1, 2. Xana hi nga wu kuma kwini nsizrelelo namunhla?

A HI nge wo famba a ndleleni hi siku ledzri ku nga ni xidzedze lexikulu. Tilo dzri ya dzri mphuma, dzri sungula ku hatima dzri tlhela dzri dzruma. Ku nga li kungani ku sungula mpfula. U tsrutsruma u djula ka ku tumbela kone. Hi loko u kuma mbangu wa ku hlayiseka wa ku tumbela ka wone​—kutani u ku hefu!

² Hi le ka xiyimu lexi fanaka namunhla. Swiyimu swa misava swi ya swi biha. U nga ha tivutisa: ‘Ni nga wu kuma kwini nsizrelelo xana ke?’ Mupsalma a tsrale leswi: ‘Ni ta ku ku Yehovha: ‘U wutxhavelo byanga ni khokholo dzranga, Xikwembu Nkulukumba wanga, lweyi ni ku dumbaka.’ ’ (Amapsalma 91:2) Ina, Yehovha a nga hi ntsrhunxa ka swikazratu swezru swoswi. Nakone a hi dumbisa wumundzruku lebyi hlamalisaka.

3. Hi nga yentxa yini akuva Yehova a va khokholo dzrezru?

³ Xana Yehovha a nga hi sizrelela hi ndlela yini? A nga hi pfuna kuva hi kota ku langusana ni swikazratu swini ni swini leswi hi nga ha vaka naswu, nakone a ni ntamu swinene lakakuva a nga hlula hinkwavu lava nga ha djulaka ku hi vavisa. Nambi loko hi humelela hi ntxhumu wa ku biha swoswi, hi nga tiyiseka ka leswaku Yehovha a ta wu lulamisa a nkameni lowu taka. Bibele dzri hi tiyisa dzri ku: ‘Tibekisani a lizrandzrwini dzra Xikwembu Nkulukumba.’ (Yuda 21) Hi fanela ku tsrhama kusuhi na Yehovha akuva a hi pfuna loko hi ni swikazratu. Kambe ke, xana hi nga swi yentxisa kuyini?

4, 5. Xana Yehovha a hi kombise kuyini lizrandzru dzrakwe?

⁴ Akuva hi kota ku tsrhama kusuhi na Yehovha, swi djula hi zranga hi twisisa lizrandzru ledzrikulu ledzri a dzri twaka  ha hine. Pimisa hi hinkwaswu leswi Yehovha a hi yentxelaka swone. A hi nyike misava ya ku xonga a tlhela a yi tata hi swiluva ni swihazri leswi hi kokaka mahlo. A tlhele a hi nyika swakuda swa ku nandzrika ni mati ya ku tenga akuva hi nwa. Hi ku tizrisa Bibele, Yehovha a hi byele vito ni wumhunu byakwe lebyi hlamalisaka. Ku tlula hinkwaswu, a hi kombe lizrandzru dzrakwe loko a zrumele N’wanakwe wa ku zrandzreka, Yesu, a misaveni akuva a hi fela. (Yohan 3:16) Hi kola ka gandzrelo dzrakwe, hi ni dumbo dzra wumundzruku lebyi hlamalisaka.

⁵ Yehovha a simeke Mfumu wa Wumesiya, ku nga Mfumu wa le matilweni lowu taka helisa nhlomulo hinkwawu ku nga li khale. Mfumu lowo wu ta ndzruluta misava yi va paradeyisi, lani hinkwavu va taka hanya na va nyonxile a ku zruleni lokukulu. (Amapsalma 37:29) Ndlela yimbeni leyi Yehovha a hi kombisaka lizrandzru dzrakwe ha yone hi leswi a hi dondzrisaka mahanyela lamanene ngopfu. A tlhela a hi zramba leswaku hi khongota kwakwe nakone a tsrhama na a lulamele ku hi yingiseta. Handle ka ku ganaganeka, Yehovha a kombise lizrandzru dzrakwe ka mun’wana ni mun’wana wa hine.

6. Xana u nga swi kombisa kuyini leswaku lizrandzru dzra Yehovha dzri ku khumba mbilu?

⁶ Xana u nga swi kombisa kuyini leswaku lizrandzru dzra Yehovha dzri ku khumba mbilu? Mu kombe leswaku wa swi khensa hinkwaswu leswi a ku yentxelaka swone. Xa ku vavisa hi leswaku namunhla vanyingi a va tlangeli. Swi ve tanu ni loko Yesu a ve la misaveni. Khambi dzrimbeni, Yesu a dahe 10 wa vhanu lava a va ni nhlokonho, kambe e khensiwa hi mun’we ntsena. (Luka 17:12-17) Hi djula ku fana ni wanuna lwiyani a nga khensa Yesu. Nkama hinkwawu hi navela ku tlangela Yehovha.

7. Xana hi fanela ku mu zrandzrisa kuyini Yehovha?

⁷ Handle ka leswo, hi fanela ku kombisa leswaku ha mu  zrandzra Yehovha. Yesu a byele valandzreli vakwe leswaku va fanela ku zrandzra Yehovha hi mbilu yavu hinkwayu, ni hi hika dzravu hinkwadzru ni hi ku yanakanya kwavu hinkwaku. (Dondzra Mattheo 22:37.) Xana swi hlaya yini leswo?

8, 9. Hi nga mu kombisa kuyini Yehovha leswaku ha mu zrandzra?

⁸ Xana swa dzringana ku hlaya hi nomu ntsena leswaku ha mu zrandzra Yehovha? Im-him. Loko hi zrandzra Yehovha hi mbilu hinkwayu, hi hika hinkwadzru ni hi miyanakanyu hinkwayu, hi ta swi kombisa hi mintizro yezru. (Mattheo 7:16-20) Bibele dzri swi beka a livaleni leswaku loko hi zrandzra Xikwembu Nkulukumba, hi ta yingiseta swileleto swakwe. Xana swa kazrata? Im-him, ‘hikuva swileleto swakwe [Yehovha] a swi bindzri’.​—Dondzra 1 Yohan 5:3.

⁹ Ku yingiseta Yehovha swi yentxa wutomi byezru byi nyonxisa. (Ezaya 48:17, 18) I yini lexi taka hi pfuna ku tsrhama kusuhi na Yehovha? A hi voneni.

10. Ha yini u fanela ku tama u dondzra ha Yehovha?

¹⁰ Xana swi sukele kwini ku za u va munghanu wa Yehovha? Hi ku dondzra kwaku Bibele, u tive Yehovha ku yampswa u va u sungula wunghanu na yene. Wunghanu lebyi byi fana ni ndzrilo lowu djulaka ku tsrhama na wu hlanganyeteleliwa akuva wu tama wu pfuzra. Swanga hi leswi ndzrilo wu pfuzraka hi loko ku ni tihunyi, na wene swi djula u tama u dondzra ha Yehovha akuva u tiyisa wunghanu byaku na yene.​—Amaproverbia 2:1-5.

11. Xana tindondzro ta Bibele ti ta ku khumbisa kuyini?

¹¹ Loko u tama u dondzra Bibele, u ta kuma mintxhumu leyi khumbaka mbilu yaku hakunene. Vona ndlela leyi valandzreli vabidzri va Yesu va titwiki ha yone loko a va tlhamuxela wuprofeta bya Bibele. Va te: ‘Xana a timbilu tezru ifa ti nga pfuzri a ndzreni kwezru, loko a ha vulavula na hine a ndleleni, a hi pfuletelela matsralwa?’​—Luka 24:32.

12, 13. a) Ku nga ha yentxeka yini hi lizrandzru dzrezru ha Xikwembu Nkulukumba? b) Hi nga yentxa yini akuva lizrandzru dzrezru ha Yehovha dzri khanya?

 ¹² Ku fana ni ndlela leyi a valandzreli va Yesu va khumbekiki ha yone loko va twisisa Matsralwa, swi nga ha yentxeka swi ku khumbe hi ndlela leyi fanaka loko u sungule ku twisisa Bibele. Swi ku pfune ku tiva Yehovha ni ku tlhela u mu zrandzra. A wu swi naveli kuva lizrandzru ledzro dzri titimeta.​—Mattheo 24:12.

¹³ Loko kutani u li munghanu wa Xikwembu Nkulukumba, swi djula u tikazrata swi phela akuva u tiyisa wunghanu byenu. U fanela ku ya mahlweni u dondzra ha Yesu u tlhela u yanakanyisisa hi leswi u swi dondzraka, ni ndlela leyi u nga swi tizrisaka ha yone a wuton’wini byaku. (Yohan 17:3) Loko u dondzra Bibele u tlhela u gayela, tivutise leswi: ‘Xana leswi swi ni dondzrisa yini ha Yehovha? Ha yini ni fanela ku mu zrandzra hi mbilu yanga hinkwayu ni hi hika dzranga hinkwadzru?’​—1 Timoteo 4:15.

14. Xana a xikhongoto xi hi pfunisa kuyini ku tiyisa lizrandzru dzrezru ha Yehovha?

 ¹⁴ Loko u li ni munghanu lweyi u mu zrandzraka, u tsrhamela ku bula na yene mfuzri leswo swi tiyisa wunghanu byenu. Hi ku fanana, loko hi tsramela ku bula na Yehovha hi xikhongoto, swi kulisa lizrandzru ledzri hi dzri twaka ha yene. (Dondzra 1 Ba-le-Thesalonika 5:17.) Xikhongoto i nyiko ya ku hlamalisa leyi pfaka ka Tatana wezru wa le matilweni. Hi fanela ku tsrhamela ku bula na yene na swi sukela mbilwini. (Amapsalma 62:8) A hi fanelanga ku phindhetela swikhongoto swa ku swi tiva hi nhloko, kambe hi fanela ku hlaya leswi humaka mbilwini. Ina, loko hi tama hi dondzra Bibele hi tlhela hi khongota na swi sukela mbilwini, hi ta tiyisa lizrandzru dzrezru ha Yehovha.

15, 16. Xana u wu vonisa kuyini ntizro wa ku zrezra?

¹⁵ Loko hi djula ku tsrhama kusuhi na Yehovha, hi fanela ku tlhela hi byela vambeni mayelanu ni lipfumelo dzrezru. Ku byela vambeni ha Yehovha i ndjombo leyikulu. (Luka 1:74) Handle ka leswo, i wutiyanguleli lebyi Yesu a nyikiki vakriste hinkwavu va xihlayelamfuzri. Mun’wana ni mun’wana wa hine a fanela ku zrezra madzrungula lamanene ya Mfumu wa Xikwembu Nkulukumba. Xana u sungulile ku swi yentxa leswo?​—Mattheo 24:14; 28:19, 20.

¹⁶ Mupostola Pawulo a swi vonile leswaku ntizro wa ku zrezra a wu li wa lisima swinene lakakuva a wu vitane ‘nhlengwe’, kumbe wukosi. (2 Ba-le-Korinte 4:7) Ku byela vambeni ha Yehovha i ntxhumu wa lisima ngopfu ku tlula hinkwaswu. I ndlela ya kuva u tizrela Yehovha, mfuzri a swi tlangela ngopfu leswi u mu yentxelaka swone. (Ba-Heberu 6:10) Ku zrezra swi nga tlhela swi tisa mabindzru ka wene ni ka lava va ku yingisetaka. Ha yini? Hikusa a nkama u pfunaka vambeni ku tsrhindzrekela ka Yehovha ni ku kuma wutomi lebyi nga helikiki, na wene wo tipfuna ku yentxa tanu. (Dondzra  1 Ba-le-Korinte 15:58.) Xana ku ni ntizro lowu nga ku nyonxisaka ku tlula lowo?

17. Ha yini ntizro wa ku zrezra wu li wa xihatla?

¹⁷ Ntizro wa ku zrezra i wa xihatla swinene. Hi fanela ku “zrezra zritu” hi “xihatla”. (2 Timoteo 4:2, Tradução do Novo Mundo) Vhanu va fanela ku twa hi ta Mfumu wa Xikwembu Nkulukumba. Bibele dzri li: ‘A siku dzra Yehovha ledzrikulu dzri kusuhi, dzri kusuhi, dzri va dzri hangweyesa hi ku tlulisa.’ A wugamu ‘byi nga ka byi nga hlweli’. (Tsefaniya 1:14; Habakuk 2:3) Hakunene, ku nga li khale Yehovha a ta helisa misava leyi ya ku biha ya Sathana. Na leswo swi nga si na yentxeka, vhanu va fanela ku biwa ndleve akuva va hlawula ku tizrela Yehovha.

18. Ha yini hi fanela ku tipatsra ni vakriste vambeni va xihlayelamfuzri loko hi gandzrela Yehovha?

¹⁸ Yehovha a djula leswaku hi mu tizrela kun’we ni vakriste vambeni va xihlayelamfuzri. Bibele dzri li: ‘Hi va hi yanakanyana, hi susumetana a lizrandzrwini ni swiyentxweni leswinene; hi nga tsrhiki ku hlengeletana, swanga hi leswi van’wana va swi toloveliki, kambe hi khongotelana; ngopfu naswone hikuva n’wi vona leswaku a siku dzri tsrhindzrekela kusuhi.’ (Ba-Heberu 10:24, 25) Hi fanela ku yentxa hinkwaswu akuva hi nga lovhi ka ntlhanganu ni wun’we. Mintlhanganu yi hi nyika mukhandlu wa ku tiyisana hi tlhela hi kutxana.

19. I yini xi taka hi pfuna ku zrandzra vamakwezru lava nga vakriste?

¹⁹ Loko u hlalela mintlhanganu, u ta kuma vanghanu lavanene lava taka ku pfuna ku gandzrela Yehovha. U ta kuma vamakwezru va ku hambana-hambana lava tihitaka swinene akuva va tizrela Yehovha, ku fana na wene. Nakone, ku fana na wene, a va hetisekanga; va pfa va phazama. Loko va ku hoxela, va dzrivalele hi mbilu ya ku tlhantlheka. (Dondzra Ba-le-Kolosa 3:13.) Minkama hinkwayu vona leswinene ka vamakwezru lava nga vakriste hikusa leswo swi ta ku yentxa u va zrandzra u tlhela u va kusuhi swinene na Yehovha.

20, 21. Xana ke i yini ‘wutomi lebyi nga byone’?

²⁰ Yehovha a navelela vanghanu vakwe hinkwavu wutomi lebyinene ngopfu. Bibele dzri hi dondzrisa leswaku a nkameni lowu taka a wutomi byi ta va byi hambane ngopfu ni bya namunhla.

²¹ A nkameni lowu taka, hi ta hanya hi nga ha fi, ku nga li ntsena 70 kumbe 80 wa malembe. Swi ta hi nandzrikela ku hanya ‘wutomi lebyi nga helikikiki’ na hi nga vabyi nikutsrongo, nakone hi li ni ku zrula ni ku nyonxa a misaveni leyi nga paradeyisi. Leswo hi leswi Bibele dzri swi vitanaka ‘wutomi lebyi nga byone’. Yehovha a dumbisa ku hi nyika wutomi lebyi nga byone, kambe hi fanela ku yentxa hinkwaswu leswi hi nga swi kotaka swoswi akuva hi ‘tikhomela’ wutomi lebyo.​—1 Timoteo 6:12, 19.

22. a) Xana hi nga ‘tikhomela wutomi lebyi nga byone’ hi ndlela yini? b) Ha yini hi ku a hi nge byi xavi wutomi lebyi nga helikikiki?

²² Xana hi nga yentxa yini akuva hi ‘tikhomela wutomi lebyi nga byone’? Hi fanela ku ‘yentxa leswinene’ hi tlhela hi ‘yandzra hi mintizro leminene’. (1 Timoteo 6:18) Leswo swi tlhamuxela leswaku hi fanela ku tizrisa leswi hi swi dondzraka a Bibeleni. Nambitasu, a wutomi lebyi nga byone a hi byi kumi hi mintamu yezru. Hi nge ti za hi byi xavile. I nyiko ya mahala leyi Yehovha a yi nyikaka malandzra yakwe ya ku dumbeka, ku nga xikombiso xa ‘timpswalu’ takwe. (Ba-le-Roma 5:15) Tatana wezru wa le matilweni a swi djula hi mbilu hinkwayu ku hanana malandzra yakwe ya ku dumbeka a nyiko leyi.

23. Ha yini u fanela ku hlawula hi wutlhazri swoswi?

²³ Tivutise: ‘Xana ni gandzrela Xikwembu Nkulukumba hi ndlela leyi a yi yamukelaka?’ Loko u gungula leswaku u fanela ku txintxa xa kukazri, vhela u tekela ku txintxa. Loko hi dumba Yehovha hi tlhela hi yentxa leswi hi nga swi kotaka akuva hi mu yingiseta, Yehovha a ta va xisizrelelo xezru. A ta  sizrelela malandzra yakwe ya ku dumbeka a masikwini ya wugamu ya misava leyi bihiki ya Sathana. Ntsrhaku ka leswo Yehovha a ta hi nhingenisa a paradeyisini akuva hi hanya wutomi lebyi nga helikikiki hi lani a dumbisiki ha kone. I ntiyiso, u nga tikhomela wutomi lebyi nga byone loko u hlawula hi wutlhazri swoswi!