Haheitalai ta laloa: Tim be ena turana danu idia gadara lalonai, Tim ese bolo ia negea lao, bena neiba ta ena motuka ena windo ia hodoa, ia makohi.

Bema oi be Tim, dahaka do oi karaia?

EDENA KARA DO OI ABIA HIDI: A, B, EIAVA C?

1. Heau.

2. Ma ta oi bleim.

3. Ia vara sivaraina be neiba dekenai oi gwauraia, bona oi hamaoroa idia makohi windo edia davana do oi henia.

Reana oi ura Haere “A“ oi abia hidi. To, herevana windo oi makohia o dahaka kerere oi karaia, to hanaihanai emu kerere oi gwauraia hedinarai be mai ena badina namodia.

1. Unai bamona oi karaia be maoro.

   Baibel ia gwau: “Ai ura mai momokani ida gau ibounai ai karaia.”​—⁠Heberu 13:18.

2. Taunimanima be emu dika do idia gwauatao bema emu kerere oi gwauraia hedinarai.

   Baibel ia gwau: “Bema oiemu kara dika oi hunia noho neganai, namo ta do oi davaria lasi. Oiemu kara dika do oi gwauraia hedinarai, bona dika do oi rakatania, unai neganai Dirava ese oi do ia bogahisihisi henia.”​—⁠Aonega Herevadia 28:13.

3. Gau badana be, Dirava ia moale badina unai bamona oi karaia.

   Baibel ia gwau: “Iehova ese koikoi tauna ia inai henia, to kara maoromaoro tauna be Iena turana namona.”​—⁠Aonega Herevadia 3:32; NWT.

United States ai, kekeni ta ladana Karina, 20, be motuka amo ia spidi dainai pulisi taudia ese tiketi ta idia henia, bona ia ese ena tamana dekenai unai ia gwauraia lasi. To, Karina ese unai ia hunia daudau lasi. Ia gwau: “Lagani ta bamona murinai, egu tamana ese pulisi edia risit dekenai egu ladana ia itaia. Ia ese lau ia gwau henia!”

Dahaka ia dibaia? Karina ia gwau: “Kerere hunia karana ese dika ia habadaia. Gabeai, unai kara ena metau do oi huaia!”

Baibel ia gwau: “Ita ibounai be nega momo ita kerere.” (Iamesi 3:2) Bona emu kerere oi gwauraia hedinarai haraga neganai, oi hahedinaraia oi be manau bona laloa namonamo lo tauna.

Dala ta be inai: Emu kerere amo gau ta oi dibaia be namo. Kekeni ladana Vera ia gwau: “Egu kerere ta ta amo gau ta lau dibaia toho, unai be lau ia durua taunimanima namona ta ai lau lao bona gabeai kerere lau karaia lasi totona.” Unai be edena bamona ita karaia diba?

Emu tamana ena basikele oi gaukaralaia bona oi hadikaia. Dahaka do oi karaia?

• Emu uduna oi koua bona oi ura lasi emu tamana be unai ia itaia.

• Emu tamana dekenai sivarai momokanina oi gwauraia.

• Emu tamana dekenai sivarai momokanina oi gwauraia to bleim be ta dekenai oi atoa.

Eksam ta dekenai oi feil badina oi stadi lasi. Dahaka do oi karaia?

• Oi gwau, eksam ena henanadai momo be idia auka.

• Oi gwau eksam ai oi feil badina oi stadi lasi.

• Oi gwau eksam ai oi feil badina tisa be oi dekenai ia badu.

 Rau 13 ai basikele bona eksam haheitalaidia oi laloa lou, bona mani oi laloa bema oi be (1) emu tamana bona (2) emu tisa. Oi laloa emu tamana bona emu tisa be dahaka do idia laloa bema oi ese emu kerere oi gwauraia hedinarai? Eiava idia be dahaka do idia laloa bema oi ese emu kerere oi hunia?

Mani lagani gunanai oi karaia kererena ta oi laloa bena henunai henanadai oi haerelaia.

Dahaka kerere oi karaia? Unai kerere be edena bamona oi hamaoromaoroa?

• Egu kerere lau hunia.

• Egu kerere ena bleim be ma ta dekenai lau atoa.

• Egu kerere do lau gwauraia hedinarai.

Bema emu kerere oi gwauraia hedinarai lasi, gabeai emu lalomamina be edena bamona?

• Ia namo​—⁠tau ta ia diba lasi!

• Ia dika​—⁠hereva momokani lau gwau be namo.

Oi laloa unai neganai edena bamona emu kerere oi hamaoromaoroa diba?

Emu kerere amo dahaka oi dibaia?

Dahaka dainai haida be idia ura lasi edia kerere idia gwauraia hedinarai?

Oi laloa taunimanima ese oi be edena bamona do idia laloa bema emu kerere oi hunia momo?

Oi laloa taunimanima ese oi be edena bamona do idia laloa bema nega momo emu kerere oi hunia? Eiava oi laloa idia ese oi be edena bamona do idia laloa bema emu kerere oi gwauraia hedinarai?​—⁠Luka 16:10.