LAPENY ME 3
Atwero Lok ki Lunyodona Nining?
NGO MA ONONGO IN IBITIMO?
Go kong ni: Man Ceng adek otyeno. Geoffrey, ma tye ki mwaka 17, otyeko ticce woko, dok tye atera me bedo piny ka namo! En oyabo TV ci ojany i wi kom ma en maro loyo.
I cawa meno kikome, Babane otuc i doggola ma cwinye pe yom.
“Geoffrey! Pingo itye ka balo cawa i neno TV ma kun omyero ibed ka konyo omeru matidi ki homework ma kimiye? In pe itimo gin mo keken ma kiwacci!”
Geoffrey onguro lok ni, “Man dok ocako lokke ma jwi-ni.”
Babane odolo bade. “Awobi, iwacci ngo?”
Geoffrey oomo yweyo kun waco ni “Gin mo ku.”
Babane okeco adada dok oloko ki kiniga ni “Pe ilok kweda kumeno!”
Ka onongo nene itye Geoffrey, kono itimo ngo me juko daa-ni?
TAM KONG!
Nywako lok ki lunyodoni tye calo dwoyo mutoka. Ka inongo kigengo yo moni woko, ibitemme me yenyo yo mukene.
ME LABOLLE:
Anyaka mo ma nyinge Leah owaco ni, “Anongo ni lok ki babana tek tutwal. I kine mukene aloko kwede pi kare mo, ci en penya ni, ‘Timma kica, ibedo ka lok kweda?’”
LEAH OLO TWERO YERO ME TIMO JAMI ADEK.
-
Ored i wi babane.
Leah ored ni, “Man obedo gin ma pire tek! Winy lokka ya!”
-
Okwer lok ki babane.
Leah owek lok ki babane i kom pekone.
-
Okur kare mupore, ci oyab lok ki babane doki.
Leah olok ki babane wang ki wang lacen, nyo ocone waraga i kom pekone.
Tam ango ma in itwero miyo Leah ni oyer?
TAM KONG: Won Leah tye ki tam mapol i wiye
Kit ma omyero pe iwek gigeng ma kiketo i gudo ojuk wotti woko-ni, itwero bene nongo yo me lok ki lunyodoni
Kadi bed Yero Tam me 2 romo bedo yo mayot loyo, ento pe nyuto ryeko. Pingo? Pien ni me lweny ki pekkine, Leah myero olok ki babane
Ka Leah Oyero Tam me 3, ci en pe biye ni ariya man ogenge ki tute me lok ki babane. Me ka meno, en temo nyamo lok man i kare mukene. Dok ka Leah oyero me coyo waraga bot babane, en twero winyo maber ber cutcut.
Coyo waraga bene romo konye me yero nyig lok mupore me tito pekone kikome. Ka won Leah okwano waraga-ni, en biniang gin ma Leah onongo mito titte dok man romo konye me niang peko pa nyare maber. Pi man, Yero Tam me 3 bikelo adwogi maber bot Leah ki babane. Kadi oyero me lok ki wonne wang ki wang nyo coyo waraga bote, timo man rwatte ki tira me Baibul ni “watamu pi gin ma kelo kuc.”
Tam ango mukene ma Leah twero yero me lubone?
Tam kong i kom gin mukene, ci ico piny i kabedo ma kiweko odong nono-ni. Co bene adwogi ma twero bino pi yero me lubo tam meno.
GWOKKE KI LOKO LOK MA KELO TAM MAPAT
Wi opo ni, gin ma iwaco ki gin ma lunyodoni niang ki i lokki i cawa mukene pe rwatte.
ME LAPORE:
Lunyodoni romo penyi pingo wangi col. Iromo gamo ni, “Pe amito lok iye.”
Ento lunyodoni gubiniang calo iwaco ni: “An pe agenowu, pe atwero lok kwedwu. Abiloko ki lurema i kom peko man ento pe abiloko kwedwu.”
Go kong ni itye ka yelle ki peko mo dok lanyodoni mito konyi, ento iwaco ni: “Pe ipar. Atwero cobone kena.”
-
Lunyodoni giromo niang lokki nining?
-
Itwero dok i lok pa lanyodoni i yo maber nining?
