1, 2. Ti pani onrowa onikhaliherya olelo-va?

MUUPUWELE mweettaka mukwaha, vano enapacerya woopa epheyo ya munamukhaya. Meeku annipacerya oriipihana, vanniverunya ni woopa etari. Moohipisa epula ennipacerya orupa. Nto munniphavelasa opuro wootthyawela. Tthiri munnihakalala vaavo vaniphwanya anyu nipuro noovareleleya!

² Olelo-va, hiyo ninkhala okathi wooxankiha. Molumwenkuni itthu sinootepa otakhala. Nyuwo pooti wiikoha so: ‘Ti pani onrowa okikhaliherya?’ Nasalimo alempe so: ‘Kinimwahimerya Apwiya wira: “Nyuwo ntthyawelo naka n’ulipa waka: nyuwo Muluku aka kinimuroromelaka”’. (Esalimo 91:2) Mwekeekhai, Yehova onoowerya onikhaliherya ovilela mixankiho sahu vano, ni onninivaha nlipelelo nooloka na muhoolo.

3. Ninrowa ompaka sai Yehova okhala ntthyawelo nahu?

³ Yehova onnikhaliherya sai? Owo pooti onikhaliherya ovilela mixankiho sahu, maana toowerya onvikana khula mutthu oneererya onihaaxa. Hata enikhumelelaka etthu yootakhala vano, nikupaliki wira Yehova onoolokiherya etthu eyo muhoolo. Biibiliya onnitumererya so: “Mukhaleke mophentani mwa Muluku”. (Yuda 21) Nihaana omwaattamela Yehova wira onikhaliherye okathi wa mixankiho. Masi ninrowa omwaattamela sai?

4, 5. Yehova oonihenrye sai wira onniniphenta?

⁴ Wira nimwaattamele Yehova, nihaana woona moota Yehova onniphenta awe. Muupuwele itthu sotheene Yehova opanke awe mmureerelo ahu. Owo oopaka elapo ela  yoosareya miri ni inama sa khula enamuna. Nave oonivaha yoolya yoosiva ni maasi ooloka. Omurumeelaka Biibiliya, Yehova onninleela nsina nawe ni mikhalelo sawe sooloka. Moohaaniherya, ohooniherya oniphenta wawe omurumaka Mwanawe, eyo piiyo, Yesu, orwa valaponi wira ovahe okumi awe mmureerelo ahu. (Yohani 3:16) Nto mukuttho wa Yesu, onninikhaliherya okhalana nlipelelo nooloka na muhoolo.

⁵ Yehova ookumiherya Omwene wa oMesiya, niire so, eguvernu ya wiirimu yeeyo enrowa omaliha ohaawa wotheene. Omwene owo onrowa wiiriha elapo okhala eparayiisu, wira atthu otheene akhaleke oohakalala ni murettele mahiku otheene. (Esalimo 37:29) Enamuna ekina Yehova enooniherya awe oniphenta wawe, ti oniixuttiha moota wookhalana okumi wooloka ni woohakalaliha nenna-va. Nave-tho, onninlattula wira ninvekeleke, nto okathi wotheene onniwiriyana mavekelo ahu. Tthiri Yehova onnooniherya wira onnaaphenta atthu otheene.

6. Munrowa wooniherya sai wira munneemererya ophenta wa Yehova?

⁶ Munrowa wooniherya sai wira munneemererya ophenta wa Yehova? Mmuxukhurelaka mwaha wa itthu sotheene sipanke awe mmureerelo anyu. Mooriipiha murima, atthu anceene olelo-va khanimuxukhurela. Nave okathi wa Yesu yaahikhala atthu yahaamuxukhurela. Ekwaha emosa, Yesu aahaavoniha anamakuttula muloko, masi mmosa paahi taamuxukhurenle. (Luka 17:12-17) Hiyo nihaana okhala ntoko mulopwana ole aamuxukhurenle Yesu. Nto okathi wotheene nihaana omuxukhurela Yehova.

7. Xeeni vanitthuneya ahu omphenta Yehova?

⁷ Nave-tho, nihaana omphenta Yehova. Yesu aahiwiixuttiha atthareli awe wira yaahaana omphenta Yehova ni murima aya wotheene, ni erooho aya yotheene, ni muupuwelo  aya wotheene. (Mmusome Matheyo 22:37.) Ela entaphulela exeeni?

8, 9. Ninrowa wooniherya sai wira ninnimphenta Yehova?

⁸ Niireke vanniphiyerya ohimya wira ninnimphenta Yehova? Nnaari. Akhala wira ninnimphenta Yehova ni murima ahu wotheene, ni erooho ahu, ni muupuwelo ahu, nnimooniherya eyo ni miteko sahu. (Matheyo 7:16-20) Biibiliya onniiwanyeiha saana wira hiyo ninnooniherya omphenta Muluku, neettelaka sooruma sawe. Niireke vannivila opaka eyo? Nnaari, maana “soruma sa [Yehova] khasinnirikela wettela”.​—Mmusome 1 Yohani 5:3.

⁹ Nto vaavo vanimwiiwelela ahu Yehova, ninniphwanya ohakalala mookumini mwahu. (Yesaya 48:17, 18) Masi exeeni enrowa onikhaliherya omwaattamela Yehova? Nrowe niwehe.

10. Munrowa ovikaniha sai wiixutta voohimya sa Yehova?

¹⁰ Nwenrye sai okhala mpatthani a Yehova? Omusoma Biibiliya ohookhaliheryani omusuwela Yehova oratteene, nto munapacerya wataana nuuwo. Ompatthani owo onlikana ni mooro yoowo oniphavela anyu wira ohittiphe. Ntoko siisaale vanitthuneya aya ikhuni wira mooro ohittiphe, nyuwo muhaana ovikaniha wiixutta voohimya sa Yehova wira ompatthani anyu otepeke olipa.​—Miruku 2:1-5.

11. Munoonela sai sowiixuttiha sa Biibiliya?

¹¹ Nto vaavo vanivikaniha anyu omusoma Biibiliya, munrowa wiixutta itthu soovara murima. Nkahaya moone moota awiixutti a Yesu yoonenle aya vaavo Yesu aatthokiherya awe iprofesia sa Biibiliya. Awo yaahimmye so: “Khinòna murim’ahu oviha, vanilavulihawe mphironi, antaphulelaka Solempwa?”—Luka 24:32.

12, 13. (a) Omphenta Muluku onrowa wookhaliheryani sai? (b) Ninrowa ovikaniha sai omphenta Yehova?

 ¹² Nuumala Yesu waatthokiherya Soolempwa awiixutti ale yaahihakalala maana yahiiwexexa saana, nave-tho nyuwo pooti wira mwaahihakalala vaavo mwaapacenrye anyu omwiiwexexa Biibiliya. Eyo yahookhaliheryani omusuwela Yehova ni omphenta. Tthiri khamuniphavela wira ophenta iwo ovukuwe.​—Matheyo 24:12.

¹³ Nuumala okhala mpatthani a Muluku, muhaana omananiha wira mulipihe ompatthani anyu. Muhaana ovikaniha wiixutta voohimya sa Muluku ni Yesu, ni wuupuwelela ele eniixutta anyu ni woona moota woovarihela muteko. (Yohani 17:3) Vaavo vanimusoma anyu aahiiso omwiixutta Biibiliya, mwiikoheke so: ‘Ela enisoma aka enkiixuttiha exeeni voohimya sa Yehova Muluku? Xeeni vanitthuneya aka omphenta Yehova ni murima aka wotheene ni erooho aka yotheene?’​—1 Timótheyo 4:15.

14. Moota xeeni nivekelo ninkhaliherya aya olipiha omphenta wahu Yehova?

 ¹⁴ Apatthani ooloka, annilavulihana okathi wotheene, nto eyo ennilipiha wataana waya. Moolikanasa, vaavo khuta okathi vanilavulana ahu Yehova nnivekelo, omphenta wahu onnilipa. (Mmusome 1 aTesalonika 5:17.) Nivekelo yoovaha yuulupale enikhuma wa Tiithi ahu a wiirimu. Nto khula okathi nihaana ovekelaka ni murima ahu wotheene. (Esalimo 62:9) Nihaana osyaka omakela ohimya itthu simosaru, masi nlavuleke masu anikhuma vamurimani vahu ni ohimya ekeekhai. Moohaaniherya, ovikaniha omusoma Biibiliya ni ovekela ni murima ahu wotheene, onoonikhaliherya olipiha omphenta wahu Yehova.

15, 16. Munoonela sai muteko woolaleerya?

¹⁵ Akhala wira nimphavela ovikaniha omwaattamela Yehova, nihaana-tho waaleela akina sookupali sahu. Waaleela akina voohimya sa Yehova, eparakha yuulupale. (Luka 1:74) Nave Yesu ohaavaha muritti ola maKristau otheene eekeekhai. Tivonto, otheene ahu nihaana olaleerya ihapari sooreera sa Omwene wa Muluku. Niireke moopacerya olaleerya?​—Matheyo 24:14; 28:19, 20.

¹⁶ Murummwa Paulo aahoona muteko woolaleerya okhala wootepa otthuneya; tivonto aalikanyinhe awe ni “muhakhu”. (2 aKorinto 4:7) Waaleela akina voohimya sa Yehova ni yoolakela awe, muteko muulupale onitthuneya anyu opaka. Ela enamuna yooloka ya omurumeela Yehova, tthiri owo onnisiveliwa ni nyuwo. (aHéberi 6:10) Nave-tho, olaleerya onnoovahani eparakha nyuwo ni ale anoowiriyanani, maana eyo ennaakhaliherya awo ni nyuwo omwaattamela Yehova wira mphwanye okumi woohimala. (Mmusome 1 aKorinto 15:58.) Moohaaniherya khuuvo muteko mukina oniwerya woohakalalihani siisa?

17. Xeeni muteko woolaleerya onitthuneya awe opakiwa mowaakuveya?

 ¹⁷ Muteko woolaleerya ohaana opakiwa mowaakuveya. Hiyo nihaana ‘olaleya masu’, ni opaka eyo mowaakuveya. (2 Timótheyo 4:2) Atthu ahaana wiiwa ihapari sooreera sa Omwene wa Muluku. Biibiliya onihimya wira: “Nihiku nulupale n’Apwiya nri vakhiviru: nihanle ophiya vowakuveya”. Nto wanikisa “khivaninteya”. (Sofoniya 1:14; Habakuki 2:3) Tthiri, moohipisa Yehova onrowa opwetexa olumwenku ola wootakhala wa Satana. Ehinatthi wiiraneya eyo, atthu ahaana oleeliwa wira athanle omurumeela Yehova.

18. Xeeni Yehova oniphavela awe wira hiyo ni maKristau makina eekeekhai nimukokhoreleke yena?

¹⁸ Yehova oniphavela wira hiyo ni maKristau makina eekeekhai nimukokhoreleke yena. Biibiliya onihimya wira: “Nùpuxeryaneke mukina ni mukhw’awe, wira nakuviheryaneke ophenta n’uvara miteko sorera. Nihijompeleké orowa omuthukumanoni, nihatthariheké ale ahinrowa-tho. Ohiya vo, nlipiheryaneke, votepa-tho vavo vanònanyu wira nihiku n’Apwiya nri vakhiviru”. (aHéberi 10:24, 25) Niimananiheke wira nihicompele mithukumano sotheene. Tthiri mithukumano sinninivaha eparakha ya olipihana mukina ni mukhwaawe.

19. Exeeni enrowa onikhaliherya waaphenta anna ni arokora eeKristau?

¹⁹ Ohicompela mithukumano, onimookhaliheryani waaphwanya apatthani ooloka anrowa wookhaliheryani omukokhorela Yehova. Nave munimwaaphwanya anna ni arokora a mikhalelo soovirikana, yaawo animananiha omurumeela Yehova. Anna awo toohimalela ntoko nyuwo ni annivonya. Vaavo anivonya aya, muhaana waalevelela. (Mmusome aKolosi 3:13.) Khuta okathi mmananiheke oweha miteko sooloka sa anna ni arokora a eKristau, mpakaka ele enrowa wookhaliheryani waaphenta ni omwaattamela Yehova.

20, 21. Enitaphulela exeeni “ekumi yekekhai”?

²⁰ Yehova oniphavela wira apatthani awe akhalane okumi wootepa oreera. Biibiliya onniixuttiha wira okumi ahu muhoolo onrowa okhala wootepa oloka ovikana orina ahu olelo-va.

²¹ Muhoolo, ninrowa okhalaka mahiku otheene, ohiya iyaakha 70 aahiiso 80 paahi. Ninrowa okhalana “ekumi yekekhai” ni yooloka, murettele, ni ohakalala mparayiisu mooreera. Tivonto Biibiliya onihimya awe okhala “ekumi yekekhai”. Yehova ooleiherya okumi wekeekhai, masi nihaana wiimananiha wira niphwanye okumi woohimala.​—1 Timótheyo 6:12, 19.

22. (a) Ninrowa ‘ophwanya [sai] ekumi yekekhai’? (b) Niireke Yehova onrowa onivaha okumi woohimala mwaha woophwanela?

²² Ninrowa ‘ophwanya [sai] ekumi yekekhai’? Hiyo nihaana ‘owirela sorera akhw’ihu’ ni ‘okhala athajiri ni miteko sahu sorera’. (1 Timótheyo 6:18) Eyo enitaphulela wira nihaana weettela ele eniixutta ahu mBiibiliyani. Masi khaninrowa ophwanya okumi woohimala ni owerya wahu paahi. Okhala wira khahiyo nnoophwanela waakhela okumi ohinimala. Maana okumi woohimala yoovaha enikhuma wa Yehova mmureerelo wa arumeyi awe oororomeleya, ntoko “eparakha [ikharari] ya Muluku”. (aRoma 5:15) Mwekeekhai, Tiithi ahu a wiirimu oniphavela waavaha arumeyi awe oororomeleya eparakha eyo.

23. Xeeni munitthuneya anyu opaka soothanla sooloka nenna-va?

²³ Mwiikoheke so: ‘Kiireke kinnimukokhorela Muluku ntoko siniphavela awe?’ Mwaweha wira muhaana opaka marukunuxo, nto muhipiserye opaka. Vaavo vanimuroromela ahu Yehova ni opaka khula etthu eniwerya ahu wira nimwiiwelele, Yehova onrowa okhala ntthyawelo nahu. Nto Yehova onrowa owaakiherya atthu awe oororomeleya okathi ola  wootakhala wa olumwenku wa Satana. Nuumala-vo, Yehova onrowa onivaha okumi woohimala mParayiisu, ntoko sileihenrya awe. Tthiri, nyuwo munoowerya ophwanya okumi woohimala mwapaka soothanla sooloka nenna-va!