1, 2. Ndi ye lwakiro lwirhu mw’ezi nsiku mbi?

ORHANYE obe oli walambagira omu njira, ecihusi cinene ciyishe. Ebitu bibe bîru. Obone emirazo, oyumve emikungulo n’enkuba nnene erhangire yarhoga. Olonze aha wayegema. Buzinda wanabona aha wayegema, wanayumva orhululire!

² Akasanzi rhulamiremwo ntyo kwo kayosire. Ebintu bigendekire byabiha ah’igulu. Nkabaga anacidose ntya: “Lero ngahi nakayakira!” Mukozi muguma wa Yehova ayandisîre ntya: “We lwakiro lwani, we ibuye ncifulikaho, we Nyamuzinda wani, we ncikubagira.” (Ennanga 91:2, NWT) Yehova anarhurhulirize n’okurhuha obulangalire bwinja bw’akasanzi kayisha.

3. Bici rhukwanine okujira lyo Yehova arhurhabala omu malibûko girhu?

³ Gurhi Yehova arhulangamwo? Anakarhurhabala omu mazibu girhu goshi. Ajira buhashe bunene kulusha abantu boshi bakalonza okurhujira kubi. Ciru rhwakagwarhwa n’obuhanya, rhugwerhe obulangalire oku Yehova ayish’irhuyukiza amalibûko girhu goshi. Ebibliya erhuhire omurhima oku rhubêre “omu buzigire bwa Nnamahanga.” (Yuda 21) Lyo Yehova arhurhabala omu malibûko girhu, rhushinganine rhubere bira bage. Gurhi rhwakabamwo bira ba Yehova?

4, 5. Gurhi Yehova arhuyerekamwo oku arhuzigira?

⁴ Lyo rhubera bira ba Yehova rhukwanine rhuhugûkwe oku aba arhuzigire bwenene. Rhurhanye oku byoshi Yehova arhujirîre. Arhuhîre igulu linja, alihîramw’ensimba n’emirhi minjinja. Arhuhîre ebiryo binunu n’amishi minja  ganacire. Arhubwizîre izino lyage n’amorhere gage minja kugerera Ebibliya. N’okubundi arhuyeresîre oku aba arhuzigîre erhi arhuma Omugala cusha lyo ahâna akalamo kage kabe ngombôlo yirhu. (Yowane 3:16) Kugerera eyo ngombôlo, rhugwerhe obulangalire bwinja bw’akasanzi kayisha.

⁵ Yehova ashimisîre Obwami, burhegesirwe na Masiya. Obola Bwami buli empingu bwayusa amalibûko goshi gali ah’igulu n’okulihindula libe paradizo. Omu Paradizo abantu boshi bayish’ilama ensiku zoshi; omu murhula n’omwishingo. (Ennanga 37:29) Yehova aba arhuzigire erhi arhuhugûlira gurhi rhwakajira lyo rhuba n’akalamo kinja. Arhuhire omurhima mpu rhukamushenga ngasi mango, anaba mubidu okurhuyumvirhiza. Yehova aba azigîre ngasi muguma wirhu.

6. Gurhi wakayerekanamwo oku oshagalukire obuzigîre Yehova akujirakwo?

⁶ Gurhi wakayerekanamwo oku oshagalukire obuzigîre Yehova akugwerhekwo? Oyerekane oku oshagalukire byoshi ali akujirira. Ene bantu banji ciru wakabajirira ebintu binja, barhavuga omunkwa. Ntyo kw’obyanâli omu kasanzi ka Yezu. Lusiku luguma Yezu afumya bashomyo 10, cikwone muguma yene mulibo wagalusîre ali muvuga omunkwa. (Luka 17:12-17) Nirhu rhwanasima rhube aka oyo mulume. Rhukwanine rhukavuga Yehova omunkwa okubyoshi arhujirira.

7. Gurhi rhwakayereka Yehova oku rhumuzigira bwenene?

⁷ Rhukwanine rhuyerekane oku rhuzigira Yehova. Yezu abwizîre abaganda bage gurhi bâl’ikwanine bazigîre Yehova, adêrha ntya: Ozigire Yehova Nyamuzinda wawe “n’omurhima gwawe gwoshi,” “n’obugumaguma bwawe boshi,” “n’obukengere bwawe boshi.” (Osome Mateyo 22:37, NWT) Okwo kw’okuderha gurhi?

8, 9. Gurhi rhwakayerekamwo Yehova oku rhumuzigire?

 ⁸ Ka kuli kwinja okuderha kwone omu kanwa okurhuzigire Yehova? Nanga. Erhi rhwakamuzigira “n’omurhima gwirhu goshi,” “n’obugumaguma bwirhu boshi,” “n’obukengere bwirhu boshi,” rhwanayerekana ntyo kugerera ebijiro birhu. (Mateyo 7:16-20) Ebibliya edesire n’obwalagale oku, erhi rhwakazigira Nnamahanga, rhukwanine rhukenge amarhegeko gage. Ka kuli kuzibu okukenga amarhegeko ga Nnamahanga? Nanga, bulya “amarhegeko gage garhaba mazirho.”​—Osome 1 Yowane 5:3.

⁹ Erhi rhwakarhumikira Yehova, rhwanaba n’obushagaluke omu kalamo kirhu. (Izaya 48:17, 18) Cikoki, bici byarhurhabala rhubere bira bage?

10. Bulya gurhi okwanine ogendekere wayîga binji kuli Yehova?

¹⁰ Ka wakakengera gurhi obwira bwawe haguma na Yehova bwarhangirâga? Omu kuciyigiriza Ebibliya, wamanyîre okuli okubiyerekire Yehova, n’obwira bwawe haguma naye bwarhondera bwaba buzibu. Obo bwira kwo buli nka muliro. Ly’omuliro gugendekera gwayâka, biba bihunyire ogendekere wahira kw’enshali. Okwo kukuyigirizize oku ly’obwira bwawe haguma na Yehova bugendekera bwaba buzibu, bihunyire ogendekere waciyigiriza binji okubiyerekire Nnamahanga ly’omumanya kulusha.​—Emigani 2:1-5.

11. Bunguke buci wakabanabo omu kuciyigiriza Ebibliya?

¹¹ Omu kugendekera waciyigiriza Ebibliya, wayîga bintu binji kuli Yehova, bintu byakuhuma okumurhima. Erhi Yezu aba ali ahugûlira baganda bage babirhi obulebi bw’omu Bibliya bwali muyerekire, baderha erhi: “Ewa! K’emirhima yirhu erhakag’iyâka ene akarhuganiza omu njira n’okurhuhugûlira Amandiko?”​—Luka 24:32, NWT. 

12, 13. (a) Erhi wakagendekera waciyigiriza Ebibliya n’obushiru, gurhi oko kwashumya obuzigire bwawe kuli Nnamahanga? (b) Bici rhushinganine okujira ly’obuzigire bwirhu kuli Nnamahanga bugendekera bwaba buzibu?

 ¹² Erhi abaganda ba Yezu bahugûkwa Amandiko, emirhima yabo yacishînga. Nawe, wacishinzîre erhi orhondêra wahugûkwa Ebibliya, wâba n’omwishingo guli nka gw’abo baganda ba Yezu. Oko kwakurhabâla wamânya n’okuzigîra Yehova. Orhayemeraga ciru kantu kaguma karhuma obwira bwawe haguma na Yehova bwarha erhi kunyiha.​—Mateyo 24:12.

¹³ Ly’obwira bwawe haguma na Nnamahanga bugendekera bwaba buzibu, bihunyire ocihangane bwenene. Ogendekere waciyigiriza binji kuli Yehova na Yezu. Orhanye gurhi wakakolesa ebi oli waciyigiriza omu kalamo kawe. (Yowane 17:3) Nkw’oli wasoma Ebibliya erhi oli waciyigirizayo, ocidose: “Bici ebi ndi n’asoma binyigirizize kuli Yehova? Mw’ogu mulongo nsomire, bici nyiziremwo byakanshumya  nzigîre Yehova n’omurhima gwani goshi n’obugumaguma bwani boshi?”​—1 Timoteyo 4:15.

14. Bulya gurhi isala lyanarhurhabala rhugendekere rhwazibuhya obwira bwirhu haguma na Yehova?

¹⁴ Erhi wakaba ogwerhe omwira ocikubagira, kwanaba kwinja okamuganiza ngasi mango. Eri njira nguma wakakolesa ly’obwira bwawe buba buzibu haguma naye. Na ntyo kw’obwira bwirhu haguma na Yehova bushinganine bube, rhukwanine rhukamuganiza kugerera isala ly’obwira bwirhu haguma naye buba buzibu. (Osome 1 Abatesalonika 5:17) Isala luba luhembo lwinja lurhenga emwa Larha oli omu mpingu. Rhushinganine okumuganiza kurhenga oku murhima. (Ennanga 62:8) Rhurhakwanini okugalukira amasala rhwabisîre omu bwenge bwirhu, cikoki, rhukarhanya kw’ebi rhuli rhwaderha. Ly’obuzigire bwirhu kuli Yehova bugendekera bwaba buzibu, rhukwanine okugendekera rhwayiga Ebibliya, n’okushenga kurhenga oku murhima.

15, 16. Gurhi obona omukolo gw’okuyalagaza emyanzi y’Obwami?

¹⁵ Lyo rhubera bira ba Yehova, rhukwanine rhukabwira abandi lugenda obuyemere bwirhu. Okubwira abandi lugenda Yehova, luli lukengwa lunene. (Luka 1:74) Liri irhegeko Yezu ahîre abakristu bw’okuli boshi. Rhukwanine okuyalagaza emyanzi minja y’Obwami bwa Nnamahanga. Ka nawe warhangîre okujira ntyo?​—Mateyo 24:14; 28:19, 20.

¹⁶ Entumwa Paolo yohe yakâg’ibona og’omukolo gw’okuyalagaza emyanzi minja y’Obwami, oku kali kantu kabulagirire. Adêrha oku “buli buhirhi.” (2 Abakorinti 4:7) Okubwira abandi okubiyerekire Yehova n’omuhigo gwage, gw’omukolo gw’obulagirire abakristu bw’okuli bakwanine okushokoza omu kalamo kabo. Eri njira y’okukolera Yehova. Yehova agendekire ashagalukira ngasi kantu oli wamujirira. (Abahabraniya 6:10) Ogo mukolo gw’okuyalagaza emyanzi y’Obwami guli gwabulagirire kandi kuli we, bulya  gwanakuyungula gunayungule abali bakuyumvirhiza. Erhi wakaba oli wayalagaza emyanzi y’Obwami, wanarhabala abandi bayegerere Yehova banabe n’obulangalire bw’obuzîne bw’ensiku n’amango. (Osome 1 Abakorinti 15:58) Ka hali ogundi mukolo gwakakushagalula nkw’ogo?

17. Bulya gurhi omukolo gw’okuyalagaza omwanzi gw’Obwami guli mukolo gwakujirwa duba-duba?

¹⁷ Okuyalagaza emyanzi y’Obwami, guli mukolo gwa kujirwa duba-duba. Rhushinganine ‘okuyigiriza oluderho [. . .] lwa Nnamahanga basime erhi barhasime.’ (2 Timoteyo 4:2) Bene bantu balagirire okuyumva omwanzi g’Obwami bwa Nnamahanga. Ebibliya edesire erhi: “Olusiku ludârhi lw’obukunizi bwa Yehova luli hofi, luyishire luli buhena.” Obuzinda “bwayisha ho n’aho buzira kulegama.” (Sofoniya 1:14; Habakuki 2:3, NWT) Hano hofi-hofi, Yehova ashereza igulu lya Shetani. Cikoki embere z’aho, bene bantu bashinganine okuhabwa oburhonde okubiyerekire ebyay’ishiba, lyo bacishoga okukolera Yehova.

18. Bulya gurhi kuli kwa bulagirire okukâja omu ntimanano haguma n’abirhu bakristu bw’okuli?

¹⁸ Yehova alonzize rhumuharamye haguma n’abirhu bakristu. Ebibliya edesire erhi: ‘Rhurhabalane rhwêne na rhwêne, rhunahânane omurhima omu buzigire n’omu kukola aminja. Rhurhalekaga okukâja haguma, kulya baguma badwirhe bakâjira; ci rhukahânana omurhima, na bwenene bulya mubwine oku olusiku luli hofi.’ (Abahabraniya 10:24, 25) Rhukwanine rhujire okwirhu koshi lyo rhukâja omu ntimanano zirhu zoshi. Zinarhuhashise okuhânana omurhima.

19. Bici byankarhurhabala rhugendekere rhwazigira bene wirhu na bali birhu?

¹⁹ Erhi wakakaja omu ntimanano z’ecikristu, wanacijirira abira bakakurhabala ogendekere waharamya Yehova. Omo wabugana bene winyu na bali binyu, nabo bali bajira okwabo koshi akawe lyo baharamya Nnamahanga. Cikoki okengere  oku nabo barhali bimana akawe, banajire nabo amagosa. Obe mubidu okubabalira. (Osome Abakolosi 3:13) Okasegerêza amorhere gabo minja. Oko kwanakurhabala ogendekere wabazigira onagendekere wayegerera Yehova.

20, 21. “Obuzîne b’okunali,” byo bici?

²⁰ Yehova alonzize abira bage babe n’akalamo kinja bwenene. Ebibliya eyigirizize oku, omu kasanzi kayisha, akalamo kirhu kayish’iba lubero n’aka rhulamire ene.

²¹ Rhurhakacilâma myaka 70 erhi 80 yone. Rhwayish’iba “n’akalamo k’ensiku n’amango.” Rhwanalâme omu murhula erhi rhunagwerhe amagala nkana omu Paradizo. Ebibliya ehamagire ako kalamo, “kalamo k’okunali.” Yehova arhulaganyize oku arhuha ako kalamo. Cikoki rhukwanine rhujire okwirhu koshi lyo “rhugwarha buzibuzibu” obo buzîne bw’ensiku n’amango kurhangira ene.​—1 Timoteyo 6:12, 19, NWT.

22. (a) Gurhi “wakagwarhamw’obuzîne b’okunali?” (b) Bulya gurhi erhali misi yirhu yo yakarhuha obuzîne bw’ensiku n’amango?

²² Gurhi “rhwakagwarhamwo obuzîne bw’okunali?” Rhushinganine “rhuhirhire omu bijiro binja” n’oku “kahâna n’omurhima mwinja.” (1 Timoteyo 6:18) Kuli kuderha oku rhukwanine rhulame ebi rhuli rhwayiga omu Bibliya. Cikoki, arhali misi yirhu yanarhuhîse oku buzîne b’okunali. Arhanali misi yirhu yo yarhuha obuzîne bw’ensiku n’amango. Luli luhembo lurhenga emwa Yehova, luba “lukogo lurhashinganinwi.” (Abaroma 5:15) Larha wirhu w’empingu alonzize ashoboze abakozi bage olo luhembo.

23. Bulya gurhi kuli kwabulagirire kurhangira ene okucihebera emihigo minja buzira kulegama?

²³ Ocidose ntya: “Kanamparamye Nnamahanga nk’oku alonzize?” Erhi akaba hali empindûlo wajira omu kalamo kawe, ozijire kurhangira ene. Erhi rhwakajira okwirhu koshi lyorhukenga Yehova n’erhi rhwakamulangalira, aba lwakiro  lwirhu. Agendekera alanga abakozi bage mw’er’igulu lya Shetani. N’aha buzinda, anarhugîshe rhulame omw’igulu Paradizo emyaka n’emyaka, nk’oku anâl’ilaganyize. Erhi wakacihebera emihigo minja kurhangira ene, wagwarha obuzîne b’okunali!