Fwanyikizha bino: Tim byo abena kukaya na bakwabo, wapanchila mpila pa windo wa bene, ne windo walajika.

Umvwe yobe wajinga Tim, inge waubile byepi?

WAKONSHA KUSALAPO KIMO PA BINO BISATU:

1. Kunyema.

2. Kupamo mukwenu mambo.

3. Kubuula bena nzubo amba yobe walala windo ne kwipana kupotelapo windo mukwabo.

Wakonsha kwesekwa kusala jishinda 1. Bino kyawama bingi kuswa inge paji byo walubankanya.

1. Kyawama kuswa inge walubankanya.

   Baibolo waamba’mba: “Tukebesha kwikala ba kishinka mu bintu byonse.”—Bahebelu 13:18.

2. Javula, bantu balekelako mambo muntu uswa inge walubankanya.

   Baibolo waamba’mba: “Awa ufya mambo anji kechi ukamona byawama ne, pakuba yense wiasolola ne kwialeka bakamubila lusa.”—Byambo bya Maana 28:13.

3. Kyakila pa byonse, kuswa byo ulubankanya kusangajika Lesa.

   Baibolo waamba’mba: “Yehoba washikwa muntu wa bujimbijimbi, pakuba aba baoloka bo balunda nanji ba pa muchima.”—Byambo bya Maana 3:32.

Karina, uji na myaka 20, wafile kapepala ko bamukwachijilepo ku bakapokola na mambo a kwendesha motoka masekenyi. Bino pa kupitapo moba, bashanji bekataaine. Karina washimikizha’mba: “Panyuma ya mwaka umo, batata bataaine kano kapepala ne jizhina jami ponka. Bankajipijile bingi.”

Wafunjijileko ka? Karina waamba’mba: “Kufya bintu byo walubankanya kulengelatu bintu kutaminako. Nangwatu ufye, bikayukanyikwa.”

Baibolo waamba’mba: “Atweba bonse tulubankanya.” (Yakoba 3:2, tubyambo twa munshi) Byonka byo twamona, kupelawizha kuswa byo walubankanya kumwesha’mba wikepesha kabiji wakoma mu maana.

Kyalondelapo ke kufunjilako ku byo walubankanya. Nsongwakazhi wa jizhina ja Vera waambile’mba: “Mfunjilako ku byonse byo ndubankanya ne kumona mo nakonsha kuwamishako ne byo nakonsha kubula kubwezhapo kyo natamishe.” Twayai tumone byo wakonsha kuba bino.

Fwanyikizha’mba walomba nkinga ya bashobe, ne kwiyonauna. Wakonsha kuba byepi?

• Kwikalatu nzoo ne kulombatu’mba bashobe babule kuyuka.

• Kubuula bashobe byo wauba.

• Kubuula bashobe byaji kumweka, ne kwamba’mba mukwenu ye waji kulengela.

Fwanyikizha’mba wafweluka mpeso ku sukulu na mambo a kubula kutanga. Wakonsha kuba byepi?

• Kwamba’mba mepuzho a mpeso kechi baji kwianemba bulongo ne.

• Kuswa’mba kechi wateleko muchima kutanga ne.

• Kubepela bafunjishi bobe amba kechi bakutemwatu ne

 Pano languluka pa bino bifwanyikizho bibiji ne kufwanyikizha’mba (1) yobe mwina nkinga, ne (2) yobe mufunjishi. Bashobe ne bafunjishi bobe bakonsha kulanguluka byepi pe obewa inge wapelawizha kuswa’mba walubankanya?Kabiji bakonsha kukumona byepi inge wakana kwibabuula byo walubankanya?

Pano vulukapo kintu kyo walubankenye mwaka wapwa, ne kukumbula mepuzho alondelapo.

Ñanyi kintu kyo walubankenye? Waubilepo ka?

• Nafile byo nalubankenye.

• Naambile’mba mukwetu ye walengejile.

• Naswile ponkapotu amba nalubankanya.

Umvwe kechi waswile amba walubankanya ne, waumvwine byepi byo papichile moba?

• Naumvwine bulongo—Kechi bankwachile ne.

• Naumvwine kutama ku muchima—Nafwainwe kwambatu kishinka.

Ñanyi kintu kyawama kyo wafwainwe kuba?

Wafunjijileko ka ku byo walubankenye?

Mambo ka bantu bamo o bakaina kuswa inge balubankanya?

Bantu bakakumonanga byepi inge kimye kyonse kechi uswa byo ulubankanya ne? Kabiji inge uswa byo ulubankanya bakakumonanga byepi?—Luka 16:10.