Dǒ nukún nǔ elɔ mɛ kpɔ́n: Hwenu e Tɔmáa kpo xɔ́ntɔn tɔn lɛ kpo ɖò balɔ́ɔn xò wɛ é ɔ, é xò balɔ́ɔn ɔ ɖokpo b’ɛ gbà nùkpɛ́n mɛ e nɔ nɔ akpá yetɔn é sín mɔ̌to tɔn.

Enyi hwi wɛ nyí Tɔmáa ɔ, etɛ a ka na wà?

WLƐNWÍN ATƆN WƐ A SIXU ZÁN:

1. Hɔn.

2. Sɔ́ kplá mɛ ɖevo kɔ.

3. Ðɔ nǔ e jɛ é nú nɔzo towe ɔ, bo ɖɔ n’i ɖɔ enyi é jló è ɔ, emi na sú nǔ e gblé lɛ é xɔ́.

Wlɛnwín A ɔ zinzan sixu jló we. Amɔ̌, hwebǐnu wɛ é nyɔ́ ɖɔ a ni nɔ yí gbè nú nùwanyido towe lɛ, enyi nùkpɛ́n ɖé wɛ a hɛn gbà alǒ nǔ ɖevo wɛ a dó sìn ɔ nɛ.

1. Nǔ e sɔgbe bɔ è na wà é nɛ.

   Biblu ɖɔ: “Mǐ ɖó jlǒ bo na nɔ zán gbɛ̀ ɖagbe [‘nɔ ɖɔ nugbǒ,’ NWT] ɖò nǔ bǐ mɛ.”​—Eblée lɛ 13:18.

2. Hwɛ sísɔ́ kɛ mɛ e yí nùwanyido tɔn lɛ sín gbè é nɔ vɛwǔ nú gbɛtɔ́ lɛ ǎ.

   Biblu ɖɔ: “Mɛ e nɔ sɔ́ hwɛ tɔn hwla ɔ nɔ yì nukɔn ǎ; amɔ̌, mɛ e nɔ ɖɔ hwɛ tɔn lɛ, bo nɔ jó dó ɔ, è nɔ sɔ́ hwɛ tɔn kɛ ɛ.”​—Nùnywɛxó 28:13.

3. Ðò taji hú bǐ ɔ, é nɔ nyɔ́ Mawu nukúnmɛ.

   Biblu ɖɔ: “Mawu Mavɔmavɔ gbɛ́ wǎn nú mɛdídá lɛ, bo ka nɔ zun xɔ́ntɔn xá mɛ e nɔ wà nǔ jlɔjlɔ lɛ.”—Nùnywɛxó 3:32.

Karina ɖó xwè 20, é tɛnkpɔn bo na sɔ́ akwɛ e kponɔ lɛ gbò n’i ɖó wezun kínkán dín wutu é sín wema hwla dó papa tɔn. Amɔ̌, é kpéwú bo sɔ́ hwla kaka sɔyi ǎ. Karina ɖɔ: “Xwè ɖokpo mɔ̌ gudo ɔ, papa ce mɔ akwɛ e è gbò nú mì é sín wema ɔ. É fá dó mì ɖebǔ ǎ!”

Etɛ enɛ ka kplɔ́n mǐ? Karina ɖɔ: “Nùwanyido lɛ zízé hwla nɔ hɛn nǔ lɛ nyla d’eji. È nɔ wá sún sìn tɔn jɛn wɛ!”

Biblu ɖɔ: “Mǐ mɛ bǐ wɛ nɔ wà nǔ nyì dò gbɔn alɔkpa gègě mɛ.” (Jaki 3:2) Enyi è nɔ yí nùwanyido mɛtɔn lɛ sín gbè, bo ka nɔ wà mɔ̌ tɛn tɔn mɛ tlolo ɔ, é nɔ xlɛ́ ɖɔ è nɔ sɔ́ mɛɖée hwe bo lɛ́ zin.

Nǔ e bɔ d’ewu ɔ wɛ nyí ɖɔ nùwanyido towe lɛ ni kplɔ́n nǔ we. Ðyɔvǐ e è nɔ ylɔ ɖɔ Vera é ɖɔ: “Un nɔ tɛnkpɔn bo nɔ kpɔ́n nùwanyido ɖokpo ɖokpo dó mɔ nǔ e na kplɔ́n nǔ mɛ é ɖé, bo nɔ sɔ́ nùkplɔnmɛ e na d’alɔ mì bɔ un na kpɔ́n te bo na sɔ́ alɔ ɖevo dó ɖu ninɔmɛ ɔ na hweɖevonu é ɖ’emɛ.” Mǐ ni kpɔ́n lee a sixu bló enɛ gbɔn é.

A hwě papa towe sín kɛkɛ b’ɛ gblé dó we. Etɛ a ka na wà dìn?

• A na kpɛ́nkpɛ́n ǎ bo ɖó nukún ɖɔ papa towe kún na ɖ’ayi wu ó.

• Ðɔ nǔ e jɛ é pɛ́pɛ́ nǔ papa towe.

• Ðɔ nǔ e jɛ é nú papa towe, bo ka sɔ́ kplá kɔ nú mɛ ɖevo.

A j’ayǐ nú tɛnkpɔn ɖé ɖò azɔ̌mɛ ɖó a kplɔ́n nǔ ǎ wutu. Etɛ a ka na wà dìn?

• Ðɔ ɖɔ tɛnkpɔn ɔ syɛn dín.

• Yǐ gbè ɖɔ emi kún kplɔ́n nǔ ó wɛ zɔ́n.

• Ðɔ ɖɔ mɛ̌si ɔ gbɛ́ wǎn nú emi wɛ zɔ́n.

 Dìn ɔ, dǒ nukún nǔ enɛ lɛ mɛ kpɔ́n, sɔ́ hwiɖée ɖó (1) papa towe kpo (2) mɛ̌si towe kpo tɛnmɛ. Enyi a sɔ́ jlǒ dó yí gbè nú nùwanyido towe lɛ ɔ, etɛ papa towe kpo mɛ̌si towe kpo ka na lin dó wutu towe? Enyi a cyɔn nǔ dó nùwanyido towe lɛ ɔ, etɛ ye ka na lin dó wutu towe?

Dìn ɔ, lin tamɛ dó nǔ e a wà nyì dò xwè e wá yì é mɛ é ɖé jí bo na xósin nú nùkanbyɔ elɔ lɛ.

Nǔ tɛ a ka wà nyì dò? Nɛ̌ a ka wà nǔ gbɔn?

• Un sɔ́ hwla.

• Un sɔ́ kplá kɔ nú mɛ ɖevo.

• Un sɔ́ jlǒ dó yí nùwanyido ce gbè.

Enyi a ma yí nùwanyido ɔ gbè ǎ wɛ ɔ, nɛ̌ é ka wá cí nú we?

• Un tɔ́n sín mɛ bǐ cekée lě!

• Na ko ɖɔ nugbǒ tɔn mɛ.

Nɛ̌ a ka sixu ko ɖeɖɛ ninɔmɛ ɔ gbɔn b’ɛ na nyɔ́ hugǎn?

Etɛ nùwanyido towe ɔ ka kplɔ́n we?

Aniwu mɛɖé lɛ ka nɔ hwla nùwanyido yetɔn lɛ?

Enyi a nɔ tɛnkpɔn bo nɔ hwla nùwanyido towe lɛ hwebǐnu ɔ, etɛ mɛ lɛ ka sixu lin dó wǔ we? Enyi a ka nɔ yí nùwanyido towe lɛ gbè ɔ, etɛ ye ka na lin dó wǔ we?​—Luki 16:10.