuseso vakti. Jekh puti o Isus sačardža dešen manušen kola hineljen guba, ama samo jekh oljendar zahvaljijape oljese (Luka 17:12-17). Amen manga te ova sar akava manuš kova zahvaljisalo e Isusese. Uvek manga te zahvaljinamen e Jehovase.

7. Sar valjani te manga e Jehova?

⁷ Isto adžahar, amen valjani te mothova amaro mangipe premalo Jehova. O Isus vačerdža pe učenikondže so valjani te mangen e Jehova celone viljeja, celona duša  hem celona godža (Čitinen Matej 22:37). So značini odova?

8, 9. Sar šaj te mothova so manga e Jehova?

⁸ Da lji šaj samo te phena so manga e Jehova? Na. Ako amen manga e Jehova celone viljeja, duša hem godža, amaro mangipe premalo oljeste ka dičhol ko odova so čera (Matej 7:16-20). I Biblija sikavi so ako manga e Devlje, amen ka šuna odova so ov phenela amendže. Da lji tano odova pharo te čera? Na, sose e Jehovase „zapovestija nane phare“ (Čitinen 1. Jovaneso 5:3).

⁹ Ked šuna e Jehova, tegani isimen bahtalo hem šukar dživdipe (Isaija 48:17, 18). Ama, so ka pomožinimen te ačhova paše e Jehova? Akana ka vačera odoljestar.

10. Sose valjani hem ponodri te sikljove ando Jehova?

¹⁰ Sar uljan e Jehovaso amal? Dži sikljiljan andi Biblija, tu pendžardžan e Jehova pobuter hem odova bajačerdža to amaljipe oljeja. Odova amaljipe tano sar jag koja thabljola. Sar so ki jag valjani te čhivenpe kašta te šaj hem ponodri te thabljol, isto adžahar hem tu valjani ponodri te sikljove ando Jehova te šaj to amaljipe oljeja te barjol (Godžalje lafija 2:1-5).

11. Sar ka utičini upro tute odova so sikljoveja andi Biblija?

¹¹ Dži ponodri sikljoveja andi Biblija, tu ka arakhe buča kola čače ka khuvenče ko vilo. Dikh so pheje duj učenikija ked o Isus objasnija oljendže e biblijake proročanstvija. On pheje: „Na pherdilo lji amaro vilo dži vačerdža amenca ko drumo, dži objasnija amendže o Ljila?“ (Luka 24:32).

12, 13. (a) So šaj te ovel e mangipa kova isimen premalo Devel? (b) Sar šaj hem ponodri te zorjačera amaro amaljipe premalo Jehova?

 ¹² Sar so akala učenikija hine bahtalje ked haljilje e Devljeso Lafi, šaj hem tu hijanlje bahtalo ked počmijan te haljove odova so pisini ki Biblija. Odova pomožijatu te pendžare e Jehova hem te mangelje. Niked ma muk odova mangipe te šudrol (Matej 24:12).

¹³ Akana ked uljan e Devljeso amal, tu valjani hem ponodri te de sa tutar te ačhol zoralo to amaljipe oljeja. Valjani hem ponodri te sikljove ando Jehova hem ando Isus. Razmislin odoljestar sar šaj ko toklo dživdipe te ičeretu ko odova so sikljiljan (Jovan 17:3). Ked čitineja ja sikljoveja andi Biblija puč kokri tut: „So odova sikavima ando Jehova? Sar odova pomožinima te mangav e Devlje celone viljeja hem duša?“ (1. Timotejese 4:15).

14. Sar i molitva pomožini te ovelmen zoralo mangipe premalo Jehova?

 ¹⁴ O šukar amala uvek vačerena jekh jekheja hem odova zorjačeri oljengo amaljipe. Isto adžahar, ked amen uvek moljinamen e Jehovase odova zorjačeri amaro mangipe premalo oljeste (Čitinen 1. Solunskonendže 5:17). I molitva tani jekh but šužo daro ando amaro nebesko Dad. Amen valjani uvek te vačera oljeja viljestar (Psalam 62:8). Ki molitva na valjani te vačera uvek ista lafija, nego valjani te vačera odova so čače isimen ko vilo. Ako ponodri sikljova andi Biblija hem moljinamen viljestar, amaro mangipe premalo Jehova ka ovel zoralo.

15, 16. Sar dikheja ko odova so šaj te vačere averenca ando Jehova?

¹⁵ Ako manga te ačhova paše e Jehova, amen valjani te vačera averenca odoljestar so sikljiljam andi Biblija. Isimen but bari čast te vačera averenca ando Jehova (Luka 1:74). O Isus pheja so sa o hrišćanja isiljen odija odgovornost. Svako amendar valjani te vačeri o šukar haberi ando Devljeso Kraljevstvo. Da lji čereja akava? (Matej 24:14; 28:19, 20).

¹⁶ O apostol Pavle dikhlja ko odova te vačeri o šukar haberi sar diso but važno. Ov pheja soj tano odova „barvaljipe“ (2. Korintskonendže 4:7). Te vačere averenca ando Jehova hem ando odova so ov mangela te čerel, tani najvažno buti so šaj te čere. Adžahar služineja e Jehovase hem ov cenini odova so čereja oljese (Jevrejendže 6:10). Ked vačereja o šukar haberi, tegani pomožineja tuče hem averendže te oven paše e Jehova hem te ovel tumen večno dživdipe (Čitinen 1. Korintskonendže 15:58). Nisavi aver buti našti te čereltu te ove odobor bahtalo!

17. Sose avdije valjani sig posig te vačera averendže o šukar haberi?

 ¹⁷ Avdije valjani sig posig te vačera averendže o šukar haberi. Amen valjani odova te čera ked tano šukar hem ked tano pharo vakti (2. Timotejese 4:2). O manuša valjani te šunen ando Devljeso Kraljevstvo. I Biblija phenela: „Paše tano o baro dive e Jehovaso. Paše tano hem avela but sigate“. O krajo „na ka harini!“ (Sofonija 1:14; Avakum 2:3). Pana hari, o Jehova ka uništini e Bengeso lošno sveto. Ama angljeder te ovel odova, amen valjani te vačera e manušendže so adžičeriljen, te šaj te birinen da lji mangena te služinen e Jehovase.

18. Sose valjani te služina e Jehovase ki kupa avere čačutne hrišćanenca?

¹⁸ O Jehova mangela te služina oljese ki kupa avere čačutne hrišćanenca. I Biblija vačeri: „Te razmislina jekh jekhestar, te šaj te ohrabrinamen te mothova mangipe hem te čera šukaripe, hem te na ačhava amare sastankija sar so disave isiljen tabijati, nego te ohrabrina jekh jekhe, sa pobuter so dikhena so avela sa popaše o dive“ (Jevrejendže 10:24, 25). Amen valjani te da sa amendar te dža ko sa o sastankija. O sastankija šaj te pomožinenmen te ohrabrina hem te zorjačera jekh jekhe.

19. So pomožinimen te manga e phraljen hem e phenjen?

¹⁹ Ked džaja ko sastankija, tu šaj te arakhe šukar amaljen kola ka pomožinentu te služine e Jehovase. Odothe ka pendžare phraljen hem phenjen kola sar tute celone viljeja služinena e Jehovase. Ama, hem on tane nesavršena hem grešinena. Odoljese ov spremno te oprostine oljendže (Čitinen Koloskonendže 3:13). Ma dikh o mane kola isiljen te phralja hem te phenja, nego  rode ano oljende okova soj tano šukar. Odova ka pomožiniče te mangeljen hem te ove popaše e Jehova.

20, 21. Soj tano o „čačutno dživdipe“?

²⁰ O Jehova mangela sa oljese amala te oveljen najšukar dživdipe. I Biblija sikavimen so odova dživdipe ka ovel averčhane kotar dživdipe kova isimen avdije.

²¹ Ko vakti so avela, na ka živina samo 70 ja 80 berša. Amen ka živina večno ko raj kuri ka ovelmen savršeno sastipe, bahtaljipe hem rahati. Asavko dživdipe ki Biblija vičinipe „čačutno dživdipe“. O Jehova dijamen po lafi so ka delmen asavko dživdipe, ama amen pana akana valjani te da sa amendar te šaj te ovelmen odova (1. Timotejese 6:12, 19).

22. (a) Sar šaj „te ovelmen o čačutno dživdipe“? (b) Sose našti te zaslužina o večno dživdipe?

²² Sar šaj te ovelmen odova „čačutno dživdipe“? Amen valjani te čera šukaripe averendže (1. Timotejese 6:18). Odova značini so valjani te ičeramen ko odova so sikljova andi Biblija. Čače, niko ando manuša našti kokri pese te čerel asavko dživdipe savo o Jehova mangela te delmen. Amare zoraljipa našti te ovelmen večno dživdipe. Odova tano baro daro ando Jehova kova dela pe verno slugendže, jekh baro šukaripe kova na zaslužina (Rimskonendže 5:15). Amaro nebesko Dad čače mangela te del pe verno slugendže akava daro.

23. Sose akana valjani te ane šukar odluke?

²³ Puč kokri tut: „Da lji me služinava e Devljese adžahar sar so ov mangela?“ Ako valjani te čere disave promene ko to dživdipe, čer odova so posigate. Muktu upro Jehova, šunlje ko sa hem ov ka ovel toklo than kuri šaj  te garavetu. O Jehova ka arakhi pe verno slugen ko palune dive ando Bengeso lošno sveto. Palo odova, o Jehova ka čerel te ovel raj ki Phuv sar so dija po lafi. Ako akana aneja šukar odluke, šaj te oveltu čačutno dživdipe.