DEER 3
Uw Rogon ni Nggu Weliy Lanin’ug ko Gallabthir Rog?
MANG E GA RA RIN’?
Mu susunnag e re n’ey: Ke dalip fen e maruwel ni blayal’, ma Geoffrey ni 17 e duw rok e ke mu’nag e maruwel rok u tabinaw, ma be yan ni nge toffan! Ma aram me cheleg e TV me yan i par nga daken ba chiya nri baadag.
Me yib e chitamangin i sak’iy nga langan e mab ni ke damumuw.
Me gaar: “Geoffrey! Mang fan ni ga be adbey e tayim rom ko miyal TV ma damur ayuweg walagem ko homework rok? Dariy ba ngiyal’ ni ga ma rin’ e n’en ni ka nog ngom!”
Me non Geoffrey nrayog ni ngan rung’ag laman ni gaar: “Ku bayay.”
Me gaar e chitamangin ngak: “Mang e ga be yog?”
Me non Geoffrey nib gel ni gaar: “Dariy!”
Ma aram mi ri damumuw e chitamangin me gaar: “Dab um non ngog ni arrogon!”
Faanra gur Geoffrey, ma uw rogon ni ga ra siyeg ndabi buch ban’en ni aray rogon?
MU TAL NGAM LEM!
Numon u thilmed e gallabthir rom e bod e yan u karrow. Faanra ga be yan u karrow mag taw nga bang ni ke man e kanawo’ riy, ma aram e rayog ni ngkum gay yugu ba pa’ e kanawo’ nrayog ni ngam man riy.
BOD NI:
Bay bochi pin ni ka nog Leah ngak ni gaar: “Ba mo’maw’ ni nggu non ko chitamag. Bay yu ngiyal’ ni gu ra mu’ i weliy ban’en ngak me gaar, ‘Ga be non ngog?’”
DALIP BAN’EN NRAYOG NI NGE RIN’ LEAH.
-
Nge tolul ko chitamangin.
Rayog ni nge tolul Leah ni be gaar, “Mmotoyil! Ba ga’ fan e n’en gu be yog ngom!”
-
Dab ki non ko chitamangin.
Nge mulan’ Leah ma dabki guy rogon ni nge weliy e magawon rok ko chitamangin.
-
Nge sonnag e ngiyal’ nib puluw mfini weliy bayay e magawon rok.
Ke gay Leah ba ngiyal’ nrayog ni nge non ko chitamangin ara yoloy e babyor nge pi’ ngak ni be weliy murung’agen e magawon rok.
Bin ngan e ga ra yog ngak Leah ni nge rin’?
MU LEMNAG E RE N’EY: Bay ban’en ni be rin’ e chitamangin Leah ni ke mitan’ riy, ere aram fan nder nang ni ke chalban Leah. Ere faanra rin’ Leah e n’en ni bay ko A, ma aram e dabi nang e chitamangin fan ni be tolul ngak. Ra rin’ Leah e re n’ey mab mudugil ndabi adag e chitamangin ni nge motoyil ko n’en nge yog. Maku reb e, ra m’ug riy nder tayfan e chitamangin. (Efesus 6:2) Bin riyul’ riy e, faanra tolul Leah ngak e chitamangin ma dabi yib angin.
Rayog ni ngam gay yugu reb e kanawo’ ni ngam weliy lanin’um riy ko gallabthir rom ni bod rogon ni faanra ke man e kanawo’ ngom ma dab mu pag e re n’em ni nge talegem ndab kum man ko gin ga be sor ngay
Yugu aram rogon nib mom ni nge rin’ e n’en ni bay ko B, machane de gonop ni faanra rin’ e re n’ey. Mang fan? Faanra nge pithig Leah e magawon rok, mab t’uf ni nge weliy laniyan’ ko chitamangin. Maku reb e, faanra nge ayuweg e chitamangin Leah ko magawon rok, ma aram e ba t’uf ni nge nang e n’en be buch rok. Ere faanra dab ki non Leah ko chitamangin, ma aram e dabi puf e magawon rok.
Faanra rin’ Leah e n’en ni bay ko C, ma aram e be yip’ fan nde pag e re magawon nem ni nge taleg ndab ki non ko chitamangin. Ke gay rogon ni nge weliy e magawon rok ko chitamangin u reb e tayim nib puluw ni nge rin’ riy. Faanra mel’eg ni nge yoloy e babyor nge pi’ ko chitamangin, ma aram e rayog ni nge dabki par ni be lemnag e magawon rok.
Faanra yoloy e re babyor nem maku rayog ni nge ayuweg ni ngari weliy e n’en ni baadag ni nge yog. Nap’an nra beeg e chitamangin Leah e re gi babyor nem, ma ra nang ko mang e be guy Leah rogon ni nge weliy ngak. Re n’ey e rayog ni nge ayuweg ni nge nang fan e magawon rok Leah nib fel’ rogon. N’en ni be yog e C ni ngan rin’ e ra yib angin ngak Leah nge chitamangin. Demtrug ko nge non ko chitamangin ara nge yoloy e babyor nge pi’ ngak, ma n’en ni be yog e C ni ngan rin’ e ba puluw ko fare fonow ni bay u Bible ni be yog ni “thingar ud nameged e pi n’en ni ma fek e gapas i yib.”—Roma 14:19.
Mang e ku rayog ni nge rin’ Leah?
Mu lemnag yugu reb e ban’en nrayog ni nge rin’ Leah, mag yoloy nga but’. Ngemu’ mag yoloy e n’en nra buch ni faanra rin’ e re n’em.
MU KOL AYUW KO N’EN NGA MOG
Dab mu pagtalin ni n’en ni ka mog nge n’en ni be lemnag e gallabthir rom ni ka mog e gathi gubin ngiyal’ nib taareb.
BOD NI:
Sana rayog ni nge fithem e gallabthir rom ko mang e kam puwan’nag, me lungum, “Dariy.”
Machane n’en ni ke rung’ag e gallabthir rom e: “Der pagan’ug ni nggu weliy lanin’ug ngomew. Gu ra weliy e magawon rog ko pi fager rog, machane dab gu weliy ngomew.”
Mu susunnag ni kam mada’nag reb e magawon nrib mo’maw’ me yog e gallabthir rom ngom ni ngar ayuwegew gur. Machane me lungum ngorow: “Dabi magafan’mew ngog, ya rayog ni nggu pithig ni yigoo gag.”
-
Rayog ni n’en ni ke rung’ag e gallabthir rom e:
-
N’en nib fel’ ni nga mog e:
