IDEEDƖ- 4
-Bho ˈɩn ˈkɔɔ- ɲɔn ɔnˈ dhɛ ɛˈ, ka ˈye nʋn -ɛn?
-BHO Ɛ NƖN- MƆNˈ, KA -ˈYE NƲN -ƐN?
-Naan dɩ nɩn tɔˈ i -ˈyeɛ ˈjhe: Timʋn -e ɔɔˈ ˈˈdhai ɔ bhla -balɔnˈ-. Ɔ poa -balɔnˈ bhuo ˈsʋ ɔ ghwa ɲʋn anˈ ˈkamiɔn ɔnˈ ˈˈjhenan- ˈmɛn.
-Bho -nɩn Timʋn -dhe ɛˈ, ka -man mun nʋn- -ɛn?
-NAAN TƆˈI KE!
DHƖ TAAN -ˈBHƐƐ -ˈYE NƲN:
-
-ˈYe ple.
-
-ˈYe ɲɔn -dhee -ˈnɔɔn dɩ ˈˈkpei ˈˈduu-.
-
-ˈYe ˈgɩn cɛn -ˈye ˈˈgbu -jhei- ˈˈɲɩn, ˈˈdhe -bho -ˈbhɛɛ ɛɛˈ ˈkpa -poɛ- ɛˈ, -ˈyeɛ ˈkpa po.
Dhɛ -ɛ -ˈtmʋan ˈdhe 1 nɛn ˈdhi ɛˈ, ɛ ˈbhɛɛˈ ɛ ˈye ˈe -manˈ ˈˈdhru ˈdhi jhi ˈˈdoo-. ˈKlaa -bho -ˈkɔɔ ɲɔn ɔnˈ dhɛ ɛˈ, bhɛ nɩn- ˈkamiɔn ɔnˈ ˈˈjhenan oo, dhɛ -dhee -ˈnɛɛn mɔn ˈdhe- ɛˈ, dhɛ nʋan an, -ˈyeɛ ˈˈɩjhibho-.
DHƖ TAAN -ƖANˈ DƖ -BHO -ˈKƆƆ DHƐ Ɛˈ, -ˈYEƐ ˈˈƖJHIBHO- Ɛ
-
Ɛmɛn- -nɩn dhɛjɛɛn.
Biiblʋ ˈnaan: “ˈDhe dhɩ klɛɛkpɛ ˈʋn ɛ, -aa ˈbɔn -a ˈye na -ka ˈdjɛ ka.”—Eble 13:18.
-
Ɲʋn -bho -ʋʋ -ˈkɔɔ dhɛ -ʋaˈ ˈˈduɛ i ɛ, ɲʋn an ˈŋwɔɔn ʋaˈ ˈgɩn ˈmɛn ˈˈdoo-.
Biiblʋ ˈnaan: ‘Ɲɔn -ɔ ˈˈdua ɔɔˈ dhɩsaɩn- dhi ɛ, ɔɔˈ ˈˈsi dhɛ ˈˈɩ, ˈklaa ɲɔn -ɔ -ˈtmʋan ɩanˈ dɩ, -wɛeˈ -ɔ tʋɩn ˈkpʋ ˈˈɩ ɛ, ɲʋn an muɛn ɔɔˈ -ghwɛe- ˈjhe-.’—Iiˈˈbhlaadhɩ- 28:13.
-
Ɛɛ nʋɛn Ɲɔnsoa ˈtʋn.
Biiblʋ ˈnaan: ‘Ɲʋn -anˈ nʋʋdhɩ ˈˈcniian ˈˈɩn ɛn, ɛɛ ɲaan Zoova i, ˈklaa ɲʋn -ˈsrɛa ˈˈɩ ɛ, ʋbʋ- -nɩn ɔ -jhbhɛɛ-.’ —Iiˈˈbhlaadhɩ- 3:32.
Karinɩn ˈbhleɛ zɩn anˈ 20. ˈˈSʋlɩ -ɲnaan ʋn in ˈdhe -jeˈˈ kpɔ dhueˈ, ʋanˈ ˈkamiɔn -plee sʋn anˈ dɩ. Ʋn muan ŋmɛinˈˈ ʋn ˈsɩ ˈtmʋn. -Zʋn dhueˈ zi -wɛeˈ ʋanˈ ˈˈbho ɔˈ ˈˈjɛ ˈjhe ɛɛˈ ˈsɛɛ ˈdhe ˈˈgbu. Karinɩn ˈnaan: “-Ka ˈyea ˈdha ˈka se nɩn-!”
ˈSrɩn -wɛ Karinɩn -za ˈo -ɛ? Ʋn ˈnaan: “-Bho nʋn dhɛ -wɛeˈ -man seɛ iˈˈdu ɛˈ, ɛɛˈ po dhɛ ˈˈoo dhɛ ˈkpa. -Ka ti ˈjhe ɩn nɩn- ɛnˈ, ɛɛ muɛn gbɔ ˈghlʋ-.”
-BHO -ˈKƆƆ DHƐ Ɛˈ, -ˈYE ˈO ˈSRƖN -ZA
Biiblʋ ˈnaan: “Dhɩa ˈˈdhru kpɛɛ -da -duuˈˈ -ɩa ˈgbee- -aaˈ [klɛɛ].” (Zakɩ 3:2) -ˈMɛn ˈˈjɛ ˈˈɩ-piɛ- -e tɔˈ ˈjɔɔn ˈdhi -nɩɛn- -e, ɩmɩn- -ˈbhɛɛ -ɩn -ˈyeɛ nʋn ˈˈdhe -bho nʋn dhɛ ɛˈ, -ˈyeɛ ˈˈɩjhibho- ˈˈdoo-.
-Kenɛnˈ ɛn, dhɛ nʋan an, ɛ ˈye -ʋn ˈsrɩn ˈˈdu. ˈƝnɔnkpaoˈ -jhu dhueˈ ɲɔn ɔn ˈdhaa Vera ˈnaan: “Dhɛ ˈˈoo dhɛ ˈman nʋan -ɛ sea ˈo -jeˈˈ nɩn- ɛn, ˈman ˈjheɛˈ -ka klainˈˈ paaˈ nɩan. Ɛɛ tɔɔn ˈmʋn dhɛ, ɛɛ ˈˈduɛ ˈˈʋn ˈsrɩn -wɛeˈ ˈye tɔˈ ˈdhi ˈkpa ˈˈdhe -bho ˈɩn nɩn- ˈe dɩ nɩan dhueˈ ˈdhi ɛˈ, ˈye ɩanˈ kpʋn ka jhibho-.” -Ka -ˈyea nʋn -ke ɛ, ɛmɛn- -aa jhi ˈjhea.
-Manˈ ˈˈbho ɔˈ sooˈˈ ˈkɔɔˈ ˈdhee- ˈkwa. Ka -man mun nʋn -ɛn?
-
-ˈSeɛ -manˈ ˈˈbho ˈtmʋʋn- in, ˈbho- -gwlɩˈˈ ɛ, ɔ ˈsɩ jhibho- i.
-
-ˈYe -manˈ ˈˈbho tɔˈdɩ ˈtmʋʋn-.
-
-ˈYeɛ ˈo ɲɔn -ˈnɔɔn ˈˈkpe po.
-ˈSe dhɛ ˈcɩan ˈsʋ -ˈse dhɛ ˈjhe ˈdhe klainˈˈ. Ka -man mun nʋn -ɛn?
-
-ˈYe ˈcɛn ˈkpa -ˈye -manˈ ˈsɛɛ iˈfae-.
-
-ˈYe ide- -ˈye tɔˈinaan-.
-
-ˈYe ka nʋn mesie se ˈman dɩkman-.
Po -manˈ ˈˈjɛ ˈbho (1) -manˈ ˈˈbho -e (2) -manˈ klainˈˈ mesie ɔˈ ˈgɔ ˈˈɩ, -ˈyeɛ ˈjhe. Dhɛ nʋan an, -bho jhibhɛ ˈˈɩ ˈdhee, kɛɛ mun nɩn- ˈbho ʋbʋ -gwlɩˈˈ -ɛ? ˈˈDhe -bho se -manˈ nʋʋndhɩ ˈˈɩjhibho- ɛˈ, kʋʋ ˈyeɛ ˈjhe -ɛ?
-Kaan bhla a, dhɛ dhueˈ nʋan -zʋn zia -ɛ sea ˈˈɩˈsrɛ ɛ, -nɛɛn tɔˈ ˈˈkpe i. -ˈMɛn -za ˈe ideedɩ- nɩn.
Dhɛ nʋn ˈdhe-, -ɛ se ˈˈɩˈsrɛ -ɛ? ˈBho ɛ ˈdhe ɛ, ka nʋn -ɛn?
-
ˈƖn ˈˈzilɛˈ.
-
ˈƖn ˈˈduuɛ ɲɔn dɩ ˈˈkpe i.
-
ˈƖn jhibhɛ ˈˈɩ ˈmɛn.
ˈˈZila -manˈ nʋʋndhɛ ɛˈ, kɛ nɩn- ˈbho- -gwlɩˈˈ -dhe -ɛ?
-
ˈMʋnan nʋn ˈʋn ˈmɛn!
-
ˈƖn -kpleeˈ.
-Ɛ -nmɔn ˈˈjhrii -ˈbhɛɛ -ˈye nʋn ˈdhe- -ɛ?
ˈSrɩn -wɛ -za ˈe ɛ ˈdhi -ɛ?
KA -MAN MUN ˈDHA -A?
-Bho ɲʋn -ˈnʋʋn nʋn dhɛ ɛˈ, dhɛɛdɩ- ʋaˈ jhibhɛ ˈˈɩ -ɛ?
-Bho -man sa doo jheejhee ɛˈ, ka ɲʋn an mun -ʋn ˈjhe- -ɛ? ˈˈDhe -bho nʋn dhɛ -wɛeˈ -ˈyeɛ ˈˈɩjhibho- ɛˈ, ka ɲʋn an mun -ʋn ˈjhe- -ɛ?—Lukɩ 16:10.