1, 2. Ana mpaka tupate kwapi malo gambone gakutililako moŵa agano?

AGANISYE kuti ali paulendo, nambo palisikuli kwana chimbungo soni wula. Kusa kukutenda chipi, njasi sikumesya soni kukutanda kulindima. Kaneko wula jamachili jikugwa. Kaneko akusosasosa malo gakuuŵa. Mpaka aŵe ŵakusangalala naga akupata malo gambone soni gejumu.

² Masiku agano tukutama mundamo mpela jeleji. Yakutendekwa yapachilambopa yikusakalilasakalila. Nambo mpaka aliwusye kuti, ‘Ana mpaka mbate kwapi malo gambone gakutililako?’ Daudi jwalembile kuti, “Chinjimsalila Yehofa kuti, ‘Mli pakutilila pangu, soni chilindo changu Mlungu jwangu, jwachinjimkulupilila.”’ (Salimo 91:2) Kusala yisyene, Yehofa ni jwampaka atukamuchisye patukusimana ni yakusawusya soni jwalakwe atupele chembecheyo chambone msogolo.

3. Ana Yehofa mpaka aŵe chamtuli malo getu gakutilila?

³ Ana Yehofa mpaka aŵe chamtuli malo getu gakutilila? Jwalakwe mpaka atukamuchisye kulimbana ni chakusawusya chilichose champaka tusimane nacho. Yehofa ali jwamachili mnope kupunda jwalijose jwampaka atuwulasye. Atamose yindu yakusakala yili yitutendechele, tukakayichilaga kuti Yehofa chachimasya yakusakalayo msogolo. Baibulo jikusatulimbikasya pajikusati, “Atendeje yindu yampaka yimtendekasye Mlungu kwanonyela.” (Yuda 21) M’yoyo kuti tupochele chikamuchisyo kutyochela kwa Yehofa pandaŵi jakusawusya, tukusosekwa kuŵa najo paunasi. Nambo ana mpaka tutende yeleyi chamtuli?

4, 5. Ana Yehofa alosisye chamtuli kuti akusatunonyela?

⁴ Kuti tuŵe paunasi ni Yehofa tukusosekwa kumanyilila kuti jwalakwe akusatunonyela mnope. Aganisye yindu yejinji yatutendele Yehofa. Jwalakwe atupele chilambo chakusalala chegumbale ni yakumela soni yinyama yakusangalasya. Atupelesoni yakulya yakunong’a soni mesi gambone gakumwa. Kupitila m’Baibulo, Yehofa atujiganyisye yakwamba lina lyakwe soni ndamo syakwe syambone. Kupunda yosope, jwalakwe ŵatunonyele mwakututumichisya Mwanagwe jwakunonyelwa, jwali Yesu kukupeleka umi wakwe m’malo mwa m’weji. (Yohane 3:16) M’yoyo, ligongo lya mbopesi jeleji, tukwete chembecheyo chambone msogolo.

⁵ Yehofa atamilikasisye Uchimwene wa Umesiya, kapena kuti boma jakwinani, jele jachijimasye yakusawusya yosope pangakaŵapa. Uchimwene welewu chiwulinganye chilambochi kuŵa paladaiso, soni jwalijose chachitamaga m’chilambochi mwamtendele soni mwakusangalala mpaka kalakala. (Salimo 37:29) Litala line lyatulosisye Yehofa chinonyelo chakwe, lili kutujiganya ndamo syambone. Jwalakwe akusatuŵendasoni kuti tupopeleje kwa jwalakwe, soni akusaŵa jwakoseka kupikanila mapopelo getu. Yehofa alosisye chinonyelo chakwe kwa jwalijose jwa m’weji.

6. Ana mpaka alosye chamtuli kuti akusayamichilaga chinonyelo cha Yehofa?

⁶ Ana mpaka alosye chamtuli kuti akusayamichilaga chinonyelo cha Yehofa? Ayamichileje chilichose chaŵatendele Yehofa. Yili yakutesya chanasa kuti ŵandu ŵajinji ali ŵangayamichila. Yesu paŵaliji pachilambo chapasi ŵandu nganaŵasoni ŵakuyamichila. Ndaŵi jine Yesu ali aposisye ŵandu ŵamatana likumi, mundu jumo ni jwaŵam’yamichile. (Luka 17:12-17) Tukusosekwa kuŵa mpela mundu jwaŵam’yamichile Yesuju. Ndaŵi syosope tukusosekwa kum’yamichilaga Yehofa.

7. Ana mpaka tulosye chamtuli kuti tukusamnonyela mnope Yehofa?

 ⁷ Tulosyejesoni kuti tukusamnonyela Yehofa. Yesu ŵajiganyisye ŵakulijiganya ŵakwe kuti amnonyeleje Yehofa ni mtima wawo wosope, umi wawo wosope, soni nganisyo syawo syosope. (Aŵalanje Mateyu 22:37.) Ana yeleyi yikusagopolela chichi?

8, 9. Ana mpaka tulosye chamtuli kuti tukusamnonyela Yehofa?

⁸ Ana yili yakwanila kwamba kusala kuti tukusamnonyela Yehofa? Iyayi. Naga tukusamnonyela Yehofa ni mtima wetu wosope, umi wetu wosope, soni nganisyo syetu syosope, nikuti tuchilosya yeleyi mu yakutenda yetu. (Mateyu 7:16-20) Baibulo jikusatujiganya mwakupikanika kuti naga tukusamnonyela Mlungu, tuchipikanila malamusi gakwe. Ana kupikanila malamusi ga Yehofa kuli kwakusawusya? Iyayi, ligongo “malamusi gakwego nganigaŵa gakusitopesya.”—Aŵalanje 1 Yohane 5:3.

⁹ Naga tukumpikanila Yehofa, tuchiŵa ŵakusangalala soni tuchikola umi ŵakwikutila. (Yesaya 48:17, 18) Nambo ana chichi champaka chitukamuchisye kuŵa paunasi ni Yehofa? Kwende tulole.

10. Ana ligongo chichi akusosekwa kwendelechela kulijiganya yakwamba Yehofa?

¹⁰ Ana ŵatesile yatuli kuti aŵe paunasi ni Yehofa? Kupitila mkulijiganya kwawo Baibulo, ŵammanyilile mnope Yehofa, soni ŵatandite kuŵa najo paunasi. Unasiwu uli mpela moto wawukusosekwa kuwukwisililaga. Mpela muyikusaŵelaga kuti moto ukusasosekwa sasu kuti ukoleleje, akusosekwa kwendelechela kulijiganya yakwamba Yehofa kuti unasi wawo ni jwalakwe ukamala.—Misyungu 2:1-5.

11. Ana yajikusajiganya Baibulo mpaka yakwaye chamtuli?

¹¹ Pakupitilisya kulijiganya Baibulo, chachilijiganya yindu yakwayika pamtima. Aganisye muŵapikanile ŵakulijiganya ŵa Yesu, pandaŵi jele Yesu ŵasalaga yakulochesya  ya m’Baibulo. Jemanjajo ŵatite, “Ana mitima jetu nganijiŵa mpela jikolela moto paŵaliji mkuŵecheta ni m’weji mwitala, paŵatusalilaga Malemba?”—Luka 24:32.

12, 13. (a) Ana tukakunda chichi kutendekwa ni chinonyelo chetu kwa Yehofa? (b) Ana mpaka tutende yamtuli kuti tujendelechele kumnonyela Yehofa?

¹² Mpela muyaŵelele ni ŵakulijiganya ŵala kuti yakwayiye mumtima paŵapikanichisye Malemba, kombolekasoni kuti wawojo ŵapikanaga m’yoyo paŵatandite kujipikanichisya Baibulo. Yeleyi yakamuchisye kummanyilila Yehofa soni kumnonyela. Akakunda kuti chinonyelo chawo pa Yehofa chinandipe.—Mateyu 24:12.

¹³ Pali paunasi ni Mlungu, akusosekwa kulingalinga kuti unasi wawo upitilisye kuŵa wakulimba. Akusosekwa kwendelechela kulijiganya ya Yehofa ni Yesu, soni aganichisyeje yalijiganyisyeyo soni mwampaka atendele kuti ayikamulichisyeje masengo paumi wawo. (Yohane 17:3) Pakuŵalanga kapena kulijiganya Baibulo, aliwusyeje kuti, ‘Ana yeleyi yikunjiganya chichi pakwamba ya Yehofa Mlungu? Ligongo chichi ngusosekwa  kumnonyela jwalakwe ni mtima wangu wosope soni umi wangu wosope?’—1 Timoteo 4:15.

14. Ana kupopela kukusakamuchisya chamtuli kuti tumnonyeleje mnope Yehofa?

¹⁴ Naga akwete mjawo jwambone, akusaŵechetana najo mwakutamilichika. Yeleyi yikusakamuchisya kuti unasi wawo ni mjawojo uŵe wakulimba. Mwakulandana ni yeleyi, patukuŵecheta ni Yehofa mwakutamilichika mwipopelo, unasi wetu ni jwalakwe ukusaŵa wakulimba. (Aŵalanje 1 Atesalonika 5:17.) Lipopelo lili mtuka wapenani ŵakutyochela kwa Atati wetu ŵakwinani. Ndaŵi syosope tukusosekwa kuŵechetana ni Yehofa kutyochela pasi pamtima. (Salimo 62:8) Tukagambaga kupeleka mapopelo gakwamba kwinjisya mumtwe, nambo tupopeleleje yindu yatukusosechela. Naga tukwendelechela kulijiganya Baibulo soni kupopela kutyochela pasi pamtima, nikuti unasi wetu ni Yehofa uchiŵa wakulimba.

15, 16. Ana masengo gakulalichila akusagawonaga chamtuli?

¹⁵ Naga akusaka kwendelechela kuŵa paunasi ni Yehofa, akusosekwa kwasalilaga ŵane yakwamba chikulupi chawo. Kwasalila ŵane yakwamba Yehofa uli upile wapenani. (Luka 1:74) Gali masengo gele Yesu ŵapeleche kwa Aklistu wosope ŵasyesyene. Wosopewe tukusosekwa kulalichilaga utenga wambone wakwamba Uchimwene wa Mlungu. Ana atandite kala kulalichilaku?—Mateyu 24:14; 28:19, 20.

¹⁶ Ndumetume Paulo ŵagawonaga masengo gakulalichila kuŵa gakusosekwa mnope, mwati wagakolasile kuti “chipanje.” (2 Akolinto 4:7) Kwasalila ŵane yakwamba Yehofa soni chakulinga chakwe gali masengo gakusosekwa mnope gampaka atende. Lili litala lyakumtumichilila Yehofa, soni jwalakwe akusayamichila yiliyose yakusamtendela. (Ahebeli 6:10) Kulalichila mpaka kwakamuchisye wawojo soni ŵandu ŵakwapikanila kuŵa paunasi ni Yehofa soni kupata umi wangamala. (Aŵalanje 1 Akolinto 15:58.) Ana panasoni masengo gane gampaka asangalaleje nago mnope?

17. Ana ligongo chichi masengo gakulalichila gakusosekwa kutendekwa mwachitema?

 ¹⁷ Tukusosekwa kamula mwachitema masengo gakulalichilaga. Tukusosekwa ‘kulalichila maloŵe,’ soni ‘tutende nago mwachitema.’ (2 Timoteo 4:2) Ŵandu akusosekwa kupikana yakwamba Uchimwene wa Mlungu. Baibulo jikusati, “Lisiku lyekulungwa lya Yehofa liŵandichile, liŵandichile soni likwanguya mnope kwisa.” Mbesi ‘ngasijikokoŵa’ kwisa. (Sefaniya 1:14; Habakuku 2:3) Kusala yisyene pachangakaŵapa, Yehofa chajonanje chilambo cha Satanachi. Nambo yeleyi mkaniyitendekwe, ŵandu akusosekwa kwakalamusya kuti asagule kumtumichila Yehofa.

18. Ligongo chichi tukusosekwa kumlambila Yehofa pampepe ni Aklistu ŵasyesyene?

¹⁸ Yehofa akusaka kuti m’weji tumlambileje yalumo ni Aklistu ŵasyesyene. Baibulo jikusati, “kwende tuganichisyaneje kuti tulimbikasyane pa chinonyelo soni masengo gambone, tukaleka kusongana pamo mpela mwakusatendela ŵane, nambo kwende tulimbikasyane jwine ni m’jwakwe, soni tujonjechesye kutenda yeleyi mnopemnope palikuŵandichila lisikulyo.” (Ahebeli 10:24, 25) Tukusosekwa kutenda yampaka tukombole kuti tusimanikweje pamisongano josope. Misongano jikusatupa upile wakulimbikasyana jwine ni m’jwakwe.

19. Ana chichi champaka chitukamuchisye kuti twanonyeleje abale ni alongo ŵetu ŵachiklistu?

¹⁹ Pakusimanikwa pamisongano chachipata achimjawo ŵambone ŵachachakamuchisya pakumtumichila Yehofa. Chachisimana ni abale ni alongo ŵakulingalinga kumtumichila Yehofa mpela mwakutendela wawojo. Jemanjaji ali ŵangali umlama soni ndaŵi sine akusalemwesya mpela mwakusatendela wawojo. Naga jemanjaji alemwisye akusosekwa kuŵa ŵakoseka kwakululuchila. (Aŵalanje Akolose 3:13.) Ndaŵi syosope alolechesyeje ndamo syambone mwa abale ni alongo wawo ŵachiklistu. Yeleyi yichakamuchisya wawojo kuti ŵanonyeleje Aklistu achimjawo soni chachiŵa paunasi wakulimba ni Yehofa.

20, 21. Ana “umi usyesyene” uli chichi?

²⁰ Yehofa akusasaka kuti achimjakwe wosope akole umi wambone. Baibulo jikusatujiganya kuti kusogoloku umi wetu uchiŵa wakulekangana mnope ni mwawuŵelele masiku agano.

²¹ Kusogoloku tuchikola umi wangamala. Ngasitugamba kutama ni umi kwa yaka 70 kapena 80 basi. Tuchisangalala ni “umi wangamala” tuli tukwete umi wamlama. Tuchitamaga mwamtendele soni mwakusangalala m’chilambo chakusalala cha paladaiso. Baibulo jikusakolanga yakutendekwa yeleyi kuti “umi usyesyene.” Yehofa ŵalagwisye yakutupa umi usyesyenewu, nambo tukusosekwa kutenda yampaka tukombole sambano jino kuti “tuwukamule mwamachili” umiwo.—1 Timoteo 6:12, 19.

22. (a) Ana mpaka tutende chichi kuti “tuwukamulichisye mwamachili umi usyesyene”? (b) Ana ligongo chichi umi wangamala nganuŵa malipilo getu?

²² Ana mpaka tutende chichi kuti “tuwukamule mwamachili umi usyesyene”? Tukusosekwa ‘kutendaga yindu yambone’ soni tuŵeje “ŵakusichila payitendo yambone.” (1 Timoteo 6:18) Yeleyi yikugopolela kuti tukusosekwa kamulichisya masengo yatulijiganyisye m’Baibulo. Nambo umi wangamala ngaŵa mkuwupata mwamachili getu, soni nganuŵa malipilo getu. Umiwu uli mtuka walulele ŵakutyochela kwa Yehofa ŵakusiŵapaga ŵakutumichila ŵakwe ŵakulupichika. Yeleyi yikulosya kuti jwalakwe akusatulosyaga “umbone mtima wekulungwa.” (Aloma 5:15) Atati ŵetu ŵakwinani ali ŵakusachilila kwapa ŵakutumichila ŵakwe mtuka wa umiwu.

23. Ana ligongo chichi akusosekwa kutenda yisagula yakuŵajilwa sambano jino?

²³ Aliwusye kuti, ‘Ana ngusalambilaga Mlungu m’litala lyakusalijitichisya jwalakwe?’ Naga akuyiwona kuti akusosekwa kuchenga yindu yine paumi wawo, akusosekwa kutenda yeleyo mwachitema. Naga tukumdalila Yehofa soni kutendaga yiliyose yakusosekwa kuti tumpikanileje, nikuti Yehofa chachiŵa  malo getu gakutilila. Jwalakwe chachachenjela ŵandu ŵakwe ŵakulupichika m’masiku gambesi m’chilambo chakusakala cha Satanachi. Kaneko Yehofa chachilolechesya kuti tukutama kwangamala m’Paladaiso, mpela muŵalaguchisye. Kusala yisyene yili yakomboleka kupata umi wangamala naga akutenda yisagula yakuŵajilwa sambano jino.