1, 2. Yumi inap painim we ples hait long nau?

TINGIM olsem yu wokabaut long rot long taim nogut. Skai i go tudak moa. Laitning i sut, na tanda i stat long pairap. I no longtaim ren i pundaun. Yu painim ples bilong hait. Yu amamas tru taim yu painim wanpela hap we i gutpela na yu ken hait long en!

² Yumi stap long wankain taim nogut long nau. Ol samting i kamap long graun i go nogut moa. Ating yu tingting, ‘Mi inap painim we wanpela ples hait?’ Man bilong raitim Buk Song long Baibel i tok: “Mi bai tokim Jehova olsem: ‘Yu ples hait bilong mi na yu strongpela banis bilong mi, yu God bilong mi na mi trastim yu.’” (Song 91:2) Yes, Jehova inap lukautim yumi long dispela graun i pulap long planti hevi na em i tokim yumi long gutpela samting yumi ken wet long en long bihain.

3. Olsem wanem Jehova i ken i stap ples hait bilong yumi?

³ Olsem wanem Jehova inap lukautim yumi? Em inap helpim yumi long karim ol hevi bilong yumi, na em i gat bikpela strong winim ol man i laik mekim nogut long yumi. Maski sapos bagarap i painim yumi long nau, yumi ken bilip tru olsem Jehova inap stretim dispela samting long bihain. Baibel i strongim bel bilong yumi olsem: “Yupela bai stap insait yet long pasin laikim bilong God.” (Jut 21) Yumi mas i stap klostu long Jehova na bai em i ken helpim yumi long taim bilong hevi. Tasol olsem wanem yumi inap mekim olsem?

4, 5. Olsem wanem Jehova i soim pasin laikim bilong em long yumi?

⁴ Bilong stap klostu long Jehova, yumi mas luksave olsem em i laikim tru yumi. Tingim olgeta samting Jehova  i mekim bilong helpim yumi. Em i bin givim yumi graun i naispela tru na em i bin putim ol naispela plaua na ol animal long graun. Na tu, em i givim yumi ol naispela kaikai long kisim na gutpela wara long dring. Long rot bilong Baibel, Jehova i tokim yumi long nem bilong em na ol gutpela pasin bilong em. Na bikpela samting moa, em i kamapim klia pasin laikim bilong em long yumi taim em i salim Pikinini bilong em, Jisas, i kam long graun bilong givim laip bilong em bilong helpim yumi. (Jon 3:16) Na long rot bilong dispela sakrifais bilong em, yumi ken bilip na wetim ol gutpela samting tru bai kamap bihain.

⁵ Jehova i bin kamapim Kingdom Bilong Mesaia, em wanpela gavman long heven we klostu nau em bai pinisim olgeta pen na hevi. Dispela Kingdom bai mekim graun i kamap wanpela paradais we olgeta manmeri bai i stap bel isi na amamas oltaim. (Song 37:29) Narapela rot tu Jehova i soim pasin laikim bilong em long yumi, em long rot bilong skulim yumi long wokabaut long nambawan gutpela rot long nau. Na tu, em i tokim yumi long beten long em, na oltaim em i redi long harim beten bilong yumi. Jehova i soim olsem em i laikim tru yumi olgeta wan wan.

6. Olsem wanem yu ken soim olsem yu tenkyu long pasin laikim bilong Jehova?

⁶ Olsem wanem yu ken soim olsem yu tenkyu long pasin laikim bilong Jehova? Yu mas tenkyu tru long olgeta samting Jehova i bin mekim bilong helpim yu. Tasol sori tru, long nau planti man i no gat pasin bilong soim tenkyu bilong ol. Long taim bilong Jisas tu i gat wankain pasin long graun. Wanpela taim Jisas i oraitim 10-pela lepra man, tasol wanpela tasol i tok tenkyu long em. (Luk 17:12-17) Yumi laik bihainim wankain pasin olsem dispela man i bin tok tenkyu long Jisas. Oltaim yumi laik tok tenkyu long Jehova.

7. Olsem wanem yumi ken soim pasin laikim bilong yumi long Jehova?

⁷ Yumi mas soim tu olsem yumi laikim Jehova. Jisas i tokim ol disaipel bilong em olsem ol i mas laikim Jehova  long bel olgeta, na long laip olgeta bilong ol, na long tingting olgeta bilong ol. (Ritim Matyu 22:37.) Dispela i makim wanem samting?

8, 9. Olsem wanem yumi ken soim Jehova olsem yumi laikim em?

⁸ Pasin bilong tok olsem yumi laikim Jehova, dispela tasol em inap? Nogat. Sapos yumi laikim Jehova long bel olgeta, laip olgeta, na tingting olgeta bilong yumi, bai yumi soim olsem yumi laikim tru em long ol samting yumi mekim. (Matyu 7:16-20) Baibel i tok olsem sapos yumi laikim God, bai yumi bihainim ol lo bilong em. Olsem wanem? I hatwok long mekim olsem? Nogat, long wanem, ol lo bilong Jehova “i no givim hevi long yumi.”—Ritim 1 Jon 5:3.

⁹ Taim yumi bihainim ol lo bilong Jehova, yumi bai i stap amamas na i stap gut. (Aisaia 48:17, 18) Tasol wanem samting bai helpim yumi long i stap klostu long Jehova? Orait nau yumi ken stori long dispela.

10. Bilong wanem yu mas wok yet long kisim save long Jehova?

¹⁰ Olsem wanem yu bin kamap pren bilong Jehova? Long rot bilong stadi long Baibel, yu kisim save moa long Jehova na kamap pren bilong em. Dispela pasin pren bilong yu wantaim em i olsem paia em yu laik bai em i wok long lait i stap. Paiawut i save mekim paia i lait i stap, na olsem tasol yu mas wok yet long kisim save long Jehova bambai dispela i strongim pasin pren bilong yu wantaim Jehova.—Provep 2:1-5.

11. Ol tok bilong Baibel inap mekim wanem long yu?

¹¹ Taim yu wok long stadi long Baibel, bai yu kisim save long ol samting we yu pilim tru long bel bilong yu. Lukim tupela disaipel bilong Jisas i pilim olsem wanem taim em i kamapim gut ol tok profet bilong Baibel long tupela. Tupela i tok: “Taim em i toktok long yumi long rot na kamapim gut ol tok bilong Rait Holi long yumi, bel bilong yumi i bin kirap tru, a?”—Luk 24:32.

12, 13. (a)  Wanem samting inap kamap long pasin bilong yumi long laikim God? (b) Yumi ken mekim wanem na bai pasin laikim bilong yumi long Jehova i no pinis?

 ¹² Ol disaipel bilong Jisas i pilim tru long bel ol tok bilong Baibel taim ol i kliagut long en, olsem tasol yu tu i bin pilim bikpela amamas taim yu kirap long kliagut long ol tok bilong Baibel. Dispela i helpim yu long save long Jehova na laikim em. Yu no laik bai dispela pasin laikim bilong yu i pinis.—Matyu 24:12.

¹³ Taim yu kamap pren bilong God, yu mas wok yet long strongim dispela pasin pren bilong yu wantaim em. Yu mas wok yet long kisim save long em na Jisas na tingim ol samting yu lainim na olsem wanem yu ken bihainim long i stap bilong yu. (Jon 17:3) Taim yu ritim o stadi long Baibel, askim yu yet: ‘Dispela tok i givim wanem save long mi long God Jehova? Bilong wanem mi mas laikim em long bel na laip olgeta bilong mi?’—1 Timoti 4:15.

14. Olsem wanem pasin bilong beten i strongim pasin bilong yumi long laikim Jehova?

 ¹⁴ Sapos yu gat wanpela gutpela pren, yu bai laik long toktok wantaim em long olgeta taim, na strongim yet pasin pren bilong yutupela. Olsem tasol, taim yumi beten long Jehova long olgeta taim, dispela bai mekim pasin bilong yumi long laikim Jehova i stap strong. (Ritim 1 Tesalonaika 5:17.) Pasin bilong beten em i wanpela gutpela presen i kam long Papa bilong yumi long heven. Yumi mas kamapim ol tingting i stap long bel bilong yumi. (Song 62:8) Yumi no ken kolim ol wankain tok tasol planti taim, nogat, yumi mas pilim tru long bel ol tok yumi mekim. Yes, sapos yumi wok yet long stadi long Baibel na beten na kamapim bel bilong yumi, dispela bai mekim pasin bilong yumi long laikim Jehova i stap strong.

15, 16. Yu gat wanem tingting long wok autim tok?

¹⁵ Sapos yumi laik i stap klostu yet long Jehova, yumi mas tokim ol arapela long bilip bilong yumi. Pasin bilong toktok wantaim ol arapela long Jehova, em i wanpela gutpela wok. (Luk 1:74) Na em wanpela wok Jisas i givim long olgeta trupela Kristen. Yumi olgeta i mas autim gutnius bilong Kingdom Bilong God. Yu bin mekim olsem pinis?—Matyu 24:14; 28:19, 20.

¹⁶ Aposel Pol i pilim olsem wok bilong autim tok em i wanpela gutpela samting tru; em i tok dispela wok i “dia tumas.” (2 Korin 4:7) Wok bilong tokim ol arapela long Jehova na ol samting em bai mekim, em i nambawan gutpela wok yu ken mekim. Em wanpela rot yu ken mekim wok bilong Jehova, na em i amamas long ol samting yu mekim bilong em. (Hibru 6:10) Wok bilong autim tok inap helpim yu na ol man i harim tok yu autim, long wanem, yu helpim ol arapela na yu yet long i go klostu long Jehova na long kisim  laip oltaim. (Ritim 1 Korin 15:58.) I no gat narapela wok inap givim yu amamas olsem wok bilong autim tok i mekim.

17. Bilong wanem yumi mas tingim olsem taim i sot pinis bilong autim tok?

¹⁷ Em i bikpela samting long tingim olsem taim i sot pinis long mekim wok bilong autim tok. Yumi mas “autim tok,” na yumi mas “givim bel tru long mekim olsem.” (2 Timoti 4:2) Ol man i mas harim tok bilong Kingdom Bilong God. Baibel i tok: “Bikpela de bilong Jehova i kam klostu pinis! Em i kam klostu pinis na em i kam kwiktaim tru!” Pinis “bai kamap long taim stret bilong en!” (Sefanaia 1:14; Habakuk 2:3) Yes, klostu nau, Jehova bai bagarapim pasin nogut bilong dispela graun bilong Satan. Paslain long dispela, yumi mas givim tok lukaut long ol manmeri na bai ol i ken wokim disisen olsem ol bai lotuim Jehova o nogat.

18. Bilong wanem yumi mas lotuim Jehova wantaim ol arapela trupela Kristen?

¹⁸ Jehova i laik bai yumi lotuim em wantaim ol arapela trupela Kristen. Baibel i tok: “Yumi wan wan i mas tingim narapela narapela, na kirapim ol long mekim pasin laikim na mekim ol gutpela wok. Yumi no ken lusim pasin bilong bung wantaim, olsem sampela i save mekim, nogat. Yumi mas strongim bel bilong narapela narapela na mekim moa yet taim yumi lukim dispela de i kam klostu.” (Hibru 10:24, 25) Yumi mas wok strong long i go long olgeta miting. Ol miting i opim rot long yumi strongim narapela narapela.

19. Wanem samting inap helpim yumi long laikim ol brata sista Kristen bilong yumi?

¹⁹ Taim yu go long ol miting, yu bai i gat ol gutpela pren em ol bai helpim yu long lotuim Jehova. Yu bai bungim kain kain brata sista, na wankain olsem yu, ol tu i wok strong long lotuim Jehova. Na wankain olsem yu, ol i no gutpela olgeta, ol tu i save popaia. Taim ol i popaia, yu mas redi long lusim rong bilong ol. (Ritim Kolosi 3:13.) Oltaim tingim ol gutpela pasin bilong ol brata sista Kristen bilong yu. Sapos yu mekim olsem dispela bai helpim yu long laikim ol na i go klostu moa long Jehova.

20, 21. “Laip tru” em i wanem samting?

²⁰ Jehova i laik bai olgeta pren bilong em i stap amamas. Baibel i tokim yumi olsem laip bilong yumi long bihain bai i narapela kain long laip bilong yumi long nau.

²¹ Long bihain, bai yumi stap oltaim bai yumi i no stap 70 o 80 yia tasol, nogat. Bai yumi stap “laip oltaim” na no gat sik, stap bel isi, na stap amamas long naispela ples paradais. Baibel i tok “dispela laip em i laip tru.” Jehova i tok promis long givim yumi laip tru, tasol yumi mas mekim olgeta samting nau na bai yumi “holim strong” dispela laip.—1 Timoti 6:12, 19.

22. (a) Olsem wanem yumi ken “holim strong dispela laip em i laip tru”? (b) Bilong wanem yumi no inap mekim wanpela wok we yumi inap kisim laip oltaim?

²² Yumi mas mekim wanem bilong “kisim dispela laip em i laip tru”? Yumi mas “mekim gutpela pasin” na “mekim planti gutpela wok.” (1 Timoti 6:18) Dispela i makim olsem yumi mas bihainim ol tok bilong Baibel yumi bin kisim save long en. I no long hatwok bilong yumi yet na yumi bai kisim laip tru. Yumi no inap mekim wanpela wok we inap mekim na yumi kisim laip oltaim. Dispela laip tru em i presen i kam long Jehova, em i givim long ol gutpela wokman bilong em, na dispela em “bikpela pasin helpim” em i mekim long ol. (Rom 5:15) Papa bilong yumi long heven i amamas long givim dispela presen long ol gutpela wokman bilong em.

23. Bilong wanem yu mas wokim ol gutpela disisen long nau?

²³ Askim yu yet, ‘Mi lotuim God long pasin em i orait long en?’ Sapos yu lukim olsem yu mas mekim sampela senis, orait kwiktaim yu mas mekim olsem. Taim yumi bilip long Jehova na mekim olgeta samting yumi inap long mekim bilong bihainim tok bilong em, Jehova bai i stap ples hait bilong yumi. Em bai lukautim lain bilong em long dispela taim bilong las de bilong pasin nogut bilong dispela graun  bilong Satan. Na Jehova bai mekim ol samting na bai yumi i stap oltaim long Paradais, olsem em i bin tok promis long en. Yes, yu inap kisim dispela laip tru sapos yu wokim ol gutpela disisen long nau!