1, 2. Aia ty ahatreavantikagne fiarovagne?

ERETSERETO tihoe mandeha mitsangatsangagne amy ty andro mitiobey rehe. Maiegne i lagnitsey, magnelatse naho mangotroke i androy. Niavy ka i oragney naho fa niavy eo. Mipay toeragne rehe hitampina’o. Hanao akore rehe naho fa mahatrea toeragne azo antoke sady fonitse!

² Mitovy amy izay ty raha misy amy izao. Miharaty ty tontolo toy. Va’e hieretseretse rehe tie: ‘Aia ty hahatreavako fiarovagne?’ Hoe ty mpanoratse salamo: “Hirehake amy i Jehovah raho tie: ‘Fitampinako rehe, vaho fiarovagne mafe ho ahy, sady Andrianagnahareko hatokisako.’ ” (Salamo 91:2) Afake miaro antikagne amy ty olagne mahazo antikagne ty Jehovah sady magnomey fampitamagne fanjaka amy ty hoavy.

3. Akore ty hahazoantikagne ty fiarova i Jehovah?

³ Akore ty fomba iarova i Jehovah antikagne? Afake magnampe antikagne hiatreke ze olagne mahazo antikagne reke, sady mahery mihoatse ze ndaty va’e te hagnisy raty antikagne. Matoky tikagne fa hagnaregne ze raha raty manjò antikagne ty Jehovah amy ty hoavy. Mandrisike antika ty Baiboly tie: “Ko misintake amy ty hatean’Andrianagnahare.” (Joda 21) Mba hahazoagne ty fagnampea i Jehovah, le toko’e hifandrambe ama’e tikagne. Faie akore ty fomba hanoantikagne izay?

4, 5. Akore ty nanoroa i Jehovah ty hatea’e antikagne?

⁴ Mba hiharineagne i Jehovah, le toko’e ho fantantikagne fa teà’e tikagne. Eretsereto iaby ze raha natao  i Jehovah ho antikagne. Nimei’e antikagne ty tane toy, le fineno’e raha mitiry naho biby soasoa. Nimea’e hanegne naho rano malio ka tikagne. Nampianare i Jehovah antikagne agnate ty Baiboly ao ty tahina’e naho ty toetoe’e fanjaka. Tsy vita izay, fa ty nagniraha i Jehovah i Ana’ey ho an-tane etoy mba hagnomey ty ai’e ho antikagne ty magnamaregne fa teà’e vata’e tikagne. (Jaona 3:16) Ty sorogne natao i Jesosy ty mahavy antikagne hanan-draha tamaegne fanjaka amy ty hoavy.

⁵ Nagnomey toky antikagne ty Jehovah tie fa marine hamaragne o fijaleagneo ty Fanjakà i Mesia. Hagnova ty tane toy ho paradisa i Fanjakagney, le ho sambatse naho hiadagne nainai’e ze ndaty hitoboke ao. (Salamo 37:29) Misy fomba hafa ka anoroa i Jehovah ty hatea’e antikagne. Ampianare’e ty fomba hanagnagne fiaignagne soa tikagne. Manasa antikagne hivavake ama’e ty Jehovah, sady vogno’e lognandro hijanjigne ty vavake ataontikagne. Abaribary i Jehovah antikagne tsikiraidraike ty hatea’e.

6. Akore ty havalentikagne ty hatea i Jehovah?

⁶ Akore ty havalentikagne ty hatea i Jehovah? Atorò fa isaora’o ze raha natao’e ho azo. Mampanahelo fa maro ty ndaty tsy mahay misaotse amy izao. Maregne zay naho henteagne ty raha nisy tamy ty Jesosy tan-tane etoy. Nisy fotoagne, nagnasitragne boka folo ty Jesosy faie raike avao ty nisaotse aze. (Lioka 17:12-17) Ohatse soa ho antikagne i lahilahy nahay nisaotsey. Teàntikagne ka ty hisaotse i Jehovah lognandro.

7. Akore ty toko’e hiteàvantikagne i Jehovah?

⁷ Toko’e hanoro ty hateantikagne i Jehovah ka tikagne. Nirehake tamy i mpiana’e rey ty Jesosy fa tsy maintsy tea i Jehovah amy ty fo’e naho amy ty fiai’e vaho  amy ty sai’e iareo. (Vakio Matio 22:37.) Inogne ty dika izay?

8, 9. Akore ty anoroantika fa teàntikagne ty Jehovah?

⁸ Ampe vao ty mirehake fa teàntikagne ty Jehovah? Aha’a. Toko’e ho trea amy ty ataontikagne, fa teàntikagne amy ty fontikagne naho amy ty fiaintikagne vaho amy ty saintikagne ty Jehovah,. (Matio 7:16-20) Ampianare ty Baiboly fa toko’e hagnorike ty lily i Jehovah tikagne, naho tea aze. Tsy sarotse ty fanoagne izay, fa “tsy mavesatse ty lili’e.”—Vakio 1 Jaona 5:3.

⁹ Ho sambatse naho ho afa-po amy ty fiaignagne tikagne naho magnorike ty saontsy i Jehovah. (Isaia 48:17, 18) Faie inogne ty hagnampe antikagne hifandrambe soa ama’e? Andao hohenteantikagne zay.

10. Nagnino ro toko’e ho tohiza’o ty fianaragne miomba i Jehovah?

¹⁰ Akore ty nahavy azo ho ragne i Jehovah? Nampitombo ty fahafantara’o i Jehovah sady nahavy azo ho ragne’e ty fianara’o Baiboly. Mitovy amy ty afo teàgne hirehetse avao ty firagneta’o amy i Jehovah. Toko’e hisiagne hatae avao ty afo naho teàgne hirehetse. Mitovy amy izay ka, fa toko’e hianatse miomba i Jehovah lognandro rehe, soa tie hihamafe ty firagneta’areo.—Ohabolana 2:1-5.

11. Ino ty voka ty raha ampianare ty Baiboly amy ty fiaigna’o?

¹¹ Naho manohy mianatse Baiboly rehe, le maro ty raha hanohigne ty fo’o ao. Mareho ty raha nanohigne ty fo i mpiana i Jesosy roe rey naho fa nagnazava ty faminaniagne agnate Baiboly ao ty Jesosy. Nirehake iareo tie: “Tsy hoe nisy afo nirebareba hao ty fontikagne tamy ie nirehake tamantikagne tan-dalagneỳ, naho tamy ie nagnazava soa tamantikagne ty Soratse Masigney?”—Lioka 24:32.

12, 13. a) Va’e hanao akore ty hateantika i Jehovah? b) Akore ty hagnamefasagne ty hateantika i Jehovah?

 ¹² Tohigne ty fo i mpianatse rey naho fa nahafantatse ty raha ampianare ty Soratse Masigne. Mitovy amy izay ka, fa naho fa nanomboke nahazo ty raha rehafe ty Baiboly rehe, le nitohigne ty fo’o. Izay ty nagnampe azo hahafantatse i Jehovah naho ho tea aze. Tsy teà’o hihamanintsigne ty hateà’o aze.—Matio 24:12.

¹³ Nanomboke tamy ty niragneta’o i Jehovah, le nikezake mafe rehe mba hagnamafe ty firagneta’areo. Tsy maintsy manohy mianatse miomba i Jehovah naho i Jesosy rehe. Eretsereto ze raha ianara’o sady ampiharo amy ty fiaigna’o. (Jaona 17:3) Naho fa mamaky ndra mianatse Baiboly rehe, le eretsereto tie: ‘Inogne ty ianarako miomba i Jehovah? Nagnino raho ro toko’e ho tea aze amy ty foko naho amy ty fiaiko?’—1 Timoty 4:15.

14. Nagnino ty vavake ro magnamafe ty hateantika i Jehovah?

 ¹⁴ Naho teà’o hihamafe ty firagneta’o amy ty ragne’o, le toko’e hifampirehake tsy tapake nareo. Mitovy amy izay avao ka, fa naho mirehake amy i Jehovah tsy tapake tikagne, le hihamafe ty hateantikagne aze. (Vakio 1 Tesalonianina 5:17.) Fagnomezagne fanjaka boake amy i Raentikagne an-dagnitse agney ty vavake. Toko’e ho avy am-po ty raha rehafentikagne ama’e. (Salamo 62:8) Tsy toko’e hagnerekeregne raha raike avao tika naho fa mivavake, fa toko’e hisy heve’e ty raha rehafentikagne. Hihamafe ty hateantika i Jehovah, naho manohy mianatse Baiboly sady mivavake avy am-po tikagne.

15, 16. Akore ty fahatreava’o ty asa fitoriagne?

¹⁵ Toko’e hirehake ty raha inoantika amy ty hafa tikagne naho te hiharine i Jehovah. Tombotsoa ho antikagne ty mirehake miomba i Jehovah amy ty hafa. (Lioka 1:74) Izay ty andraikitse nimey i Jesosy ty Kirisitianagne maregne. Toko’e hagnambara ty talily soa i Fanjakàn’Andrianagnaharey tikagne. Fa nanao izay vao rehe?—Matio 24:14; 28:19, 20.

¹⁶ Nahatsapa ty apositoly Paoly fa sarobily ty asa fitoriagne, le nampitovize’e amy ty “fanagnagne.” (2 Korintianina 4:7) Ty mirehake miomba i Jehovah naho ty fikasa’e amy ty hafa ro asa lahibey azo’o atao. Ty raha ataontikagne ty ahatreavagne tie sarobily amantikagne ty manompo i Jehovah. (Hebreo 6:10) Magnampe azo naho i ndaty mitsanogne azoy ty asa fitoriagne. Ty anto’e, io ty fomba hagnampea’o ty vata’o naho ty hafa hagnarine i Jehovah naho hahazo i havelogne nainai’ey. (Vakio 1 Korintianina 15:58.) Misy asa hafa nahafa-po azo ankoatse ty fitoriagne vao?

17. Nagnino ty asa fitoriagne ro meke?

 ¹⁷ Meke vata’e ty asa fitoriagne. Toko’e ‘hagnambara’ tikagne sady ‘tsy toko’e hangatake andro’ naho fa manao izay. (2 Timoty 4:2) Mila maharey ty miomba i Fanjakàn’Andrianagnaharey o ndatio. Hoe ty Baiboly: “Marine ty andro lahibey i Jehovah. Fa marine o andro iohoe sady lomay miharine mbetoa. Inay ty andro i Jehovah! Andro mafaitse naho mampikolalaike ty lahilahy mahery.” “Tsy halaogne” ty hahavia ty fara’e. (Zefania 1:14; Habakoka 2:3) Tsy ho ela ty Jehovah, le handrava ty tontolo i Satana toy. Aloha ty hisehoa izay, le mila mampitao o ndatio tikagne kera mba hanompo i Jehovah iareo.

18. Nagnino tikagne ro toko’e hanompo i Jehovah miharo amy ty Kirisitianagne maregne?

¹⁸ Teà i Jehovah hanompo aze miharo amy ty Kirisitianagne maregne tikagne. Hoe ty Baiboly: “Andao tika hifampihevetse mba hifandrisike ho amy ty hatea naho ty asa soa, le tsy hahafoe ty fiharoantikagne mivory, manahake ty ila’e fa zatse tsy mivory, fa hifampahery, lohotsie fa trea’areo tie mihamarine i andro zay.” (Hebreo 10:24, 25) Toko’e hanao ze fara herintika mba hagnatrehagne fivoriagne tikagne. O fivoriagneo ro mahavy antikagne ho fale naho hampahery ty hafa.

19. Inogne ty hagnampe antika ho tea ty mpiharo manompo amantikagne?

¹⁹ Hahatrea ragnetse soa hagnampe azo hanompo i Jehovah rehe naho fa magnatreke fivoriagne. Hifankatrea amy ty rahalahy naho ty rahavave manao ze fara heri’e mba hanompoagne i Jehovah rehe naho fa mivory. Tsy voririke iareo, le manao hadisoagne manahake azo avao ka. Faie mivognona hamela heloke rehe naho miseho zay. (Vakio Kolosianina 3:13.) Ty toetse soa anagna iareo ro henteo, fa izay ty hagnampe azo tsy halaigne ireo naho hiharine i Jehovah.

20, 21. Inogne ty atao tihoe “havelogne vata’e”?

²⁰ Teà i Jehovah hanagne fiaignagne soa ty mpanompo’e. Ampianare ty Baiboly fa tsy mitovy amy ty fiaignagne amy izao ty ho fiaignantikagne amy ty hoavy.

²¹ Ho velogne nainai’e tikagne amy ty hoavy, fa tsy ho velogne 70 ndra 80 taogne avao. Hahatrea ty tsiro’e amy ty “fiaignagne nainai’e”, ho salama soa, vaho hiadagne tikagne amy i paradisay ao. Izay ty mahavy ty Baiboly hirehake aze tihoe “havelogne vata’e.” Mampitamà ty Jehovah fa hagnomey havelogne vata’e, faie tsy maintsy manao ze azontika atao tikagne mba “hitagne” mafe aze.—1 Timoty 6:12, 19.

22. a) Inogne ty hagnampe antikagne “hitagne mafe i havelogne vata’ey”? b) Miankigne amy ty herintika vao ty hahazoantika i havelogne nainai’ey?

²² Ino ty hagnampe antika “hitagne mafe i havelogne vata’ey”? Tsy maintsy “hanao soa” naho “ho mpagnarivo amy ty asa soa” tika. (1 Timoty 6:18) Ty dika izay, toko’e hagnorike ze raha ianaragne agnate Baiboly ao tika. Faie, tsy miankigne amy ty hery anagnantikagne ndra ty raha vitantikagne ty hahazoagne i havelogne nainai’ey. Fagnomezagne boake amy i Jehovah hoahy ty mpanompo’e tsy mivalike i havelogne nainai’ey sady porofo ty ‘hasoa fagnahy tsy misy hoe’e’ anagna’e. (Romanina 5:15) Teà i Raentikagne an-dagnitse agney ty hagnomey izay hoahy ty mpanompo’e tsy mivalike.

23. Nagnino rehe ro toko’e hanao ty maregne?

²³ Dineho tie: ‘Manompo i Jehovah amy ze fomba iteà’e aze vao raho?’ Le avy le ovao naho fa misy raha trea’o fa toko’e hovagne amy ty fiaigna’o. Toko’e hagnorike sady hatoky i Jehovah tikagne naho fa misy raha ataontikagne, fa miaro antikagne reke. Hiaro ty mpanompo’e tsy mivalike ty Jehovah agnate ty fara ty tontolo  i Satana toy. Teà i Jehovah hiaigne amy i Paradisay ao tikagne, fa izay ty nampitamae’e. Hahazo i havelogne vata’ey rehe naho mahay misafily manomboke amy izao!