1, 2. Wari du rengbe ani ka gbia bandahe ni areme?

MO Berẽnga gupai nga mo na ndu ngbagene bayuge kini tona kaa ya. Ngbangbaturũ ki tona ka biro, ikpiro gumba ki du, na gumba ki tona ka sumbo. Ka si aimanga ya mai ki tona ka na. Mo ki tona ka gbata gu ba ka mo gbu rogoho. Nairiwo gu bakere ngbarago ka mo du na ni ka si du nga mo bi gu ba du ni wenehe na ni uguhe!

² Kina gu ngbatunga bangisa pai re du ani areme rogoho. Agu apai du rogo zegino nagberã kina kumbatayo. Mo rengbe ka baka bangiro nga, ‘Wari du rengbe mi ka gbia bandahe ni?’ Bake papara atambuahe akepai ki ya: ‘Mi aya fu Yekova, “Mo nga gi bagbuko nga gi gbata; gi Mbori, nga gu ko mi nakida kuti ko.’” (Atambuahe 91:2) Nirengo, Yekova ima rengba ka fu ongoda furani awere ti gaani akpakarapai, na ko nafu wene maabangirise furani tipa kumbatayo.

3. Wai du rengbe ani ka sa Yekova ni gaani bagbuko?

³ Wai du rengbe Yekova ka banda rani? Ko rengbe ka undo rani tipa ani sovura kuti agu akpakarapai du ani na ni, na ko ima du na ome ti ko kisusi gu boro rengbe ka imisa rani. Ka gbegberẽpai vura manga rani awere, ani rengbe kadu na gu kido nga Yekova nika nyasa anyasa riipa gupai re kumbatayo. Baibiri nangarasa rani nga: “Oni bánda tironi rogo ga Mbori nyemuse yo.” (Yuda 21) Si naida ani nye mbembedi na Yekova tipa ka gbia gako undo ti regbo fudifudiapai. Ono wai du rengbe ani ka manga gipai re?

4, 5. Wai du Yekova nayugu gako nyemuse furani?

⁴ Tipa ka nye mbembedi na Yekova, si naida ani ini wai ko na kpinyemu rani ni bakerehe. Mo berẽnga kina pa gu weneapai dunduko Yekova namangihe furani. Ko ima fu bawene kpotosende furani nga gu hiki be wene ambumbudo watadu wene zukuzuku angua gbiati anya. Ko ima fu wene nzinziri ariahe furani gbiati gigiri ime tipa ani mbirihe. Vurube Baibiri, Yekova ima yugo rimoko furani gbiati gako wene iiriwo asino. Gu susi asusa tie gbe nga, ko ayugu gako nyemuse furani ho ko akedi gu wiriko ni ko akpinyemuko nga Yesu ku auru kpotosende no tipa ko ye kafu ungako tipa rani. (Yoane 3:16) Na mbiko gi gako motumo re, ani na wene maabangirise tipa kumbatayo.

⁵ Yekova ima manga mbakadapai tipa gu Kindo nga ga Masiya, gu zogarago du ngbangbaturũ yo nga gu nika nyasariipa arungo dunduko barambeda. Gu Kindo re nika sa kpotosende ni paradizo, yo aboro dunduko nika raka ni rogo zereda na ngbarago nyeanye kindi. (Atambuahe 37:29) Gu kura gene Yekova nayugu gako nyemuse ngbaha furani nga ka yugopai furani tipa wai rengbe ani ka raka bawene raka awere. Ko naida ani kpari fuko, na ko ti aregbo dunduko regerege ka degatuko kuti gaani akpee. Si tie ziazia nga Yekova ima yugo gako nyemuse furani ni basasa dunduko.

6. Wai du si aida mo mangipai kuti gu nyemuse Yekova nayuguhe foro?

⁶ Wai du si aida mo mangipai kuti gu nyemuse Yekova nayuguhe foro? Mo yuguhe fuko nga mo na tambuahe tipa agu apai dunduko ko namangihe foro. Si nafu kina gberãrago nga, badungu aboro areme afunga tambuahe te. Kina gu bangisapai re a naadu ti gu regbo Yesu adu auru kpotosende ane. Ti kura regbo sa, Yesu ahusi aboro-ngbataka bawe ono kina gu ni sa gbua na fu tambuahe fuko. (Ruka 17:12-17) Si  naida ani du wa gu kumba nafu tambuahe fu Yesu re. Si naida ani fu tambuahe afu fu Yekova ti aregbo dũ.

7. Wai du rengbe ani ka kpinyemu Yekova?

⁷ Si naida ani niyugu gaani nyemuse a fu Yekova. Yesu aya fu gako abawiriki wẽ si naida i kpinyemu Yekova na kpotoyo dunduko, na mbisimo yo dunduko, na gayo berã dũ. (Mo gedi Matayo 22:37.) Ginipai gipai re ayugoho?

8, 9. Wai du rengbe ani ka yugoho fu Yekova nga ani ima kpinyemuko?

⁸ Ya mo gupai gbua si aidaha nga ka ya ani ima kpinyemu Yekova? Oó. Ka si du nga ani kpinyemu Yekova na kpotorani yo dunduko, mbisimo rani dũ, na gaani berã dũ, ani nika yugoho rogo mangapai yo. (Matayo 7:16-20) Baibiri nayugo gupai ziazia nga ka ani kpinyemu Mbori, ani ka aka kuti gako arugute. Ya mo mbumbupai du? Oó, bambiko ga Yekova “rugute asusa nga omerani te.”—Mo gedi 1 Yoane 5:3.

⁹ Ho ani agiasangba Yekova ni, ani nadu na ngbarago rogo gaani raka yo. (Yesaya 48:17, 18) Ono ginipai rengbe ka undo rani tipa ani nye mbembedi na Yekova? Ani bingoho.

10. Tipagine du si aida mo ni wirikipai awirika kindi ti ni tipa Yekova?

¹⁰ Wai du mo aye kada ni bakurea Yekova? Vurube gamo wirika Baibiri, mo ima ye ka ino Yekova wenengai na ki sonosi mbembedi pagume na ko. Gi pa bakure re wakina we nga gu si aida mo bandaha tipa si ni ki aki kindi. Kina wai si naaida i nimoi nyake amaa kindi ku bangiri we yo tipa si ni ki aki kindi, kinawo si aida mo nindu kindi kumbatayo kaa wirikapai tipa Yekova na ka sa gamo pabakure na ko si du ni nyanyakihe.—Asanza 2:1-5.

11. Wai du rengbe gu yugopai nga ga Baibiri kadu na maapai kurii gamo raka?

¹¹ Wa mo nikaa ndu kindi kumbatayo kaa wirika Baibiri, mo nika wirika agu apai awirika nga gu nika zio ngbaduro  yo. Mo bingo wai kura ga Yesu abawiriki ue adu ho ko aasaka rogo Baibiri yo ni fuyo. I aya: “Ani akigi akiga, ho ko afura ni na ani gene, wa ko ayugu Ziazia Kekeapai fu rani te?”—Ruka 24:32.

12, 13. (a) Ginipai rengbe ka manga tipa gu nyemuse du ani na ni tipa Mbori? (b) Wai du rengbe ani ka sa gaani nyemuse dagbarani na Yekova si du ni ungaha?

¹² Kina wai abawiriki akigi ho i agi rogo Ziazia Kekeapai yo ni, si ima rengba kadu a nga kinawo mo adu zaaza ho mo atona kaa giarogo agu apai yo ni du rogo Baibiri yo. Gipai re du naaundo ro tipa mo ini Yekova na ki kpinyemuko. Si aidanga mo mbu gi nyemuse re si zere te.—Matayo 24:12.

¹³ Bara sa kindi mo nada ni bakurea Mbori, si naida mo mangi ome nyanyaki tipa gamo pa bakure na ko du nyanyaki. Si naida mo nindu kumbatayo kindi kaa wirikapai tipa ko gbiati Yesu na kini berẽkurii gupai mo awirikaha na wai rengbe mo ka mangasunge na ni rogo gamo raka yo. (Yoane 17:3) Ho mo agedapai ni watadu ho mo awisigo Baibiri ni,  mo sana tiro nga: ‘Ginipai gipai re ayugoho fere tipa Yekova? Tipagine du si aida mi kpinyemuko ko ti ni na kpotoreyo gbiati mbisimo re dunduko?’—1 Timoteo 4:15.

14. Wai du rengbe kparakpee ka nyakasa gaani nyemuse koyo du Yekova ni?

¹⁴ Ho du mo ni na wene bakureamo, mo nafura na ni dedede, na gipai re nasa gaoni pabakure si du ni nyanyakihe. Teketeke a, ho ani afura ni dedede na Yekova rogo kpee yo, si na sa gaani nyemuse koyo du ko ni si du ni nyanyakihe. (Mo gedi 1 ATesaroniko 5:17.) Kparakpee nga gu bawene gamahe gu Barani du ngbangbaturũ yo nafuhe furani. Si naida ani fura na ko ti aregbo dũ kina boro ngbadurani yo. (Atambuahe 62:8) Si aidanga ani mangi kina bangisa kparakpee te, ono si naida ani pe kina boro gupai ani aberãha. Nirengo, ka ani aandu kindi kumbatayo kaa wirika Baibiri na kini mangi gu kparakpee naye kina boro ngbadurani yo, gaani nyemuse koyo du Yekova ni nika du ni ba nyanyakihe gbe.

15, 16. Wai du mo abi sunge tungusapai?

¹⁵ Ka ani aida ka nye mbembedi na Yekova, si naida ani ni fura afura fu kura aboro tipa gaani ida. Fura fu kura aboro tipa Yekova nga bawene momu. (Ruka 1:74) Na gere nga gu sunge Yesu afuhe fu ndikidi aKristano dunduko. Ani dunduko si aida ani tungusipa gu wene pangbanga nga ga ga Mbori Kindo. Ya mo mo ima manga gipai re?—Matayo 24:14; 28:19, 20.

¹⁶ Gu mokedi nangia Pauro abihe nga sunge tungusapai angia bawene sunge; ko ayambuhe nga “kumuko.” (2 AKorindo 4:7) Fura fu aboro tipa Yekova na tipa gako ringbisapai nga gu nyanyakipa sunge si aida mo mangihe. Si nga gu kura gene tipa mo mangisunge fu Yekova, na ko nabi gupai mo amangaha na nyanyakipaha. (AEbere 6:10) Tungusapai  rengbe arengba ka undoro gbiati agu aboro nadegatuyo foro bambiko mo naundo tiro gbiati kura aboro tipa i nye mbembedi na Yekova. (Mo gedi 1 AKorindo 15:58.) Ya mo kura sunge ho rengbe ka fu ngbarago foro susi gere?

17. Tipagine du si aida sunge tungusapai mangi ti ni ni ipiipihe?

¹⁷ Sunge tungusapai nga gu sunge si aida si du ni ipiipihe. Si naida ani “nitúngusi pai,” na si naida ‘ani ké na ni, ho du ragoho ni’ watadu ni ipiipihe. (2 Timoteo 4:2) Si naida aboro gi pai agia tipa ga Mbori Kindo. Baibiri naya: “Gu bakere rago nga ga Yekova du mbembedi, si mbembedi ki niipisi tihe gbe!” Digido zegino “aíma nga te!” (Zefania 1:14; Abakuka 2:3) Nirengo, barambeda, Yekova nika gbarasa gi ga Satana gbegberẽ zegino re. Mbata fu gupai re mangi, si naida i fu zahe fu aboro wa ka i sia ka iriso Yekova.

18. Tipagine du si aida ani irisi Yekova ti ni na gu kura ndikidi aKristano?

¹⁸ Yekova naida ani irisiko wa sa na gu kura ndikidi aKristano. Baibiri naya: “Ani bérẽ pa akuarani ka nyakasa yo kuti nyemuse na wene mangaapai. Ka ani hé nga dungura tirani na akuarani, wa du sino agu yo ya, ono ani rúgu akuarani aruga; ki nimangi he susi, wa bi oni he ya gu uru re si nambeda.” (AEbere 10:24, 25) Si naida ani mangi ome kadu pati adunguratise dunduko. Adunguratise nafu momu furani tipa ani nyakasi akuarani na ki ngarasi yo.

19. Ginipai rengbe ka sarani ani kpinyemu awirinarani nga aKristano?

¹⁹ Ho mo aye ni kupati adunguratise, mo nagbia wene abakure nga aguyo nika undoro mo irisi Yekova. Mo nika gbia badungu awirina nga aguyo du wa kina ro namanga bakere asadatise tipa ka iriso Yekova. I nga aboro zangarengba naingapai wakina ro. Ho i amanga ingahe ni, si naida mo du regerege tipa ka mbupai fuyo. (Mo gedi AKorosaio 3:13.) Si naida mo naagbe berãro ti aregbo dũ tipa gu wene asino du ti awirina, si nika sa gupai nga mo kpinyemuyo na ki sa ro mo mbedi gbe na Yekova.

20, 21. Ginihe nga “ndikidi unga”?

²⁰ Yekova naida gupai nga abakureako dunduko raki bawene raka. Baibiri nayugo gupai nga gu raka ani ka rakaha kumbatayo nika du kia ti gu raka ani arakaha areme.

²¹ Kumbatayo, ani nika raka nyeanye kindi, angianga tipa agarã gbua 70 watadu 80 ya. Ani nika ka gbia “nyenye unga” kidu na wene kpotorani, kidu na zereda, na kidu na ngbarago rogo bawene paradizo. Gere du nga gupai Baibiri ayambaha nga “ndikidi unga.” Yekova du kidohe tipa kafu gi ndikidi unga re furani, ono si naida animangi bakere asadatise amanga awere tipa ka ‘zádaha’ nyanyaki.—1 Timoteo 6:12, 19.

22. (a) Wai du rengbe ani ka zada “gu unga nga ndikidi unga” nyanyaki? (b) Tipagine du ani aarẽnga ti ni tipa ka gbia nyenye unga ya?

²² Wai du rengbe ani ka zada gu “gu unga nga ndikidi unga” nyanyaki? Ani duwa ka ani “mángi gu pai ngba angba” na ki “kúmuko na wene mangaapai.” (1 Timoteo 6:18) Gere nayugo gupai nga si naida ani mangi gupai ani awirikaha rogo Baibiri ku rogo mangaapai yo. Wa vura duhe wo, gu ndikidi unga re arunga kina riipa gu ome ani amangaha te. Ani aarẽnga ka gbia nyenye unga te. Si nga gu gamahe Yekova afuhe fu gako amoyambu gbua, kpia gu gako gamahe re nga “ga Mbori undahe.” (ARomo 5:15) Gu Barani du ngbangbaturũ yo nakpinyemu kafu gi gamahe re fu gako ruru amoyambu.

23. Tipagine du si aida mo mangi wene siapai ti ni awere?

²³ Mo sananga tiro nga, ‘Ya mo mi nairiso Yekova ngba gu gene ngbatiko?’ Ka si du nga mo bi gupai nga si naida mo mangi bete aariapai, si naida mo mangihe kina awere. Ho ani akido kuti Yekova na kini mangi agu apai dunduko rengbe omerani na ni, Yekova na du ni gaani bagbuko. Ko nika banda gako aboro abanda rogo gu yangara arame nga  ga gi ga Satana gbegberẽ zagino re. Tingbafuoho, Yekova nika sarani dunduko ani raki paradizo yo nyeanye kindi, ringbisihe kina kuti gako kidohe. Nirengo, mo rengbe arengba ka raka ndikidi raka ka mo mangi wene siapai awere!