1, 2. Singasitfolaphi sivikelo lamuhla?

ASE uticabange uhamba endleleni, kuta litulu lelibi. Seligucubele, kumnyama, selicala kumanyata futsi lidvuma kamatima. Kutsi kusenjalo, libese liyayitsela. Uyacalata ufune indzawo yekubhaca. Cabanga nje kutsi ungajabula kangakanani ekugcineni nawutfola indzawo lephephile, lenganetsi!

² Natsi sisesimeni lesifanako namuhla. Bubi lobusemhlabeni sebandze kakhulu. Mhlawumbe uyatibuta, ‘Ngingasitfolaphi sivikelo?’ Umbhali weTihlabelelo watsi kuJehova: “Wena usiphephelo sami nenqaba yami, unguNkulunkulu wami lengetsembele kuye.” (Tihlabelelo 91:2) Jehova angaticedza tinkinga tetfu, futsi usetsembisa likusasa lelihle.

3. Singamenta njani Jehova abe siphephelo setfu?

³ Angasivikela njani Jehova? Angasisita silwisane nanoma ngabe nguyiphi inkinga lesihlangabetana nayo, futsi unemandla lamakhulu kunanobe ngubani longetama kusilimata. Asingabati kutsi ngisho noma sehlelwa tintfo letimbi lamuhla, Jehova utawulungisa wonkhe umonakalo esikhatsini lesitako. LiBhayibheli litsi: “Nitigcine elutsandvweni lwaNkulunkulu.” (Juda 21) Kudzingeka sihlale sisondzelene naJehova kute asisite etikhatsini letimatima. Singakwenta njani loko?

4, 5. Ukhombise njani Jehova kutsi uyasitsandza?

⁴ Lokutasisita sihlale sisondzelene naJehova kukhumbula kutsi usitsandza kangakanani. Ase ucabange ngato  tonkhe tintfo Jehova lasentele tona. Usiphe umhlaba lomuhle lawugcwalise ngetilwane letinhle kanye netihlahla. Uphindze asondle ngekudla lokumnandzi kanye nangemanti lahlobile lesiwanatsako. EBhayibhelini, Jehova usitjele ligama lakhe nebuntfu bakhe lobuhle. Ngetulu kwako konkhe, ukhombise kutsi uyasitsandza ngekutfumela Jesu iNdvodzana yakhe layitsandzako kutsi itosifela emhlabeni. (Johane 3:16) Loko ngiko lokusenta setsembe kutsi sitawuba nelikusasa lelihle.

⁵ Jehova usilungiselele uMbuso loholwa nguMesiya kute acedze konkhe kuhlupheka masinyane. Lohulumende losezulwini utawenta umhlaba ube lipharadisi, bese bantfu bahlalisana ngekuthula nenjabulo kuze kube phakadze. (Tihlabelelo 37:29) Lenye indlela Jehova lakhombisa ngayo kutsi uyasitsandza kusifundzisa indlela lencono kakhulu yekuphila. Uphindze asicele kutsi sikhulume naye ngemthantazo ngoba uhlale akulungele kuyilalela. Jehova ukubeke ebaleni kutsi usitsandza sonkhe.

6. Ungakhombisa njani kutsi nawe uyamtsandza Jehova?

⁶ Ungakhombisa njani kutsi nawe uyamtsandza Jehova? Mkhombise kutsi uyabonga ngato tonkhe tintfo lakwentele tona. Lokubuhlungu kutsi bantfu labanyenti lamuhla abakwenti loko. Kwakunjalo nangalesikhatsi Jesu asesemhlabeni. Ngalelinye lilanga, Jesu welapha emadvodza lalishumi labekanebulephelo, kodvwa yinye vo leyabonga. (Lukha 17:12-17) Sifuna kuyilingisa lendvodza, simbonge Jehova ngaso sonkhe sikhatsi.

7. Kufanele simtsandze kakhulu kangakanani Jehova?

⁷ Kudzingeka sikhombise kutsi siyamtsandza Jehova. Jesu watjela balandzeli bakhe kutsi kufanele bamtsandze Jehova ngenhlitiyo yabo yonkhe, nangemphefumulo wabo wonkhe, kanye nangengcondvo yabo yonkhe. (Fundza Matewu 22:37.) Kusho kutsini loko?

8, 9. Singakhombisa njani kutsi siyamtsandza Jehova?

 ⁸ Kwenele yini kumane nje sitsi siyamtsandza Jehova? Cha. Tento tetfu ngito letitawukhombisa kutsi Jehova simtsandza ngenhlitiyo yetfu yonkhe, umphefumulo, kanye nengcondvo yetfu. (Matewu 7:16-20) LiBhayibheli likwenta kucace kutsi nasitsandza Nkulunkulu sitawulalela imiyalo yakhe. Kulukhuni yini loko? Akulukhuni ngoba ‘imiyalo yakhe ayisiwo umtfwalo.’​—Fundza 1 Johane 5:3.

⁹ Nasilalela Jehova, siyajabula futsi senetiseke. (Isaya 48:17, 18) Kodvwa yini letasisita kutsi sihlale sisondzelene naJehova? Ase sibone.

10. Kungani kufanele uchubeke ufundza ngaJehova?

¹⁰ Wabakha njani bungani naJehova? Kudadisha liBhayibheli kukwente wamati kakhudlwana Jehova, futsi waba ngumngani wakhe. Lobungani benu bufana nemlilo lokufanele uchubeke uvutsa. Umlilo udzinga kukhwetelwa kute uchubeke uvutsa, ngako nawe kudzingeka ungayekeli kufundza ngaJehova nawufuna kuchubeka ungumngani wakhe.​—Taga 2:1-5.

11. Utawutiva njani ngalotakufundza eBhayibhelini?

¹¹ Nawuchubeka udadisha liBhayibheli, utawufundza ngetintfo letitayitsintsa mbamba inhlitiyo yakho. Sicela unake kutsi bafundzi baJesu lababili bativa njani ngalesikhatsi Jesu abachazela tiphrofetho letiseBhayibhelini. Batsi: “Angitsi sivele satsintseka tinhlitiyo ngesikhatsi akhuluma natsi endleleni, asichazela imiBhalo?”​—Lukha 24:32.

12, 13. (a) Kungentekani elutsandvweni lesinalo ngaNkulunkulu? (b) Yini lesingayenta kute sihlale simtsandza Jehova?

¹² Njengebafundzi baJesu labatsintseka tinhlitiyo ngesikhatsi bacondza imiBhalo, nawe kungenteka wativa  ngendlela lefanako ngalesikhatsi ucala kuvisisa lokushiwo liBhayibheli. Loku kukusite kutsi umati kahle Jehova futsi umtsandze. Ungaluvumeli lolutsandvo luphole.​—Matewu 24:12.

¹³ Nasewungumngani waJehova, kudzingeka usebente kamatima kute bungani benu bungapheli. Kufanele uchubeke ufundza ngaye nangaJesu futsi ucabangisise ngekutsi ungakusebentisa njani lokufundzako ekuphileni kwakho. (Johane 17:3) Nawufundza liBhayibheli noma ulidadisha, tibute: ‘Loku kungifundzisani ngaJehova? Kungani kufanele ngimtsandze ngenhlitiyo nangemphefumulo wami wonkhe?’​—1 Thimothi 4:15.

14. Umthantazo usisita njani kutsi sihlale simtsandza kakhulu Jehova?

¹⁴ Nawunemngani lokahle, nivame kucoca futsi loko kuyabucinisa bungani benu. Ngendlela lefanako,  kuchubeka sikhuluma naJehova ngemthantazo, kusenta simtsandze kakhulu. (Fundza 1 Thesalonika 5:17.) Umthantazo usipho lesiligugu lesisiphiwe nguBabe wetfu losezulwini. Njalo nasikhuluma naye kufanele simtjele lokusetinhlitiyweni tetfu. (Tihlabelelo 62:8) Akukafaneli simane nje siphindzaphindze umthantazo lesiwatiko kodvwa kufanele sisho tintfo lesiticabangisisile. Nasichubeka sidadisha liBhayibheli futsi sithantaza ngalokusuka etinhlitiyweni tetfu, kutsandza kwetfu Jehova kutawuchubeka kukhula.

15, 16. Uwutsatsa njani umsebenti wekushumayela?

¹⁵ Nasifuna kuchubeka sisondzelene naJehova kufanele sishumayele. Kukhuluma nebantfu ngaJehova kulilungelo lelihle kakhulu. (Lukha 1:74) Kungumsebenti Jesu lawuniketa onkhe emaKhristu eliciniso. Sonkhe kufanele sishumayele tindzaba letimnandzi teMbuso waNkulunkulu. Sewucalile yini wena kushumayela?​—Matewu 24:14; 28:19, 20.

¹⁶ Kushumayela bekumcoka kakhulu kumphostoli Pawula kangangekutsi waze watsi ‘kungumcebo.’ (2 Khorinte 4:7) Kucoca nalabanye ngaJehova kanye nangenjongo yakhe kungumsebenti lobaluleke kakhulu longawenta. Kuyindlela longakhonta ngayo Jehova futsi loko lomentela kona kuligugu kuye. (Hebheru 6:10) Kushumayela kungasita wena kanye nalabo labakulalelako, ngoba kunisondzeta kuJehova futsi kunganisita nitfole kuphila lokuphakadze. (Fundza 1 Khorinte 15:58.) Ukhona yini lomunye umsebenti longakwenetisa ngephandle kwekushumayela?

17. Yini leyenta umsebenti wekushumayela uphutfume kangaka?

¹⁷ Umsebenti wekushumayela uphutfuma kakhulu.  Kufanele ‘sishumayele livi, ngekutimisela.’ (2 Thimothi 4:2) Bantfu kudzingeka bati ngeMbuso waNkulunkulu. LiBhayibheli litsi: “Lilanga lelikhulu laSimakadze selisondzele, yebo, lisedvute, futsi lita ngekushesha,” ‘ngeke lephute.’ (Zefaniya 1:14; Habakhuki 2:3) Sekusele kancane kutsi Jehova abhubhise lelive lelibi laSathane. Ngaphambi kwekutsi lelive libhujiswe, bantfu kudzingeka bafundziswe kuze bakhone kukhetsa kukhonta Jehova.

18. Kubaluleke ngani kukhonta Jehova sinalamanye emaKhristu eliciniso?

¹⁸ Jehova ufuna simkhonte sikanye nemaKhristu eliciniso. LiBhayibheli litsi: “Asinakane, sisitane ngekukhutsatana elutsandvweni nasemisebentini lemihle. Singakuyekeli kuhlangana ndzawonye, njengobe labanye sebanemkhuba wekungahlangani; kodvwa asikhutsatane kakhulu, njengobe nani niyabona kutsi lilanga selisondzele.” (Hebheru 10:24, 25) Kufanele sente konkhe lokusemandleni etfu kute siye kuyo yonkhe imihlangano. Lemihlangano isiniketa litfuba lekukhutsatana siphindze sicinisane.

19. Yini lengasisita kutsi siwatsandze emaKhristu lesikanye nawo?

¹⁹ Nawuya kulemihlangano, utawutfola bangani labakahle labatakusita ekukhonteni Jehova. Utawuhlangana nebazalwane nabodzadze labehlukahlukene labatimisele njengawe kukhonta Jehova. Bayawenta emaphutsa ngoba banesono njengawe. Nakwenteka bakulimata kulungele kubacolela. (Fundza Kholose 3:13.) Timisele kunaka kakhulu buntfu babo lobuhle ngoba loko kutakusita kutsi ubatsandze futsi usondzele kakhulu kuJehova.

20, 21. Kuyini “kuphila lokungukonakona”?

²⁰ Jehova ubafunela lokuncono kakhulu bonkhe bangani  bakhe. LiBhayibheli lisifundzisa kutsi esikhatsini lesitako imphilo itawehluka ngalokuphelele kulena yalamuhla.

²¹ Esikhatsini lesitako ngeke siphile iminyaka lengu-70 noma lengu-80 nje kuphela. Kunaloko, sitawujabulela ‘kuphila phakadze’ emhlabeni lolipharadisi, siphile saka, sijabulile futsi sinekuthula. LiBhayibheli litsi loku “kuphila lokungukonakona.” Ngisho noma Jehova asetsembisa kusinika ‘lokuphila,’ kufanele nyalo sente konkhe lokusemandleni etfu ‘kute sikubambisise.’​—1 Thimothi 6:12, 19.

22. (a) Yini lesingayenta kute ‘sibambisise kuphila lokungukonakona’? (b) Sisho ngani kutsi kute lesingakwenta lokungasenta sifanelwe kuphila lokuphakadze?

²² Yini lesingayenta kute ‘sibambisise kuphila lokungukonakona’? Kufanele ‘sente lokuhle, sinjinge emisebentini lemihle.’ (1 Thimothi 6:18) Loku kusho kutsi kufanele sikusebentise lesikufundza eBhayibhelini. Noma kunjalo, kuphila lokungukonakona ngeke sikutfole ngemisebenti yetfu. Kute lesingakwenta lokungasenta sifanelwe kuphila lokuphakadze. Kusipho Jehova lasinika bantfu bakhe labetsembekile futsi loko kukhombisa ‘umusa’ wakhe lomkhulu. (Roma 5:15) Babe wetfu losezulwini utimisele kunika tinceku takhe letetsembekile lesipho.

23. Kubaluleke ngani kutsi ukhetse kahle kusengunyalo?

²³ Tibute, ‘Ngikhonta Nkulunkulu ngendlela layemukelako yini?’ Nawubona kutsi kusadzingeka ulungise, vele wente njalo ungaphotisi maseko. Jehova utawuba siphephelo setfu nasimetsemba ngenhlitiyo yetfu yonkhe futsi senta konkhe lokusemandleni etfu kute simlalele. Utawubavikela bantfu bakhe kulamalanga ekugcina alelive lelibi laSathane. Ngemuva kwaloko Jehova  utasigcina setsembiso sakhe sekutsi asente siphile phakadze epharadisi. Kuphila lokuphakadze ungakutfola kuphela nawukhetsa kahle kusengunyalo!