1, 2. E lingbi ti bata terê ti e na ndo wa laso?

TARA ti bâ so mo yeke tambela na gigi na mbeni lango so pupu ayeke sara ngangu. Lê ti nduzu ayeke vuko gï vukongo, wâ ti bekpa akomanse ti za nga ngu-nzapa akomanse ti sungba. Kete na pekoni ngu akomanse ti pika ngangu. Mo gi mbeni ndo ti honde terê ti mo dä. Bê ti mo ayeke dë tongana mo wara mbeni nzoni ndo so ngu apika mo dä ape.

² E yeke na yâ ti mara ti ye tongaso laso. Aye ti dunia so ayeke ga gï sioni sioni. Peut-être mo yeke hunda terê ti mo: ‘Ndo wa la mbi lingbi ti gue dä ti bata terê ti mbi?’ Mbeni wasungo psaume atene: “Mbi yeke tene na Jéhovah: ‘Mo yeke ndo ti batango terê ti mbi nga ngangu gbagba ti mbi, Nzapa ti mbi so mbi zia bê ti mbi na ndö ti mo.’” (Psaume 91:2). Jéhovah alingbi ti bata e na yâ ti dunia so asi singo na akpale laso, nga lo mû na e mbeni pendere beku ti kekereke.

3. Tongana nyen la e lingbi ti sara si Jéhovah aga ndo ti batango terê ti e?

³ Tongana nyen la Jéhovah alingbi ti bata e? Lo lingbi ti mû maboko na e na yâ ti akpale kue so e wara, nga lo yeke na ngangu mingi ahon azo kue so ayeke gi ti sara sioni na e. Même tongana mbeni ye ti sioni asi na e laso, e yeke na confiance so Jéhovah ayeke leke ande kpale ni mbeni lâ. Bible awa e, atene: “Ala ngbâ na yâ ti ndoye ti Nzapa.” (Jude 21). A lingbi e ngbâ nduru na Jéhovah ti tene lo mû maboko na e na yâ ti angoi ti ngangu. Me e lingbi ti sara ni tongana nyen?

4, 5. Tongana nyen la Jéhovah afa so lo ye e?

⁴ Ti ngbâ nduru na Jéhovah, a lingbi e hinga so lo ye e mingi. Gbu li ti mo na ndö ti aye kue so Jéhovah asara ndali ti e. Lo mû na e pendere sese so asi singo na apendere fleur na akeke nga na anyama. Lo mû nga na e anzerengo kobe ti tengo ni nga nzoni ngu ti nyongo ni. Jéhovah afa na e iri ti lo nga na apendere sarango ye ti lo na yâ ti Bible. Ahon ye kue, Jéhovah afa so lo ye e mingi na ngoi so lo tokua Jésus, Molenge ti lo so lo ye lo mingi, na sese ti mû fini ti lo ndali ti e (Jean 3:16). Ndali ti sacrifice so, e yeke na mbeni pendere beku ti kekereke.

⁵ Jéhovah aleke Royaume ti lo, mbeni gouvernement so ayeke na yayu, so Jésus la ayeke Gbia ni, so ayeke hunzi pasi kue fafadeso. Royaume ni ayeke sara ande si sese aga paradis, ndo so azo kue ayeke duti dä na siriri nga na ngia teti lakue lakue (Psaume 37:29). Mbeni ye so Jéhovah asara ti fa so lo ye e ayeke so lo fa na e tongana nyen ti duti nzoni na yâ ti gigi ti e laso. Lo hunda nga na e ti sambela lo, na lo yeke lakue nduru ti mä asambela ti e. Jéhovah afa polele so lo ye e oko oko kue.

6. Tongana nyen la mo lingbi ti fa so mo bâ ndoye ti Jéhovah na nene ni?

⁶ Tongana nyen la mo lingbi ti fa so mo bâ ndoye ti Jéhovah na nene ni? Fa na lo so mo kiri singila na lo mingi ndali ti aye kue so lo sara ndali ti mo. Mawa ni ayeke so, azo mingi ayeke kiri singila pëpe. A yeke nga lani tongaso na ngoi so Jésus ayeke na sese. Mbeni lâ, Jésus asava azo ti buruma bale-oko, me gï oko la akiri singila na lo (Luc 17:12-17). E ye ti sara ye tongana koli so akiri singila na Jésus so. E ye lakue ti kiri singila na Jéhovah.

7. Tongana nyen la e lingbi ti fa so e ye Jéhovah mingi?

⁷ A lingbi nga e fa so e ye Jéhovah. Jésus atene lani na  adisciple ti lo so a lingbi ala ndoye Jéhovah na bê ti ala kue, na âme ti ala kue nga na bibe ti ala kue. (Diko Matthieu 22:37.) Tënë so aye ti tene nyen?

8, 9. Tongana nyen la e lingbi ti fa na Jéhovah so e ye lo?

⁸ Tongana e tene gï na yanga so e ye Jéhovah alingbi awe? Ên-ën. Tongana e ye Jéhovah na bê ti e kue, na âme ti e kue nga na bibe ti e kue, e yeke fa na yâ ti asarango ye ti e so e ye lo (Matthieu 7:16-20). Bible afa polele so tongana e ye Nzapa, e yeke bata acommandement ti lo. A yeke ngangu ti sara ni? Ên-ën, ndali ti so “acommandement ti [Jéhovah] ayeke ye so ane pëpe”.—Diko 1 Jean 5:3.

⁹ Tongana e mä yanga ti Jéhovah, e yeke na ngia na yâ ti fini ti e (Ésaïe 48:17, 18). Me nyen la ayeke mû maboko na e ti ngbâ nduru na Jéhovah? Zia e bâ ni.

10. Ngbanga ti nyen a lingbi mo ngbâ ti manda ye na ndö ti Jéhovah?

¹⁰ Mo ga lani kamarade ti Jéhovah tongana nyen? Na lege ti mandango Bible, mo hinga Jéhovah nzoni mingi nga mo lë kpengba songo na lo. Songo so ayeke tongana wâ so mo ye ti tene angbâ ti za. Gï tongana ti so wâ abezoin keke ti wâ si angbâ ti za, mo bezoin ti ngbâ ti manda ye na ndö ti Jéhovah ti tene songo ti mo na lo angbâ ti kpengba.—aProverbe 2:1-5.

11. Afango ye ti Bible ayeke sara nyen na ndö ti mo?

¹¹ Tongana mo ngbâ ti manda Bible, mo yeke manda ande aye so andu bê ti mo mingi. Bâ tënë ti bê ti ambeni disciple ti Jésus use na ngoi so lo fa nda ti aprophétie ti Bible na ala. Ala tene: “Na ngoi so lo yeke sara fade tënë na e na lege, nga so lo yeke zi nda ti Mbeti ti Nzapa kue na e, tënë ni andu fade bê ti e mingi ape?”—Luc 24:32.

12, 13. (a) Ndoye ti e na mbage ti Nzapa alingbi ti ga tongana nyen? (b) Tongana nyen la e lingbi ti ngbâ ti ye Jéhovah?

 ¹² Legeoko tongana ti so afango ye ti Bible andu bê ti adisciple na ngoi so ala mä yâ ni, peut-être mo nga kue na ngoi so mo komanse ti mä lani yâ ti Bible, a ndu bê ti mo mingi. A mû maboko na mo ti hinga Jéhovah nga ti ye lo. Mo ye ti tene ndoye so adë pëpe.—Matthieu 24:12.

¹³ So mo ga kamarade ti Nzapa awe, a lingbi mo sara kue ti ngbâ ti kpengba songo ti mo na lo. A lingbi mo ngbâ ti manda ye na ndö ti lo nga na Jésus nga ti gbu li ti mo na ndö ti aye so mo yeke manda na ti bâ tongana nyen la mo lingbi ti sara ye alingbi na ni na yâ ti fini ti mo (Jean 17:3). Tongana mo yeke diko Bible wala mo yeke manda ni, hunda terê ti mo: ‘Nyen la ye so afa na mbi na ndö ti Jéhovah Nzapa? Ngbanga ti nyen a lingbi mbi ye lo na bê ti mbi kue nga na âme ti mbi kue?’—1 Timothée 4:15.

14. Tongana nyen la sambela ayeke mû maboko na e ti ngbâ ti ye Jéhovah mingi?

 ¹⁴ Tongana mo yeke na mbeni nzoni kamarade, mo yeke sara lisoro na lo lakue, na a yeke sara si songo ti mo na lo akpengba. Legeoko nga, tongana e sara tënë lakue na Jéhovah na yâ ti sambela, a yeke sara si e ye lo mingi. (Diko 1 aThessalonicien 5:17.) Sambela ayeke mbeni pendere matabisi so alondo na Babâ ti e ti yayu. A lingbi e sambela lo lakue na bê ti e kue (Psaume 62:8). A lingbi e manda asambela ti e mandango na li pëpe, me a lingbi atënë so e tene alondo na bê ti e. Tongana e ngbâ ti manda Bible nga ti sambela na bê ti e kue, e yeke ngbâ ti ye Jéhovah mingi.

15, 16. Mo bâ kua ti fango tënë tongana nyen?

¹⁵ Tongana e ye ti ngbâ nduru na Jéhovah, e bezoin nga ti sara tënë ti mabe ti e na azo. Ti sara tënë ti Jéhovah na azo ayeke mbeni pendere pasa mingi (Luc 1:74). A yeke nga mbeni kua so Jésus amû na atâ Chrétien kue. A lingbi e oko oko kue e fa nzoni tënë ti Royaume ti Nzapa. Mo komanse ti sara ni awe?—Matthieu 24:14; 28:19, 20.

¹⁶ Bazengele Paul abâ lani kua ti fango tënë na nene ni mingi; lo iri ni mbeni “mosoro”. (2 aCorinthien 4:7). Ti sara tënë ti Jéhovah nga na ye so lo leke ti sara na azo ayeke kua so ayeke kota mingi so mo lingbi ti sara. A yeke mbeni lege ti sara na Jéhovah, na lo bâ kua so mo yeke sara na nene ni mingi (aHébreu 6:10). Fango tënë alingbi nga ti ga na ye ti nzoni na mo nga na azo so amä mo, ndali ti so a mû maboko na mo nga na amba ti mo ti ga nduru na Jéhovah nga ti wara fini ti lakue lakue. (Diko 1 aCorinthien 15:58.) Mbeni kua so alingbi ti ga na mo ngia ahon so ayeke dä?

17. Ngbanga ti nyen la a lingbi a fa tënë hio?

 ¹⁷ Fango tënë ayeke kua so a lingbi a sara ni hio. A lingbi e “fa tënë ti Nzapa,” nga a lingbi e “ngbâ na ndö ni”. (2 Timothée 4:2). Azo ayeke na bezoin ti mä tënë ti Royaume ti Nzapa. Bible atene: “Kota lâ ti Jéhovah aga nduru! A yeke pusu nduru, na a yeke ga tâ gï hio hio!” Nda ni ayeke “si na retard ape!” (Sophonie 1:14; Habakuk 2:3). Jéhovah aga nduru awe ti futi sioni dunia ti Satan. Kozo si ye so asi, a lingbi a mû wango na azo tongaso si ala lingbi ti soro ti sara na Jéhovah.

18. Ngbanga ti nyen a lingbi e voro Jéhovah legeoko na amba ti e atâ Chrétien?

¹⁸ Jéhovah aye ti tene e voro lo legeoko na amba ti e atâ Chrétien. Bible atene: “Zia e bi lê na ndö ti mba ti pusu mba ti duti na ndoye na ti sara anzoni kusala, e zia pëpe lege ti guengo lakue na bungbi ti e, tongana ti so ambeni zo ayeke sara ka, me e wa terê na popo ti e nga e ngbâ ti sara ni mingi ahon ti kozo, so ala bâ lango ni ayeke pusu nduru.” (aHébreu 10:24, 25). A lingbi e sara ngangu ti gue na abungbi kue. Abungbi azi lege na e ti wa terê na popo ti e nga ti kpengba mba.

19. Nyen la alingbi ti mû maboko na e ti ye aita ti e ti bungbi?

¹⁹ Tongana mo gue na abungbi, mo yeke wara anzoni kamarade so ayeke mû maboko na mo ti voro Jéhovah. Mo yeke wara aita nde nde so ayeke sara ngangu tongana mo ti voro lo. Nga legeoko tongana mo, ala yeke mbilimbili-kue pëpe na ala yeke sara afaute. Tongana ala sara ni, duti nduru ti pardonné ala. (Diko aColossien 3:13.) Zia lê ti mo lakue gï na ndö ti anzoni sarango ye ti aita ti mo ti bungbi, ndali ti so sarango tongaso ayeke mû maboko na mo ti ye ala nga ti ga nduru mingi na Jéhovah.

20, 21. “Fini so ayeke tâ fini ni biani” aye ti tene nyen?

²⁰ Jéhovah aye ti tene gigi ti akamarade ti lo kue anzere na ala mingi. Bible afa na e so gigi ti e ti kekereke ayeke duti tâ nde mingi na ti laso.

²¹ Na yâ ti ngoi so ayeke ga, e yeke ngbâ na fini lakue lakue. E yeke ngbâ na fini gï ngu 70 wala 80 pëpe. E yeke wara “fini ti lakue lakue” na nzoni seni, na siriri nga na ngia na yâ ti mbeni pendere paradis. A yeke ye so Bible airi ni “fini so ayeke tâ fini ni biani.” Jéhovah amû zendo ti mû na e fini ni so, me a lingbi e sara ye kue so e lingbi ti sara laso ti “gbu” ni.—1 Timothée 6:12, 19.

22. (a) Tongana nyen la e lingbi ti “gbu fini so ayeke tâ fini ni biani”? (b) Ngbanga ti nyen la e lingbi lâ oko pëpe ti sara mbeni ye ti wara fini ti lakue lakue?

²² Tongana nyen la e lingbi ti “gbu fini so ayeke tâ fini ni biani”? A lingbi e “sara ye ti nzoni” nga e “sara anzoni kusala mingi”. (1 Timothée 6:18). So ti tene a lingbi e sara ye alingbi na ye so e manda na yâ ti Bible. Ye oko, na ngangu ti e wani e lingbi pëpe ti wara fini so ayeke tâ fini ni biani. E lingbi pëpe ti sara mbeni ye ti wara fini ti lakue lakue. A yeke matabisi so Jéhovah amû na awakua ti lo so ayeke be-ta-zo, a yeke mbeni ye so afa “kota nzobe” ti lo (aRomain 5:15). Babâ ti e ti yayu aye biani ti mû matabisi so na awakua ti lo so ayeke be-ta-zo.

23. Ngbanga ti nyen a lingbi mo mû anzoni desizion laso?

²³ Hunda terê ti mo: ‘Mbi yeke voro Nzapa tongana ti so lo ye?’ Tongana mo bâ so a lingbi mo sara ambeni changement, sara ni hio. Tongana e zia bê ti e na Jéhovah na e sara kue ti mä yanga ti lo, lo yeke ga ndo ti batango terê ti e. Lo yeke bata awakua ti lo so ayeke be-ta-zo na lâ ti nda ni ti sioni dunia ti Satan so si ye ti sioni asi na ala ape.  Jéhovah ayeke sara kue ti tene e duti na yâ ti Paradis teti lakue lakue gï tongana ti so lo mû zendo ni. Mo yeke wara fini so ayeke tâ fini ni biani tongana mo mû anzoni desizion laso.