1, 2. Ri nga wana ngafhi tsireledzo ṋamusi?

KHA ri ri ni khou tshimbila nnḓa hu na ḓumbu ḽihulu. Makole a thoma u swifhala, ya thoma u penya, ya bvuma. Hu si kale mvula ya thoma u shuluwa. Na ṱoḓa fhethu ha u khuda. Ni pfa mbilu yo rula musi ni tshi wana fhethu ho tsireledzeaho.

² Ri kha vhuimo vhu fanaho na honoho na ṋamusi. Zwiimo zwa shango zwi khou ṋaṋa u tshinyala. Ni nga ḓivhudzisa uri: ‘Ndi nga wana ngafhi tsireledzo?’ Muphisalema o ṅwala uri: “Ndi ḓo amba na Yehova nda ri: ‘U vhukhudo hanga na vhushavhelo hanga, Mudzimu wanga ane nda mu fhulufhela.’” (Phisalema 91:2) Yehova a nga ri vhofholola kha thaidzo dzashu zwino nahone u ri ṋea fhulufhelo ḽavhuḓi nga ha vhumatshelo.

3. Ri nga ita hani uri Yehova a vhe vhukhudo hashu?

³ Yehova a nga ri tsireledza nga nḓila-ḓe? A nga ri thusa u sedzana na thaidzo iṅwe na iṅwe ine ra nga vha nayo nahone u na maanḓa u fhira muthu muṅwe na muṅwe ane a nga lingedza u ri vhaisa. Naho ha nga itea zwithu zwi vhavhaho kha riṋe, ri nga vha na vhungoho ha uri Yehova u ḓo zwi lugisa tshifhingani tshi ḓaho. Bivhili i ri ṱuṱuwedza uri: “Ni dzule ni tshi ita zwine zwa ita uri Mudzimu a ni fune.” (Yuda 21) Ri fanela u dzula ri tsini na Yehova uri a ri thuse nga zwifhinga zwi lemelaho. Fhedzi ri nga dzula hani ri tsini nae?

4, 5. Yehova o sumbedza hani uri u a ri funa?

⁴ U itela u dzula ri tsini na Yehova, ri fanela u pfesesa  nḓila ine a ri funa ngayo. Humbulani nga ha zwithu zwoṱhe zwe Yehova a ri itela zwone. O ri ṋea ḽifhasi ḽavhuḓi nahone a ḽi ḓadza nga zwimela na zwipuka zwi takadzaho. O dovha a ri ṋea zwiḽiwa zwi ḓifhaho na maḓi o kunaho a u nwa. Yehova o ri ḓivhadza dzina ḽawe na u ri funza zwine a vha zwone a tshi shumisa Bivhili. U fhira zwoṱhe, o sumbedza u ri funa musi a tshi rumela Murwa wawe Yesu kha ḽifhasi uri a ṋekedze vhutshilo hawe a tshi itela riṋe. (Yohane 3:16) Nga ṅwambo wa tshenetsho tshiṱhavhelo, ri na fhulufhelo ḽavhuḓi ḽa vhumatshelo.

⁵ Yehova o ri ṋea Muvhuso wa Vhumessia, muvhuso wa ṱaḓulu une wa ḓo fhelisa u tambula hoṱhe hu si kale. Wonoyo Muvhuso u ḓo ita uri ḽifhasi ḽi vhe pharadiso, hune vhathu vhoṱhe vha ḓo tshila nga mulalo na dakalo nga hu sa fheli. (Phisalema 37:29) Iṅwe nḓila ye Yehova a ri sumbedza ngayo u ri funa ndi nga u ri gudisa nḓila ya khwine ine ra nga tshila ngayo ṋamusi. U dovha a ri ramba uri ri mu rabele, u dzula o lugela u thetshelesa thabelo dzashu. Yehova o sumbedza khagala lufuno lwawe kha riṋe roṱhe.

6. Ni nga sumbedza hani uri ni dzhiela nṱha nḓila ine Yehova a ni funa ngayo?

⁶ Ni nga sumbedza hani uri ni dzhiela nṱha nḓila ine Yehova a ni funa ngayo? Nga u livhuwa zwoṱhe zwe a ni itela zwone. Zwi ṱungufhadzaho ndi uri vhanzhi ṋamusi a vha livhuwi. Zwo vha zwo tou ralo na musi Yesu e kha ḽifhasi. Kha tshiṅwe tshiitea, Yesu o fhodza vhathu vha fumi vha re na mapele, fhedzi ndi muthihi fhedzi we a mu livhuwa. (Luka 17:12-17) Ri ṱoḓa u fana na munna we a livhuwa Yesu. Ri ṱoḓa u dzula ri tshi livhuwa Yehova.

7. Ri fanela u funa Yehova lungafhani?

⁷ Ri fanela u sumbedza Yehova uri ri a mu funa. Yesu o vhudza vhafunziwa vhawe uri vha fanela u funa Yehova nga mbilu yoṱhe, nga zwoṱhe zwine vha vha zwone na nga  ṱhalukanyo yavho yoṱhe. (Vhalani Mateo 22:37.) Zwenezwo zwi amba mini?

8, 9. Ri nga sumbedza hani Yehova uri ri a mu funa?

⁸ Naa zwo eḓana u sokou amba uri ri funa Yehova? Hai. Arali ri tshi funa Yehova nga mbilu yoṱhe, nga zwoṱhe zwine ra vha zwone na nga ṱhalukanyo yashu yoṱhe, ri ḓo sumbedza uri ri a mu funa nga zwine ra zwi ita. (Mateo 7:16-20) Bivhili i bvisela khagala uri arali ri tshi funa Mudzimu, ri ḓo tevhedza milayo yawe. Naa zwenezwo zwi a konḓa? Hai. Milayo ya Yehova “a si muhwalo.”​—Vhalani 1 Yohane 5:3.

⁹ Musi ri tshi thetshelesa Yehova, ri tshila ro takala nahone ri a fushea. (Yesaya 48:17, 18) Fhedzi ndi mini zwine zwa nga ri thusa u dzula ri tsini na Yehova? Kha ri vhone.

10. Ndi ngani ni tshi fanela u bvela phanḓa ni tshi guda nga ha Yehova?

¹⁰ No vha hani khonani ya Yehova? Nga u guda Bivhili, no kona u ḓivha Yehova nga vhuḓalo na u vha na vhukonani nae. Honovhu vhukonani vhu nga mulilo une na ṱoḓa uri u dzule u tshi khou duga. Samusi mulilo u tshi ṱoḓa u khuṱhedzwa uri u duge, ni fanela u bvela phanḓa ni tshi guda nga ha Yehova uri vhukonani haṋu nae vhu dzule ho khwaṱha.​—Mirero 2:1-5.

11. Ni ḓo vhuyelwa hani nga u guda Bivhili?

¹¹ Musi ni tshi bvela phanḓa na u guda Bivhili, ni ḓo guda zwithu zwinzhi zwine zwa ni kwama mbilu. Ṱhogomelani nḓila ye vhafunziwa vha Yesu vhavhili vha ḓipfa ngayo musi Yesu a tshi vha ṱalutshedza vhuporofita ha Bivhili. Vho ri: “Naa ho ngo ri kwama mbilu musi a tshi khou amba na riṋe nḓilani, a tshi khou ri ṱalutshedza Maṅwalo?”​—Luka 24:32.

12, 13. (a) Hu nga itea mini kha u funa hashu Mudzimu? (b) Ri nga dzula hani ri tshi funa Yehova?

 ¹² Samusi mbilu dza vhafunziwa dzo kwamea musi vha tshi pfesesa Maṅwalo, na inwi ni nga vha no ḓipfa nga yeneyo nḓila musi ni tshi thoma u pfesesa Bivhili. Zwo ni thusa u ḓivha na u funa Yehova. A ni ṱoḓi lwonolu lufuno lu tshi fhola.​—Mateo 24:12.

¹³ Musi ni tshi vha khonani ya Mudzimu, ni fanela u shuma nga maanḓa uri vhukonani ha vhoiwe vhu dzule ho khwaṱha. Ni fanela u bvela phanḓa ni tshi guda nga hae na Yesu na u humbula nga ha zwine na khou zwi guda na nḓila ine na nga zwi shumisa ngayo vhutshiloni haṋu. (Yohane 17:3) Musi ni tshi vhala kana u guda Bivhili, ḓivhudziseni uri: ‘Ndi guda mini nga ha Yehova Mudzimu? Ndi ngani ndi tshi fanela u mu funa nga mbilu yoṱhe na nga zwoṱhe zwine nda vha zwone?’​—1 Timotheo 4:15.

14. Thabelo i thusa hani kha u ita uri u funa hashu Yehova hu dzule ho khwaṱha?

 ¹⁴ Musi ni na khonani yavhuḓi, ni amba nayo tshifhinga tshoṱhe nahone zwenezwi zwi ita uri vhushaka ha vhoiwe vhu khwaṱhe. Zwi ngaho zwenezwo, u amba na Yehova tshifhinga tshoṱhe nga thabelo, zwi ita uri ri mu fune vhukuma. (Vhalani 1 Vhathesalonika 5:17.) Thabelo ndi tshifhiwa tshavhuḓi tshi bvaho kha Khotsi ashu wa ṱaḓulu. Ri fanela u amba nae tshifhinga tshoṱhe zwi tshi bva mbiluni. (Phisalema 62:8) A ro ngo fanela u rwela thabelo ngomani, ri fanela u amba zwi tshi bva mbiluni. Arali ra bvela phanḓa na u guda Bivhili na u rabela zwi tshi bva mbiluni, ri ḓo dzula ri tshi funa Yehova.

15, 16. Ni dzhia hani mushumo wa u huwelela?

¹⁵ Arali ri tshi ṱoḓa u dzula ri tsini na Yehova, ri fanela u vhudza vhaṅwe nga ha lutendo lwashu. U amba na vhaṅwe nga ha Yehova ndi ndugelo khulwane vhukuma. (Luka 1:74) Ndi vhuḓifhinduleli he Yesu a vhu ṋea Vhakriste vhoṱhe vha ngoho. Muṅwe na muṅwe washu u fanela u ḓivhadza mafhungo maḓifha a Muvhuso wa Mudzimu. Naa no no zwi ita?​—Mateo 24:14; 28:19, 20.

¹⁶ Muapostola Paulo o dzhia mushumo wa u huwelela u wa ndeme vhukuma, o u vhidza “lupfumo.” (2 Vhakorinta 4:7) U vhudza vhaṅwe nga ha Yehova na zwine a ṱoḓa u zwi ita ndi mushumo wa ndeme vhukuma une na nga u ita. Ndi nḓila ine na nga shumela Yehova ngayo nahone u dzhiela nṱha zwine na mu itela zwone. (Vhahevheru 6:10) U huwelela zwi vhuyedza inwi na vhane vha ni thetshelesa ngauri ni thusa vhaṅwe na inwi muṋe uri ni sendele tsini na Yehova na uri ni wane vhutshilo vhu sa fheli. (Vhalani 1 Vhakorinta 15:58.) Naa hu na muṅwe mushumo une wa nga ita uri ni fushee nga nnḓa ha u huwelela?

17. Ndi ngani mushumo wa u huwelela wo ṱavhanyiswa?

 ¹⁷ Mushumo wa u huwelela wo ṱavhanyiswa vhukuma. Ri fanela u ‘huwelela ipfi’ nahone ri fanela u zwi ita “nga u fhisea.” (2 Timotheo 4:2) Vhathu vha ṱoḓa u pfa nga ha Muvhuso wa Mudzimu. Bivhili i ri: “Ḓuvha ḽihulu ḽa Yehova ḽi tsini! Ḽi tsini, ḽi khou ḓa nga u ṱavhanya!” Vhufhelo a vhu “nga lengi!” (Tsefanya 1:14; Habakuku 2:3) Hu si kale, Yehova u ḓo fhelisa shango ḽivhi ḽa Saṱhane. Musi zwenezwo zwi sa athu u itea, vhathu vha fanela u tsivhudzwa uri vha kone u nanga u shumela Yehova.

18. Ndi ngani ri tshi fanela u gwadamela Yehova ri na vhaṅwe Vhakriste vha ngoho?

¹⁸ Yehova u ṱoḓa ri tshi mu gwadamela na vhaṅwe Vhakriste vha fhulufhedzeaho. Bivhili i ri: “Kha ri ḓivhane khwine uri ri kone u funana nga ho engedzeaho na u ita mishumo mivhuya, ri songo litsha u kuvhangana nga tshashu, samusi vhaṅwe vha tshi ita nga u ralo, fhedzi ri ṱuṱuwedzane, zwihuluhulu samusi ni tshi vhona uri ḓuvha ḽi khou sendela.” (Vhahevheru 10:24, 25) Ri fanela u ita zwoṱhe zwine ra nga kona uri ri vhe hone miṱanganoni yoṱhe ya Ṱhanzi Dza Yehova. Miṱangano i ri ṋea tshibuli tsha u ṱuṱuwedzana na u khwaṱhisana.

19. Ndi mini zwine zwa nga ri thusa u funa Vhakriste nga riṋe?

¹⁹ Musi ni tshi ya miṱanganoni, ni ḓo wana khonani dza vhukuma dzine dza ḓo ni thusa u gwadamela Yehova. Ni ḓo ṱangana na vhahashu vho fhambanaho vhane u fana na inwi, vha ita zwoṱhe zwine vha nga kona u itela u mu shumela. A vho ngo fhelela nahone vha a khakha u fana na inwi. Musi vha tshi ita nga u ralo, dzulani no lugela u vha hangwela. (Vhalani Vhakolosa 3:13.) Dzulani ni tshi sedza zwithu zwavhuḓi kha vhaṅwe Vhakriste ngauri zwi ḓo ni thusa u vha funa na u sendela tsini na Yehova.

20, 21. “Vhutshilo ha vhukuma” ndi mini?

²⁰ Yehova u ṱoḓa khonani dzawe dzoṱhe dzi tshi tshila vhutshilo ha khwine vhukuma. Bivhili i ri funza uri vhutshilo hashu ha tshifhingani tshi ḓaho vhu ḓo vha ho fhambana tshoṱhe na vhutshilo hashu ha ṋamusi.

²¹ Tshifhingani tshi ḓaho, ri ḓo tshila lwa tshoṱhe, hu si miṅwaha ya 70 kana ya 80 fhedzi. Ri ḓo ḓiphina nga “vhutshilo vhu sa fheli” ri na mutakalo wavhuḓi, mulalo na dakalo pharadisoni yo nakaho. Zwenezwi ndi zwine Bivhili ya zwi vhidza “vhutshilo ha vhukuma.” Yehova o fhulufhedzisa u ri ṋea honovhu vhutshilo ha vhukuma, fhedzi ri fanela u ita zwoṱhe zwine ra nga kona zwino u itela u vhu ‘farelela ro khwaṱha.’​—1 Timotheo 6:12, 19.

22. (a) Ri nga ‘farelela’ hani ‘vhutshilo ha vhukuma ro khwaṱha’? (b) Ndi ngani ri si nga si renge vhutshilo vhu sa fheli?

²² Ri nga ‘farelela’ hani ‘vhutshilo ha vhukuma ro khwaṱha’? Ri fanela u ‘ita zwivhuya’ na u ‘ita zwithu zwinzhi zwavhuḓi.’ (1 Timotheo 6:18) Zwi amba uri ri fanela u shumisa zwe ra zwi guda Bivhilini. Naho zwo ralo, vhutshilo ha vhukuma a vhu ḓitiki nga vhuḓidini hashu. Ri nga si vhuye ra renga vhutshilo vhu sa fheli. Ndi tshifhiwa tsha mahala tshi bvaho kha Yehova tshine a fha vhashumeli vhawe vha fhulufhedzeaho, ndi tsumbo ya “vhuthu vhuhulu” hawe. (Vharoma 5:15) Khotsi ashu wa ṱaḓulu u ṱoḓa u ṋea vhashumeli vhawe vha fhulufhedzeaho tshenetshi tshifhiwa zwa vhukuma.

23. Ndi ngani ni tshi fanela u ita phetho yo teaho zwino?

²³ Ḓivhudziseni hezwi, ‘Naa ndi khou shumela Mudzimu nga nḓila ine a i ṱanganedza?’ Arali na wana uri ni tea u ita tshanduko, ni fanela u dzi ita nga u ṱavhanya. Musi ri tshi ḓitika nga Yehova na u ita zwoṱhe zwine ra nga kona u itela u mu thetshelesa, u ḓo vha vhushavhelo hashu. U ḓo ita uri vhathu vhawe vha fhulufhedzeaho vha dzule  vho tsireledzea kha maḓuvha a vhufhelo a shango ḽivhi ḽa Saṱhane. Yehova u ḓo ita vhungoho ha uri ri tshile Pharadisoni nga hu sa fheli samusi o fhulufhedzisa. Ni nga wana vhutshilo ha vhukuma arali na ita phetho yo teaho zwino.