1, 2. Бүгүнки күндә пана җайни қәйәрдин тапсақ болиду?

 ТӘСӘВВУР ҚИЛИҢ, сиз кочида кетип барисиз. Бир пәйттә асманни қоюқ қара булут қаплап, чақмақ чеқип һава гүлдүрләшкә башлиди. Кейин асмандин челәкләп қуйғандәк, қаттиқ ямғур яғди. Шу чағда сиз өзүңизгә пана болидиған җай издәшкә башлайсиз. Сиз шундақ йәрни тапқанда, өзүңизни нәқәдәр бехәтәр һис қилип, хошал болисиз!

² Бүгүнки күндә биз шуниңға охшаш әһвалда һаят кәчүриватимиз. Дуниядики әһвал барғансири начарлишиватиду. Бәлким сиз: «Пана җайни қәйәрдин тапсам болиду?»— дәп сорайдиғансиз. Зәбур язғучиси Йәһва Худаға: «Панаһим һәм һимайичим, Сән мән тайинидиған Тәңримдур»,— дәп ейтқан (Зәбур 90:2). Йәһва бизни җәбир-җапаларға толған зулмәт дунияда һимайә қилиду вә әҗайип үмүт бериду.

3. Йәһва бизни һимайә қилиши үчүн немә қилалаймиз?

³ Йәһва бизни қандақ һимайә қилиду? У бизгә қийинчилиқларни йеңип чиқишқа ярдәм бериду вә бизгә зиян-зәһмәт йәткүзәләйдиған дүшмәнләрдин күчлүгирәк. Һәтта туюқсиз қийинчилиқларға дуч кәлсәкму, Йәһва келәчәктә һәммә зиян-зәһмәтләрни йоқ қилидиғанлиғиға ишәнчимиз камил. Муқәддәс китап өзүмизни Худаниң меһир-муһәббитидә сақлашқа дәвәт қилиду (Йәһуда 21). Еғир вақитларда, Йәһва бизгә ярдәм берәлиши үчүн, Униң билән болған достлуғумизни мәһкәм сақлишимиз керәк.

4, 5. Яратқучимиз һәрбиримизгә болған меһир-муһәббәтни қандақ көрситиватиду?

⁴ Йәһва билән дост болуш үчүн, У бизни қанчилик яхши көридиғанлиғини чүшинишимиз керәк. Яратқучимиз биз  үчүн қандақ яхшилиқларни қилғанлиғи һәққидә ойлап көрүң. Мәсилән, У биз үчүн гөзәл тәбиәтни, әҗайип өсүмлүкләрни вә һайванатларни яратқан. Шундақла У бизгә түрлүк-түмән озуқ-түлүкләрни вә пакиз суларни бәргән. Муқәддәс китап арқилиқ Йәһва бизгә Өз исмини вә есил-пәзиләтлирини ечип бәргән. Униңдин башқа, Йәһва сөйүмлүк Оғли Әйсани йәргә әвәтип, Өз меһир-муһәббитини көрсәткән (Йоһан 3:16). Әйса өз һаятини қурбанлиққа бәргәчкә, биз әҗайип үмүткә егә болдуқ.

⁵ Йәһва асманда Падишалиқ орнатқан. Бу Падишалиқ пат арида һәммә қайғу-һәсрәтләрни йоқ қилип, йәр-йүзини җәннәткә айландуриду. Җәннәттә һәммә адәмләр теч-аман вә шат-хорам һаят кәчүриду (Зәбур 37:29). Шундақла Йәһва бизгә һазирниң өзидә тоғра һаят кәчүрүшни үгитип, Өз меһир-шәпқитини көрсәтмәктә. Йәнә Йәһва бизни Униңға дуа қилишқа үндәйду. У һәр вақитта бизниң дуалиримизға қулақ салиду. Һәқиқәтән, Пәрвәрдигар һәрбиримизни яхши көриду.

6. Йәһваниң меһир-муһәббити үчүн миннәтдарлиғиңизни қандақ көрситәләйсиз?

⁶ Йәһваниң меһир-муһәббити үчүн болған миннәтдарлиғиңизни қандақ көрситәләйсиз? Әпсуски, бүгүнки күндә көп адәмләр миннәтдарсиз. Әйса йәрдә болғандиму дәл мошундақ адәмләр болған. Бир қетим Әйса махав кесилигә гириптар болған он кишини сақайтқан, бирақ уларниң арисидин пәқәт бирила қайтип келип, рәхмитини ейтқан (Луқа 17:12—17). Шуңа биз Әйсаға келип миннәтдарлиқ билдүргән кишигә охшаш, Йәһваға дайим өз миннәтдарлиғимизни билдүрәйли.

7. Биз Йәһвани қанчилик яхши көрүшимиз керәк?

⁷ Бизму асмандики Атимизға меһир-муһәббитимизни көрситишимиз керәк. Әйса шагиртлириға: «Йәһва Худани пүтүн жүригиң, пүтүн җениң һәм пүтүн әқлиң билән сөйгин»,— дәп ейтқан (Мәтта 22:37ни оқуң).

8, 9. Йәһваға болған меһир-муһәббитимизни қандақ көрситәләймиз?

 ⁸ «Худани яхши көримән»,— дәп ейтипла қоюш йетәрликму? Яқ. Йәһвани пүтүн қәлбимиз, пүтүн җенимиз һәм пүтүн әқлимиз билән сөйсәк, Униңға болған меһир-муһәббитимизни иш-һәрикитимиз билән көрситимиз (Мәтта 7:16—20). Муқәддәс китаптин ениқ көрүнгәндәк, биз Пәрвәрдигарни яхши көрсәк, Униң әмирлиригә қулақ салимиз. Бу қийин әмәс, чүнки Йәһваниң «әмирлири еғир әмәс» (Йоһанниң 1-хети 5:3ни оқуң).

⁹ Тәңри Йәһваға бойсунсақ, бәхитлик вә мәналиқ һаят кәчүримиз (Йәшая 48:17, 18). Әнди, Йәһва билән болған достлуқни сақлап қелишқа немә ярдәм беридиғанлиғини көрүп чиқайли.

10. Немә үчүн Йәһва Худа тоғрисида билим елишни давамлаштурушимиз керәк?

¹⁰ Сиз Йәһва Худа билән қандақ дост болдиңиз? Сиз Муқәддәс китапни оқуп-үгинип, аста-аста Пәрвәрдигарни яхширақ тонуп-билдиңиз вә Униң билән дост болушни халидиңиз. Худа билән болған достлуқни гүлхан билән селиштурушқа болиду. Гүлхан өчмәслиги үчүн, униңға дайим отун ташлап туруш керәк. Шуниңға охшаш, Йәһва билән болған достлуғумизни күчәйтиш үчүн, У һәққидә билим елишни давамлаштуруш лазим (Пәнд-нәсиһәтләр 2:1—5).

11. Муқәддәс китап тәлимлири сизгә қандақ тәсир қилиду?

¹¹ Муқәддәс китапни оқуп-үгинишни давамлаштурсиңиз, жүригиңизгә чоқум тәсир қилидиған нәрсиләрни биливалисиз. Әйса икки шагиртиға Язмилардики пәйғәмбәрлик сөзләрни чүшәндүргәндә, улар немини һис қилғанлиғиға көңүл бөлүң. Улар: «У йолда биз билән параңлишип, Муқәддәс Язмиларни тәпсилий чүшәндүргәндә, жүрәклиримиз көймидиму?»— дәп ейтқан (Луқа 24:32).

12, 13. а) Йәһваға болған меһир-муһәббитиңиз билән немә йүз бериши мүмкин? ә) Йәһваға болған меһир-муһәббитиңизни қандақ сақлап қелишқа болиду?

 ¹² Әйсаниң шагиртлири Язмиларни чоңқурирақ чүшәнгәндә, бу уларға қаттиқ тәсир қилған. Муқәддәс китапни чүшинишкә башлиғанда, сизму уларға охшаш һис-туйғуда болисиз. Шундақ қилип, Йәһвани йеқинирақ тонуп, Уни техиму яхши көрисиз. Асмандики Атимизға болған меһир-муһәббитиңиз һечқачан совуп кәтмисун (Мәтта 24:12).

¹³ Йәһва Худа билән болған мунасивитиңизни давамлиқ мустәһкәмләш үчүн бар күчиңизни селишиңиз керәк. Шуңа Йәһва вә Әйса һәққидә билим елишни тохтатмаң. Алған билимиңиз һәққидә чоңқур ойлиниң һәм уларни һаятиңизда қандақ қоллинишқа болидиғанлиғи тоғрисида мулаһизә қилиң (Йоһан 17:3). Муқәддәс китапни оқуғанда яки тәтқиқ қилғанда, өзүңиздин мундақ дәп сораң: «Йәһва  тоғрилиқ немиләрни биливалдим? Немә үчүн Худани пүтүн қәлбим һәм пүтүн җеним билән сөйүшүм керәк?» (Тимотийға 1-хәт 4:15).

14. Дуа Худаға болған меһир-муһәббитиңизни қандақ күчәйтиду?

¹⁴ Сиз җан достуңиз билән дайим сөзлишип, достлуғиңизни мустәһкәмләләйсиз. Шуниңға охшаш, Худаға дайим дуа қилип турсиңиз, Униңға болған меһир-муһәббитиңиз күчийиду (Салоникилиқларға 1-хәт 5:17ни оқуң). Дуа — асмандики Атимизниң әҗайип соғиси. Шуңа биз һәрдайим қәлбимиздә болған һәммә нәрсиләрни Униңға ейтишимиз керәк (Зәбур 62:8). Сиз ядлавалған дуаларни ейтмастин бәлки, өз қәлбиңиздики ой-пикриңизни ейтишиңиз керәк. Муқәддәс китапни давамлиқ оқуп-үгәнсәк вә чин жүрәктин дуа қилсақ, Йәһваға болған меһир-муһәббитиңиз күчийиду.

15, 16. Сиз вәз қилиш ишиға қандақ қарайсиз?

¹⁵ Пәрвәрдигар билән болған достлуғимизни сақлап қелиш үчүн башқиларға Муқәддәс китаптин билгәнлиримизни ейтишимиз керәк. Йәһва һәққидә башқиларға ейтиш — чоң шан-шәрәптур (Луқа 1:74, 75). Йәнә Әйса Мәсиһ һәммә шагиртлириға шу шәрәплик ишни тапшурған. Шуңа һәрбиримиз Падишалиқ һәққидики хуш хәвәрни вәз қилишимиз керәк. Сизчу, бу иш билән мәшғул болуватамсиз? (Мәтта 24:14; 28:19, 20).

¹⁶ Әлчи Паул бу ишни бәкму қәдирлигән вә бу ишни «ғәзнә» дәп атиған (Коринтлиқларға 2-хәт 4:7). Башқиларға Йәһва һәм Униң ирадиси һәққидә ейтиштин муһимирақ иш йоқ. Бу Худаға болған ибадитимизниң муһим бир қисми. У бизниң қиливатқан хизмитимизни алаһидә қәдирләйду (Ибранийларға 6:10). Вәз қилиш сизгиму, тиңшиғучиларғиму пайда әкелиду. Сәвәви, сиз өзүңизгә вә башқиларға Худа билән дост болуп, мәңгү яшаш пурситигә егә болушқа ярдәм  берисиз (Тимотийға 1-хәт 4:16ни оқуң). Кишиниң көңлини қанаәт тапқузидиған буниңдин артуғирақ иш йоқ!

17. Немә үчүн вәз қилиш бәк җиддий иш?

¹⁷ Вәз қилиш — бәк җиддий иштур. Муқәддәс китап бизни «қолайлиқ вә қолайсиз вақитта» вәз қилишқа дәвәт қилиду (Тимотийға 2-хәт 4:2). Адәмләр Худа Падишалиғи һәққидә чоқум билиши керәк. Муқәддәс китапта, «Пәрвәрдигарниң улуқ күни йеқиндур... интайин тез йетип келиду» вә «һеч кечикмәйду», дегән сөзләр бар (Зәфания 1:14; Һабаккук 2:3, КТ). Пат йеқинда Йәһва Шәйтанниң рәзил дуниясини вәйран қилиду. Шу күн кәлгичә, адәмләр Йәһваға хизмәт қилишни таллиши үчүн, уларни агаһландурушимиз зөрүр.

18. Немә үчүн биз башқа етиқатдашлар билән биргә Йәһваға ибадәт қилишимиз керәк?

¹⁸ Йәһва бизниң башқа етиқатдашлар билән биргә Униңға ибадәт қилишимизни халайду. Муқәддәс китапта мундақ дәп йезилған: «Меһир-муһәббәт вә яхши ишлар қилишқа үндәш үчүн, бир-биримиз һәққидә ойлинайли. Бәзиләр адәтләнгәндәк, жиғилишлиримизни қалдурмайли, әксинчә әшу күнниң йеқинлишип қалғанлиғини көрүп турған екәнмиз, бир-биримизгә техиму көпирәк илһам берәйли» (Ибранийларға 10:24, 25). Биз һәммә учришишларға беришқа бар күчимизни селишимиз лазим. Бу учришишлар бир-биримизни роһландурушқа вә мустәһкәмләшкә имканийәт яритиду.

19. Етиқатдашларни яхши көрүшкә немә ярдәм бериду?

¹⁹ Учришишларға қатнишип турсиңиз, Худаға ибадәт қилишқа ярдәм беридиған яхши достларни тапалайсиз. У йәрдә келип чиқиши вә мүҗәз-хулқи һәрхил болған қериндашларни учритисиз. Уларму Худаға сизгә охшаш чин жүрәктин хизмәт қилишқа тиришиду. Есиңиздә болсун, уларму сиздәк намукәммәл вә хаталиқларни өткүзиду. Шуниң үчүн уларни кәчүрүшкә  тәйяр болуң (Колосилиқларға 3:13ни оқуң). Һәрдайим етиқатдашларниң яхши хисләтлиригә диққәт қилиң. Бу сизгә уларни яхши көрүшкә вә Йәһваға йеқинирақ болушқа ярдәм бериду.

20, 21. «Һәқиқий һаят» дегән немә?

²⁰ Йәһва һәммә достлириниң бәхитлик һаят кәчүрүшини халайду. Муқәддәс китапта бүгүнки һаятимизға қариғанда, келәчәктики һаятимиз мутләқ башқичә болидиғанлиғи йезилған.

²¹ Биз келәчәктә пәқәт 70 яки 80 жил әмәс, бәлки мәңгү һаят кәчүримиз. Биз гөзәл җәннәттә яшап, сақ-саламәтлик болумиз. Йәнә теч-аман вә бәхит-саадәт һаят кәчүримиз. Муқәддәс китапта бу һәқиқий һаят дәп аталған. Йәһва бизгә һәқиқий һаятни соға қилишқа вәдә бәргән, бирақ шу һаятқа егә болуш үчүн бар күчимизни селишимиз керәк (Тимотийға 1-хәт 6:12, 19).

22. а) «Һәқиқий һаятқа» егә болуш үчүн немә қилиш керәк? ә) Һәқиқий һаятқа немә үчүн өз күчимиз билән еришәлмәймиз?

²² Һәқиқий һаятқа егә болуш үчүн немә қилишимиз керәк? Биз яхшилиқ қилишимиз лазим (Тимотийға 1-хәт 6:18). Бу Муқәддәс китаптин оқуп-үгәнгәнлиримизни қоллинишни билдүриду. Амма һәқиқий һаятқа өз күчимиз билән еришәлмәймиз. Һәқиқий һаят Йәһваниң садиқ хизмәтчилиригә көрсәткән «мол меһирлиги» яки бәргән бебаһа соғиси (Римлиқларға 5:15). Бизниң әрштики Атимиз садиқ хизмәтчилиригә бу соғини беришни халайдиғанлиғи шәк-шүбһисиздур.

23. Немә үчүн һазирниң өзидә тоғра қарар қобул қилиш муһим?

²³ Өзүңиздин: «Мән Йәһва Худаға У халиғандәк ибадәт қиливатимәнму?»— дәп сорап көрүң. Әгәр бәзи өзгиришләрни қилиш керәк болса, дәрһал һәрикәт қилиң. Йәһваға тайиниң вә Униңға қулақ селиң, шу чағдила У сизгә пана болиду. Шәйтан дуниясиниң ахирқи күнлиридә, Пәрвәрдигар өзиниң  садиқ хизмәтчилирини һимайә қилиду. Кейин Худа Өзи вәдә қилғандәк, бизгә җәннәттә мәңгү яшашқа мүмкинчилик бериду. Шуңлашқа, һәқиқий һаятқа егә болуш үчүн һазирниң өзидә тоғра қарар қобул қилиң!