3ǁÎ DÎS
Ti ǁgûra ǀkha ta mati a ǁnâugu ǁkhā?
TARENATS SATSA A DĪ ǁKHĀ?
ǂÂi re sao ra-i xa: Wunstaxtsēs kham ǃuis ge. Gregorib hîna 17 kurixab ge oms sîsenni ǀkha go toa tsî ǁkhoaxase ra sâ ǂgao! ǁÎb ge ai-īsiǂhôaǂgaresa ra kō tsî ǁkhoaxase ǁîs aisi ǂnôa.
ǁKhā ǁaeb aib ge Dadasaba oms tawa ge hā tsîb ge ǁîba kaise ge ǂkhîoǃnâ i.
“Gregorib! Tare-i ǃaromats sa ǁaeba ra ǂkhôa ai-īsiǂhôaǂgaresa aisi, sa ǃgâsabats skol sîsenni ǀkha nî hui hîna? Sats ge mîbahets ta khami dī tama hâ!”
“ǁKhawa,” tib ge Gregorib ra hūnunu, ǁnâuheb nîse.
Gregorib Dadasab ge ra mâǀgū. “Tare-ets ra mî, ti axa?”
Gregorib ge ǃgae rase ra mî “xū-e ta mî tama hâ ti pa.”
ǁÎb Dadab ge kaise go ǁaixa. “Tāts ge tita ǀkha dī nî ǃhoa!” Tib ge ǃgari dommi ǀkha ge mî.
Sats ga Gregorib ǁharodi ǃnâ hâhâ o, matits ga ǂkhababa ǁkhae hâ?
ǁAEBA Ū TSÎ ǂÂI RE!
Sa ǁgûra ǀkha ǃhoas ge audosa ǃnaris ǀkha a ǀgui. Sats ga daob hîna a ǂganamsab tawa sī o, ots kom ǀnî hâ daoba a ôa ǁkhā o.
AIǁGAUSE:
“Tita ge kaise a ǃgomba-e ti dadab ǀkha ǃhoasa” dis ge Tiasa ra mî. “ǀNî ǁaeb ai ta ge ǁîb ǀkha ra ǃhoa xaweb ge ǁîba dawasen tsî ra dî te ‘tita ǀkhas ra ǃhoa?’”
TIAS GE ǃNONA XŪNA ŪHÂ DĪ ǁKHĀS A NA.
-
ǁÎs ge ǁîs dadasab ai a ǃau ǁkhā.
Tias ge ra ǃau tsî ra mî, “nē i ge a ǂhâǂhâsa ǃgâ te re!”
-
Tamas ka io, os ge ǁîsa dadasab ǀkha ǃhoa tide.
Tias ge ǁîs ǃgomsina dadasab ǀkha ra ǃhoa ǀû.
-
Tamas ka io, os ge ǀnî hâ ǁaeb ai a ǃhoa ǁkhā.
Tias ge ǁîs dadab ǀkha sâsaseb hâ ǁaeb ai nî ǃhoa tamas ka io sîǂkhanisa a xoaba bi ǁkhā ǁîs ǃgomsin xa.
Mâ ǀgauba Tias ǃaroma a ǃgâi, tits nî mî?
ǂÂI RE: Tias dadasab ǂâis ge ǀnîba hâ ǁnā-amagab ge mû tama hâ ǁîs ǁaixa hâsa. Os ga Tiasa ǂguro ǀgaub A ti hâba ǁhûi o, o i ge hui tide. ǁÎs ga ǃau hâ o, os ge Tias dadasaba ǁîsa ga ǃgâ tama hâ tsî ǁnās ge ǁîba ǃgôasiba ga ǁgau tama hâ. (Efeseǁîn 6:2) O i ge nē ǀgauba xu khoe-e ǀama ǁkhā tide.
ǀNî hâ daobats ta ôa khamits ge sats tsîna nî dītsâ sa ǁgûra ǀkha ǃgâi ǀgaub ai ǃhoasa.
Tsî ǀgamǁî ǀgaub B ti hâb ge ǀnîsi supuse nî mûsen, xaweb ge nē ǀgauba ǃgâi tama hâ. Tare-i ǃaroma? ǁÎs ǃgomsina ǃgâi ǀgaub ai ǃhoaǃgaos ǃaromas ge Tiasa ǁîs dadasab ǀkha ǃgâi ǀgaub ai nî ǃhoa. Tsî ǁîb ga ǁîsa hui ǂgao o, ob ge nî ǂan tae-i a ǃgomsisa ǁîs ûib ǃnâ. ǃNōxugus ge tātsēs tsîna ǃgomsina ǀam kai tide.
Tsî ǃnonaǁî ǀgaub C ti hâb ǃnâs ge ǁîsa daob hîna a ǂganamsab khami ī tide. Xawes ge nî dītsâ ǃgomsina ǃhoaǃgaosa ǀnî hâ ǁaeb ai. ǁÎs dadasabas ga sîǂkhanisa xoaba o, os ge ǃgâise nî tsâ.
Nē sîǂkhanisa xoas ǃnâ-ūs ge ǀnîsi ǃgâise a ǁgâiǂuisen ǁkhā ǂhâbas hâ ǀgaub ai. ǁÎs dadasab ga nē sîǂkhanisa khomai o, ob ge ǀnîsi nî ǁnâuǃā tare-es ge Tiasa ǁîba gere mîba ǂgaosa tsîb ge ǁîs ti ǃgomsin tsîna a ǁnâuǃā ǁkhā. ǃNonaǁî ǀgaub C sa xu ra ge Tias tsî ǁis dadasab tsîna a ǀama ǁkhā. ǂNû tamas ka io ra ga sîǂkhanis ǃnâ-ū ǃhoa xawes ge sao ra ǀapemāsa Elobmîsa xū ra hā nēti ra mîsa “A da ǁnâi ǂkhîb dina sauru!gon”—Romeǁîn 14:19.
Mâ ǀgaugas Tiasa noxoba ūhâ sîsenū ǁkhās a ga?
ǂÂi re ǀgui tamas ka io ǀgam ǀgauga hînats noxoba a sîsenū ǁkhā ga tsî nēpa māsa soab ǃnâ xoa re. Tsî kō re nē ǀgaub mâǀî nî ǁnaeǁgau tsi sa.
MÎTS TA XŪ-E ǃGĀSASE MÎ RE
ǂÂis ǃnâ ūhâ re sats ta mî xūn tsî sa ǁgûra ra ǂâi xūn ge hoaǁae ǀgui tama hâ.
AIǁGAUSE:
Sa ǁgûra ga dî tsi o, tare-i ǃaromats ǁaixa hâ di. Ots ge ǀnîsi nî ǃeream “xū te re, ǃhoa ǂgao tama ta ge hâ.”
Xawe ra ge sa ǁgûra ǀnîsi nî ǂâi: “ǁÎrats ǂgomǃgâ tama hâ amagats ǁîra mîba ǂgao tama ti. Tsî ra ge ǀnîsi nî ǂâi sats, sa ǀhōsa-i ǀkha ǀgui sa ǃgomsina ra ǃhoa ǂgao di, ǁîra ose.”
ǂÂi re sats ge kai ǃgomsiba ūhâ tsî sa ǁgûra ge ra hui tsi ǂgao. Ots ge ǀnîsi go ǃeream: “Tā ǁae re. Tita ge nē ǃgomsiba a tani hōǁkhā.”
-
Sa ǁgûra ge ǀnîsi nî ǁnâu?
-
Matits ǃgâise a ǃeream ǁkhā?
