4-سۇراق
قاتەلىكتەرىمدى قالاي تۇزەسەم بولادى؟
سەن نە ىستەر ەدىڭ؟
مىنا جاعدايدى ەلەستەتىپ كورشى: تيم دوستارىمەن بىرگە دوپ ويناپ ٴجۇرىپ، كورشى اۋلاداعى كولىكتىڭ اينەگىن سىندىرىپ قويادى.
تيمنىڭ ورنىندا بولساڭ، سەن نە ىستەر ەدىڭ؟
توقتا دا، ويلان!
سەن 3 ٴتۇرلى جولمەن ارەكەت ەتە الاسىڭ:
-
A. قاشىپ كەتۋ.
-
B. كىنانى وزگە بىرەۋگە جابا سالۋ.
-
C. كىناڭدى مويىنداپ، كورشىگە سىنعان اينەكتىڭ اقىسىن تولەيتىنىڭدى ايتۋ.
سەن A نۇسقاسىن تاڭداعىڭ كەلەر. ٴبىراق اينەكتى سىندىرىپ قويساڭ نە تاعى باسقا قاتەلىك ىستەسەڭ، كىناڭدى مويىنداعانىڭ جاقسى.
كىناڭدى مويىنداۋعا تالپىندىراتىن 3 سەبەپ
-
كىناڭدى مويىنداساڭ، دۇرىس ىستەيسىڭ.
كيەلى كىتاپتا: «ٴبىز بارلىق جاعدايدا ادال ٴجۇرىپ-تۇرعىمىز كەلەدى»،— دەلىنگەن (ەۆرەيلەرگە 13:18).
-
باسقالار كىناسىن مويىنداعان ادامدى كوپ جاعدايدا كەشىرەدى.
كيەلى كىتاپتا: «كۇنالارىن جاسىرعان وركەندەمەس، ال مويىنداپ، ولاردى تاستاعان راقىم كورەر»،— دەلىنگەن (ناقىل سوزدەر 28:13).
-
ەڭ باستىسى — سولاي ەتكەنىڭ قۇدايعا ۇنايدى.
كيەلى كىتاپتا: «ەحوبا ارامزا ادامنان جەركەنەدى، شىنشىل اداممەن جاقىن دوس بولادى»،— دەلىنگەن (ناقىل سوزدەر 3:32).
20 جاسار كارينا اكەسىنىڭ كولىگىن ايداي تۇرۋعا العان بولاتىن. ول جىلدامدىقتى اسىرىپ، سول ٷشىن ايىپپۇل تولەۋ تۋرالى حابارلاما الدى. ٴبىراق ول مۇنى ماڭگى جاسىرىپ جۇرە المادى. ول بىلاي دەيدى: «شامامەن ٴبىر جىلدان كەيىن اكەم مەنىڭ اتىما جازىلعان ايىپپۇل حابارلاماسىن كورىپ قويدى. سودان باسىم پالەگە قالدى!»
بۇدان قانداي ساباق الامىز؟ كارينا بىلاي دەيدى: «قاتەلىگىڭدى جاسىرساڭ، جاعدايدى ودان سايىن ۋشىقتىراسىڭ. كەيىن ٴبارىبىر سول ٷشىن جاۋاپ بەرۋىڭ كەرەك بولادى عوي!»
ٶز قاتەلىكتەرىڭنەن ساباق ال
كيەلى جازبالاردا: «ٴبارىمىز دە كوپ سۇرىنەمىز»،— دەلىنگەن (جاقىپ 3:2). مۇندايدا قاتەلىگىڭدى مويىنداساڭ ٵرى مۇنى دۇرىس جولمەن ىستەسەڭ، ٶزىڭدى كىشىپەيىل ٵرى اقىلى تولىسقان ادام رەتىندە تانىتاسىڭ.
كەلەسى قادام — قاتەلىكتەرىڭنەن ساباق الۋ. ۆەرا ەسىمدى قىز بىلاي دەيدى: «مەن ٵربىر قاتەلىگىمنەن ساباق الامىن. كەلەسى جولى سونداي جاعدايعا كەزىككەندە دۇرىس ارەكەت ەتىپ، جاقسى جاققا قاراي وزگەرۋگە تىرىسامىن». سەن دە سولاي ىستەي الاسىڭ.
سەن اكەڭنىڭ ۆەلوسيپەدىن الىپ، ونى بايقاماي سىندىرىپ قويدىڭ دەلىك. ەندى نە ىستەيسىڭ؟
-
اكەڭ ەشتەڭە بايقامايدى دەگەن ويمەن بولعان جايتتى جاسىراسىڭ.
-
اكەڭە ٴبارىن ەش بۇكپەسىز ايتىپ بەرەسىڭ.
-
اكەڭە بولعان جايتتى ايتاسىڭ، ٴبىراق كىنانى باسقا بىرەۋدىڭ موينىنا ارتاسىڭ.
دايىندالماي بارعاندىقتان، ەمتيحاننان جامان باعا الدىڭ دەلىك. ەندى نە ىستەيسىڭ؟
-
سۇراقتار تىم قيىن بولدى دەپ شاعىمداناسىڭ.
-
بۇعان ٶزىڭ كىنالى ەكەنىڭدى مويىندايسىڭ.
-
مۇعالىم ساعان قاسارىسقاندىقتان، ادەيى جامان باعا قويدى دەپ ويلايسىڭ.
قاتەلىكتەرىڭدى مويىنداعاننان كەيىن، ولاردى ويلاي بەرسەڭ، كولىكتى ايداپ كەلە جاتىپ، ماڭدايىنداعى ايناعا قايتا-قايتا قاراي بەرگەن سياقتى بولاسىڭ
الدىندا ايتىلعان مىسالدارعا ورالىپ، ٶزىڭدى 1) اكەڭنىڭ، 2) مۇعالمنىڭ ورنىنا قويىپ كور. قاتەلىگىڭدى ەش قىمسىنباي مويىنداساڭ، اكەڭ مەن مۇعالىمىڭ سەن جايلى قانداي ويدا بولار ەدى؟ ال جاسىرۋعا تىرىسساڭ، ولار نە ويلاپ قالادى؟
ەندى سوڭعى ٴبىر جىلدا جاساعان قاتەلىكتەرىڭدى ەسكە الىپ، كەلەسى سۇراقتارعا جاۋاپ بەرىپ كور.
ول قانداي قاتەلىك ەدى؟ سول جاعدايدا سەن نە ىستەدىڭ؟
-
جاسىرىپ قالدىم.
-
كىنانى باسقاعا جابا سالدىم.
-
ەش قىمسىنباي مويىندادىم.
كىناڭدى مويىنداماعان بولساڭ، ارتىنان نە سەزىندىڭ؟
-
قۇتىلىپ كەتكەنىمە قۋاندىم!
-
ٶزىمدى كىنالى سەزىندىم، شىندىقتى ايتۋىم كەرەك ەدى.
سول كەزدە نە ىستەگەنىڭ دۇرىس بولار ەدى؟
قاتەلىگىڭنەن قانداي ساباق الدىڭ؟
سەن نە ويلايسىڭ؟
نەگە كەيبىر ادامدار كىنالارىن مويىندامايدى؟
كىناڭدى ىلعي جاسىرا بەرەتىن بولساڭ، ادامدار سەن تۋرالى قانداي ويدا بولادى؟ ال مويىندايتىن بولساڭ شى؟ (لۇقا 16:10).
