CʼAJTIYA 4
¿Bajcheʼ miʼ mejlel c tojʼesan jiñi tsaʼ bʌ c mele?
¿CHUQUI MAʼ MEL JATETIC?
Ñaʼtancu iliyi: Tim woli (choncol) ti alas yicʼot i yamigojob i miʼ topʼben ti pelota i vidriojlel i carro jiñi yambʌ xchumtʌl, pero mach yʌlol i chaʼan.
Cheʼ jatetic, ¿chuqui maʼ mel?
WAʼLEN A ÑAʼTAN
UXCHAJP CHUQUI MIʼ MEJLEL A MEL:
-
Maʼ putsʼel.
-
Maʼ wʌqʼuen tiʼ mul yambʌ.
-
Maʼ suben chaʼan mi caj a tojben.
Tajol maʼ ñaʼtan a mel jiñi opción A. Pero ñumen wen cheʼ maʼ sub a mul, mach yʌlʌlic chuqui tsaʼ mele.
UXCHAJP CHUCOCH YOM MAʼ SUB A MUL
-
Jiñʌch i wenlel bʌ.
Jiñi Biblia miʼ yʌl: «Com c mel lojon chuqui utsʼat» (Hebreos 13:18).
-
Mi tsaʼ subu a mul, tajol mi caj a ñusʌbentel.
Jiñi Biblia miʼ yʌl: «Maʼanic miʼ taj i wenlel jini muʼ bʌ i muc i mul. Jini muʼ bʌ i sub i mul, muʼ bʌ i cʌy i mul, mi caj i pʼuntʌntel» (Proverbios 28:13).
-
Ñumen ñuc bʌ jiñʌch cheʼ mi caj a tijicñesan Jehová.
Jiñi Biblia miʼ yʌl: «Come jini xjontolil tsʼaʼ miʼ qʼuejlel ti lac Yum, pero lac Yum miʼ pʌsben jini toj bʌ jini mucul tac bʌ i chaʼan» (Proverbios 3:32).
Karina, am bʌ 20 i jabilel, maʼañic tsiʼ sube i tat chaʼan tsaʼ aqʼuenti i toj jumpʼejl multa chaʼan wen ora tsiʼ ñijca jiñi carro. Pero maʼañic tsaʼ mejli i muc. Karina miʼ yʌl: «Cheʼ bʌ lʌcʼʌ ñumeñix jumpʼejl jab, jiñi c tat tsiʼ qʼuele jumpʼejl jun baqui miʼ yʌl chaʼan tsaʼ c tojo jumpʼejl multa. ¡Tsaʼ ochiyon ti tsʌts bʌ wocol!».
¿Chuqui tsiʼ cʌñʌ? Karina miʼ tsictesan: «Miʼ ñumen tsʌtsʼan jiñi wocol mi maʼan maʼ sub a mul. Ti jumpʼejl bʌ qʼuin mi caj a xotʼ».
¿CHUQUI MIʼ CΛNTESAÑET JIÑI TSAʼ BΛ A MELE?
Jiñi Biblia miʼ yʌl: «Ti lac pejtelel cabʌl mi lac taj lac sajtemal» (Santiago 3:2). Cheʼ bʌ ti ora mi lac sub lac mul woli lac pʌs lac pecʼlel yicʼot lac ñaʼtʌbal.
Yambʌ jiñʌch cheʼ an chuqui miʼ cʌntesañet jiñi a mul. Vera, juntiquil xcʼalʌl, miʼ yʌl: «Mic ñop j qʼuel bajcheʼ jumpʼejl coltʌntel jiñi mach bʌ weñic tsaʼ c mele. Cheʼ bʌ mic mel mach tac bʌ weñic, mic chaʼlen wersa chaʼan miʼ coltañon. Mi tsaʼ c chaʼ taja jiñi wocol, yambʌlix bajcheʼ mi caj c tojʼesan». Ti ili muʼ bʌ caj laj qʼuel, ¿chuqui maʼ mel cheʼ jatetic?
A tat miʼ majñʌbeñet i bicicleta pero maʼ jemben. ¿Chuqui maʼ mel?
-
Maʼañic mic suben, tajol maʼañic mi caj i qʼuel.
-
Mic suben chuqui tsiʼ chaʼle.
-
Mic suben, pero yambʌ mi cʌqʼuen tiʼ mul.
Maʼan tsaʼ ñusa jiñi examen come maʼan tsaʼ chajpa a bʌ. ¿Chuqui maʼ mel?
-
Mi cʌl chaʼan wen wocol jiñi examen.
-
Mi cʌl chaʼan c mul come maʼan tsaʼ c chajpa c bʌ.
-
Mi cʌl chaʼan mach yom i qʼuelon jiñi maestro.
Ñaʼtancu ili chaʼchajp wocol yicʼot chaʼan jatet 1) jiñi tatʌl yicʼot 2) jiñi maestro. ¿Chuqui mi caj i yʌlob mi tsaʼ cʼoti i ñaʼtañob chaʼan a mulʌch? ¿Chuqui mi caj i yʌlob ti a tojlel mi tsaʼ mucu?
Ñaʼtan mach bʌ weñic tsaʼ mele ti ili jabil i jacʼʌ ili cʼajtiya tac:
Cheʼ bʌ tsaʼ cotsa c mul, ¿chuqui tsaʼ c mele?
-
Tsaʼ c ñopo c muc.
-
Tsaʼ cʌqʼue i mulin yambʌ.
-
Tsaʼ c subu ti ora.
Mi maʼañic tsaʼ subu, ¿bajcheʼ yubil tsaʼ wubi?
-
¡Weñʌch! Tsaʼ c mele chuqui com.
-
Mach weñic. Tsaʼ c subu i wentʌlel.
¿Baqui bʌ tsiʼ mele i wentʌlel?
¿Chuqui tsaʼ cʌñʌ cheʼ bʌ tsaʼ mele jiñi?
¿CHUQUI MAʼ WΛL?
¿Chucoch an tajol wocol ti subol jiñi lac mul?
¿Chuqui mi caj i ñaʼtʌntel mi tiʼ pejtelel ora maʼ ñop a muc jiñi a mul? ¿Chuqui mi caj i ñaʼtʌntel mi mucʼʌch a sub? (Lucas 16:10).