Ripurira kongaro ndji: Ngunda ama nyanda puna omapanga we, Collin wa umba otjimbere nomasa natji ka teya oruiho rwohauto yomuraranganda.

Andakuzu oove Collin, otjo tjita vi?

U NOVIṊA 3 MBI MO YENENE OKUTJITA:

1. 1. Okutupuka.

2. 2. Okukuminina omundu warwe.

3. 3. Okuraera omuraranganda woye kutja pa kayenda tjike nu omuraere kutja mo sutu.

Mape ya o vanga okutoorora Omukambo 1. Posi yokutja, onawa aruhe tji mo yakura kutja wa tjiti otjiṋa otjivi.

1. Ootjiṋa otjisemba okutjita.

   Ombeibela mai tja: “Tjinga atu vanga okutjita ihi tji tji ri otjisemba oruveze aruhe.”—Ovaheberi 13:18.

2. Ovandu potuingi ve isira imba mbe rihepura ozondataiziro zawo.

   Ombeibela mai tja: “Ngu ma vandeke ozongatukiro ze ke nokuṋingapara; nungwari ingwi ngu me rihepura zo na poka ku zo, Ndjambi me mu tjariparere.”—Omiano 28:13.

3. Kombanda yaavihe, okurihepura ozondataiziro zoye ku yorokisa omutima waMukuru.

   Ombeibela mai tja: “Muhona tjinga a tonda ovandu mbe tjita ourunde, nungwari Eye u yakura ovasemba nouṱakame.”—Omiano 3:32.

Omukazona ngu nozombura 20 wena Karina wa kondja okuhorekera ihe kutja wa pewa okakarata mena rokuhinga omaze omengi. Posi yokutja kaa yenene okuhoreka otjiṋa hi nga aruhe. Eye wa tja: “Ape kombunda yombura, tate wa muna okakarata nga. Nu tjiri mba hita moumba ounene!”

Matu rihongere tjike kotjiṋa hi? Karina wa tja: “Okuhoreka ouvi woye ku tjita kutja oviṋa vi ririre ko ovivi. Orondu kombunda mau katjiukwa!”

Ombeibela mai tja: “Atuhe tu tataiza moviṋa ovingi.” (Jakobus 3:2) Otja tji twa munu, okurihepura ozondataiziro zetu momuano omusemba ku raisa kutja oweṱe overisusuparise nokutja twe kura mozondunge.

Omukambo omutjavari okurihongera kozondataiziro zoye. Omukazona wena Veronica wa tja: “Mbi kondja okuvara ondataiziro aihe ndji me tjiti otjomuano omuwa wokurihongera ku yo kutja mbi rire omundu omusemba nokutja mbi tjinde ongaro ndjo momuano omuwa otjikando tjarwe.” Ngatu tare kutja ove mo yenene vi okutjita nai wina.

Ngatu tje wa yazema ohauto yaiho nu oteya. Mo tjiti vi?

• Mo mwina uriri nokumbu kutja iho e he i munu.

• Mo raere iho kutja pa kayenda tjike.

• Mo raere iho kutja pa kayenda tjike posi yokutja o yandja ondjo momundu warwe.

Ngatu tje ove koungurire nawa moviungura vyoye vyoskole mena rokutja korihongere. Mo tjiti vi?

• Mo yandja ondjo koviungura vyoskole kutja vya ri ovizeu.

• Mo yakura ozopenda zoye ozombi nu otoora omerizirira.

• Mo kuminine omiṱiri kutja i notjiṋa naove.

 Nambano tara kozongaro nḓa tamunwa pombanda mba nu u kondje okuripura kutja oove (1) iho (2) omiṱiri yoye. Iho nomiṱiri yoye mape ya ave ku vara vi indu tji wa yakura kutja wa zunḓa? Owo mave utu okukuvara vi indu tji wa horeke ozondataiziro zoye?

Nambano ripura nondataiziro ndji wa tjita morukapitaveze okuzambo u zire omapuriro nge ri kehi mba.

Otjikeṋa tji wa tjita? Ove wa tjinda vi ondataiziro yoye ndji?

• Mba horeka.

• Mba kuminina omundu warwe.

• Mbe rihepura.

Ndovazu korihepurire ozondataiziro zoye, ove oorimunu vi kombunda yanao?

• Ee tjaterwa kutja hina pu mba kamburwa!

• Ee rivere, orondu mba sokutja mbe rihepura ozondataiziro zandje.

Omomuano uṋe omuwa mbu wa sokutja wa tjinda ouzeu mbwi?

Otjikeṋa tji we rihongera okuza kondataiziro yoye?

Ongwaye ovandu tjiva tji ve he rihepura ozondataiziro zawo?

Ovandu mave utu okuripura tjike ohunga na ove indu aruhe tji u kondja okuhoreka ozondataiziro zoye nu mave ripura tjike ohunga na ove indu tji mo rihepura ozondataiziro zoye?—Lukas 16:10.