PENJO MAR 3
Anyalo Wuoyo gi Jonyuolna e Yo Mane?
INYALO TIMO NANG’O?
Par ane wachni: En Tich Adek otieno. Geoff, ma jahigni 17, osetieko tijene, koro odwaro bet piny mondo oyue. Oyawo TV kae to ombemore e kom moheroga betie.
Apoya nono, wuon-gi chopo ka iye owang’.
Owacho ne Geoff kama: “Geoffrey! Ang’o mitimo e TV kanyo. Donge onego bed ni ikonyo owadu timo homework? Ang’o momiyo in ok iwinjga wach?”
Geoff ng’uro wach gi dwol ma wuon-gi nyalo winjo kowacho niya: “Koro ichako kendo.”
Wuon-gi chorore bute kae to openje kama: “Iwacho nang’o nyathini?”
Geoff dwoke gi dwol mapiny niya: “Onge gima awacho baba.”
Wuon-gi koro iye owang’ matek. Owachone gi gero kama: “Mad achak awinji kiwuoyo koda gi dwol ma kamano kendo!”
Kapo ni in Geoff, inyalo timo ang’o mondo igeng’ dhaw ma kamano?
PAR ANE MONDI!
Wuoyo gi janyuolni inyalo pim gi riembo mtoka. Kapo ni iyudo ka wang’ yo moro odin, to inyalo luwo machielo.
KUOM RANYISI:
Nyako moro miluongo ni Leah wacho kama: “Ayudoga ka tekna ahinya wuoyo gi babawa, anyaloga chako wuoyo kode, to ka pok adhi mabor to owachona niya: ‘Mos, kare iwuoyoga koda?’”
LEAH NYALO TIMO ACHIEL KUOM GIK MALUWOGI.
-
Onyalo rogo ne wuon-gi.
Leah wuoyo matek kowacho ne wuon-gi kama, “Yaye baba, chik iti! Gima awachonini ok en mar oyuma!”
-
Onyalo weyo wuoyo gi wuon-gi.
Leah weyo temo wuoyo gi wuon-gi chuth e wi gik ma chande.
-
Onyalo rito nyaka kinde mowinjore mondo owuo e wi wachno.
Leah nyalo wuoyo gi wuon-gi bang’e, kata onyalo ndikone gik ma chandego mondo osom.
E kind gik ma owuoyego, en mane minyalo nyiso Leah mondo otigo?
PAR NIYA: Wuon Leah ne gimoro omako pache, omiyo ok nong’eyo gima chando Leah. Kuom mano, ka po ni Leah oyiero tiyo gi Dwoko manie A, to obiro bwogo wuon-gi. Yorno ok bi miyo wuon Leah ochik ite ne gima iwachone, to bende ka Leah oyiero tiyo gi yorno, ok obi nyiso wuon-gi luor. (Jo-Efeso 6:2) Omiyo, yorno ok ber tiyogo kata matin nikech ok obi konyo.
Mana kaka dereva ma ok bi weyo dhi nyime gi wuoth nikech yo odin, e kaka in bende ok onego iwe wuoyo gi jonyuolni mana nikech yo miwuoyogo kodgi ok morgi. Inyalo tiyo gi yo machielo
Kata obedo ni Dwoko manie B nyalo bedo mayot tiyogo, pod ok ober. Nikech ang’o? Nikech mondo wuon Leah okonye, nyaka Leah kwong wach gima chande. Omiyo, ling’ ok bi konyo gimoro amora.
Kata kamano, kapo ni Leah otiyo gi Dwoko manie C, obiro nyiso ni ong’eyo ni yore mag wuoyo gi wuon-gi pok odinore duto. Kuom mano, obiro hore mos nyaka kinde mowinjore. Bende, kata ka oyiero mar ndiko ne wuon-gi barua, mano nyalo miyo owinj maber ber.
Ndiko barua biro konye chano weche ma ne odwaro wacho e yo maber. Wuon Leah biro winjo gima Leah ne temo wachone malong’o kendo mano biro miyo ong’e gima chande. Omiyo, Dwoko manie C nyalo konyo Leah gi wuon-gi maber. Bed ni Leah oyiero mar wuoyo gi wuon-gi achiel kachiel kata oyiero mar ndiko ne wuon-gi barua, gima duong’ en timo gima Muma jiwowa waduto ni “waluwuru gik ma loso kuwe.”—Jo-Rumi 14:19.
Gin yore mage momedore ma Leah nyalo tiyogo?
Tem ane paro yo machielo, kae to indike piny kae. Ndik bende gima nyalo timore ka otiyo gi yorno.
WUO E YO MA WINJORE MALONG’O
Ber ng’eyo ni seche moko gima iwacho nyalo winjore ne jonyuolni e yo mopogore.
KUOM RANYISI:
Jonyuolni nyalo penji gimomiyo ok imor. Kidwokogi ni, “Ok adwar wuoyo e wi wachno sani,”
jonyuolni nyalo kawo ni itemo wachonegi niya: “Un ok unyal konya. Abiro wuoyo gi osiepena e wi wachni to ok un.”
Par ane ni chandruok moro oyudi kae to jonyuolni ochiwore mar konyi. Ka iwachonegi ni: “Weuru aweya, abiro mana timo gino kenda.”
-
Jonyuolni nyalo kawo ni iwachonegi ni:
-
Dwoko maber minyalo miyogi en:
Samoro Inyalo Hero Magi Bende
GIK MA MBESENI WACHO
Ngimana ka Ne An Rawera—Anyalo Wuoyo gi Jonyuolna e Yo Mane?
Inyalo yudo ber mathoth moloyo kaka ne iparo.
PENJO MA ROWERE OHERO PENJORE
Ere Kaka Anyalo Wuoyo gi Jonyuolna e Wi Chike ma Giketona?
Puonjri kaka inyalo wuoyo gi jonyuolni e yor luor. Weche nyalo dhini maber moloyo kaka iparo.
