1, 2. Tefea te koga e maua ei ne tatou te puipuiga i aso nei?

MAFAUFAU la me e sasale atu koe i tua i te taimi o te matagi malosi. Ko pouli te lagi, ko kamata o lapa‵lapa a uila, kae ‵pa a fatili. E seki leva kae ‵to ‵lotu te vaiua. E ‵sala koe ki se koga mo ou fakamalu. Kae ko pelā aka loa koe i te mauaga o se koga telā e ‵lei kae e se ‵siu foki!

² Ko ‵nofo atu tatou i se tulaga tai ‵pau penā i aso nei. A te tulaga o mea i te lalolagi ko gasolo o masei atu. Kāti ko mafaufau koe, ‘E maua ne au i fea te puipuiga?’ Ne tusi mai te faisalamo i te Tusi Tapu: “Ka fai atu au ki a Ieova: ‘A koe ko toku lafiga mo toku ‵pui malosi, ko toku Atua telā e talitonu au ki ei.’” (Salamo 91:2) Ao, e mafai o fesoasoani mai a Ieova ki ‵tou fakalavelave i te taimi nei, kae e tuku mai ne ia se fakamoemoega gali mō tatou i aso mai mua.

3. E fai pefea ne tatou a Ieova mo fai ‵tou lafiga?

³ E puipui pefea ne Ieova tatou? E mafai o fesoasoani mai a ia ke fakafesagai tatou mo so se fakalavelave, kae e sili atu tena malosi i lō so se tino telā e taumafai o fakalogo‵mae tatou. Kafai foki loa e isi se mea masei e tupu ki a tatou i te taimi nei, e mautinoa i a tatou me ka faka‵lei ne Ieova te mea tenā i aso mai mua. E fakamalosi mai te Tusi Tapu ki a tatou: “Ke tumau koutou i loto i te alofa o te Atua.” (Iuta 21) E ‵tau o fakapili‵pili atu tatou ki a Ieova ke maua tena fesoasoani i taimi faiga‵ta konei. Kae e mafai pefea o fai ne tatou te mea tenā?

4, 5. Ne fakaasi mai pefea ne Ieova tena alofa mō tatou?

⁴ Ko te mea ke fakapili‵pili atu tatou ki a Ieova, e ‵tau o iloa  ne tatou te lasi o tena alofa mō tatou. Mafaufau ki mea katoa ne fai ne Ieova mō tatou. Ko oti ne tuku mai ne ia ki a tatou te lalolagi gali kae faka‵fonu ne ia ki lakau mo manu fakaofoofogia. Ne tuku mai foki ne ia a meakai ‵gali mo ‵kai mo vai ‵ma mo inu. E auala i te Tusi Tapu, ne akoako mai ei ne Ieova ki a tatou a tena igoa mo ana uiga ‵gali. Kae sili i mea katoa, ne fakaasi mai ne ia tena alofa mō tatou i te ugamaiga ne ia tena Tama fagasele, ko Iesu, ki te lalolagi ke tuku atu tena ola mō tatou. (Ioane 3:16) Kae ona ko te taulaga tenā ko maua ei ne tatou se fakamoemoega gali mō aso mai mua.

⁵ Ko oti ne fakatoka ne Ieova se Malo telā e pule i ei a Keliso, se pulega i te lagi telā ko pili o fakaseai ne ia a logo‵maega katoa. Ka fai ne te Malo a te lalolagi mō fai se palataiso, telā ka ‵nofo a tino katoa i ei i te filemu mo te fia‵fia ki te se-gata-mai. (Salamo 37:29) A te suā auala ne fakaasi mai ei ne Ieova tena alofa mō tatou ko te akoakoga ne ia o tatou ki te ‵toe auala ‵lei ke ola i ei. Ne ‵kami foki ne ia tatou ke ‵talo ki a ia, kae e toka faeloa a ia o fakalogo ki ‵tou ‵talo. Ne fakaasi faka‵lei mai eiloa ne Ieova tena alofa mō tatou taki tokotasi.

6. E ‵tau o saga atu pefea koe ki te alofa o Ieova?

⁶ E ‵tau o saga atu pefea koe ki te alofa o Ieova? Fakaasi atu ki a ia tou loto fakafetai mō mea katoa ne fai ne ia mō koe. Se mea fakafanoanoa me e tokouke a tino i aso nei e seai se loto fakafetai i a latou. E penā foki eiloa mo te taimi ne nofo ei a Iesu i te lalolagi. I se taimi e tasi ne faka‵lei ne Iesu a tino lepela e tokosefulu, kae e tokotasi fua mai i a latou ne fakafetai atu ki a ia. (Luka 17:12-17) E ma‵nako tatou ke fai pelā mo te tagata telā ne fakafetai atu ki a Iesu. E ma‵nako foki tatou ke fakaasi atu faeloa te ‵tou loto fakafetai ki a Ieova.

7. E ‵tau o pefea te ‵poko o te ‵tou a‵lofa ki a Ieova?

⁷ E manakogina foki ke fakaasi atu ne tatou te alofa ki a Ieova. Ne fai atu a Iesu ki ana soko me e ‵tau mo latou o a‵lofa  ki a Ieova mo olotou loto kātoa, olotou ola kātoa mo olotou mafaufau kātoa. (Faitau te Mataio 22:37.) Se a te uiga o te mea tenā?

8, 9. E fakaasi atu pefea ne tatou ki a Ieova me e a‵lofa tatou ki a ia?

⁸ E mata, ko lava fua i te fai atu me e a‵lofa tatou ki a Ieova? Ikai. Kafai e a‵lofa tatou ki a Ieova mo ‵tou loto kātoa, foitino, mo mafaufau, ka fakaasi atu ne tatou te ‵tou a‵lofa mō ia i ‵tou faifaiga. (Mataio 7:16-20) E akoako faka‵lei mai te Tusi Tapu me kafai e a‵lofa tatou ki te Atua, ka faka‵logo tatou ki ana fakatonuga. E mata, e faigata te mea tenā? Ikai, me i fakatonuga a Ieova “e se ‵mafa.”—Faitau te 1 Ioane 5:3.

⁹ Kafai e faka‵logo tatou ki a Ieova, ka maua ne tatou se olaga fiafia kae fakamalie loto. (Isaia 48:17, 18) Kae ne a mea ka fesoasoani mai ki a tatou ke fakapili‵pili atu tatou ki a Ieova? Ke onoono aka tatou.

10. Kaia e ‵tau ei o tumau koe i te tauloto e uiga ki a Ieova?

¹⁰ Ne fai pefea koe mo fai se taugasoa o Ieova? E auala i tau akoga faka-te-Tusi Tapu, ne tauloto koe ki mea e uke e uiga ki a Ieova kae ati aka se va fakataugasoa mo ia. A te va fakataugasoa tenei e fai pelā me se afi telā e manako koe ke ka faeloa. E pelā eiloa mo te afi telā e manako ki fafie, e manakogina ke tumau koe i te tauloto e uiga ki a Ieova ke fakamalosi i ei te va fakataugasoa o koulua.—Faataoto 2:1-5.

11. Ka aoga pefea a akoakoga mai te Tusi Tapu ki a koe?

¹¹ Kafai e tumau koe i te sukesuke ki te Tusi Tapu, ka tauloto koe ki mea kolā ka otia malosi i ei tou loto. Ke mafaufau ki lagonaga ne oko ki soko e tokolua o Iesu i te taimi ne fakamatala atu ei ne Iesu ki a lāua a valoaga mai te Tusi Tapu. Ne fai mai lāua: “E a, e seki otia ‵ta loto i ana pati kolā ne fai mai ki a tāua i te auala, i te taimi ne fakamaina faka‵lei mai ei ne ia a Tusitusiga Tapu ki a tāua?”—Luka 24:32.

12, 13. (a) Se a te mea e mafai o tupu ki te ‵tou a‵lofa ki te Atua? (e) E mafai pefea o fakamalosi aka ne tatou te ‵tou a‵lofa ki a Ieova?

 ¹² E pelā eiloa mo te auala ne otia ei a loto o soko i te taimi ne malamalama ei lāua i Tusitusiga Tapu, kāti ne penā foki ou lagonaga i te taimi ne kamata ei o malamalama koe i mea mai te Tusi Tapu. Ne fesoasoani atu te mea tenei ke iloa ne koe a Ieova kae ke alofa ki a ia. E se manako koe ke galo atu te alofa tenei.—Mataio 24:12.

¹³ I te taimi eiloa e fai ei koe mo taugasoa o te Atua, e ‵tau o galue malosi koe o fakamalosi te va fakataugasoa o koulua. E ‵tau o tumau koe i te tauloto e uiga ki a Iesu kae mafaufau ‵loto ki au mea ne tauloto mo te auala ke fakagalue aka ei i tou olaga. (Ioane 17:3) Kafai e faitau kae sukesuke koe ki te Tusi Tapu, fesili ifo: ‘Se a te mea e akoako mai ne te mea tenei e uiga ki a Ieova te Atua? Kaia e ‵tau ei o alofa au ki a ia mo toku loto mo toku foitino kātoa?’—1 Timoteo 4:15.

14. E fakamalosi aka pefea ne te ‵talo a ‵tou a‵lofa mō Ieova?

 ¹⁴ Kafai e isi se taugasoa ‵lei o koe, e sau‵tala faeloa koulua i taimi katoa, kae fai ei ke tumau te malosi o tou lua va fakataugasoa. E penā foki eiloa māfai e fai‵pati tatou ki a Ieova i ‵talo, e fai ei ke tumau te malosi o ‵tou a‵lofa mō ia. (Faitau te 1 Tesalonia 5:17.) A te ‵talo se meaalofa gali mai te ‵tou Tamana i te lagi. E ‵tau o fai‵pati faeloa tatou ki a ia mai ‵tou loto. (Salamo 62:8) E se ‵tau o fai ‵tou ‵talo e pelā me se mea tauloto, kae e ‵tau o faipati ‵tonu atu tatou. Ao, kafai e tumau tatou i te sukesuke ki te Tusi tapu kae ‵talo mai ‵tou loto, ka fakamalosi aka ei ne tatou te ‵tou a‵lofa mō Ieova.

15, 16. Se a tau kilokiloga ki te galuega talai?

¹⁵ Kafai e ma‵nako tatou ke fakatumau te ‵pili o ‵tou va mo Ieova, e ‵tau foki o fai‵pati tatou ki nisi tino e uiga ki ‵tou fakatuanaki. A te faipati atu ki nisi tino e uiga ki a Ieova se tauliaga gali ‵ki. (Luka 1:74) Kae se tiute telā ne tuku atu ne Iesu ki Kelisiano ‵tonu katoa. E ‵tau mo tatou katoa o talai atu te tala ‵lei o te Malo o te Atua. E mata, ko oti ne fai ne koe te mea tenei?—Mataio 24:14; 28:19, 20.

¹⁶ Ne iloa ne te apositolo ko Paulo a te tāua o te galuega talai; ne taku ne ia me se “koloa tāua.” (2 Kolinito 4:7) A te fakailoa atu ki nisi tino e uiga ki a Ieova mo tena fuafuaga ko te ‵toe galuega tafasili i te tāua telā e ‵tau o fai ne koe. Se auala e tasi tenā e tavini atu ei koe ki a Ieova, kae e fakatāua malosi ne ia a mea e fai ne koe mō ia. (Epelu 6:10) A te galuega talai e aoga ki a koe mo latou kolā e faka‵logo ki a koe me ko fesoasoani atu koe ki nisi tino mo koe eiloa ke fakapili‵pili atu ki a Ieova kae ke maua te ola se-gata-mai. (Faitau te 1 Kolinito 15:58.) E mata, e isi se suā galuega aka e mafai o maua ne koe mai i ei te fiafia tonu?

17. Kaia e ‵tau ei o fai fakavave te galuega talai?

¹⁷ A te galuega talai e ‵tau o fai fakavave. E ‵tau mo tatou o  “folafola atu te muna,” kae e ‵tau o “fai fakavave.” (2 Timoteo 4:2) E ‵tau o lagona ne tino a mea e uiga ki te Malo o te Atua. Muna a te Tusi Tapu: “A te aso lasi o Ieova ko pili mai! Ko pili mai kae ko oko eiloa i te vave mai!” A te gataga “ka se tuai eiloa!” (Sefanaia 1:14; Sapakuka 2:3) Ao, i se taimi pili mai mua nei, ka fakaseai atu ei ne Ieova a te lalolagi masei a Satani. Koi tuai o tupu te mea tenā, e ‵tau o avatu se fakailoaga ki tino ko te mea ke filifili latou o tavini atu ki a Ieova.

18. Kaia e ‵tau ei o tapuaki tatou ki a Ieova fakatasi mo nisi Kelisiano ‵tonu?

¹⁸ E manako a Ieova ke tapuaki atu tatou ki a ia fakatasi mo nisi Kelisiano ‵tonu. Muna a te Tusi Tapu: “Ke na mafau‵fau tatou te suā tino ki te suā tino o fakama‵losi atu ke fakatau a‵lofa kae fai a mea ‵lei, ke mo a ma ‵galo sāle tatou i ‵tou fakatasiga, e pelā mo te masani a nisi tino, kae ke fakamalosi atu te suā tino ki te suā tino, kae maise eiloa me ko iloa ne koutou i te aso tenā ko pili mai.” (Epelu 10:24, 25) E ‵tau o fai ne tatou te ‵toe mea e mafai o fai ke ‵kau atu ki fakatasiga katoa. E tuku mai i fakatasiga se avanoaga ke fakatau fakamalosi ne tatou te suā tino ki te suā tino.

19. Ne a mea e mafai o fesoasoani mai ki a tatou ke a‵lofa ki ‵tou taina mo tuagane Kelisiano?

¹⁹ Kafai e kau koe ki fakatasiga, ka maua ne koe a taugasoa kolā ka fesoasoani atu ke tapuaki koe ki a Ieova. Ka fetaui koe mo taina mo tuagane kese‵kese, kolā e fai foki ne latou te ‵toe mea e mafai o fai ke tapuaki atu ki a ia, e pelā eiloa mo koe. E se ‵lei katoatoa latou kae fai mea ‵se foki, e pelā eiloa mo koe. Kafai e fai latou penā, ke na toka koe o fakamagalo latou. (Faitau te Kolose 3:13.) Ke saga atu faeloa ki uiga ‵lei o ou taina mo tuagane Kelisiano, mai te faiga penā ka fai ei ke alofa koe ki a latou kae ke gasolo aka eiloa o pili koe ki a Ieova.

20, 21. Se a “te ola tonu”?

²⁰ E manako a Ieova ke maua ne ana taugasoa katoa te ‵toe olaga ‵lei. E akoako mai te Tusi Tapu ki a tatou me ka ‵kese ‵ki eiloa te ‵tou olaga i aso mai mua mo te olaga i aso nei.

²¹ I aso mai mua, ka ola tatou ki te se-gata-mai, kae e se i tausaga fua e 70 io me 80. Ka maua ne tatou te “ola se-gata-mai” i se olaga malosi ‵lei, filemu kae fia‵fia i se palataiso gali. Tenā te mea e taku ne te Tusi Tapu ko “te ola tonu.” E tauto mai a Ieova ke tuku mai ki a tatou a te ola tonu tenei, kae e ‵tau o fai ne tatou te ‵toe mea e mafai o fai i te taimi nei ke “puke ‵mau” ki ei.—1 Timoteo 6:12, 19.

22. (a) E mafai pefea ne tatou o ‘puke ‵mau ki te ola tonu’? (e) Kaia e se fai ei a te ola se-gata-mai e pelā me se ‵togi o ‵tou taumafaiga?

²² E mafai pefea ne tatou o ‘puke ‵mau ki te ola tonu’? E ‵tau mo tatou o “ga‵lue ki mea ‵lei” kae ke “mau‵mea i te faiga o galuega ‵lei.” (1 Timoteo 6:18) Ko tena uiga e ‵tau mo tatou o fakagalue aka a mea ne tauloto ne tatou mai te Tusi Tapu. Kae e se fakalagolago eiloa a te mauaga o te ola tonu ki ‵tou taumafaiga totino. A te ola se-gata-mai e sē se ‵togi e maua ne tatou ona ko ‵tou taumafaiga. A te mea tenā se meaalofa mai i a Ieova ki ana tavini fakamaoni, se fakaakoakoga o tena “alofa tauanoa.” (Loma 5:15) E manako eiloa te Tamana i te lagi o tuku atu ki ana tavini fakamaoni a te meaalofa tenei.

23. Kaia e ‵tau ei o fai ne tatou a fakaikuga ‵tonu i te taimi nei?

²³ Ke fesili ifo ki a koe eiloa, ‘E mata, e tapuaki atu au ki te Atua i te auala e manako a ia ki ei?’ Kafai e iloa ne koe me e ‵tau o fai ne koe ne fakama‵fuliga, e ‵tau o na fai eiloa ne koe i te taimi nei. Kafai e fakalago‵lago tatou ki a Ieova kae fai so se mea e mafai ko te mea ke faka‵logo ki a ia, ka fai eiloa a Ieova mo fai ‵tou lafiga. Ka puipui ne ia ana tino fakamaoni i te vaitaimi o aso fakaoti o te lalolagi masei a Satani.  Ko fakamautinoa ei ne Ieova me ka ola eiloa tatou i te Palataiso ki te se-gata-mai, e pelā eiloa mo tena tautoga. Ao, e mafai eiloa o maua ne koe te ola tonu māfai e fai ne koe a fakaikuga ‵tonu i te taimi nei!