1, 2. «Идегелдиг чаглакты» кайыын тып ап болур бис?

УЛУГ шуурган үезинде кудумчуга турган дижик силер. Дээр караңгылап, кызаңнаашкын кызаңайнып, диңмирээшкин диңмиреп, суггур чаъс-даа келген. Ынчан силер дүрген-не чаглактаныр чер дилеп эгелээр силер. А кажан ону тып алырыңарга, сеткилиңер оожургаар.

² Амгы үеде бис база ындыг «улуг шуурганныг» үеде чурттап турар бис. Делегейде байдал хүнден хүнче баксырап бар-ла чыдар. Ындыг-даа болза, бистиң хоргадалывыс бар. «Дээрги-Чаяакчыга: „Бурганым, Сен мээң хоргадалым сен, быжыг шивээм сен, мен Сеңээ идегээр мен“ — деп чугаалаар сен» — деп, ыр күүседикчизи бижээн (Ырлар 90:2). Иегованы шынап-ла бистиң хоргадалывыс деп болур, чүге дизе Ол биске бергелерни ажып эртеринге дузалавышаан, келир үеге хамаарыштыр идегелди берип турар.

3. Иегова биске хоргадал болзун деп күзээр болзувусса, чүнү канчаар ужурлуг бис?

³ Оруувуска кандыг-даа бергелер турза, Иегова биске оларны ажып эртер күштү бээр. Бурган кандыг-даа дайзыннарывыстан артык күштүг. Чуртталгавыска кончуг берге байдал таваржып кээр-даа болза, шупту хилинчек-човалаңывыстың  уржуктарын Иегова келир үеде ап кааптар дээрзинге чигзинмес бис. «Бурганның ынакшылының ачызында бодуңарны шынчы кадагалаңар» — деп, Библия бисти кыйгырып турар (Иуда 21). Иеговадан ырай бээр болзуңарза, Ооң дузазын ап шыдавайн баар силер.

4, 5. Иегова ынакшылын биске канчаар көргүзүп турарыл?

⁴ Иегова-биле найыралывысты чидирбес дээш, Ооң биске күштүг ынакшылын сактып чоруур болзувусса эки. Ол биске кайы хире хөй чүүлдү кылып берген-дир, бодап безин көрүңер даан! Иегова биске ынакшылын кайгамчыктыг бөмбүрзекти, бойдусту болгаш дириг амытаннарны чаяап бергени-биле илереткен. Оон аңгыда Ол биске элбек амданныг аъш-чемни база арыг сугну берген. Иегова биске Библияны таварыштыр Бодунуң адының утказын база чараш шынарларының дугайында ажыткан. Ынчалза-даа Бурганның биске сөңнээн белектериниң эң-не үнелии — Бодунуң Оглун, Иисус Христосту, бис дээш амы-тынын бээр кылдыр черже чорутканы-дыр (Иоанн 3:16). Иисустуң өргүлүнүң ачызында келир үеже идегелдиг апарган бис.

⁵ Иегова дээрде Мессиан Чагырганы тургускан, ол чагырга удавас бүгү-ле бузут-бакты чок кылыр. Ооң ачызында бүгү чер дываажаң апаар. Аңаа кижилер амыр-тайбыңга, аас-кежикке сеткили ханып, мөңге чурттаар (Ырлар 36:29). Оон ыңай Иегова кижи бүрүзү дээш сагыш човап турары-биле  ынакшылын илередип чоруур. Ол биске чуртталгада эң-не эки орукту айтып берип, бистиң мөргүлдеривисти кезээде дыңнаарын аазап турар.

6. Иегованың ынакшылынга канчаар харыылаар болзувусса экил?

⁶ Иегованың ынакшылынга канчаар харыылап болур? Ооң силерге кылган бүгү чүүлү дээш, өөрүп четтиргениңерни илередиңер. Харааданчыг чүүл, амгы үеде дыка хөй улус өөрүп четтирерин билбес. Ындыг улус Иисус Христостуң үезинде база турган. Бир катап Иисус кеш аарыглыг он кижини экиртип каарга, оларның чүгле чаңгызы өөрүп четтиргенин илередип чедип келген (Лука 17:12—17). Иеговага өөрүп четтирерин кажан-даа утпаалыңар!

7. Иеговага ынакшылывыс кандыг болур ужурлугул?

⁷ Бурган биске ынак болганда, бис база Аңаа ынак болур ужурлуг бис. Иисус Иеговага бүгү-ле чүлдү-чүрээнден, бүгү-ле сеткил-сагыжындан, бүгү-ле угаан-сарыылындан ынак болурун өөреникчилеринге чагаан. (Номчуптуңар: Матфей 22:37.) Ооң утказы кандыгыл?

8, 9. Иеговага ынаавысты канчаар көргүзүп болур бис?

⁸ «Иеговага ынак мен» деп анаа-ла чугаалаары чедер бе? Чок. Иеговага бүгү-ле чүлдү-чүрээвистен, бүгү-ле сеткил-сагыжывыстан, бүгү-ле угаан-сарыылывыстан ынаавыс ажыл-херээвистен көскү болур ужурлуг (Матфей 7:16—20). «Бурганга ынаавысты Ооң чагыгларын күүсеткенивис-биле көргүзер бис, а Ооң чагыгларын күүседири берге эвес» — деп Библияда тода бижээн. (Номчуптуңар: 1 Иоанн 5:3.)

 ⁹ Иегованы дыңнаар болзувусса, чуртталгавыс аас-кежиктиг болур (Исайя 48:17, 18). Иегова-биле найыралдыг артарынга биске чүү дузалаарыл? Бо айтырыгның харыызын билип алыылыңар.

10. Иегованың дугайында билип алырын чүге уламчылаар ужурлуг бис?

¹⁰ Иегова-биле найыралыңарның канчаар эгелээнин сактыр-дыр силер бе? Библияны өөренип эгелээш, Бурганның дугайында хөйнү билген тудум, Ооң өңнүү апаар күзелиңер тыптып келген. Бурган-биле найыралды одагга дөмейлеп болур. Одааңарны өжүрбес дээш, ыяшты ынаар үргүлчү киир октаар болгай силер. Ооң-биле дөмей, Бурган-биле найыралыңарның «одаа» өшпезин дээш, Иегованың дугайында билиглерни алырын уламчылаңар (Чугаалар 2:1—5).

11. Библейжи алыс шын силерге кандыг салдарлыг болурул?

¹¹ Билип ап турарыңар библейжи алыс шын силерниң чүрээңерге албан дээштиг болур. Ол ышкаш Иисус бодунга хамааржып турган библейжи өттүр билген медеглелдерни ийи өөреникчизинге тайылбырлап чорда, оларның «чүректери хып чораан». Олар мынча дээннер: «Ол орук ара бистиң-биле чугаалажып чорда база Бижилгениң утказын биске тайылбырлап чорда, чүректеривис хып чорбажык бе?» (Лука 24:32).

12, 13. а) Бурганга ынакшылывыс соой берип болур бе? б) Бурганга ынак бооп артарынга биске чүү дузалаарыл?

¹² Иисустуң өөреникчилеринге Бижилгениң чамдык  кезектерин билип алганы ол хире дээштиг болган! Силер база Библияның утказын билип эгелээш, улуг өөрүшкүнү миннинген чадавас силер. Ол чүүл силерни Иегова-биле оон-даа чоок найыралдажып, Аңаа ынак болурунче оттурган. Ынчалза-даа Бурганга ынакшыл соой берип болур, ындыг чүүлдүң болу бээрин күзевес-ле болгай силер (Матфей 24:12).

¹³ Бурганның өңнүү апарган-даа болзуңарза, Ооң-биле найыралыңарны быжыглаарын уламчылаңар. Бурганның болгаш Иисус Христостуң дугайында билиглерни улаштыр-ла алыңар база билип алган чүүлүңерниң дугайында хандыр боданыңар. Ол билиглер силерниң чуртталгаңарга салдар чедирер деп утпаңар (Иоанн 17:3). Библияны номчуп азы ону хууда шинчилеп тургаш, бодуңарга  мындыг айытырыгларны салыңар: «Иегованың дугайында чүнү билип алдым? Чүге бүгү-ле чүлдү-чүрээмден, сеткил-сагыжымдан ынак болурумга Иегова төлептигил?» (1 Тимофейге 4:15).

14. Иеговага ынакшылды быжыктырарынга, мөргүл канчаар дузалап болур?

¹⁴ Чоок өңнүктер чүзү-биле онзаланып турарыл? Олар үргүлчү кады аралажып чугаалажыр болгай, ооң ачызында оларның найыралы быжыгар. Шак ынчаар бис база Иегова-биле үргүлчү мөргүл таварыштыр чугаалажыр болзувусса, Бурган-биле найыралывыс быжыгар. (Номчуптуңар: 1 Фессалоникчилерге 5:17.) Мөргүл — дээрде Адавыстың биске кайгамчык белээ-дир. Мөргүлдеривис сеткиливистиң ханызындан боор ужурлуг (Ырлар 61:9). Доктаадып алган мөргүлдерни катаптаан ажыы чок, чүрээңерниң ханызындан мөргүңер. Ынчангаш Библияны өөренирин уламчылап, сеткилиңер ханызындан мөргүүр болзуңарза, Иеговага ынакшылыңарны кадагалап алыр силер.

15, 16. Суртаал ажылынга хамаарылгаңар кандыгыл?

¹⁵ Иегова-биле найыралывысты кошкатпас дээш, Ооң дугайында өскелерге чугаалаар болзувусса эки. Ол дээрге биске улуг алдар-хүндү-дүр (Лука 1:73—75). Оон аңгыда суртаалдаар хүлээлгени Христос бодунуң эдерикчилеринге дааскан. Бис шупту Бурганның Чагыргазының дугайында буянныг медээни суртаалдаар ужурлуг бис. Силер ону кылып турар силер бе? (Матфей 24:14; 28:19, 20).

 ¹⁶ Павел элчин суртаалдаар аргазын аажок үнелеп, ону «эртине-байлак» деп турган (2 Коринфичилерге 4:7). Амгы үеде Иегованың болгаш Ооң күзел-соруунуң дугайында чугаалаарындан артык чугула ажыл чок. Ол дээрге бистиң Бурганга мөгейиишкинивистиң кезээ-дир. Бурган силерниң күжениишкиннериңерни аажок үнелеп турар (Еврейлерге 6:10). Суртаал ажылынга киржилгеңер чүгле силерге эвес, а силерни дыңнап турар улуска база ажыктыг болур. Олар силер ышкаш, Иеговага чоокшулап, мөңге чурттаар шаңналды алыр. (Номчуптуңар: 1 Коринфичилерге 15:58.) Шынап-ла, Чагырга дугайында суртаалдаары төлептиг ажыл!

17. Суртаал ажылын чүге соңгаарлатпас ужурлуг бис?

¹⁷ Бурганның медээзин соңгаарлатпайн суртаалдаар ужурлуг бис (2 Тимофейге 4:2). Кижилерге Бурганның Чагыргазының дугайында дүрген дыңнадыр болза эки. Библияда мынча дээн: «Дээрги-Чаяакчының өндүр улуг хүнү чоокшулап келген — далаштыг кел чыдар», ол «үр үеде саадавас» (Софония 1:14; Аввакум 2:3). Удавас Иегова Эрликтиң каржы делегейин узуткаар. Ынчангаш улус Иеговага бараалгаар шиитпирни хүлээп четтигиптер кылдыр, ооң дугайында оларга сагындырар ужурлуг бис.

18. Иегова бисти чыышта акы-угбалар-биле кады Аңаа мөгееривисти чүге күзеп турар?

¹⁸ Иегова бисти чыышта акы-угбалар-биле кады Аңаа мөгееривисти күзеп турар. «Бот-боттарывыска сагыш човангыр бооп, ынакшылче база буянныг херектерже бот-боттарывысты ыдалап  көрээлиңер. Чыглып, аралажырындан ойталаваалы (чамдык улус аңгыланып чаңчыга берген болгай), харын бот-боттарывысты деткип көрээли, сөөлгү хүннүң чоокшулап орарын көргеш, улам күштүг деткижээлиңер» — деп Библияда бижээн (Еврейлерге 10:24, 25). Ынчангаш чыыштарны үспес дээш, бар-ла шаавыс-биле кызар болзувусса эки, чүге дизе чүгле аңаа бот-боттарывысты деткижип, быжыктырып болур бис.

19. Акы-угбаларга ынак болурунга биске чүү дузалаарыл?

¹⁹ Чыыштарже барып тургаш, Иеговаже чоокшулаарынга дузалаар өңнүктерлиг апаар силер. Силер ышкаш, сеткилиниң ханызындан Иеговага бараалгап чоруур акы-угбалар-биле аңаа таныжып алыр силер. Ынчалза-даа олар база тергиин эвес болгаш, частырыгларны кылыптып болур, ынчангаш өршээринге белен болуңар. (Номчуптуңар: Колосчуларга 3:13.) Чыышта ха-дуңманың эки шынарларын үргүлчү эскерип, оларның четпес талаларын херекке албазын кызыдыңар. Ынчан акы-угбаларга ынак болуру силерге белен болур база Иеговага чоок апаар силер.

20, 21. «Ёзулуг эки амыдырал» дээрге кандыг амыдырал чүвел?

²⁰ Иегова өңнүктериниң аас-кежиктиг болурун күзеп турар. Бистиң амыдыралывыс келир үеде көңгүс өске апаар деп Библияда бижээн.

²¹ Бис амгы үеде ышкаш 70—80 хар эвес, а кезээ мөңгеде кайгамчыктыг дываажаңга тергиин кадыкшылдыг чурттаар бис. Ынчан кымдан-даа, чүден-даа  кортпайн, ёзулуг аас-кежиктиг болур бис! Ындыг чуртталганы Библияда ёзулуг эки амыдырал дээн. Иегова шак ындыг амыдыралды биске белекке бээрин аазап турар, ынчалза-даа чүгле чаңгыс негелде бар — «мөңге амыдыралды чаалап алыр» ужурлуг бис (1 Тимофейге 6:12, 19).

22. а) «Мөңге амыдыралды чаалап алыр» дээрге чүү дээни ол? б) Мөңге амыдыралды кижи боду чедип ап болур бе? Тайылбырлаптыңар.

²² «Мөңге амыдыралды чаалап алыр» дээрге чүү дээни ол? «Буян тарыыр, буянныг ажыл-херээ-биле байыыр» дээни ол (1 Тимофейге 6:18). Өскээр чугаалаарга, Библиядан билип алган билиглеривисти амыдыралывыска ажыглаар ужурлуг бис. Ынчалзажок ёзулуг мөңге амыдыралды кижи боду чедип ап шыдавас. Ол дээрге Иегованың биске «хайырлаан авыралдыг белээ-дир» (Римчилерге 5:15). Дээрде Адавыс Бодунуң шынчы бараалгакчыларынга мөңге амыдыралды хайырлаарын аажок күзеп турар дээрзинге чигзинмеңер.

23. Кандыг шиитпирни хүлээп алыр ужурлуг силер? Тайылбырлаптыңар.

²³ «Бурганның күзеп турары ышкаш, Аңаа бараалгап турар мен бе?» деп бодуңардан айтырыңар. Амыдыралыңарда өскертир хире чүүлдер бар болза, ону ам дораан кылыңар. Иеговага дыңнангыр бооп, Аңаа ынаныр болзуңарза, чүгле ынчан Ооң камгалалын алыр силер. Эрликтиң каржы делегейиниң сөөлгү хүннеринде Иегова шынчы бараалгакчыларын камгалаар база аазааны ёзугаар дываажаңга мөңге амыдыралды оларга  белекке бээр. Ийе, ёзулуг эки амыдыралды чедип ап болур силер! Ол чүгле силерниң боттарыңардан хамааржыр.