1, 2. Ndove podemo catar protession ancoi?

IMAGINA che ti te sì drio caminar e te vedi che l’è drio vegner un temporal. El cielo l’è drio restar scuro, le saete le ze drio slusar e scomìnsia a tronar. Suito scomìnsia a piover. Ti te sì drio catar un posto par scónderte. Che alìvio quando te cati un posto sicuro e suto!

² Ancoi noantri semo in una situassion compa­gna. Le condission del mondo le ze drio restar sempre pedo. Fursi ti te domandi: ‘Ndove posso catar protession?’ El salmista el ga dito: “Mi dirò a Geovà: ‘Ti te sì el me refùgio e la me tore de protession, el me Dio de chi me fido.’” (Salmo 91:2) Geovà el pol darne alìvio de tuti i problemi e una maraveiosa speransa par el futuro.

3. Come podemo far de Geovà el nostro refùgio?

³ Come Geovà el pol proteger noantri? Lu el pol giutarne a infrontar tuti i problemi che gavemo. Geovà l’è pi poderoso che tuti quei che i proa farne mal. Anca se pol suceder robe rugne con noantri, podemo esser sicuri che Geovà ndarà indrissar tuti i dani nel futuro. La Bìblia la ne incoraia cossita: ‘Mantegneve nel amor de Dio.’ (Judas 21) Gavemo pròpio bisogno de star darente de Geovà par ricever el so aiuto intanto che semo drio viver in questi tempi difìcili. Ma come podemo farlo?

4, 5. Come Geovà el ga mostrà el so amor par noantri?

⁴ Capir quanto Geovà el ne ama el ne giutarà a  restar ancora pi darente de Lu. Pénseghe sora tuto quel che Geovà el ga fato par noantri. Lu el ne ga dato una bela Tera con tanti bei animai e tante bele piante. Anca el ne ga dato de magnar e àqua par bever. Par meso dela Bìblia, Geovà el ne ga insegnà el so nome e le so bele qualità. Ma el pi grando ato de amor l’è stà quando el ga mandà el so Fiol amado, Gesù, par dar la so vita par noantri. (João 3:16) Par via de sto sacrifìssio, gavemo una maraveiosa speransa par el futuro.

⁵ Geovà el ga stabilio un Regno, un governo celestial che presto el finirà fora con tuto el sofrimento. El Regno de Dio el farà dela Tera un paradiso, ndove tuti i viverà in pace e felicità par sempre. (Salmo 37:29) Geovà el ga mostrà el so amor insegnando a noantri a viver dela meio maniera possìbile. Lu anca el ne invita a far orassion parché Lu l’è sempre pronto a scoltarne. Geovà el ga pròpio mostrà de tante maniere el so grando amor par noantri.

6. Come ti te pol corisponder al amor de Geovà?

⁶ Come ti te pol corisponder al amor de Geovà? Mostra che te sì grato par tuto quel che Lu el ga fato par ti. L’è triste saver che tante persone ancoi le ze ingrate, come ntel tempo de Gesù. Una volta, Gesù el ga guario diese leprosi ma sol un l’è tornà indrio par ringrassiarlo. (Lucas 17:12-17) Volemo sempre ringrassiar Geovà, cossita come quel omo el ga fato.

7. Come gavemo de amar a Geovà?

⁷ Gavemo anca de mostrar el nostro amor par Geovà. Gesù el ga dito che i so veri seguidori i ga de amar a Geovà  con tuto el so cuor, con tuta la so ànima e con tuta la so mente. (Lesi Mateus 22:37.) Cossa questo vol dir?

8, 9. Come podemo mostrar che amemo a Geovà?

⁸ No basta sol dir che amemo a Geovà. Ma par meso dele nostre assion gavemo de mostrar el nostro amor con tuto el cuor, ànima e mente. (Mateus 7:16-20) La Bìblia la insegna che, se amemo a Dio, ndaremo obedir ai so comandamenti e questi no i ze mia “un peso”. —Lesi 1 João 5:3.

⁹ Quando obedimo a Geovà semo pròpio felici. (Isaías 48:17, 18) Ma cossa ne giutarà a continuar a esser amighi de Geovà? Ndemo veder.

10. Parché te ocore continuar a imparar sora Geovà?

¹⁰ Come ti te sì deventà amigo de Geovà? L’è stà par meso del stùdio dela Bìblia che ti te ghè cognossesto meio Geovà e che ti te ghè scominsià una amicìssia con Lu. Questa amicìssia la è come un fogo che ti te vol mantegner impissà. Come el fogo el ga bisogno de legna par restar impissà, cossita te ocore continuar a imparar sora Geovà par mantegner forte la to amicìssia con Lu. —Provérbios 2:1-5.

11. Come quel che la Bìblia la insegna el pol giutarte?

¹¹ Se ti te seiti studiar la Bìblia, te ndarè imparar robe che le ndarà tocar el to cuor. Varda come i se ga sentio due dissìpoli de Gesù quando lu el ga spiegà a lori le professie bìbliche. Lori i ga dito: “No’l brusea el nostro cuor intanto che lu el parlea con noantri ntela strada, che el spieghea le Scriture?” —Lucas 24:32.

12, 13. (a) Cossa podaria suceder col nostro amor par Dio? (b) Come podemo mantegner ben vivo el nostro amor par Geovà?

 ¹² Compagno quei due dissìpoli, pol esser che ti te ghè sentio el medèsimo entusiasmo quando te ghè scominsià a capir la Bìblia. Questo el te ga giutà a co­gnosser Geovà e amarlo. Sicuro che ti no te vol che sto amor el se smorse. —Mateus 24:12.

¹³ Dopo che ti te ghè deventà amigo de Dio, te ocore laorar tanto par mantegner forte sta amicìssia. Seita imparar sora Lu e sora Gesù. Anca te ghè de pensarghe sora quel che te sì drio imparar e come te pol meter in pràtica ste cose ntela to vita. (João 17:3) Quando ti te sì drio leser o studiar la Bìblia, domàndate: ‘Cosa me insegna questo sora Geovà Dio? Parché mi go de amarlo con tuto el me cuor e con tuta la me ànima?’ —1 Timóteo 4:15.

14. Come la orassion la te giutarà a mantegner forte el to amor par Geovà?

 ¹⁴ Quando ti te ghè un bon amigo, te parli sempre con lu e questo mantegne forte la vostra amicìssia. Dela medèsima maniera, parlar sempre con Geovà in orassion el mantegne forte el nostro amor par Lu. (Lesi 1 Tessalonicenses 5:17.) La orassion la è un maraveioso regalo del nostro Pare celestial. Sempre gavemo de parlar a Lu dal nostro cuor. (Salmo 62:8) No gavemo de dir sempre le medèsime parole drio man, ma gavemo de capir quel che disemo. Seita studiar la Bìblia e fà orassion che vien dal cuor, cossita ti te ndarè mantegner forte el to amor par Geovà.

15, 16. Come te ghè de considerar la predicassion?

¹⁵ Se volemo continuar a esser amighi de Geovà, gavemo anca de parlar ai altri sora la nostra fede. Questo l’è un grando privilègio. (Lucas 1:74) Gesù el ga dato a tuti i veri cristiani questa responsabilità. Tuti noantri gavemo de predicar le bone notìssie del regno de Dio. E ti, gheto belche scominsià a far questo? —Mateus 24:14; 28:19, 20.

¹⁶ El apòstolo Paolo el considerea la predicassion tanto importante, par quela el ga ciamà sto laoro de “un tesoro”. (2 Coríntios 4:7) Parlar ai altri sora Geovà e el so propòsito l’è el laoro pi importante che te pol far. Questa la è una maniera de servir a Geovà. Lu el dà tanto valor a quel che ti te fè. (Hebreus 6:10) La predicassion la pol benefissiar a ti e a quei che i te scolta parché la giuta a continuar amigo de Geovà e guadagnar la vita eterna. (Lesi 1 Coríntios  15:58.) Sarà che ghen’è altro laoro che te assaria pi contento?

17. Parché la predicassion la è tanto urgente?

¹⁷ La predicassion la è pròpio urgente. Gavemo de ‘predicar la parola’ e gavemo de ‘farlo con urgensa’. (2 Timóteo 4:2) Le persone le ga bisogno de scoltar sora el Regno de Dio. La Bìblia la dise: “El grando giorno de Geovà l’è darente! L’è darente e el riva svelto!” El fin “no’l tardarà!” (Sofonias 1:14; Habacuque 2:3) Presto Geovà el finirà fora col mondo rugno de Sàtana. Vanti de suceder questo, le persone le ga de saver che le pol scòlier servir a Geovà.

18. Parché gavemo de adorar a Geovà insieme ai altri veri cristiani?

¹⁸ Geovà el vol che lo adoremo insieme ai altri veri cristiani. La Bìblia la dise: “E pensemo un nel altro par stimolarne al amor e ai laori ecelenti no assando de riunirse, come arquanti i fà, ma incoraiàndose un al altro, e ancora de pi al veder che l’è drio rivar el di.” (Hebreus 10:24, 25) Le riunion le ne dà la oportunità de incoraiarse e far pi forte la nostra fede. Par quela, gavemo de far el nostro meio par assister a tute le riunion.

19. Cossa ne giuta a amar i nostri fradei e sorele cristiani?

¹⁹ Ntele riunion, te catarè boni amighi che i te giutarà adorar a Geovà. Te ndarè cognosser tanti fradei e sorele difarenti che, compagno a ti, i fà del tuto par adorar a Dio. Ma come tuti noantri, lori anca i ze imperfeti e i fà sbali. Par quela, quando questo sucede sii pronto a perdonar. (Lesi Colossenses 3:13.) Te ghè de consentrarte nele bele qualità dei to  fradei e sorele cristiane, cossita te ndarè amarli de pi e te ndarè continuar a esser amigo de Geovà.

20, 21. Elo cossa la “vera vita”?

²⁰ Geovà el vol che tuti i so amighi i gàpia la meio vita possìbile. La Bìblia la insegna che la nostra vita nel futuro la sarà del tuto difarente dela nostra vita ancoi.

²¹ Nel futuro no ndaremo viver sol 70 o 80 ani, ma ndaremo viver par sempre. Gavaremo “vita eterna” con salute perfeta, in pace e felicità ntel Paradiso qua ntela Tera. Questa la è la “vera vita”. Geovà el promete darne la vera vita, ma gavemo de far tuto quel che podemo ancoi par ‘tégnerla de maniera firme’. —1 ­Timóteo 6:12, 19.

22. (a) Come podemo ‘tegner de maniera firme la vera vita’? (b) Parché no meritemo la vita eterna?

²² Come podemo ‘tegner de maniera firme la vera vita’? Ne toca far polito e far el ben. (1 Timóteo 6:18) Questo vol dir che gavemo bisogno de meter in pràtica quel che imparemo ntela Bìblia. No ndemo guada­gnar la vera vita par via dei nostri sforsi, parché no la meritemo. La è un regalo de Geovà ai so servi fedeli, un esémpio dela so “benignità che no meritemo”. (Romanos 5:15) El nostro Pare celestial el vol pròpio dar ai so servi fedeli sto regalo.

23. Parché ancoi gavemo de far le scòlie giuste?

²³ Domàndate: ‘Son drio adorar a Dio dela maniera che Lu el aprova?’ Se ti te cati che te ghè bisogno de far cambiamenti, te ghè de farli suito. Quando se fidemo de Geovà e femo tuto quel che podemo par obedir a Lu, Geovà el sarà el nostro refùgio. Lu el mantegnerà  sicuri i so servi fedeli durante i ùltimi giorni del ­mondo rugno de Sàtana. Alora, podemo esser sicuri che viveremo par sempre ntel Paradiso come Geovà el ga promesso. Se ancoi ti te fè le scòlie giuste, te pol gaver la vera vita!