1, 2. Ninkaha nambere tusobora kwirukira kutunga obulinzi?

TEERA akasisani oliyo n’orubata, ekiyaga ky’amaani kyatandika kuteera. Ebicu by’enjura y’amaani bikwata, omurabyo gumyasa, kandi enkuba etandika kuhulika. Aho n’aho enjura etandika kugwa. Otandika kuseera h’oraigama. Tohurra ohumwire obw’otunga ekiikaro ky’okwigamamu enjura?

² Naitwe omu kasumi kanu nitusisana abali omu bwire bw’ekiyaga. Ebintu omu nsi nibyeyongera kusiisikara. N’osobora kwekaguza, ‘Ninkaha nambere tusobora kwirukira?’ Omuhandiiki wa Zabuli akagamba ngu: “Ndigamba ha Mukama nti Ogu nikyo kyokwebingamu kyange, nekikomero kyange.” (Zabuli 91:2) Gali mananu ngu Yahwe n’asobora kutuhumuza omu busumi bw’ebizibu, kandi n’aturaganiza ngu nitwija kuba kurungi akasumi akarukwija.

3. Nitusobora tuta kufoora Yahwe obwirukiro bwaitu?

³ Yahwe n’asobora kutulinda mu mulingo ki? N’asobora kutukonyera kuraba omu bulemeezi obutwine, kandi n’akirra kimu abanyanzigwa baitu amaani. N’obuturahikwaho ekintu ekibi kyona, twikale tukimanyire ngu omu kasumi k’omu maiso, Yahwe n’aija kusemeza ebintu byona. Baibuli etutererra eti: “Mwerindege omu kugonza kwa Ruhanga.” (Yuda 21) Enkoragana yaitu na Yahwe esemeriire kwikara eri y’amaani obuturaaba nitugonza atukonyere omu bwire bw’olemeezi. Baitu nitusobora tuta kulinda enkoragana yaitu na Yahwe eri nungi?

4, 5. Yahwe atwolekere ata okugonza?

⁴ Obu turamanya omulingo Yahwe atugonzaamu nitwija  kukora kyona ekirukusoboka kulinda obunywani bwaitu nauwe bugumire. Teekereza ha buli kintu ekya Yahwe atukoliire. Akatuha ensi enungi, enyakurumu ebimera n’ebisobro ebirukusemeza. Atuhaire eby’okulya ebirukunura n’amaizi amarungi ag’okunywa. Yahwe akozeseze Baibuli kutugambira ibara lye n’emiringo ye enungi muno. Ekirukukirayo byona, akatwoleka okugonza obu yahaireyo omwana we arukugonzebwa, Yesu okutufeera. (Yohana 3:16) Kandi habw’ekicunguro kinu, twine okunihira ngu nitwija kutunga obwomeezi obutahwaho kandi obusemiire.

⁵ Yahwe atuteriireho obulemi bw’Obukama oburukulemwa omwana we, enu niyo gavumenti eri omu iguru erukwija kumaraho okubonabona kwona. Obukama bunu nibwija kufoora ensi yoona orugonjo, nambere harukwija kuba obusinge n’okusemererwa okutahwaho. (Zabuli 37:29) Omulingo gundi Yahwe atwolekeremu okugonza kwe, nukwo kutwegesa omulingo tusemeriire kukozesa obwomeezi bwaitu. Atuhaire ekisembo ky’okumusaba kandi ayetegekere kuhuliiriza okusaba kwaitu. Itwena Yahwe atwolekere okugonza okwatwinire.

6. N’osobora ota kwoleka ngu nosiima okugonza Yahwe akwolekere?

⁶ N’osobora ota kwoleka ngu nosiima okugonza kwa Yahwe? Mwoleke ngu nosiima buli kimu kyona eky’akukoliire. Eky’enaku, abantu baingi biro binu tibasiima. N’akasumi Yesu obu akaba ali omu nsi, abantu bali ntasiima. Akasumi kamu, Yesu akakiza abagenge ikumi, baitu omu wenka nuwe yamusiimire. (Luka 17:12-17) Nitugonza kuba nk’omusaija onu ayasiimire Yesu. Leka twikale nitwoleka okugonza kwaitu hali Yahwe buli kiro.

7. Nitusobora kwoleka tuta ngu nitugonza muno Yahwe?

⁷ Nikyetaagisa naitwe twoleke okugonza kwaitu hali Yahwe. Yesu akagambira abegeswa be ngu, baine kugonza Yahwe n’emitima yabo yoona, n’obwomeezi bwabo bwona,  kandi n’ebiteekerezo byabo byona. (Soma Matayo 22:37.) Kinu nikimanyisa ki?

8, 9. Nitusobora tuta kwoleka Yahwe ngu nitumugonza?

⁸ Nikimara kugamba bugamba ngu nitugonza Yahwe? Nangwa. Obuturagamba ngu nitugonza Yahwe n’omutima gwaitu gwona, n’obwomeezi bwaitu bwona, kandi n’amagezi gaitu goona, ebikorwa byaitu nibiija kwoleka ngu mali nitumugonza kwo. (Matayo 7:16-20) Baibuli etugambira ngu obuturaaba nitugonza Ruhanga, nitwija kworobera ebiragiro bye. Kigumire kworobera ebiragiro bya Yahwe? Nangwa, habwokuba ‘ebiragirobye tibirukulemerra.’—Soma 1 Yohana 5:3.

⁹ Obutworobera Yahwe, tutunga okusemererwa n’obwomeezi oburungi. (Isaya 48:17, 18) Baitu kiki ekiratukonyera kwikara tuli banywani ba Ruhanga? Katurole.

10. Habwaki oine kweyongera kwega hali Yahwe?

¹⁰ Kiki ekyakukonyire kufooka munywani wa Ruhanga? Okwega Baibuli kikakukonyera kweyongera kumumanya kandi kikakukonyera kufooka munywani we. Obunywani bunu buli nk’omurro ogw’orukugonza gwikale nigwaka. Baitu nk’oku omurro gwetaagisa enku kwikara nigwaka, naiwe noyetaagisa kwikara noyega hali Yahwe kurora obunywani bwawe nauwe bwayeyongera kuguma.—Enfumo 2:1-5.

11. Eby’orukwega omu Baibuli nibiija kukukonyera bita omu bwomeezi bwawe?

¹¹ Obworayeyongera kwega Baibuli, noija kwega ebintu ebirukwija kukukoonyera. Katurole omulingo abegeswa babiri aba Yesu bayehuliiremu obu Yesu y’abasoboroliire obunabbi bw’omu Baibuli. Bakagamba: “Omutima gwaitu tigusarairege omunda yaitu, obwabaire nabaza naitwe omu muhanda, natusuku’ra ebyahandikirwe?”—Luka 24:32.

12, 13. (a) Kiki ekisobora kuhika ha kugonza kwaitu okutwinire Ruhanga? (b) Nitusobora tuta kulinda okugonza kwaitu hali Yahwe kugumire?

 ¹² Naiwe n’osobora kuba w’akwasirweho obu watandikire kwega Baibuli nk’oku abegeswa ba Yesu bakwasirweho hanyuma y’okwetegereza ebyahandiikirwe. Kwega Baibuli kikakukonyera kumanya Yahwe n’okumugonza. Otaleka okugonza kunu kukafuka.—Matayo 24:12.

¹³ Hanyuma y’okufooka munywani wa Ruhanga, nikikwetaagisa kukora kyona ekirukusoboka kurora walinda obunywani bwawe nauwe buli bw’amaani. Oine kweyongera kumwegaho, okwega hali Yesu, kucumitiriza haby’orukwega, n’okuteekereza omulingo osobora kubita omu nkora. (Yohana 17:3) Obworaaba nosoma rundi noyega Baibuli, wekaguze: ‘Kinu nikinyegesa ki hali Yahwe Ruhanga? Habwaki nsemeriire kumugonza n’omutima gwange gwona hamu n’obwomeezi bwange bwona?’—1 Timoseo 4:15.

14. Okusaba kukonyera kuta kwombeka okugonza kwaitu hali Yahwe?

 ¹⁴ Obw’oba n’omunywani nfe na nfe, obaza nauwe obutoosa kandi kikonyera obunywani bwanyu kweyongera kuguma. Omulingo nugwo gumu, obwosaba Yahwe obutoosa, kikonyera kwombeka okugonza kwawe nauwe. (Soma 1 Abasesalonika 5:17.) Okusaba kiri kisembo kirungi kuruga hali Isitwe ow’omu iguru. Twine kumusabaga kuruga ha mutima gwaitu. (Zabuli 62:8) Titusemeriire kukwata bukwata esaara zaitu omu mutwe, baitu ebigambo bisemeriire kuruga ha mutima. Obu turayeyongera kwega Baibuli kandi tukamusaba kuruga ha mutima gwaitu, okugonza kwaitu hali uwe nukwija kweyongera kuguma.

15, 16. Omulimo gw’okutebeza ogutwara ota?

¹⁵ Obuturaaba nitugonza kwikara tuli banywani ba Yahwe, twine kugambiraho n’abandi ebiturukwega. Kugambiraho abandi ebirukukwata hali Yahwe guli mugisa gw’amaani. (Luka 1:74) Buli bujunanizibwa obu Yesu yahaire Abakristaayo boona ab’amananu. Buli omu asemeriire kutebeza amakuru amarungi ag’Obukama. Wakatandikire kugambiraho abandi eby’orukwega?—Matayo 24:14; 28:19, 20.

¹⁶ Omukwenda Paulo akatwara omulimo gunu ogw’okutebeza kuba kintu kikuru muno; akagweta “ekyobuguda.” (2 Abakolinso 4:7) Omulimo gw’okugambira abandi hali Yahwe n’ekigendererwa kye guli mulimo mukuru muno ogurukukirra kimu emirimo endi yoona. Guli mulingo gundi ogw’okuherezaamu Yahwe, kandi asemererwa obw’arora n’otekamu amaani. (Abaheburaniya 6:10) Omulimo gunu nigusobora kukugasira n’okugasira ab’orukwegesa habwokuba nikibakonyera inywena kwirra haihi na Yahwe n’okutunga obwomeezi obutahwaho obwire oburukwija. (Soma 1 Abakolinso 15:58.) Haroho mulimo gundi gwona  ogurukusobora kukuleetera okusemererwa okukira omulimo gunu?

17. Habwaki omulimo gw’okutebeza nigwetaagisa kukorwa omu bwangu?

¹⁷ Omulimo gw’okutebeza nigwetaagisibwa kukorwa omu bwangu muno. Baibuli n’etutererra ngu “otebezege ekigambo, ogambi’rege omu biro ebisemeriiremu nebitasemeriiremu.” (2 Timoseo 4:2) Abantu nibetaaga bamanye amananu agarukukwata ha Bukama bwa Ruhanga. Baibuli egamba: “Ekiro ekikuru ekya Mukama kiri haihi! Kiri haihi nikyanguha muno!” Empero terikaraho kwija! (Zefaniya 1:14; Habakuki 2:3) Obwire obutali bwa hara, Yahwe n’agenda kuhwerekereza ensi ya Setani eyijwiremu obubi. Baitu atakagihwerekeriize, nikyetaagisa abantu tubahabule nukwo becweremu kuheereza Yahwe.

18. Habwaki tusemeriire kwesorroza hamu n’Abakristaayo bagenzi baitu kuramya Yahwe?

¹⁸ Yahwe n’agonza turamize hamu n’Abakristaayo abandi. Baibuli egamba: “Kandi tutekerezege okwekambisangana okugonzangana, nokukora engeso ezisemire okutaleka okwesorozaga hamu, nkabandi okubagira, baitu ntugambi’rangana itwenka, kandi okweyongera tweyongerege tuti nkokumurora ekiro kiri haihi nokuhika.” (Abaheburaniya 10:24, 25) Tusemeriire kwekamba kubahoga omu nso’rokano zoona. Enso’rokano zituheereza omugisa ogw’okwekambisangana n’okugaramungana amaani.

19. Kiki ekiratukonyera kugonza Abakristaayo bagenzi baitu?

¹⁹ Obworaija omu nso’rokano, noija kutunga abanywani abarungi abarukwija kukukonyera kweyongera kuramya Yahwe. Noija kusangayo ab’oruganda n’abanyanya itwe abaine okugonza kandi abeekamba kuheereza Yahwe. Baitu nabo bantu abatahikiriire, nahabwekyo basobya. Obu barakusobeza, obaganyire. (Soma Abakolosai 3:13.) Otagendera ha nsobi z’Abakristaayo bagenzi baawe baitu orole ebirungi ebi barukukora.  Obworakora eki, noija kweyongera kubagonza kandi nikiija kukukonyera kwira haihi na Yahwe.

20, 21. “Obwomezi mali” nubwo buha?

²⁰ Yahwe n’agondeza abanywani be obwomeezi oburukukirayo oburungi. Baibuli egamba ngu obwomeezi oburukwija nibwija kuba nibwahukanira kimu n’obwomeezi obw’omu kasumi kanu.

²¹ Omu busumi bw’omu maiso, nitwija kwomeera ebiro n’ebiro hatali kumara emyaka 70 rundi 80 yonka. Omu nsi empyaka, nitwija kwegondeza omu “obwomeezi obwebiro nebiro” tutarukurwara, twine obusinge, hamu n’okusemererwa. Bunu nubwo bwomeezi Baibuli eyeta “bwomezi mali.” Yahwe aturaganiize kutuha obwomeezi bwonyini, baitu abantu n’abo baine kwekamba nukwo ‘bakwatire kimu’ obwomeezi obu.—1 Timoseo 6:12, 19.

22. (a) Nitusobora tuta ‘kukwatira kimu obwomeezi obw’ebiro n’ebiro’? (b) Habwaki tutarukusobora kugamba ngu obwomeezi obutahwaho guli musaara kuruga hali Yahwe?

²² Nitusobora tuta ‘kukwatira kimu obwomeezi obw’ebiro n’ebiro’? Tusemeriire ‘kukora ebirungi’ kandi tusemeriire kuba “abaguda omu ngeso enungi.” (1 Timoseo 6:18) Kinu nikimanyisa ngu tusemeriire kuta omu nkora ebitwega kuruga omu Baibuli. Baitu tikirukumanyisa ngu nitwija kutunga obwomeezi bunu habw’amaani gaitu. Yahwe tarukutuheereza obwomeezi obutahwaho nk’omusaara. Kisembo kya busa eki Yahwe arukwija kuheereza abaheereza.’ (Abarumi 5:15) Isiitwe Yahwe n’agonza kuheereza abaheereza be ekisembo kinu.

23. Habwaki osemeriire kukora encwamu ezihikire hati?

²³ Wekaguze, ‘Nindamya Ruhanga omu mulingo oguhikire?’ Obworayesanga oine empindahinduka ez’osemeriire kukora, tandikiraho kwikora. Obuturakora kyona ekirukusoboka kworobera Yahwe n’okumwesiga, n’aija kuba rukomero  rwaitu. N’aija kulinda abantu be abesigwa batahikirweho akabi omu nsi enu enyakuli omu biro bya ha mpero. Hanyuma, Yahwe n’aija kuhikiriza omurago gwe ogw’okututahya omu nsi empyaka. Amananu gali ngu, n’osobora kutunga obwomeezi bwonyini kakuba okora hati encwamu ezihikire!