Hi poristhiti polloi: Tim nanvacho bhurgo aplea ixttam sangata khellttana tacho bol xezarachea car-ar poddtta ani car-acho arso futt’tta.

Tum Tim-achea zagear aslear kitem korta aslo?

TUJE LAGIM TIN VATTO ASAT:

1. 1. Dhanv marop.

2. 2. Dusreancho guneanv korop.

3. 3. Kitem zalam tem xezareak sangon, luksonn farik korunk kobul zavop.

Tuka ghoddie Poili vatt vinchun kaddunk bori disot. Punn ami dusreanchem luksonn korum vo anik kosli-i chuk korum, ti manun ghevop gorjechem.

1. 1. Oxem korop sarkem.

   Bible sangta, “Ami kortanv titleant-ui sarkem tem korunk amchi thir khuxi.”—Hebrevank 13:18.

2. 2. Zo munis apleo chuki manun gheta, tea munxak konnui bhogsunk toiar asta.

   Bible sangta, “Aplim patkam lipoita tachi udorgot zanvchina, zo konn kumsar zata vo chuk manun gheta ani ti vatt soddtta, taka kaklut favo zatoli.”—Mhonn’nneo 28:13.

3. 3. Oxem korop Devak avoddtta.

   Bible sangta, “Khottea mon’xak Dev vitteta, punn promannik mon’xacher to visvas tthevta.”—Mhonn’nneo 3:32.

Karina hea 20 vorsachea cheddvak, ghaddi fas choloitalem mhunn police-an talanv dilo. Hem tannem aplea daddyk sangonk na punn, hea vixim tem chodd temp lipoun dovrunk xoklem na. Tem mhunntta, “eka vorsa uprant mhojea daddy-k kollon ailem ani hanv anik trasant poddlem.”

Lisanv kitem? Karina mhunntta: “Chuki gupit dovorlear ami anik chodd trasant poddonk xokta. Atam na-tor faleam tacho porinnam bhogunk poddttoloch!”

Bible sangta, “Ami sogllim zaitea vattamnim chuki kortanv.” (Jakob 3:2) Ami amcheo chuki rokddeoch vollkhon ghetat tednam ami khaltim toxench zannvaien vaddlolim munxam mhunn kollon ietolem.

Amchea chukim thaun xikop, hi zaun asa dusri vatt. Vera nanvachem cheddum sangta, “Dor ek chukintlean hanv kitem tori xiktam ani mhaka ek borem munis zaunk modot zata. Toxench porot hi chuk korina zaunk mhaka adar zata.” Tujean-ui hem koxem korunk zata tem polloum-ia.

Tum daddy-chi bike magon vorta, punn tujea lagim ti poddtta ani tika mar lagta. Atam tum kitem kortolo?

• Daddyk kainch kollchem na oxem chintun vogich ravtolo.

• Kitem ghoddlam tem sarkem daddyk sangtolo.

• Daddyk sangtolo punn dusreancher boglant ghaltolo.

Tum xikonk nam mhunn tum exam-int fail zala. Atam tum kitem kortolo?

• Examicho paper kotthin aslo mhunn sangtolo.

• Tum xikonk nam mhunn manun ghetolo.

• Tticher-in aplo rag kaddla mhunn sangon ticho guneanv kortolo.

 Fattlea poristhitint tum tujea (1) daddychea svater asa mhunn chint, uprant (2) tticher-ichea svater asa mhunn chint. Tunvem tujeo chukeo manun ghetleo zalear, tujea daddyk ani tticher-ik tujea vixim koxem distolem? Tunvem tujeo chukeo lipounk proitn kelear tim tuje vixim kitem chint’tolim?

Gel’lea vorsa tunvem kel’lea ek chuki vixim chint ani sokol dil’lea proxnak zobab di.

Tunvem kosli chuk kel’li? Ani tednam tunvem kitem kelem?

• Hanvem ti lipoun dovorli.

• Hanvem dusreacher boglant ghatlem.

• Hanvem rokddich chuk manun ghetli.

Tunvem tuji chuk manunk nasli tednam, tuka koxem dislem?

• Ekdom borem—Hanv suttlom!

• Guneanvkari—Hanvem sot ulounk zai aslem.

Hi poristhiti tunvem anik bore bhaxen koxi samballunk zata asli?

Tujea chuki thaun tuka kitem xikonk mell’llem?

Thodde lok apli chuk manun gheunk kiteak fatti sortat?

Tunvem sodanch tujeo chukeo lipounk proitn kelear lok tujea vixim kitem chint’tole? Punn, tache bodlek tum sot uloilear te kitem chint’tole?—Lukas 16:10.