1, 2. Nkookuli nkutukonzya kujana lukwabililo mazuba aano?

YEEYA kuliikweenda munzila kakuliiguwo pati loko liyoosya. Kujulu kwasiya, kuliikumweka tulabi, alimwi yatanguna kungunduma. Mpawo mvula yatanguna kuwa. Wayanduula ndawu yakuyusa. Umvwa kabotu biyeni kuti wajana ndawu njumu ilikabotu yakuyubila mvula!

² Tuli muchimo chikozyene mazubaano. Zyiimo zyanyika ziliikwiindilila kubija. Ulakonzya kuyeya kuti, ‘Nga ndilalujana kuli lukwabililo?’ MuBbayibbele sintembauzyo wakalemba kuti: “Ndaamba aa-Jehova kuti: ‘Macijilo aangu, ndimpangala lyangu, ngu-Leza wangu ngonsyoma.’” (Intembauzyo 91:2) Nichoonzyo Jehova ulakonzya kutupa machijilo kumapenzi ngitulaawo lino, alimwi utupa bulangilizi bubotu bwakunembo.

3. Ngatulachita biyeni kuti Jehova abe machijilo eesu?

³ Kujana Jehova watukwabilila biyeni? Ulakonzya kutugwasya kutegwa tulwane amapenzi ngitulaawo, akuti nguulamanguzu kwiinda zintu zyoonse zikonzya kutuchisa. Nikuba kuti kuli zimwi zintu zibi zikonzya kutuchitikila, tulachoonzyo chakuti kunembo Jehova uyoozibambulula zyooonse zyakanyonyoonwa. IBbayibbele litusungwaazya kuti: ‘Tuliyobole muluyando lwa-Leza.’ (Juda 21) Tweelede kukkala afwiifwi aJehova kutegwa tujane lugwasyo muziindi zikatazya. Pesi nga tulazichita biyeni eezi?

4, 5. Jehova wakatutondeezya biyeni luyando lwakwe?

⁴ Kutegwa tukkale muluyando lwaJehova, tweelede  kubona nzila Jehova njatuyaandaayo. Yeeya atala azyoonse Jehova nzyaakatuchitila. Wakatupa nyika mbotu iizwide misamu abanyama. Wakatupa zyakulya zinoono amaanzi aakunywa mabotu. Kwiinda muBbayibbele, Jehova wakatuyiisya zina lwakwe abube bwakwe bubotu. Kwiinda zyoonse wakatutondeezya luyando chiindi naakatuma Mwaanakwe uyandikana loko, Jesu, aanyika kuti azoope buumi bwakwe nkaambo kandiswe. (Johane 3:16) Akaambo kakulipeda ooko, tulabulangilizi bubotu bwakunembo.

⁵ Jehova wakatupa Bwaami bwaMesiya, imfulumende yakujulu itakamane mapenzi oonse chakufwambaana. Bwaami oobu buyoochita nyika yoonse kuti ikabe paradayizi, oomo bantu boonse bayookkala chaluumuno kababotelwa kukabe kutamani. (Intembauzyo 37:29) Imwi nzila Jehova njaakatutondezyaayo luyando, njakutuyiisya kupona munzila ilikabotu. Alimwi ulikututamba kuti tukombe kuli nguwe, alubo chiindi choonse ulilibambilide kuswiilila nkombyo zyesu. Jehova wakatondeezya luyando lwakwe kumuntu umwi awumwi.

6. Nga ulaluzumina biyeni luyando lwaJehova?

⁶ Nga ulaluzumina biyeni luyando lwaJehova? Tondeezya kuti ulalumba zintu zyoonse Jehova nzyakakuchitila. Bamwi bantu tabalumbi pe. Eezi zifanana achiindi Jesu naakali aanyika. Muli zimwi zyakachitika, Jesu wakaponia baalumi bali kkumi bakalaa zipele, pesi uumwi aakati kabo ngonguwe wakalumba. (Luka 17:12-17) Aswebo tuyanda kutobelezya mwaalumi uulya wakalumba Jesu. Chiindi choonse tuyanda kutondeezya kulumba kuli Jehova.

7. Nga tulamuyanda biyeni Jehova?

⁷ Tweelede kumutondeezya luyando lwesu Jehova. Jesu wakabuzya basikwiiya bakwe kuti beelede kuyanda Jehova amoyo wabo woonse, abuumi bwaabo boonse,  amizeezo yabo yoonse. (Bala Matayo 22:37.) Zyaambaanzi eezi?

8, 9. Kujana twatondeezya biyeni kuti tulamuyanda Jehova?

⁸ Kuyanda Jehova kweelede kuyiila akwaamba amulomo luzutu na? Peepe. Kuti katuyanda Jehova amyoyo yesu yoonse, abuumi bwesu alimwi amizeezo yesu yoonse, tutondeezya luyando lwesu kwiinda munchito zyesu. (Matayo 7:16-20) IBbayibbele liyiisya kuti, ikuti katumuyanda Leza, tuyooswiilila milawu yakwe. Nziyumu na eezi? Peepe, nkaambo Jehova ‘milazyo yakwe tiili miyumu pe.’—Bala 1 Johane 5:3.

⁹ Chiindi nituswiilila Jehova, tulabotelwa alimwi akukkutisikana mubuumi. (Isaya 48:17, 18) Pesi niinzi zitatugwasye kuti tube afwiifwi aJehova? Atubone.

10. Nkaamboonzi nweelede kwiinkilila kunembo nkulokwiiya atala aJehova?

¹⁰ Wakachita biyeni kuti ube mweenzinyina waJehova? Kwiinda mukwiiya Bbayibbele, wakamuziba Jehova alimwi wakaba mweenzinyokwe. Bweenzinyina oobu buli mbuli mulilo nguyanda kuti kuuyaka. Mbubonya mbuli mulilo mbuuyanda kusoselwa kuti ukkale kuuyaka, ayebo weelede kwiinkilila kunembo kwiiya atala aJehova kuchitila kuti bweenzinyokwe aJehova busime.—Tusimpi 2:1-5.

11. Injiisyo zyamuBbayibbele ziyookupa kuti ulimvwe biyeni?

¹¹ Nuya bwiiya Bbayibbele, uzooyiiya zintu zitazoobotezye moyo wako. Bona nzila basikwiiya baJesu bobilwe njibakalimvwaayo chiindi Jesu naakali kubapandulwida businsimi. Bakati: “Sena myoyo yesu teyali kupya muzyamba zyesu, naali kuza bwaambaula aswebo munzila, aleeliya naali kutupandulwida Magwalo?”—Luka 24:32.

12, 13. (a) Niinzi chinga chilachitika kuluyando lwesu aJehova? (b) Kujana twachita biyeni kuti luyando lwesu aJehova lukkale kalukasaala?

 ¹² Mbuli basikwiiya baJesu mbubakalimvwa chiindi nibakamvwisisya Magwalo, kweelede kuti ayebo wakalimvwa oobo chiindi nwaakatalika kumvwisisisya Bbayibbele. Eezi zyakakugwasya kuti umuzibe Jehova alimwi akuti umuyande. Takwe nunga ulayanda kuti luyando oolu lumane.—Matayo 24:12.

¹³ Ikuti waba mweenzinyina waLeza, weelede kubeleka changuzu kutegwa uyumye luyando lwenu. Weelede kwiinkilila kunembo nkulokwiiya atala anguwe aJesu alimwi uyeeye atala anzulokwiiya akuti kujana wazibelesya biyeni mubuumi bwako. (Johane 17:3) Chiindi nubala naa kwiiya Bbayibbele, libuzye kuti: ‘Eezi zindiyiisyaanzi atala aJehova Leza? Nkaamboonzi nindeelede kumuyanda amoyo wangu woonse abuumi bwangu boonse?’—1 Timoteo 4:15.

14. Kukomba kutugwasya biyeni kuti luyando lwesu aJehova lusime?

 ¹⁴ Ikuti kula mweenzinyokwe ulikabotu, ulaambuulaawe chiindi choonse, eezi ziyoopa kuti bweenzinyokwe busime. Munzila ikozyene, ikuti katwaambuula aJehova chiindi choonse kwiinda munkombyo, zipa kuti kumvwanana kwesu kusime. (Bala 1 BaTesalonika 5:17.) Inkombyo nchipo chipati chizwa kuli Taatesu uuli kujulu. Tweelede kukkala katwambulaawe kuzwaansi amoyo. (Intembauzyo 62:8) Tatweelede kwiindulula-yindulula pe nkombyo kuzwa mumutwe. Pesi tweelede kuba achoonzyo anzitulikwaamba. Nisimpe, ikuti tweendelela kunembo katulikwiiya Bbayibbele akukomba kazizwa mumyoyo yesu, tuyoochita kuti luyando lwesu kuli Jehova lusime.

15, 16. Uwubona biyeni mulimo wakukambawuka?

¹⁵ Ikuti katuyanda kuti tukkale katulaafwiifwi aJehova, tweelede kubuzya bamwi nzitusyoma. Kubuzya bamwi atala aJehova nchilongezyo chipati loko. (Luka 1:74) Alimwi mutolo Jesu ngwakapa maKristu akasimpe woonse. Toonse tweelede kukambawuka makani mabotu aBwaami bwaLeza. Wakazichita kale na eezi?—Matayo 24:14; 28:19, 20.

¹⁶ Mwapostolo Paulo wakabona mulimu wakukambawuka kawuyandikana loko; wakawuwamba kuti “cintu ciyandisi.” (2 BaKorinto 4:7) Kubuzya bamwi atalaa Jehova amakanze aakwe ngumulimu uyandikana loko ngukonzya kuchita. Ninzila yakubelekela Jehova, alimwi Jehova ulawulumba mulimu nguli kumuchitila. (BaHebrayo 6:10) Kukambawuka kulakonzya kugwasya nduwe abaabo bakuswiilila nkaambo kuchitoobo kugwasya bamwi anduwe kuti muswene aafwiifwi aJehova mpawo  mujane buumi butamani. (Bala 1 BaKorinto 15:58.) Kuli mulimu uunga ulakupa kubotelwa kwindaawa na?

17. Nkamboonzi mulimu wakukambawuka nchuyandikana chakufwambaana?

¹⁷ Mazuba aano, mulimu wakukambawuka ulikuyandikana chakufwambaana. Tweelede kukambawuka “makani,” alubo ‘cakufwambaana.’ (2 Timoteo 4:2) Bantu beelede kumvwa makani atala aBwaami bwaLeza. IBbayibbele lyaamba kuti: “Buzuba bupati bwa-Jehova buli kufwaafwi, ncobeni buli kufwaafwi, bulafwambaana loko kusika!” Chiindi chakumamanino “tacikooyoocedelelwa pe!” (Zefaniya 1:14; Habakuku 2:3) Chachoonzyo, alubo chakufwambaana Jehova uyoonyonyoona nyika mbi yaSaatani. Kazitana chitika eezi bantu beelede kuchenjezegwa kutegwa basale kukomba Jehova.

18. Nkamboonzi nitweelede kukomba Jehova katulaamwi amaKristu aakasimpe?

¹⁸ Jehova uyanda kuti tumukombe katula maKristu amwi aakasimpe. IBbayibbele lyaamba kuti: “Katunga katuyeeyana, kutubusyanya-busyanya mukuyandana akucita milimo mibotu. Tutanoonga katuleka kulibunga-bunga, mbuli bamwi mbubaleka, ano kamucenjezyanya twaambo, kamucita obuya lyoonse mbomububwene kuti buzuba bwa-Kristo buli afwaafwi.” (BaHebrayo 10:24, 25) Tweelede kweezya kujanika kumiswaangano yoonse. Miswaangano itupa chiindi chakusungwaazyania akusimisyania.

19. Niinzi chinga chilatugwasya kuyanda bakwesu abachizi bachiKristu?

¹⁹ Chiindi nunjila miswaangano, uyoojana beenzinyokwe batakakugwasye kukomba Jehova. Uyooswaanana abakwesu abachizi basiyene-siyene bachita mpubakonzezya kuti bakombe Jehova mbuli nduwe. Alabo tabamaninide pe mbuli nduwe balalubizya. Kuti bakubisizya libambile  kubalekelela. (Bala BaKolose 3:13.) Chiindi choonse langisisya bube bubotu bwabakwesu abachizi, alubo kuchita oobo kuyookugwasya kuti uswene aafwiifwi aJehova.

20, 21. “Buumi bwinibwini” niinzi?

²⁰ Jehova uyanda kuti beenzinyina boonse babotelwe mubuumi. IBbayibbele liyiisya kuti buumi buli kunembo bunoosiyene abuumi mbutupona mazuba aano.

²¹ Mubuumi bulikunembo tuyoopona kukabe kutamani ikutali minyaka iili 70 naa 80. Tuyoobotelwa “buumi butagoli” akubaa mibili iitakwe machise, luumuno akubotelwa muparadayizi mbotu. Bbayibbele lyaamba kuti: ‘mbuumi bwinibwini.’ Jehova usyomezya kutupa buumi bwachoonzyo, alubo tweelede kubeleka changuzu ‘kuti tubujatisisye’—1 Timoteo 6:12, 19.

22. Kujana ‘twabujatisisya biyeni buumi bwinibwini’? (b) Nkamboonzi nitutakonzyi kufola buumi butamani?

²² Kujana ‘twabujatisisya biyeni buumi bwinibwini’? Tweelede kuchita “milimo iiluzi” alubo akubaa “milimo mibotu” miingi. (1 Timoteo 6:18) Eezi zyaamba kuti tweelede kupona kweelana anzitwiiya muBbayibbele. Nikuba boobo, buumi bwachoonzyo tabuzwi kunguzu zyesu. Tatukonzyi kufola buumi butamani. Nchipo “camuluzyalo” chizwa kuli Jehova kachiya kubabelesi bakwe. (BaRoma 5:15) Taatesu uulikujulu ulayanda kupa babelesi bakwe basyomeka chipo eechi.

23. Nkamboonzi nweelede kusala kabotu lino?

²³ Libuzye kuti, ‘Leza ndimukomba munzila njayanda na?’ Ikuti wabona kuti weelede kuchincha maponenaako, weelede kuchitoobo mpawaawo. Ikuti twachita zyoonse nzyotukonzya kuti tuswiilile Jehova akumusyoma, uyooba chiyubilo chesu. Uyookwabilila bantu bakwe basyomeka mumazuba amamanino aanyika yaSaatani mbi.  Mpawo Jehova uyoobona kuti tuyookkala muParadayizi kukabe kutamani, mbuli mbaakatusyomezya. Nisimpe, ulakonzya kujana buumi bwachoonzyo ikuti wasala kabotu lino!