1, 2. Кытысь ми умой пегӟон инты шедьтыны быгатомы?

ПУКТЭ син азяды, кужмо сильтӧл дыръя тӥ ураме кемдӥды шуыса. Инбам пеймыт луиз, чилекъя, гудыръя. Тани-тани зорыны кутскоз. Тӥ пегӟон инты утчаськоды. Нош макем тӥ шумпотӥськоды, куке умой пегӟон инты шедьтӥськоды!

² Туннэ ми сыӵе сильтӧл дыръя кадь улӥськомы. Дуннеын югдур уродгес но уродгес луэ. Но милям умой пегӟон интымы вань. Кыӵе? Псаломъёсты гожъясь вераз: «Мынам ватӥськонэ, мынам утиськонэ — Мынам Инмаре, Тыныд мон оскиськыса улӥсько» (Псалтирь 90:2). Иеговаез зэмзэ ик умой пегӟон интыен ӵошатыны луоз, малы ке шуоно со юрттэ милемлы шуг-секытъёсмес вормыны но умой улонлы оскон сётэ.

3. Мар кароно, Иегова милям пегӟон интымы мед луоз шуыса?

³ Улонамы кыӵе гинэ шуг-секытъёсын ми медам пумиське, Иегова милемлы кужым сётоз ваньзэ чиданы. Со трослы кужмогес котькинлэсь, кин милемлы уродзэ лэсьтыны тырше. Улонамы мар ке туж кышкытэз луиз ке но, ми оскыны быгатӥськомы, вуонояз Иегова ваньзэ тупатоз шуыса. Библия ӧте милемыз: «Инмарлэн  яратоназ улэ» (Иуда 21, ВД). Азьланяз но шуг-секытъёс дыръя Иеговалэсь юрттэтсэ басьтон понна, милемлы соин матысь кусыпъёсмес утёно.

4, 5. Кытысь адӟиське, Иегова милемыз яратэ шуыса?

⁴ Иеговаен кусыпъёсмы ноку но медаз сӧриське шуыса, милемлы тодамы возёно, со милемыз туж яратэ шуыса. Малпалэ ай, макем трос со ми понна лэсьтӥз. Со милемлы чебер Музъем, паймымон будосъёсты но пудо-животъёсты сётӥз. Со сяна, со сётӥз милемлы трос пӧртэм ческыт сиён но чылкыт ву. Озьы со милемлы аслэсьтыз яратэмзэ возьматӥз. Библия пыр Иегова вераз милемлы аслаз нимыз но паймымон сямъёсыз сярысь. Нош самой дуноез, мар со ми понна лэсьтӥз,— со аслэсьтыз Пизэ, Иисус Христосэз, музъем вылэ ыстӥз, со ми понна улонзэ мед сётоз шуыса (Иоанн 3:16). Иисуслэн курбонэзлы луыса, милям вуоноезлы осконмы вань.

⁵ Иегова инмын кивалтэт кылдытӥз — Мессиялэсь Эксэйлыксэ, кудӥз ӝоген ваньзэ уродзэ быдтоз. Со Эксэйлык быдэс музъемез райлы пӧрмытоз. Отын адямиос пырак дауръёс ӵоже тупаса но шумпотыса улозы (Псалтирь 36:29). Озьы ик Иегова милемлы аслэсьтыз яратэмзэ возьматэ, куке котькудмы понна нимысьтыз сюлмаське. Со милемлы самой умой улон сюрес  возьматэ но кылзэ сётэ, милесьтым вӧсяськеммес котьку кылзоз шуыса.

6. Кызьы ми возьматыны быгатомы, Инмарлы яратэмез понна тау кариськомы шуыса?

⁶ Кызьы ми возьматыны быгатомы, Инмарлы яратэмез понна тау кариськомы шуыса? Милемлы тау карыны кулэ ваньмыз понна, мар со милемлы каре. Жаляса верано луэ, тросэз туннэ тау уг каро. Озьы ик вал Иисус Христос улон нуналъёсы но. Одӥг пол, куке Иисус гижлочерен висись дас адямиосты бурмытӥз, одӥгез гинэ берытскыса Иисуслы тау кариз (Лука 17:12—17). Ойдолэ ноку но ум вунэтэ Иеговалы тау карыны!

7. Кызьы Иеговаез яратоно?

⁷ Иегова милемыз яратэ. Милемлы но сое яратыны кулэ. Иисус аслаз дышетскисьёсызлы вераз, Иеговаез вань сюлмын, вань лулын, вань визьмын яратоно шуыса. (Лыдӟе Матфейлэсь 22:37.) Мае со возьматэ?

8, 9. Кызьы ми возьматыны быгатомы, Иеговаез яратӥськомы шуыса?

⁸ Тырмыт луоз-а огшоры вераны: «Мон Иеговаез яратӥсько»? Уз. Ми Иеговаез вань сюлмын, вань лулын, вань визьмын яратӥськомы ке, со милям ужъёсысьтымы адӟиськыны кулэ (Матфей 7:16—20). Библиын валамон верамын, ми Инмарез яратӥськомы ке, солэн куронъёсызлэсь кылзӥськомы шуыса. Соослэсь кылзӥськыны секыт ӧвӧл, малы ке шуоно «Солэн курон-косонъёсыз секытэсь ӧвӧл». (Лыдӟе 1 Иоаннлэсь 5:3.)

 ⁹ Ми Иеговалэсь кылзӥськимы ке, милям улонмы шудо луоз (Исаия 48:17, 18). Нош мар юрттоз милемлы Иеговаен матысь кусыпъёсмес утьыны? Ойдолэ тодомы.

10. Малы кулэ азьланяз но Иегова сярысь тодон-валан басьтыны?

¹⁰ Тодӥськоды на-а тӥ, мар бордысен тӥляд Иеговаен кусыпъёсты юнманы кутскизы? Тӥ Библиез дышетыны кутскиды, Инмар сярысь тросгес тодӥды но тӥляд соин эшъёс луэмды потӥз. Инмарен кусыпъёс тылскем выллем, кудаз ялан пу тыроно. Тӥляд уг поты ке, со «тылскем» мед кысоз шуыса, азьланяз но Иегова сярысь тодон-валан басьтэ (Мадёнъёс 2:1—5).

11. Кызьы Библиысь тодон-валанъёс тӥ вылын шӧдӥськозы?

¹¹ Со, мае тӥ Библиысь тододы, одно ик тӥляд сюлмады пыроз. Озьы ик вал Иисуслэн кык дышетскисьёсыныз но, куке Иисус соослы Библиысь асэныз герӟаськем азьпалзэ ивортонъёсты валэктӥз. Тани мар соос шуизы: «Асьмелэн пушкамы сюлэммы ӧз ӝуа-а, куке Со асьмелы сюрес вылысен вераз, куке Священной Гожтэмез асьмелы валэктылӥз?» (Лука 24:32).

12, 13. а) Мар луыны быгатоз Инмарез яратонэн? б) Мар юрттоз милемлы Инмарен кусыпъёсмес утьыны?

¹² Куке Иисуслэн дышетскисьёсыз Гожтэмъёсты валазы, соослэн сюлэмъёссы ӝуаны кутскизы. Тӥ но Библиез валаны кутскемды бере туж шумпотӥды, луоз. Со тӥлесьтыд мылкыддэс ӝутӥз Иегова сярысь эшшо но тросгес тодыны  но сое яратыны. Но Иеговаез яратон сӥяны быгатэ. Веранэз ӧвӧл, тӥляд уг поты, со мед сӥялоз шуыса (Матфей 24:12).

¹³ Тӥляд Инмарен кусыпъёсты матын ке ини, тӥледлы азьланяз но соосты юнматыны кулэ. Инмар сярысь но Иисус Христос сярысь тодон-валан басьтэмысь эн дугдэ. Малпаське со сярысь, мае тодӥды, но тодэмдэс улонады пыртэ (Иоанн 17:3). Библиез дышетыкуды яке лыдӟыкуды малпаське: «Мае мон тодӥ Иегова сярысь? Малы мыным сое вань сюлмыным но вань визьмыным яратоно?» (2 Тимофейлы 2:7).

14. Кызьы вӧсяськон Иеговаез яратонэн герӟаськемын?

¹⁴ Тӥляд матысь эшты вань ке, тӥ ӵем соин дырдэс ортчытӥськоды, вераськиськоды соин.  Соку тӥляд кусыпъёсты эшшо но юнгес луо. Озьы ик Инмарен но. Ми вӧсяськыса соин ӵем вераськиськомы ке, милям соин кусыпъёсмы юнмало. (Лыдӟе 1 Фессалоникаослы 5:17.) Иегова Атаймылы вӧсяськыны луонлык — со номырин ӵошатыны луонтэм дан. Вӧсяськыкумы солы сюлэммес усьтоно (Псалтирь 61:9). Кулэ ӧвӧл вӧсяськонъёсты дышетыны но дышетэм вӧсяськонъёсты вераса вӧсяськыны; милям вӧсяськонъёсмы сюлмысь потыны кулэ. Озьыен, Иеговаез яратонды мед будоз шуыса, кулэ азьланяз но Библиез дышетыны но сюлмысь вӧсяськыны.

15, 16. Кызьы тӥ учкиськоды тодытон уж шоры?

¹⁵ Иеговаен кусыпъёсмы медаз лябӟе шуыса, милемлы кулэ Иегова сярысь мукетъёсызлы вераны. Со бадӟым дан. Со сяна, со — уж, кудзэ Христос аслаз дышетскисьёсызлы сётӥз. Ми ваньмы Инмарлэн Эксэйлыкез сярысь ӟеч иворез вераны кулэ. Нош тӥ вераськоды-а ини сое? (Матфей 24:14; 28:19, 20).

¹⁶ Апостол Павел тодытон уже пыриськыны луонлыкез туж дунъяз. Со сое «узырлык» шуыса нимаз (2 Коринфъёслы 4:7). Асьме нуналъёсы Иегова но солэн малпанэз сярысь вераны — со туж кулэ луись уж. Со Иеговалы йыбыртъян луэ. Иегова туж дунъя тӥлесьтыд тыршемдэс (Еврейёслы 6:10). Тодытон уже пыриськон  одно ик пайда ваёз тӥледлы но, соослы но, кинъёс тӥледыз кылзо: соос но, тӥ кадь ик, Иеговаен матысь кусыпъёс тупатозы но пырак улон басьтозы. (Лыдӟе 1 Коринфъёслы 15:58.) Вань-а кыӵе ке мукет уж, кудӥз со быдӟа шумпотон вае?

17. Малы тодытон ужез ӝегатскытэк быдэстоно?

¹⁷ Тодытон уж — со уж, кудзэ ӝегатскытэк быдэстоно. Библиын верамын: «Инмар кылэз тодыты, тупась дыре но, тупасьтэм дыре но тодытыны ялан дась лу» (2 Тимофейлы 4:2). Адямиослы кулэ кылыны Инмарлэн Эксэйлыкез сярысь. Библия вера: «Матын Кузё-Инмарлэн быдӟым нуналыз, матын — но туж дыртэ». Озьы ик со вера, та дуннелы пум вуон сярысь азьпалзэ ивортон «одно ик быдэсмоз, уз воштӥськы» шуыса (Софония 1:14; Аввакум 2:3). Ӝоген Иегова Шайтанлэсь лек дуннезэ быдтоз. Со сярысь ми адямиослы вераны кулэ, соос Иеговалы ужаны-тыршыны ужпум кутыны мед вуозы шуыса.

18. Малы милемлы Иеговалы йыбыртъяно мукет ужась-тыршисьёсыныз ӵош?

¹⁸ Иеговалэн потэ, ми солы мукет ужась-тыршисьёсыныз ӵош мед йыбыртъяломы шуыса. Библиын гожтэмын: «Огмылы огмы юрттӥськыса уломе, яратыса, ӟеч ужъёс лэсьтыса улыны мылкыдмес ӝутоме. Огазьын вӧсяськонъёсы ветлытэк ум улэ, кызьы вырыны даурто куд-огъёсыз. Огмылэсь огмы мылкыдмес  лӧпкытыломе, уката ик, Солэн нуналэзлэсь матэгес вуэмзэ шӧдӥськоды ке» (Еврейёслы 10:24, 25). Кароно ваньзэ, мае быгатӥськомы, пумиськонъёсы кельтылытэк ветлон понна, малы ке шуоно сыӵе пумиськонъёсын ми быгатомы ог-огмес юнматыны но буйгатыны.

19. Мар юрттоз милемлы вын-агайёсмес со сузэр-апайёсмес яратыны?

¹⁹ Пумиськонъёсы ветлыса, тӥ быгатоды умой эшъёс шедьтыны, кудъёсыз юрттозы тӥледлы Иеговалы матэгес кариськыны. Тӥ тодматскоды пӧртэм вын-агайёсын со сузэр-апайёсын, кудъёсыз, тӥ кадь ик, вань сюлмысьтызы Иеговалы ужало-тыршо. Соос но, тӥ кадь ик, тырбыдэстэмесь но янгышало. Соин ик дась луэ соосты простить карыны. (Лыдӟе Ефесъёслы 4:32.) Вын-агайёслэсь но сузэр-апайёслэсь котьку умой сямъёссэс адӟыны тырше, тырмымтэоссылы саклыктэс эн висъялэ. Соку тӥледлы капчигес луоз соосты яратыны но Иеговалы матэгес кариськыны.

20, 21. Кыӵе со «зэмос улон»?

²⁰ Иеговалэн потэ, солэн вань эшъёсыз шудоесь мед луозы шуыса. Библия вера, вуонояз улонмы чылкак мукет луоз шуыса.

²¹ Ми 70—80 ар гинэ ум улэ, ми пырак дауръёс ӵоже уломы. Ми уломы туж чебер райын. Милям умой тазалыкмы луоз. Милемлы нокинлэсь  кышканы луоз. Ми зэмзэ ик шудоесь луомы! Ӵапак сыӵе улонэз апостол Павел «зэмос улон» шуыса нима. Иегова кылзэ сётэ милемлы сыӵе улон кузьманы. Но со понна милемлы со улон борды юн кырмиськоно, осконлы ярамон уж лэсьтыса (1 Тимофейлы 6:12, 19, ВД).

22. а) Кызьы ми зэмос улон борды юн кырмиськыны быгатомы? б) Пырак улонэз асьмелэн тыршеменымы басьтыны быгатомы-а? Валэктэ.

²² Кызьы ми зэмос улон борды юн кырмиськыны быгатомы? «Ӟеч ужъёс лэсьтыса» но «ӟеч ужъёсын узырмыса» (1 Тимофейлы 6:18). Мукет кылъёсын вераса, милемлы кулэ улонамы пыртыны сое, мае ми Библиысь тодӥмы. Нош зэмос улонэз — пырак улонэз — асьмелэн тыршеменымы басьтыны быгатомы-а? Ум. Пырак улон — со Иеговалэн кузьымез. Со сое кузьма, малы ке шуоно со ӟечлыко Инмар (Ефесъёслы 2:8). Милям инмысь Атаймылэн зэмзэ ик аслаз оскымон ужась-тыршисьёсызлы пырак улон кузьмамез потэ.

23. Малы тӥледлы али ик ини шонер быръён лэсьтоно?

²³ Котькудӥз малпаськыны кулэ: «Йыбыртъясько-а мон Инмарлы озьы, кызьы солэн потэ?» Тӥледлы потэ ке, улонады мае ке воштоно на шуыса, али ик ини воштӥськонъёс лэсьтэ. Иегова тӥледлы пегӟон инты луоз соку гинэ, куке тӥ солэсь кылзӥськоды но солы оскоды. Шайтанлэн лек дуннеезлэн берпуметӥ нуналъёсаз Иегова утёз аслэсьтыз оскымон ужась-тыршисьёссэ  но райын пырак улон кузьманы сётэм кылзэ быдэстоз. Бен, тӥ быгатоды пырак улыны, но со понна тӥледлы али ик ини шонер быръён лэсьтоно.