1, 2. Ohin loron, iha neʼebé mak ita bele hetan protesaun?

IMAJINA toʼok katak Ita laʼo daudauk iha dalan. Kalohan komesa sai nakukun, rai-lakan, rai-tarutu no anin makaʼas. Lakleur, udan boot. Ita buka fatin atu subar. Ita sente kmaan kuandu hetan fatin neʼebé seguru!

² Nuneʼe mós ho ohin loron, mundu nia situasaun sai aat ba beibeik. Karik Ita hanoin: ‘Iha neʼebé mak haʼu bele hetan protesaun?’ Maromak nia atan ida dehan: “Haʼu sei hatete ba Jeová: ‘Ita-Boot mak haʼu-nia fatin protesaun no haʼu-nia fatin seguru, haʼu-nia Maromak neʼebé haʼu tau fiar.’” (Salmo 91:2) Sin, Jeová bele fó kmaan mai ita kuandu ita hasoru problema, no nia mós fó esperansa furak kona-ba futuru.

3. Atu hetan protesaun husi Jeová, Ita presiza halo saida?

³ Jeová proteje ita iha dalan saida deʼit? Jeová bele ajuda ita atu tahan hasoru problema oioin, no nia iha forsa boot liu fali ema naran deʼit neʼebé halo aat mai ita. Maski buat aat bele akontese ba ita, maibé ita bele fiar katak Jeová sei hadiʼa situasaun aat hotu iha futuru. Bíblia anima ita hodi dehan: “Hela nafatin iha Maromak nia domin.” (Judas 21) Atu bele simu ajuda husi Maromak iha tempu susar, ita presiza kontinua hakbesik ba nia. Maibé oinsá mak ita bele halo nuneʼe?

4, 5. Iha dalan saida deʼit mak Jeová hatudu ninia domin mai ita?

⁴ Atu hakbesik ba Jeová, ita presiza rekoñese katak Jeová hadomi tebes ita. Hanoin didiʼak buat hotu  neʼebé Jeová halo ona mai ita. Nia fó mundu furak nuʼudar ita-nia hela-fatin, no halo nakonu ho animál no ai-horis oioin. Nia mós fó hahán neʼebé gostu no bee moos atu hemu. Liuhusi Bíblia, Jeová hanorin ita kona-ba ninia naran no ninia hahalok furak sira. Buat neʼebé importante liu mak nia hatudu ninia domin mai ita hodi haruka ninia Oan-Mane mesak Jesus mai mundu atu fó ninia moris ba ita. (João 3:16) No tanba Jesus nia sakrifísiu, ita iha esperansa furak kona-ba futuru.

⁵ Jeová harii ona Mesias nia Ukun, neʼe mak governu ida iha lalehan neʼebé lakleur tan sei halakon terus hotu. Ukun neʼe sei halo mundu sai paraízu, no ema hotu bele moris kontente ba nafatin ho dame. (Salmo 37:29) Jeová mós hatudu ninia domin hodi hanorin ita oinsá atu halaʼo moris iha dalan neʼebé diʼak liu. Nia mós konvida ita atu halo orasaun ba nia, no nia sempre prontu atu rona ita. Jeová hatudu ho klaru ninia domin ba ita hotu.

6. Oinsá mak Ita bele hatudu katak ita hafolin Jeová nia domin?

⁶ Oinsá mak Ita bele hatudu katak ita hafolin Jeová nia domin? Hatudu agradese ba buat hotu neʼebé Jeová halo ba Ita. Triste mak ohin loron ema barak la hatudu agradese, hanesan ho Jesus nia tempu. Loron ida, Jesus kura ema moras-lepra naʼin-sanulu, maibé ema ida deʼit mak fila fali atu fó agradese ba nia. (Lucas 17:12-17) Hanesan mane neʼe, ita mós sempre hakarak atu fó agradese ba Jeová.

7. Ita-nia domin ba Jeová tenkesér oinsá?

⁷ Ita mós presiza hatudu ita-nia domin ba Jeová. Jesus hatete ba ninia dixípulu sira katak sira tenke hadomi Jeová ho laran tomak, moris tomak no neon tomak. (Lee Mateus 22:37.) Neʼe katak sá?

8, 9. Oinsá mak ita bele hatudu sai ita-nia domin ba Jeová?

 ⁸ La toʼo atu hatete deʼit katak ita hadomi Jeová. Se ita hadomi Jeová ho ita-nia laran, moris no neon tomak, ita sei hatudu sai ida-neʼe liuhusi ita-nia hahalok. (Mateus 7:16-20) Bíblia hanorin katak se ita hadomi Maromak, ita sei halo tuir ninia ukun-fuan sira. Neʼe susar ka lae? Lae, tanba Bíblia hatete katak Jeová nia “ukun-fuan sira la susar liu atu kumpre”.​—Lee 1 João 5:3.

⁹ Kuandu ita halo tuir Jeová, ita-nia moris sei kontente liu no iha folin. (Isaias 48:17, 18) Maibé saida mak ajuda ita atu kontinua hakbesik ba Jeová? Mai ita haree hamutuk.

10. Tanbasá mak Ita presiza kontinua aprende kona-ba Jeová?

¹⁰ Saida mak ajuda ona Ita atu sai Jeová nia belun? Hodi estuda Bíblia, Ita hatene didiʼak Jeová no haburas ona relasaun diʼak ho nia. Relasaun diʼak neʼe mak hanesan ahi neʼebé Ita hakarak halo lakan nafatin. Atu ahi bele lakan nafatin, Ita presiza aumenta tan ai. Nuneʼe mós atu Ita-nia relasaun diʼak ho Jeová bele metin nafatin, Ita presiza kontinua aprende liután kona-ba nia.​—Provérbios 2:1-5.

11. Oinsá mak Bíblia nia hanorin book Ita?

¹¹ Se Ita kontinua estuda Bíblia, Ita sei aprende buat oioin neʼebé kona Ita-nia laran. Hanoin toʼok, Jesus nia dixípulu naʼin-rua sente oinsá bainhira Jesus esplika Bíblia nia profesia? Sira hatete: “Ita sente laran-manas tebes kuandu nia koʼalia ba ita iha dalan no esplika Eskritura sira ba ita ho klaru, loos ka lae?”​—Lucas 24:32.

12, 13. (a) Se la kuidadu, ita-nia domin ba Jeová bele sai oinsá? (b) Oinsá mak ita bele hametin ita-nia domin ba Jeová?

 ¹² Bainhira Jesus nia dixípulu sira komprende Eskritura sira, ida-neʼe kona duni sira-nia laran. Hanesan neʼe mós ho Ita, karik Ita sente laran-manas bainhira Ita komesa komprende Bíblia. Ida-neʼe ajuda Ita atu hatene liután Jeová no hadomi nia. Ita lakohi husik domin neʼe sai malirin.​—Mateus 24:12.

¹³ Kuandu Ita sai ona Maromak nia belun, Ita presiza hakaʼas an nafatin atu hametin Ita-nia relasaun ho nia. Ita presiza kontinua atu aprende kona-ba nia no Jesus, no Ita mós presiza hanoin kona-ba buat neʼebé Ita aprende daudauk no oinsá atu aplika iha Ita-nia moris. (João 17:3) Kuandu Ita lee ka estuda Bíblia, husu ba Ita-nia an: ‘Ida-neʼe hanorin saida kona-ba Jeová? Oinsá mak buat neʼebé haʼu foin aprende ajuda haʼu atu hadomi liután Jeová?’​—1 Timóteo 4:15.

14. Oinsá mak orasaun bele ajuda ita hametin ita-nia domin ba Jeová?

 ¹⁴ Kuandu Ita koʼalia beibeik ho Ita-nia belun neʼebé diʼak, ida-neʼe sei hametin liután Ita-nia relasaun ho nia. Nuneʼe mós kuandu ita koʼalia beibeik ba Jeová liuhusi orasaun, ita bele hametin ita-nia domin ba nia. (Lee 1 Tesalónika 5:17.) Orasaun mak prezente furak ida husi ita-nia Aman iha lalehan. Ita presiza iha toman atu koʼalia beibeik ho nia husi laran. (Salmo 62:8) Ita labele dekór orasaun no repete liafuan neʼebé hanesan, maibé ita presiza koʼalia husi laran. Sin, se ita kontinua estuda Bíblia no halo orasaun husi laran, ita bele hametin ita-nia domin ba Jeová.

15, 16. Ita hanoin oinsá kona-ba serbisu haklaken?

¹⁵ Se ita hakarak hakbesik nafatin ba Jeová, ita mós presiza fó sai ita-nia fiar ba ema seluk. Koʼalia kona-ba Jeová ba ema seluk mak priviléjiu furak ida. (Lucas 1:74) Neʼe mak knaar neʼebé Jesus fó ba ema Kristaun hotu. Ita ida-idak presiza haklaken liafuan diʼak kona-ba Maromak nia Ukun. Ita koko ona atu halo ida-neʼe ka lae?​—Mateus 24:14; 28:19, 20.

¹⁶ Apóstolu Paulo hafolin tebes serbisu haklaken no kompara neʼe ho “rikusoin”. (2 Korinto 4:7) Fó-hatene ema seluk kona-ba Jeová no ninia hakarak mak serbisu importante liu. Neʼe mak dalan ida atu serbí Jeová, no nia sei hafolin buat neʼebé Ita halo. (Ebreu 6:10) Serbisu haklaken mós bele lori benefísiu ba Ita no mós ba ema neʼebé rona, tanba Ita ajuda ema seluk no Ita-nia an rasik atu hakbesik ba Jeová no hetan moris rohan-laek. (Lee 1 Korinto 15:58.) Iha ka lae, serbisu seluk neʼebé bele halo Ita kontente liu fali serbisu ida-neʼe?

17. Tanbasá mak serbisu haklaken urjente?

 ¹⁷ Haklaken mak serbisu neʼebé urjente tebes. Ita tenke ‘haklaken Maromak nia liafuan ho urjente’. (2 Timóteo 4:2) Ema hotu presiza rona kona-ba Maromak nia Ukun. Bíblia hatete: “Jeová nia loron boot besik ona! Neʼe besik ona no sei mai lalais loos!” Mundu nia rohan “sei la tarde!” (Sofonias 1:14; Habakuk 2:3) Sin, lakleur tan, Jeová sei halakon Satanás nia mundu aat neʼe. Antes ida-neʼe akontese, ita tenke fó avizu ba ema hotu hodi nuneʼe sira bele hili atu serbí Jeová.

18. Tanbasá mak ita presiza adora Jeová hamutuk ho maluk Kristaun sira neʼebé loos?

¹⁸ Jeová hakarak ita atu adora nia hamutuk ho ema Kristaun sira seluk neʼebé loos. Bíblia hatete: “Mai ita hanoin malu hodi fó laran-manas ba malu atu hatudu domin no hahalok diʼak, no maski ema balu sai toman ona atu la halibur hamutuk, maibé imi keta haluha atu halibur hamutuk, no fó aten-brani ba malu, liuliu bainhira imi haree loron neʼe besik daudaun ona.” (Ebreu 10:24, 25) Ita presiza hakaʼas an atu tuir reuniaun hotu. Reuniaun sira fó oportunidade ba ita atu fó laran-manas no hametin malu.

19. Saida mak bele ajuda ita atu hadomi ita-nia maluk Kristaun?

¹⁹ Bainhira Ita tuir reuniaun, Ita sei hetan belun diʼak neʼebé ajuda Ita atu adora Jeová. Ita sei koñese irmaun-irmán oioin neʼebé hakaʼas an atu adora Jeová, hanesan Ita. Maibé sira mós sala-naʼin no iha fraku oioin hanesan Ita. Tan neʼe, kuandu sira halo sala ruma, sai prontu atu fó perdua ba sira. (Lee Koloso 3:13.) Hanoin deʼit kona-ba Ita-nia maluk Kristaun nia hahalok diʼak, tanba ida-neʼe bele ajuda ita atu hadomi sira no hakbesik liután ba Jeová.

20, 21. “Moris neʼebé loloos” mak saida?

²⁰ Jeová hakarak ninia belun hotu atu moris kontente. Bíblia hanorin katak ita-nia moris iha futuru sei la hanesan ho ita-nia moris ohin loron.

²¹ Iha futuru, ita sei moris ba nafatin, laʼós deʼit ba tinan 70 ka 80. Ita sei iha “moris rohan-laek” ho saúde neʼebé perfeitu, dame no haksolok iha paraízu neʼebé furak. Neʼe mak buat neʼebé Bíblia bolu “moris neʼebé loloos”. Jeová promete atu fó moris neʼebé loloos ba ita, maibé ita tenke hakaʼas an atu “kaer metin” ba ida-neʼe.​—1 Timóteo 6:12, 19.

22. (a) Oinsá mak ita bele “kaer metin ba moris neʼebé loloos”? (b) Tanbasá mak ita labele hetan moris neʼebé loloos ho ita rasik nia hakaʼas an?

²² Oinsá mak ita bele “kaer metin ba moris neʼebé loloos”? Ita tenke “sai riku ho hahalok diʼak”. (1 Timóteo 6:18) Neʼe katak ita presiza halo tuir buat neʼebé ita aprende husi Bíblia. Maibé ita labele hetan moris neʼebé loloos ho ita rasik nia hakaʼas an. Moris rohan-laek mak prezente neʼebé Jeová fó ba ninia atan sira neʼebé laran-metin ba nia, no ida-neʼe hatudu sai Jeová nia “laran-diʼak neʼebé boot”. (Roma 5:15) Ita-nia Aman iha lalehan hakarak tebes atu fó prezente neʼe ba ninia atan sira neʼebé laran-metin.

23. Tanbasá mak Ita tenke halo desizaun agora kedas?

²³ Husu ba Ita-nia an: ‘Haʼu adora Maromak tuir dalan neʼebé nia simu ka lae?’ Se Ita rekoñese katak Ita presiza halo mudansa balu, Ita tenke halo kedas. Kuandu ita sadere ba Jeová no halo buat hotu atu halo tuir nia, nia sei sai ita-nia fatin protesaun. Durante loron ikus sira iha Satanás nia mundu aat neʼe, Jeová sei proteje ninia  atan sira neʼebé laran-metin. Tuirmai, Jeová sei lori ita ba Paraízu no halo ita moris ba nafatin hodi kumpre ninia promesa. Sin, Ita bele haksolok ho moris neʼebé loloos se Ita halo desizaun neʼebé loos agora kedas!