1, 2. Pe wi kan feni kibri na ini a ten disi?

KON meki wi taki dati yu e teki wan koiri wan dei. Ma aladi yu e waka, yu e si fa a loktu e kon dungru moro nanga moro. Faya e bigin koti na loktu, dondru e bari, dan wan hebi alen e fadon. Yu e suku wan presi fu go kibri. Te fu kaba yu e feni wan presi di drei èn yu breiti taki yu kan kibri drape.

² Na so wan sani e miti wi tu na ini a ten disi. A situwâsi na grontapu e kon ogri moro nanga moro. Kande yu e aksi yusrefi: ’Pe mi kan feni kibri?’ Na ini Bijbel skrifi: „Mi o taigi Yehovah: ’Yu na mi kibripe èn mi fortresi, mi Gado di mi o frutrow’” (Psalm 91:2). Iya, Yehovah man yepi wi nanga den problema fu wi, èn a e gi wi wan moi howpu gi a ten di e kon.

3. San wi musu du efu wi wani taki Yehovah kibri wi?

³ Fa Yehovah e kibri wi? A e yepi wi nanga iniwan problema di wi abi èn a tranga moro iniwan sma di wani pruberi fu du ogri nanga wi. Srefi efu wan ogri sani e miti wi, wi kan de seiker taki Yehovah o puru den takru bakapisi na ini a ten di e kon. Wi musu tan krosibei fu Yehovah efu wi wani taki a yepi wi na ini muilek ten. Bijbel e gi wi a deki-ati fu sorgu taki ’Gado tan lobi wi’ (Yudas 21). Ma fa wi kan du dati?

4, 5. Fa Yehovah sori taki a lobi wi?

⁴ Efu wi wani tan krosibei fu Yehovah, dan wi  musu prakseri o furu a lobi wi. Denki ala den sani di Yehovah du gi wi. A gi wi wan moi grontapu di lai nanga moi bon, bromki nanga meti. A gi wi switi nyanyan tu èn a gi wi krin watra fu dringi. Yehovah sorgu taki wi abi a Bijbel pe wi e kon sabi a nen fu en nanga den moi fasi fu en. Boiti dati, a sori taki a lobi wi di a seni en lobi Manpikin, Yesus, kon na grontapu fu dede gi wi (Yohanes 3:16). Na ofrandi disi e meki taki wi abi wan moi howpu gi a ten di e kon.

⁵ Yehovah sorgu tu gi a Mesias Kownukondre. Dati na a regering fu en di de na hemel, di o puru ala pina heri esi. A Kownukondre o meki grontapu tron wan paradijs pe ala sma o libi fu têgo na ini freide èn den o de koloku (Psalm 37:29). Wan tra fasi fa Yehovah sori taki a lobi wi, na taki a e leri wi san na a moro bun fasi fu libi now. A wani tu taki wi e taki nanga en na ini begi èn ala ten a de klariklari fu arki wi. Yehovah sori krin taki a lobi ibriwan fu wi.

6. San yu musu du fu di Yehovah lobi yu?

⁶ San yu musu du fu di Yehovah lobi yu? Sori en taki yu e warderi ala den sani di a du gi yu. A sari taki furu sma na ini a ten disi no de nanga tangi. Na so a ben de tu di Yesus ben de na grontapu. Wan leisi, Yesus dresi tin gwasiman, ma wán nomo taki en tangi (Lukas 17:12-17). Wi wani de leki a man di ben taki Yesus tangi. Ala ten wi wani sori warderi gi den sani di Yehovah du.

7. O furu lobi wi musu abi gi Yehovah?

⁷ Wi musu sori Yehovah tu taki wi lobi en. Yesus ben taigi den disipel fu en taki den musu lobi  Yehovah nanga den heri ati, den heri libi, èn nanga den heri frustan. (Leisi Mateyus 22:37.) San dati wani taki?

8, 9. Fa wi kan sori Yehovah taki wi lobi en?

⁸ Ma a nofo te wi e taki dati wi lobi Yehovah? Nôno. Efu wi lobi Yehovah nanga wi heri ati, wi heri libi, èn nanga wi heri frustan, dan wi o du sani fu sori dati (Mateyus 7:16-20). Bijbel e leri wi taki efu wi lobi Gado, wi o gi yesi na den wet fu en. A sani disi muilek fu du? Nôno, fu di „den komando fu [Yehovah] no de wan hebi”.—Leisi 1 Yohanes 5:3.

⁹ Te wi e gi yesi na Yehovah, dan wi o abi wan bun libi èn wi o de koloku (Yesaya 48:17, 18). Ma san o yepi wi fu tan krosibei fu Yehovah? Meki wi go luku.

10. Fu san ede yu musu tan leri fu Yehovah?

¹⁰ Fa yu tron wan mati fu Yehovah? Fu di yu studeri Bijbel yu kon leri sabi en moro bun èn yu tron wan mati fu en. Yu kan agersi a matifasi disi nanga wan faya di musu tan bron. Neleki fa a faya abi udu fanowdu fu man tan bron, na so wi musu tan leri fu Yehovah efu wi wani tan wan bun mati fu en.—Odo 2:1-5.

11. Sortu krakti den leri fu Bijbel o abi tapu yu?

¹¹ Te yu e tan studeri Bijbel, dan yu o leri sani di o naki yu ati. Luku fa tu fu den disipel fu Yesus ben e firi di a ben taki nanga den fu wan tu profeititori. Den taki: „Di a ben e taki nanga wi na pasi èn di a meki wi frustan finifini san skrifi na ini Gado Buku, dan dati ben naki wi ati trutru!”—Lukas 24:32.

12, 13. (a) San kan pasa nanga a lobi di wi abi gi Gado? (b) Fa wi kan tan lobi Yehovah?

 ¹² Kande yu ben firi a srefi fasi leki den disipel, di yu bigin frustan Bijbel. A sani disi yepi yu fu kon sabi Yehovah èn fu lobi en. No meki a lobi disi kon kowru.—Mateyus 24:12.

¹³ Te yu na wan mati fu Yehovah, dan yu musu tan meki muiti fu tan wan mati fu en. Yu musu tan leri fu Yehovah nanga Yesus. Yu musu denki fu den sani di yu e leri èn yu musu luku fa yu kan du den (Yohanes 17:3). Te yu e leisi èn studeri Bijbel, dan aksi yusrefi: ’San a pisi disi e leri mi fu Yehovah Gado? Fu san ede mi musu lobi en nanga mi heri ati èn mi heri libi?’—1 Timoteyus 4:15.

14. Fa begi e yepi wi fu tan lobi Yehovah?

 ¹⁴ Te yu abi wan bun mati, dan ala yuru yu e taki nanga en. A sani disi e meki taki wi e tan bun mati. Na so a de tu te wi abi a gwenti fu taki nanga Yehovah ini begi. Disi e meki taki a lobi di wi abi gi en e kon moro tranga. (Leisi 1 Tesalonikasma 5:17.) Begi na wan moi kado di wi hemel Papa gi wi. Ala ten den sani di wi e taigi en musu komoto fu wi ati (Psalm 62:8). Wi no musu leri den begi fu wi na ede, ma wi musu taki san wi e firi. Iya, efu wi e tan studeri Bijbel èn e begi komoto fu wi ati, dan wi o tan lobi Yehovah.

15, 16. Fa yu e denki fu a preikiwroko?

¹⁵ Efu wi wani tan krosibei fu Yehovah, dan wi musu taki nanga trawan fu a bribi fu wi. Disi na wan moi grani di wi abi èn na wan frantwortu di Yesus gi ala tru Kresten. Ibriwan fu wi musu preiki a bun nyunsu fu Gado Kownukondre. Yu e du disi kaba?—Mateyus 24:14; 28:19, 20.

¹⁶ Na apostel Paulus ben si a preikiwroko leki wan prenspari sani. A ben kari en wan „gudu” (2 Korentesma 4:7). A moro prenspari wroko di yu kan du na fu fruteri trawan fu Yehovah nanga den sani di a abi na prakseri. Disi na wan fasi fa yu kan dini Yehovah èn a e warderi a wroko san yu e du gi en (Hebrewsma 6:10). A preikiwroko e tyari wini kon tu gi yu nanga den sma di e arki yu. Yu e yepi den èn yu e yepi yusrefi fu kon krosibei na Yehovah èn fu kisi têgo libi. (Leisi 1 Korentesma 15:58.) Wan tra wroko de di kan gi yu so furu prisiri?

17. Fu san ede wi musu preiki fayafaya?

 ¹⁷ Wi no musu draidrai fu du a preikiwroko. Wi musu „preiki a wortu” èn wi musu du en „fayafaya” (2 Timoteyus 4:2). Den sma musu yere fu Gado Kownukondre. Bijbel e taki: „A bigi dei fu Yehovah de krosibei. A de krosibei èn a e hasti ensrefi trutru.” A kaba „no o kon lati” (Sefanya 1:14; Habakuk 2:3). Iya, heri esi Yehovah o pori na ogri grontapu fu Satan. Ma fosi dati pasa, wi musu warskow den sma so taki den kan bosroiti efu den wani dini Yehovah.

18. Fu san ede wi musu anbegi Yehovah makandra nanga tra tru Kresten?

¹⁸ Yehovah wani taki wi anbegi en makandra nanga tra tru Kresten. Bijbel e taki: „Meki wi poti prakseri na makandra tu, so taki wi kan gi makandra deki-ati fu abi lobi èn fu du bun wroko. Meki wi no misi konmakandra, soleki fa son sma gwenti du, ma gi makandra deki-ati o moro unu e si a dei e kon krosibei” (Hebrewsma 10:24, 25). Wi musu meki muiti fu de na ala den konmakandra. Te wi de drape dan wi abi na okasi fu gi makandra deki-ati èn fu tranga makandra.

19. San o yepi wi fu lobi den Kresten brada nanga sisa fu wi?

¹⁹ Te yu e go na den konmakandra, dan yu o feni bun mati di o yepi yu fu dini Yehovah. Yu o miti difrenti brada nanga sisa di e meki muiti fu dini Yehovah neleki yu. Den na sondusma èn den e meki fowtu neleki yu. Te den meki wan fowtu yu musu de klariklari fu gi den pardon. (Leisi Kolosesma 3:13.) Ala ten yu musu poti prakseri na den bun fasi fu den brada nanga sisa fu yu, fu di dati o yepi yu fu lobi den èn fu kon moro krosibei na Yehovah.

20, 21. San na „a trutru libi”?

²⁰ Yehovah wani taki ala den mati fu en abi a moro bun libi di de. Bijbel e leri wi taki a libi di wi o abi na ini a ten di e kon, o de heri tra fasi leki a libi di wi abi now.

²¹ Na ini a ten di e kon wi o libi fu têgo, wi no o libi 70 noso 80 yari nomo. Wi o prisiri fu libi fu têgo na ini a moi paradijs fu di wi no o siki, freide o de èn wi o de koloku. Dati na san Bijbel e kari „a trutru libi”. Yehovah e pramisi fu gi wi a libi disi, ma wi musu du ala san wi man fu ’grabu en hori bun steifi’.—1 Timoteyus 6:12, 19.

22. (a) Fa wi kan „grabu a trutru libi hori bun steifi”? (b) Fu san ede wi no man wroko fu kisi têgo libi?

²² Fa wi kan „grabu a trutru libi hori bun steifi”? Wi musu „du bun” (1 Timoteyus 6:18). Disi wani taki dati wi musu du den sani di wi e leri na ini Bijbel. Ma dati no wani taki dati Yehovah musu fu gi wi a trutru libi. Wi no man wroko fu kisi têgo libi. A libi disi na wan kado di Yehovah e gi den anbegiman fu en èn na wan fasi fa a e sori den „bun-ati” (Romesma 5:15). Wi hemel Papa e angri fu gi den anbegiman fu en di e gi yesi na en a kado disi.

23. Fu san ede yu musu teki bun bosroiti nownow?

²³ Aksi yusrefi: ’Mi e dini Gado na a fasi di en e feni bun?’ Efu yu e si taki yu musu kenki wan tu sani, dan yu musu du en wantewante. Te wi e du ala san wi man fu frutrow na tapu Yehovah èn wi e gi yesi na en, dan Yehovah o de wi kibripe. A o kibri en pipel na ini den lasti dei fu na ogri grontapu fu Satan. Baka  dati Yehovah o sorgu taki wi libi fu têgo na ini Paradijs, soleki fa a pramisi. Iya, yu kan kisi a trutru libi efu yu teki bun bosroiti nownow!