1, 2. Diin kita makakabiling hin proteksyon yana?

HUNAHUNAA nga naglilinakat ka ha gawas samtang may bagyo. Nagtitikasirom an langit, ngan nagtikang pagkidlat ngan pagdalugdog. Waray pag-iha, binunok. Namiling ka hin lugar nga masisirongan. Maopay na la nga ha urhi nakabiling ka hin talwas ngan mamara nga lugar!

² Puropariho hito an aton sitwasyon yana. Nagtitikaraot an mga kahimtang ha kalibotan. Bangin naghuhunahuna ka, ‘Diin ako makakabiling hin proteksyon?’ An salmista ha Biblia nagsurat: “Masiring ako kan Jehova: ‘Ikaw an akon arayopan ngan akon balwarte, an akon Dios nga akon ginsasarigan.’” (Salmo 91:2) Oo, hi Jehova makakahatag ha aton hin katalwasan ha aton mga problema yana, ngan naghahatag hiya ha aton hin makalilipay gud nga paglaom ha tiarabot.

3. Paonan-o naton hihimoon hi Jehova nga aton arayopan?

³ Paonan-o kita ginpuproteksyonan ni Jehova? Makakabulig hiya ha aton ha pag-atubang han bisan ano nga aton problema, ngan mas gamhanan gud hiya kay ha bisan hin-o nga bangin naniniguro ha pagbuhat hin maraot ha aton. Bisan kon may maraot nga mahitabo ha aton yana, makakasigurado kita nga ha tiarabot aaydon ni Jehova an maraot nga epekto hito.  An Biblia nag-aaghat ha aton: “Magpabilin kamo ha gugma han Dios.” (Judas 21) Kinahanglan magpabilin kita nga duok kan Jehova basi makarawat an iya bulig ha mga panahon han kakurian. Pero paonan-o naton bubuhaton ito?

4, 5. Paonan-o iginpapakita ni Jehova an iya gugma ha aton?

⁴ Basi magpabilin nga duok kan Jehova, kinahanglan masabtan naton kon mationan-o kita niya kahinigugma. Hunahunaa an ngatanan nga ginbubuhat ni Jehova para ha aton. Gintagan kita niya hin maopay nga kalibotan ngan ginpuno ito hin makaruruyag nga mga tanom ngan hayop. Gintatagan liwat kita niya hin magrasa nga pagkaon ngan limpyo nga tubig nga maiinom. Pinaagi han Biblia, igintututdo ha aton ni Jehova an iya ngaran ngan an iya mag-opay nga mga kalidad. Labaw ha ngatanan, iya iginpakita an iya gugma ha aton han iya ginsugo an iya hinigugma nga Anak, hi Jesus, nga kumanhi ha tuna basi ihatag an iya kinabuhi para ha aton. (Juan 3:16) Ngan tungod hito nga halad, may makalilipay gud kita nga paglaom ha tiarabot.

⁵ Igintagana ni Jehova an Mesianiko nga Ginhadian, usa nga gobyerno ha langit nga hirani na magtapos han ngatanan nga pag-antos. Hihimoon han Ginhadian an tuna nga usa nga paraiso, diin an ngatanan mag-uukoy nga murayaw ngan malipayon ha kadayonan. (Salmo 37:29) Usa pa nga paagi nga iginpapakita ni Jehova an iya gugma ha aton amo an pagtutdo ha aton kon paonan-o magkikinabuhi yana ha pinakamaopay  nga paagi. Gin-aaghat liwat kita niya nga mag-ampo ha iya, ngan andam hiya pirme nga mamati ha aton mga pag-ampo. Klaro nga iginpapakita ni Jehova an iya gugma ha kada tagsa ha aton.

6. Paonan-o mo sadang apresyaron an gugma ni Jehova?

⁶ Paonan-o mo sadang apresyaron an gugma ni Jehova? Ipakita ha iya nga nagpapasalamat ka ha ngatanan nga iya ginbubuhat para ha imo. Makasurubo nga damu yana an diri mapasalamaton. Sugad liwat hito an kahimtang han nakanhi hi Jesus ha tuna. Makausa, nagtambal hi Jesus hin napulo nga may liprosi, pero usa la an nagpasalamat ha iya. (Lucas 17:12-17) Karuyag naton subaron an lalaki nga nagpasalamat kan Jesus. Karuyag naton nga pirme magin mapasalamaton kan Jehova.

7. Mationan-o kahilarom naton sadang higugmaon hi Jehova?

⁷ Kinahanglan liwat nga ipakita naton an aton gugma kan Jehova. Ginsidngan ni Jesus an iya mga disipulo nga kinahanglan higugmaon nira hi Jehova ha ira bug-os nga kasingkasing, ha ira bug-os nga kalag, ngan ha ira bug-os nga hunahuna. (Basaha an Mateo 22:37.) Ano an karuyag sidngon hito?

8, 9. Paonan-o naton maipapakita kan Jehova nga hinigugma naton hiya?

⁸ Eksakto na ba an pagsiring la nga hinigugma naton hi Jehova? Diri. Kon hinigugma naton hi Jehova ha aton bug-os nga kasingkasing, kalag, ngan hunahuna, ipapakita naton an aton gugma ha iya pinaagi ha aton mga buhat. (Mateo 7:16-20) Klaro nga igintututdo han Biblia nga kon hinigugma naton an Dios, susugton naton an iya mga sugo. Makuri ba ito? Diri,  tungod kay an kan Jehova “mga sugo diri mabug-at.”​—Basaha an 1 Juan 5:3.

⁹ Kon nasugot kita kan Jehova, nagigin malipayon ngan kontento kita. (Isaias 48:17, 18) Pero ano an mabulig ha aton nga magpabilin nga duok kan Jehova? Kitaon naton.

10. Kay ano nga sadang ka magpadayon ha paghibaro mahitungod kan Jehova?

¹⁰ Paonan-o ka nagin sangkay ni Jehova? Pinaagi han imo pag-aram ha Biblia, mas nakilala mo hi Jehova ngan nagin magsangkay kamo. Ini nga iyo pagkamagsangkay pariho hin kalayo nga karuyag mo nga padayon nga naglalaga. Sugad la nga an kalayo kinahanglan hin sungo basi maglaga, kinahanglan magpadayon ka ha paghibaro mahitungod kan Jehova basi matipigan nga marig-on an iyo pagkamagsangkay.​—Proberbios 2:1-5.

11. Ano an magigin epekto ha imo han mga katutdoan ha Biblia?

¹¹ Samtang nagpapadayon ka ha pag-aram han Biblia, may mahibabaroan ka nga makakabantad gud han imo kasingkasing. Tagda kon ano an inabat han duha han mga disipulo ni Jesus samtang nagsasaysay hi Jesus ha ira hin mga tagna ha Biblia. Hira nagsiring: “Diri ba an aton kasingkasing naglalaga ha sulod naton samtang nakikiistorya hiya ha aton ha dalan, samtang bug-os nga gin-aabrihan niya ha aton an Kasuratan?”​—Lucas 24:32.

12, 13. (a) Ano an puydi mahitabo ha aton gugma ha Dios? (b) Paonan-o naton matitipigan nga naglalaga an aton gugma kan Jehova?

¹² Sugad la nga nabantad an kasingkasing han mga  disipulo han nasabtan nira an Kasuratan, bangin inabat ka liwat hin pariho nga kadasig han nasabtan mo an Biblia. Nakabulig ini ha imo nga makilala hi Jehova ngan higugmaon hiya. Diri mo karuyag nga magtugnaw ini nga gugma.​—Mateo 24:12.

¹³ Kon sangkay ka na han Dios, kinahanglan maniguro ka basi matipigan nga marig-on an iyo pagkamagsangkay. Kinahanglan magpadayon ka ha paghibaro mahitungod ha iya ngan kan Jesus ngan pamurubuoton mo kon ano an imo nahibabaroan ngan kon paonan-o mo ito maiaaplikar ha imo kinabuhi. (Juan 17:3) Kon nagbabasa o nag-aaram ka han Biblia, pakianhi an imo kalugaringon: ‘Ano an igintututdo hini ha akon mahitungod kan Jehova nga Dios? Kay ano nga sadang ko hiya higugmaon ha akon bug-os nga kasingkasing ngan kalag?’​—1 Timoteo 4:15.

14. Paonan-o an pag-ampo nakakabulig nga matipigan nga marig-on an aton gugma kan Jehova?

 ¹⁴ Kon may-ada ka maopay nga sangkay, regular nga nakikiistorya ka ha iya, ngan nakakabulig ini nga matipigan nga marig-on an iyo pagkamagsangkay. Ha pariho nga paagi, kon regular nga nakikiistorya kita kan Jehova ha pag-ampo, natitipigan nga marig-on an aton gugma ha iya. (Basaha an 1 Tesalonica 5:17.) An pag-ampo usa nga maopay hinduro nga regalo tikang ha aton langitnon nga Amay. Sadang kita makiistorya pirme ha iya hin kinasingkasing. (Salmo 62:8) Diri naton sadang memoryahon an aton mga pag-ampo, lugod sadang kita magin sinsero ha aton ginsisiring. Oo, kon padayon kita nga mag-aaram han Biblia ngan mag-aampo hin kinasingkasing, matitipigan naton nga marig-on an aton gugma kan Jehova.

15, 16. Ano an imo panhunahuna mahitungod ha pagsangyaw nga buruhaton?

¹⁵ Kon karuyag naton nga magpabilin nga duok kan Jehova, kinahanglan liwat nga ig-istorya naton ha iba an mahitungod han aton pagtoo. An pag-istorya ha iba mahitungod kan Jehova usa nga maopay gud nga pribilehiyo. (Lucas 1:74) Ngan usa ito nga responsabilidad nga ginhatag ni Jesus ha ngatanan nga tinuod nga Kristiano. An kada tagsa ha aton sadang magsangyaw han maopay nga sumat han Ginhadian han Dios. Ginbubuhat mo na ba ini?​—Mateo 24:14; 28:19, 20.

¹⁶ Para kan apostol Pablo, presyoso gud an pagsangyaw nga buruhaton; gintawag niya ito nga “bahandi.” (2 Corinto 4:7) An pagsumat ha iba mahitungod kan Jehova ngan han iya katuyoan amo an pinakaimportante  nga buruhaton nga imo mahihimo. Usa ito nga paagi han imo pag-alagad kan Jehova, ngan ginpapabilhan niya an imo ginbubuhat para ha iya. (Hebreo 6:10) An pagsangyaw mapulsanon liwat ha imo ngan ha mga namamati ha imo tungod kay ginbubuligan mo an iba ngan an imo kalugaringon nga magin duok kan Jehova ngan magkaada kinabuhi nga waray kataposan. (Basaha an 1 Corinto 15:58.) May-ada ba iba nga buruhaton nga makakahatag ha imo hin labaw nga kalipay?

17. Kay ano nga apurado an pagsangyaw nga buruhaton?

¹⁷ An pagsangyaw nga buruhaton apurado gud. Sadang naton “isangyaw an pulong” ngan diri kita sadang maglangan ha pagbuhat hito. (2 Timoteo 4:2) Kinahanglan makabati an mga tawo mahitungod ha Ginhadian han Dios. An Biblia nasiring: “An daku nga adlaw ni Jehova hirani na! Hirani na ito ngan malaksi gud ito nga naabot!” An kataposan ‘diri maaatrasado!’ (Zepanias 1:14; Habakuk 2:3) Oo, diri na gud mag-iiha, bubungkagon ni Jehova an maraot nga kalibotan ni Satanas. Antes ito mahitabo, an mga tawo kinahanglan pahamangnoan basi makapili hira nga mag-alagad kan Jehova.

18. Kay ano nga sadang naton singbahon hi Jehova kaupod an iba pa nga tinuod nga mga Kristiano?

¹⁸ Karuyag ni Jehova nga singbahon naton hiya kaupod an iba pa nga tinuod nga mga Kristiano. An Biblia nasiring: “Tagdon naton an usa kag usa basi mag-aghat ha pagpakita hin gugma ngan mag-opay nga mga buhat, nga diri ginpapabay-an an aton pagkatirok, sugad han nabatasan han iba, lugod nagdidinasigay ha usa kag usa, ngan labi na gud samtang nakikita niyo  nga nagtitikahirani na an adlaw.” (Hebreo 10:24, 25) Sadang kita maningkamot gud nga makatambong ha ngatanan nga katirok. An mga katirok naghahatag ha aton hin higayon nga dasigon ngan parig-unon an usa kag usa.

19. Ano an makakabulig ha aton nga higugmaon an aton Kristiano nga kabugtoan?

¹⁹ Kon natambong ka ha mga katirok, makakabiling ka hin mag-opay nga mga sangkay nga mabulig ha imo nga singbahon hi Jehova. Makikilala mo an iba-iba nga kabugtoan, nga pariho ha imo, nagbubuhat han ira gimaopayi basi singbahon hiya. Ngan pariho ha imo, diri hira perpekto ngan nakakasayop hira. Kon mahitabo ito, magin andam ha pagpasaylo ha ira. (Basaha an Colosas 3:13.) Pirme pagpokus ha mag-opay nga mga kalidad han imo Kristiano nga kabugtoan, kay an pagbuhat hito mabulig ha imo nga higugmaon hira ngan magin mas duok kan Jehova.

20, 21. Ano an “tinuod nga kinabuhi”?

²⁰ Karuyag ni Jehova nga an ngatanan niya nga sangkay magkaada han pinakamaopay gud nga kinabuhi. Igintututdo ha aton han Biblia nga an aton kinabuhi ha tiarabot magigin iba gud ha aton kinabuhi yana.

²¹ Ha tiarabot, mabubuhi kita ha waray kataposan, diri la ha sulod hin 70 o 80 ka tuig. Magpapahimulos kita han “kinabuhi nga waray kataposan” diin may-ada kita perpekto nga kahimsog, kamurayawan, ngan kalipay dida ha usa nga maopay nga paraiso. Ito an gintatawag han Biblia nga “tinuod nga kinabuhi.”  Nagsasaad hi Jehova nga ihahatag ha aton ini nga tinuod nga kinabuhi, pero kinahanglan buhaton naton an ngatanan nga aton mahihimo yana basi ito ‘makaptan hin marig-on.’​—1 Timoteo 6:12, 19.

22. (a) Paonan-o naton ‘makakaptan hin marig-on an tinuod nga kinabuhi’? (b) Kay ano nga diri kita takos magkaada han kinabuhi nga waray kataposan?

²² Paonan-o naton ‘makakaptan hin marig-on an tinuod nga kinabuhi’? Kinahanglan naton “buhaton an maopay” ngan “magin hura ha mag-opay nga mga buhat.” (1 Timoteo 6:18) Karuyag sidngon hini nga kinahanglan iaplikar naton an aton nahibabaroan ha Biblia. Pero an tinuod nga kinabuhi diri nakadepende ha aton kalugaringon nga paningkamot. Diri gud kita takos magkaada han kinabuhi nga waray kataposan. Regalo ito nga waray bayad tikang kan Jehova para ha iya matinumanon nga mga surugoon, usa nga ehemplo han iya “diri matupngan nga pagkabuotan.” (Roma 5:15) Karuyag gud han aton langitnon nga Amay nga hatagan hini nga regalo an iya matinumanon nga mga surugoon.

23. Kay ano nga kinahanglan ka maghimo hin husto nga mga pagpili yana?

²³ Pakianhi an imo kalugaringon, ‘Ginsisingba ko ba an Dios ha paagi nga iya gin-uuyonan?’ Kon makita mo nga kinahanglan maghimo ka hin pipira nga mga pagbag-o, sadang mo ito buhaton dayon. Kon nasarig kita kan Jehova ngan ginbubuhat an ngatanan nga aton mahihimo basi sugton hiya, hi Jehova magigin aton arayopan. Titipigan niya nga talwas an iya matinumanon nga katawohan durante han kataposan nga mga adlaw han maraot nga kalibotan ni Satanas.  Katapos, sisiguraduhon ni Jehova nga makakaukoy kita ha Paraiso ha kadayonan, sugad han iya iginsaad. Oo, magkakaada ka han tinuod nga kinabuhi kon maghihimo ka hin husto nga mga pagpili yana!