1, 2. ¿Bu xuʼ jta jnakʼobbailtik li avi kʼakʼale?

NOPO ti yakalot ta xanbale, vaʼun chlik avakʼ venta ti yakal ch-ikʼub li vinajele xchiʼuk ti tsots chbakʼ chauke. Jaʼ to chavile ta anil tal tsatsal voʼ. Ta anil chlik akʼel bu xuʼ chbat anakʼ aba. ¿Mi mu jechuk ti xkuxet chavaʼi mi la ata bu ch-echʼ avuʼun li voʼe?

² Li avie, jaʼ jechtik li kuxlejale, yuʼun li balumile yantik sok batel. Xuʼ van xi xa jakʼbe abae: «¿Bu xuʼ jta jnakʼobbailtik?». Xi laj yal jun jtsʼibajom ta Vivliae: «Xi chkalbe li Jeovae: ‹Voʼot jnakʼobbailot xchiʼuk voʼot jtsatsal pojobbailot, voʼot Jdiosot ti jpatoj koʼonton ta atojolale›» (Salmo 91:2). Li Jeovae xuʼ skoltautik sventa stsal kuʼuntik li jvokoltike xchiʼuk chakʼbutik jun kʼupil sba spatobil koʼontontik.

3. ¿Kʼusi skʼan jpastik sventa skoltautik li Jeovae?

³ ¿Kʼu yelan chchabiutik li Jeovae? Li stuke xuʼ tskoltautik ta stsalel kʼusiuk vokolil. Jech xtok, mas to oy sjuʼel kʼuchaʼal li buchʼu tskʼan chakʼ jvokoltike. Mi oy kʼusi chopol ta jnuptantik li avie, xuʼ jpʼel koʼontontik ti tslajes skotol jvokoltik ta jelavel li Jeovae. Xi tstij koʼontontik li Vivliae: «Te xakomik-o li ta kʼanelal yuʼun Diose» (Judas 21). Mi ta jkʼantik akʼo skoltautik ta jvokoltik li Jeovae, skʼan xkamigointik-o. ¿Kʼuxi xuʼ xkamigointik-o?

4, 5. ¿Kʼuxi chakʼbutik ta ilel Jeova ti skʼanojutike?

⁴ Sventa xkamigointik-o li Jeovae, skʼan teuk ta joltik ti  skʼanojutik tajeke. Nopbo skʼoplal skotol li kʼusitik spasoj ta jtojolaltike. La smeltsan li kʼupil sba balumil ti noj ta kʼupil sba nichimetik, teʼetik xchiʼuk chonbolometik. Jech xtok, yakʼojbutik voʼ xchiʼuk lekil veʼliletik. Li Jeova xtoke yakʼoj jnaʼtik ta Vivlia li sbie xchiʼuk ti kʼu yelan stalelaltake. Pe ti kʼu yelan mas to laj yakʼ ta ilel ti skʼanojutike jaʼo kʼalal la stak talel ta balumil li skʼanbil Nichʼon sventa xcham ta jtojolaltike (Juan 3:16). Koliyal ti jech la spas li Jeovae oy kʼusi kʼupil sba ta jkʼupintik ta jelavel.

⁵ Li Jeovae svaʼanoj ta vinajel jun Ajvalilal. Li Ajvalilal taje tslajes skotol li vokoliletike xchiʼuk tspas ta jun paraiso li balumil sventa junuk koʼontontik xchiʼuk ti xijmuyubaj sbatel osile (Salmo 37:29). Oy yan kʼuxi chakʼbutik ta ilel Jeova ti skʼanojutike, yuʼun chalbutik kʼu yelan skʼan xijkuxi. Chalbutik xtok ti akʼo jkʼopontike xchiʼuk ti ta skotol ora chaʼibutike. Jamal xvinaj ti skʼanojutik jkotoltik li Jeovae.

6. ¿Kʼuxi xuʼ chavakʼ ta ilel ti chatoj ta vokol ti skʼanojutik li Jeovae?

⁶ ¿Kʼuxi xuʼ chavakʼ ta ilel ti chatoj ta vokol ti skʼanojutik li Jeovae? Jaʼ ti oyuk sbalil xavil li kʼusitik spasoj ta atojolale. Kʼux ta alel, pe epal krixchanoetike mu snaʼ stojik ta vokol. Taje jaʼ jech kʼot ta pasel li ta skʼakʼalil Jesus eke. Jun veltae, li Jesuse la xpoxta lajunvoʼ viniketik ti ipik ta leprae, pe kʼajomal jun la stoj ta vokol (Lukas 17:12-17). Li voʼotike skʼan jechuk jpastik kʼuchaʼal li vinik ti la stoj ta vokole, yuʼun ta skotol ora skʼan jtojbetik ta vokol li Jeovae.

7. ¿Kʼu yelan skʼan jkʼantik li Jeovae?

⁷ Skʼan xkakʼbetik yil Jeova ti jkʼanojtike. Xi laj yalbe yajchankʼoptak li Jesuse: «Skʼan xakʼan ta sjunul avoʼonton li Jeova Dios avuʼune, ta sjunul akuxlejal xchiʼuk ta sjunul anopben» (kʼelo Mateo 22:37). ¿Kʼusi skʼan xal taje?

8, 9. ¿Kʼuxi chkakʼbetik yil Jeova ti jkʼanojtike?

 ⁸ ¿Mi bal noʼox ti chkaltik ti jkʼanojtik li Jeovae? Moʼoj, yuʼun mi jkʼanojtik Jeova ta sjunul koʼontontik, ta sjunul jkuxlejaltik xchiʼuk ta sjunul jnopbentike, chkakʼtik ta ilel ta skotol li kʼusitik ta jpastike (Mateo 7:16-20). Li Vivliae chal ti ta jchʼunbetik smantaltak Jeova mi jkʼanojtike, ¿mi vokol ta pasel taje? Moʼoj, yuʼun muʼyuk vokol ta chʼunbel li smantaltak Jeovae (kʼelo 1 Juan 5:3).

⁹ Kʼalal ta jchʼunbetik smantal li Jeovae, xijmuyubaj xchiʼuk oy sbalil chkil li jkuxlejaltike (Isaias 48:17, 18). Pe ¿kʼusi tskoltautik sventa xkamigointik-o li Jeovae? Jkʼeltik batel.

10. ¿Kʼu yuʼun skʼan xavojtikin-o batel li Jeovae?

¹⁰ ¿Kʼuxi lik avamigoin li Jeovae? Jaʼo kʼalal lik achan li Vivliae, yuʼun lik avojtikin li Jeovae xchiʼuk mas lek laj avil aba xchiʼuk. Li yamigoinel Jeovae xkoʼolaj kʼuchaʼal kʼokʼ. Sventa mu xtupʼe, skʼan xachuchbe-o skʼakʼal. Taje jaʼ jech skʼan xapas sventa xavamigoin-o li Jeovae, yuʼun skʼan xavojtikin-o batel (Proverbios 2:1-5).

11. ¿Kʼu yelan chavaʼi aba yuʼun li kʼusitik chachan batel ta Vivliae?

¹¹ Mi chachan-o batel li Vivliae, oy kʼusitik chachan ti chkʼot ta avoʼontone. Jkʼeltik kʼu yelan laj yaʼi sbaik chaʼvoʼ yajchankʼoptak Jesus kʼalal albatik smelolal junantik albil kʼopetike, yuʼun xi laj yalike: «¿Mi mu xtiltunuk koʼontontik kʼalal yakal chchiʼinutik tal ta loʼil ta bee, kʼalal lek tsʼakal la sjambutik tal smelolal li Tsʼibetike?» (Lukas 24:32).

12, 13. 1) ¿Kʼusi xuʼ xkʼot ta stojolal li kʼanelal oy kuʼuntik ta stojolal Jeovae? 2) ¿Kʼusi skʼan jpastik sventa jechuk-o jkʼantik li Jeovae?

¹² Toj kʼotel ta yoʼontonik li kʼusi albatik yuʼun Jesus  li chaʼvoʼ yajchankʼoptake. Xuʼ van jech laj avaʼi aba ek kʼalal lik avaʼibe smelolal li Vivliae. Koliyal taje lik avojtikin li Jeovae xchiʼuk mas to lik akʼan. Mu van xakʼan ti chlaj li kʼanelal avuʼun ta stojolal li Jeovae (Mateo 24:12).

¹³ Avie, jaʼ xa avamigo li Jeovae, jech oxal skʼan xavakʼ avipal sventa masuk to lek xavamigoin. Skʼan ti jech-o xavojtikin batel li Jeova xchiʼuk Jesuse, skʼan xanopbe skʼoplal xtok li kʼusi chachane xchiʼuk skʼan xakʼel kʼu yelan xuʼ xakuxlebin (Juan 17:3). Xi skʼan xajakʼbe aba kʼalal chachan li Vivliae: «¿Kʼusi chchanubtasun ta sventa li Jeovae? ¿Kʼu yuʼun skʼan ti ta sjunul koʼonton xchiʼuk ta sjunul jkuxlejal jkʼan li Jeovae?» (1 Timoteo 4:15).

14. ¿Kʼuxi tskoltautik li orasion sventa jkʼantik li Jeovae?

¹⁴ Mi oy junuk alekil amigoe, ¿mi mu jechuk ti nopoltik noʼox chachiʼin ta loʼile? Jech, taje jaʼ tskoltaot  sventa masuk to lek xavil abaik. Jaʼ jech li Jeova eke, yuʼun mi nopoltik noʼox ta jkʼopontike, mas to lek chkil jbatik xchiʼuk (kʼelo 1 Tesalonisenses 5:17). Jaʼ jun matanal yakʼojbutik Jeova li orasione. Jaʼ yuʼun, skʼan ta sjunuluk koʼontontik jkʼopontik (Salmo 62:8). Skʼan ti mu jchaʼalilantik li kʼusi chkal ta j-orasiontike, yuʼun skʼan jaʼuk xkaltik li kʼusi oy ta koʼontontik ta melele. Mi jech-o ta jchan Jvivliatik xchiʼuk mi ta sjunul koʼontontik ta jpastik orasione, tskoltautik sventa jechuk-o jkʼantik li Jeovae.

15, 16. ¿Kʼusi chanop ta sventa li xcholel mantale?

¹⁵ Sventa xkamigointik-o li Jeovae, skʼan xkalbetik yantik li kʼusitik jchʼunojtike. Jaʼ jun mukʼta matanal yalbel batel skʼoplal li Jeovae (Lukas 1:74). Jech xtok, jaʼ jun mantal laj yalbe Jesus li melel yajtsʼaklomtake. Jaʼ yuʼun, jkotoltik skʼan xkaltik batel li lekil aʼyejetik ta sventa li Ajvalilale. ¿Mi jech yakal chapas batel? (Mateo 24:14; 28:19, 20).

¹⁶ Li jtakbol Pabloe toj tsots skʼoplal laj yil li xcholel mantale, yuʼun la skoʼoltas ta jun «kʼulejal» (2 Korintios 4:7). Li kʼusi mas tsots skʼoplal xuʼ xapase jaʼ ti xavalbe yantik li kʼusi oy ta yoʼonton Jeovae. Kʼalal chachol mantale, jaʼ jech chavichʼ ta mukʼ Jeova xchiʼuk toj ep sbalil chil ti chatun ta stojolale (Ebreos 6:10). Kʼalal chachol mantale, jaʼ jech chakolta yantik sventa xkʼotik ta yamigo li Jeovae xchiʼuk mas to lek xavil aba xchiʼuk li Diose. Xuʼ xakuxi sbatel osil koliyal li cholmantale xchiʼuk xuʼ sta xkuxlejalik ek li buchʼutik chchikintabote (kʼelo 1 Korintios 15:58). ¿Mi oy van kʼusi yan xuʼ xakʼbot xkuxetel avoʼonton?

17. ¿Kʼu yuʼun skʼan xa noʼox cholel li mantale?

 ¹⁷ Skʼan xa noʼox cholel mantal li avie, xi chal li Vivliae: «Cholo li skʼop Diose, akʼo me ta avoʼonton spasel ta anil» (2 Timoteo 4:2). Skʼan xichʼ albel krixchanoetik li lekil aʼyejetik ta sventa li Ajvalilal yuʼun Diose. Xi chal xtok li Vivliae: «¡Nopol xa li smukʼta kʼakʼalil Jeovae!», chal ti anil chnopaj tal li yoraile xchiʼuk «¡ta yorail noʼox chvul!» (Sofonias 1:14; Abakuk 2:3). Jutuk xa tajek skʼan sventa slajesbe sbalumil Satanas li Jeovae. Jech oxal, yoʼ to ta jmalatike skʼan jpʼijubtastik li krixchanoetik sventa tsnopik mi chtunik ta stojolal Jeova.

18. ¿Kʼu yuʼun skʼan jtsob jbatik sventa xkichʼtik ta mukʼ li Jeovae?

¹⁸ Li Jeovae oy ta yoʼonton ti stsob sbaik li melel yajtuneltak sventa x-ichʼat ta mukʼe. Xi chal li Vivliae: «Jech xtok, skʼan me oyuk ta koʼonton jbatik ta jujuntal yoʼ jtijbe jba koʼontontik sventa jkʼan jbatik xchiʼuk jpastik li kʼusitik toj leke, jech xtok, mu me xkiktatik ti ta jtsob jbatik jech kʼuchaʼal oy nopem xaʼiik spasel junantike, jaʼ lek jpatbe jba koʼontontik ta jujuntal, mas to skʼan jech jpastik ta skoj ti chnopaj xa talel li skʼakʼalil chavilike» (Ebreos 10:24, 25). Skʼan xkakʼ kipaltik sventa xijkʼot ta skotol tsobajeletik, yuʼun te ta jtsatsubtas jbatik.

19. ¿Kʼusi tskoltautik sventa masuk to jkʼan li kermanotaktike?

¹⁹ Chata lekil amigoiletik li ta tsobajeletike xchiʼuk jaʼ tskoltaoxuk sventa xatun ta stojolal Jeova. Chavojtikin epal ermanoetik ti yakʼojbeik yipal spasel li kʼusi tskʼan Jeova jech kʼuchaʼal chapas eke. Li ermanoetik taje maʼuk tukʼil krixchanoetik ek xchiʼuk oy onoʼox kʼusi maʼuk jech chbat ta pasel yuʼunik, jaʼ yuʼun ta sjunuluk avoʼonton xavakʼ ta perton (kʼelo Kolosenses 3:13). Jaʼuk xakʼel li slekil talelal ermanoetike, yuʼun jaʼ tskoltaot  sventa masuk xakʼan xchiʼuk ti masuk lek xavil aba xchiʼuk li Jeovae.

20, 21. ¿Kʼusi jaʼ «li batsʼi mero kuxlejale»?

²⁰ Li Jeovae oy ta yoʼonton ti lekuk tajek xkuxlejal li yamigotake. Li Vivliae chchanubtasvan ti ta mas jelavele ta xjel ta jyalel li jkuxlejaltike.

²¹ Ta jelavele, maʼuk xa noʼox chijkuxi 70 o 80 jabil, yuʼun sbatel osil chijkuxi. Ta jkʼupin jkuxlejaltik sbatel osil ta jun paraiso, muʼyuk xa chij-ipaj, jun xa noʼox koʼontontik xchiʼuk chijmuyubaj xa noʼox. Li Vivliae chal ti jaʼ «li batsʼi mero kuxlejale» xchiʼuk yalojbutik Jeova ti chakʼbutik li kuxlejal taje. Jech oxal, skʼan xkakʼ kipaltik sventa jtatik li kuxlejale (1 Timoteo 6:12, 19).

22. 1) ¿Kʼuxi xuʼ jtatik «li batsʼi mero kuxlejale»? 2) ¿Kʼu yuʼun mu jtatik-o ti xkichʼtik akʼbel li kuxlejal sbatel osile?

²² ¿Kʼuxi xuʼ jtatik «li batsʼi mero kuxlejale»? Skʼan xkakʼ kipaltik ta spasel li lekil abtelale (1 Timoteo 6:18). Taje jaʼ skʼan xal ti akʼo jkuxlebintik li kʼusi chal Vivliae. Maʼuk ta jtatik kuxlejal sbatel osil ta skoj ti tsots chkakʼ kipaltike, yuʼun mu onoʼox jtatik-o akʼo mi chkakʼ kipaltik stael. Li Jeovae chakʼbe kuxlejal sbatel osil li tukʼil yajtuneltak ta skoj «slekil yutsil yoʼonton» (Romanos 5:15). Li Jtotik ta vinajele oy onoʼox tajek ta yoʼonton ti chakʼbe smotonin kuxlejal sbatel osil li yajtuneltake.

23. ¿Kʼu yuʼun skʼan lek kʼusi chkʼot ta nopel avuʼun li avie?

²³ Xi xajakʼbe abae: «¿Mi ta xkichʼ ta mukʼ Dios jech kʼuchaʼal oy ta yoʼontone?». Mi chavakʼ venta ti oy kʼusi skʼan xajel ta akuxlejale, jelo noʼox me. Mi ta jpat koʼontontik ta stojolal Jeova xchiʼuk mi chkakʼ kipaltik ta xchʼunbel smantale, chkʼot kʼuchaʼal jnakʼobbailtik. Li Jeovae chchabi yajtuneltak avi ti ta slajebal xa kʼakʼal  kuxulutike. Ta tsʼakale, ta jkʼupintik kuxlejal sbatel osil li ta Paraiso yaloj chakʼbutike. Mi lek kʼusi chkʼot ta nopel avuʼun li avie, xuʼ xakuxi sbatel osil.