第19章
留喺耶和华嘅爱里
1,2．今日，我哋点样得到庇护呢？
想象一下，你喺路上行紧，天色越来越暗，甚至开始行雷闪电，跟住狂风暴雨。呢个时候，你肯定好想揾个地方遮风挡雨。如果你揾到一个安全嘅地方，一定会好安心！
2 今日，呢个世界世风日下，人欲横流，千疮百孔。你可能会谂：我喺边度可以揾到庇护嘅地方呢？诗篇执笔者话：“我要向耶和华讲：‘你系我嘅庇护所，系我嘅城堡，系我嘅上帝；我信赖你。’”（诗篇91:2）我哋面对难题嘅时候，耶和华会帮助我哋。唔单止噉，佢仲俾我哋一个美好嘅希望同未来。
3．我哋点样做先至能够得到耶和华嘅保护？
3 耶和华点样帮助同保护我哋呢？佢可以帮助我哋应付所有嘅难题。耶和华系全能嘅，佢比我哋嘅仇敌强大，即使我哋真系受到伤害，最终耶和华都能够消除呢啲伤害造成嘅任何影响。圣经鼓励我哋要“常在上帝嘅爱里”。（犹大书21）如果我哋想得到耶和华嘅保护，就需要留喺佢嘅爱里。噉我哋可以点样做呢？
报答上帝对你嘅厚爱
4,5．我哋点样睇出耶和华好爱我哋？
4 我哋要留喺耶和华嘅爱里，就要记得佢系几咁爱我哋。请谂吓耶和华为我哋所做嘅一切。例如：佢唔单止赐俾我哋一个美丽嘅地球，使地球充满丰富多彩嘅动物同植物，仲赐俾我哋美味嘅食物同干净嘅水源。耶和华通过圣经教导我哋认识佢嘅名同美好嘅特质。上帝爱人类嘅最大明证，就系佢派自己嘅爱子耶稣嚟到地上为人牺牲生命。（约翰福音3:16）由于耶稣嘅牺牲，我哋有美好嘅希望同未来。
5 耶和华喺天上建立咗一个政府，就系弥赛亚王国。呢个王国好快就会将所有苦难除去，使地球成为一个乐园，到时人人都可以享有真正嘅和平安全，永远幸福快乐噉生活落去。（诗篇37:29）耶和华向人表现爱心嘅另一种方式，就系教导人点样喺而家过最好嘅生活。另外，上帝邀请我哋向佢祷告，而且随时准备好听我哋嘅祷告。由此可见，耶和华系几咁爱每一个人。
6．耶和华咁爱你，你应该点样报答佢？
6 耶和华咁爱你，你应该点样报答佢呢？要感激上帝为你所做嘅一切。今日，好多人都冇感恩之心。耶稣在世嘅日子，好多人亦都系噉。有一次，耶稣医好十个麻风病人，不过只得一个人返嚟多谢佢。（路加福音17:12-17）呢个麻风病人嘅感恩之心好值得我哋学习。我哋应该时刻感激耶和华。
7．我哋应该点样爱耶和华？
7 除此之外，我哋仲需要表明自己爱耶和华。耶稣吩咐门徒要全心、全意、全智爱耶和华。（请读马太福音22:37）耶稣嘅吩咐系乜嘢意思呢？
8,9．我哋点样表明自己爱耶和华？
8 只系口头上话爱耶和华系咪就够呢？当然唔够。如果我哋全心、全意、全智爱耶和华，就会用行动表明我哋爱佢。（马太福音7:16-20）圣经话，如果我哋爱上帝就会遵守佢嘅诫命。噉系咪好难做得到呢？唔系嘅，因为耶和华嘅“诫命并唔系沉重嘅负担”。（请读约翰一书5:3）
9 我哋服从耶和华，就可以过心满意足嘅生活。（以赛亚书48:17,18）除咗服从耶和华，我哋仲要不断加深对耶和华嘅爱，噉要点样做呢？等我哋一齐嚟睇吓。
要不断加深对耶和华嘅爱
10．点解你要不断加深认识耶和华？
10 你系点样同耶和华建立友谊嘅呢？通过研读圣经，你越来越认识耶和华，成为佢嘅朋友。你一定好珍惜呢份友谊。同上帝嘅友谊就好似炭火一样，如果想火继续燃烧，就需要不断加炭。同样，如果想继续留喺耶和华嘅爱里面，我哋就要不断加深认识佢。（箴言2:1-5）
正如需要加炭先可以令火继续燃烧，我哋都需要加深认识耶和华，对佢嘅爱先至会长燃不熄
11．深入了解圣经对你有乜嘢益处？
11 你越深入了解圣经，内心就会越受打动。耶稣嘅两位门徒有类似嘅经历。佢哋听完耶稣解释圣经嘅预言之后，就话：“佢喺路上同我哋讲话，使我哋豁然明白圣经，嗰时我哋嘅心唔系好似火一样燃烧咩？”（路加福音24:32）
12,13．（甲）我哋唔想自己对上帝嘅爱变成点样？（乙）我哋可以点样继续加深对耶和华嘅爱？
12 耶稣嘅门徒明白经文嘅意思之后，深受感动。当你开始明白圣经嘅真理，你都可能感觉内心充满热诚，燃起对耶和华嘅爱，好想更加认识佢。你一定唔想自己对上帝嘅爱慢慢冷淡落嚟。（马太福音24:12）
13 成为上帝嘅朋友之后，你仲需要努力巩固同佢嘅友谊。你需要继续认识上帝同耶稣，沉思所学到嘅知识，并且应用喺生活上。（约翰福音17:3）研读圣经嘅时候，你可以问吓自己：关于耶和华上帝，我从经文学到乜嘢？点解我应该全心全意爱佢？（提摩太前书4:15）
14．点解祷告能够加深我哋对耶和华嘅爱？
14 你经常同好朋友沟通，就可以巩固同佢嘅友谊。同样，我哋经常向耶和华祷告，同上帝嘅关系就会越来越亲密。（请读帖撒罗尼迦前书5:17）祷告系天父赐俾我哋嘅特别恩赐，我哋应该经常向佢倾心吐意。（诗篇62:8）我哋唔应该将祷告公式化，反复背诵某啲内容。我哋嘅祷告应该系衷心同坦诚嘅。如果我哋继续学习圣经同衷心祷告，就能够不断加深对耶和华嘅爱。
帮助人认识耶和华
15,16．你对传道工作有乜嘢睇法？
15 如果我哋想更加亲近耶和华，就需要同人分享圣经知识。我哋可以帮助人认识耶和华，的确系好大嘅荣幸。（路加福音1:74）所有真基督徒都会听从耶稣嘅吩咐，传讲上帝王国嘅好消息。你系咪已经开始噉做呢？（马太福音24:14；28:19,20）
16 使徒保罗好重视传道工作，将呢个工作视为“珍宝”。（哥林多后书4:7）向人传讲耶和华嘅真理，帮助人认识佢嘅旨意，可以话系世上最重要嘅工作。呢个亦都系事奉耶和华嘅一种方式。上帝唔会忘记你为佢所做嘅一切。（希伯来书6:10）传道工作可以造益你同接受真理嘅人，能够帮助你同佢哋亲近耶和华，而且喺将来得到永生。（请读哥林多前书15:58）试问仲有乜嘢工作可以令人得到更大嘅满足感呢？
17．点解传道工作非常紧急？
17 传道工作非常紧急。我哋唔单止要“传讲神圣嘅话语”，而且要“急切从事”。（提摩太后书4:2）点解人好需要听到王国嘅信息呢？圣经话：“耶和华嘅大日子临近嘞，临近嘞，飞快而嚟！”呢个制度嘅终结“绝不误期”。（西番雅书1:14；哈巴谷书2:3）冇错，耶和华好快就会毁灭撒但嘅邪恶世界。喺呢个日子嚟到之前，我哋需要向人发出警告嘅信息，噉佢哋就有机会选择事奉耶和华。
18．点解我哋应该同其他真基督徒一齐崇拜耶和华？
18 耶和华希望我哋同其他真基督徒一齐崇拜佢。圣经话：“要彼此关注，激发爱心，促进善行。唔好放弃聚会，好似有啲人习惯咗一样，反而要彼此鼓励。你哋既然睇见嗰个日子临近，就更加要噉样做。”（希伯来书10:24,25）我哋应该尽力参加所有聚会，善用呢个机会彼此鼓励互相强化。
19．乜嘢会帮助你更加爱弟兄姊妹？
19 你参加聚会，就可以揾到真朋友，佢哋会帮助你继续事奉耶和华。虽然会众弟兄姊妹嘅背景各有唔同，不过佢哋同你一样都好想尽力事奉上帝。另一方面，佢哋同你一样都系唔完美嘅人，都会犯错，所以要乐于宽恕佢哋。（请读歌罗西书3:13）我哋努力留意弟兄姊妹嘅优点，就会更加爱佢哋，同埋更加亲近耶和华。
真正嘅生命
20,21．乜嘢系“真正嘅生命”？
20 耶和华想佢所有嘅朋友都可以过最好嘅生活。圣经话，乐园嘅生活会同而家完全唔一样。
耶和华想你享有“真正嘅生命”。你会唔会得到呢？
21 将来，我哋嘅生命唔会只得短短几十年，而系永远嘅。上帝会使我哋恢复完美，得享“永生”。我哋会身心健康，喺美丽嘅乐园里面过快乐平安嘅生活。呢个就系圣经所讲嘅“真正嘅生命”。耶和华承诺会赐呢种生命俾人，不过，我哋而家就必须竭尽全力，先能够“紧握”真正嘅生命。（提摩太前书6:12,19）
22．（甲）我哋可以点样“紧握真正嘅生命”？（乙）点解话永生唔系靠自己嘅努力可以赚翻嚟嘅呢？
22 可以点样“紧握真正嘅生命”呢？我哋要“行善，喺善事上富足”。（提摩太前书6:18）呢个意味住我哋要实践圣经嘅真理。不过，永生并唔系靠自己嘅努力可以赚翻嚟嘅，而系耶和华赐俾佢忠心仆人嘅礼物，系上帝嘅“分外恩典”。（罗马书5:15）天父真系好想将呢份礼物赐俾佢忠心嘅仆人。
23．点解你而家就要作出正确嘅选择？
23 你可以问吓自己：我系咪以上帝悦纳嘅方式崇拜佢？如果你发觉自己需要调整，就应该即刻采取行动。我哋信赖耶和华，喺各样事上都服从佢，耶和华就会成为我哋嘅庇护所。喺撒但嘅邪恶世界末期，上帝会保护佢忠心嘅子民。最终，耶和华会实现佢嘅承诺，使人永远生活喺乐园里面。而家，如果你作出正确嘅选择，将来就可以享有真正嘅生命！
