NYUNA 4
Vɛɛ Ya Miŋgi yɛ Biondɔŋnda Nilaŋ Toosiaa?
YƐƐ Ŋ CHO YƐ TOSA?
Yiyaŋndɔ a taamaseliiyo hoo. Tamba cho bɔllo lɔɔ nda chaaŋaa nduaa. Mɛɛ o wuu bɔllo, mi bɔllo kɔ piɔl tofaŋ mɔmbil pilaa pɔ.
Te ndoo wa pɛ aa num cho Tamba ni, yɛɛ ŋ wa yɛ tosa?
SIM KPƐ MA YIYAŊ!
A NƆ CHUAŊ CHUALAŊ LA YAA:
-
Nyaanɔŋndo.
-
Wana cheleŋ tɔɔyaŋndo biyɔɔ.
-
Dimullo wana mɔmbillo nyɛ yɔŋnuŋndo, nduyɛ maa a cho tofaŋ mɔmbil ndɔɔ toosiaa.
Naapum dɔɔ ma chua Chuaŋ Chua 1. Kɛ sabula kɛndɛlaŋ la cho lɔɔlɔɔ le biondɔŋ nda numndaŋ chɛlɔɔ. O wa aa tofaŋndo ŋ tɛɛmbuu ni ɔɔ nyɛ cheleŋ.
SABULAŊ LA YAA LE CHƐLƆƆ BIONDƆŊNDA NUMNDAŊ
-
Nyɛ bɛnda le tosaa wo cho koŋ ni.
Baabuiyo dimi aa, “Ŋ hɛnaŋ mi ŋ tosa nyɛ bɛnda le tosaa wo o nɛi o nɛi niŋ.”—Hibuluiya 13:18.
-
Wanaa chɛl biondɔŋnda ndalaŋ nda waŋnda mal haki ni.
Baabuiyo dimi aa, “Wana o wana veŋ yɔŋndɔ wɔɔŋndo pɛ, . . . o sɔla dɛnɛ kɛndɔɔ o yoomu ndɔɔ niŋ te. Kɛ wana o wana chɔɔmuu yɔŋ ndɔ wɔɔŋndo pɛ nduyɛ mbo pɛŋgi ndu tosaa, tuiinɔŋndo Mɛlɛka o tuiinuŋ ndu inyiɛɛ ni.”—Pulɔwaa 28:13.
-
Nyɛ sɔvɛ bɛndoo kpou, o nɛŋi Mɛlɛka kɔllo.
Baabuiyo dimi aa, “Mɛlɛka Yaawɛɛ o tul wanaa tosa sɔɔŋ wɔɔŋndoŋ nda leyɛ. Kɛ wanaa tosa sɔɔŋ kɛndɔŋ nda nda, kaalaa o kaala nda ni.”—Pulɔwaa 3:32.
Mi Kalina, o nɔ wɔsilaŋ 20 ndo viŋ finya ndɔ yau dioo le mɔmbillo nyaanɔŋndo. Kɛ o lo o viaŋaa lefafɛɛŋ te. Mi Kalina dimi aa, “Mɛɛ wɔsioo hiou opilɛ, mi finya nuu cha yau koŋ a diola nilaŋ lechoo. Mi luɛi o kpundɛ bɛndoo niŋ!”
Yɛɛ o pɛɛku yɛ o hei niŋ? Mi Kalina dimi aa, “Suɛi koni ŋ kui ni te a veŋ biondɔŋndaŋ pɛ. A cho vɛlɛ paawa le laŋ o chilaŋ niŋ!”
MƐƐ Ŋ PƐƐKU ISƆƆ O BIONDƆŊNDA NUMNDAŊ NIŊ YƐ
Baabuiyo dimi aa, “Naa kpou mi ŋ tosa biondɔŋ ndaŋ tau.” (Chemisi 3:2) Nduyɛ a mɛɛ naŋ che yɛ, te ŋ keleŋa pɛ biondɔŋnda naalaŋ chɛlɔɔ, koŋ chɔm ni maa ŋ tusiŋ nduyɛ maa ŋ chɔm kaasoŋyɛi.
Nyɛ cheleŋ ŋ nɔ ma tosa wo cho ni maa, a nɔ ma pɛɛku isɔɔ o biondɔŋnda numndaŋ niŋ. Mi chuaambɔɔ diolaŋ aa Velua dimi aa, “Mi kindiŋ le chɔɔ biondɔŋ kɛ kɛ ya tosa maa nyɛ pɛɛku ya isɔɔ o cho ni, nduyɛ mi chɛl le mi hei pɛɛku ya le waa wana sɔvɛ nduyɛ mi bii suɛi keŋ o nɛi cheleŋ choo a teleŋ cheleŋ.” Ŋ tofawɔ mɛɛ ŋ tosa keŋ yɛ.
A you kandu finya numndo nduyɛ ma kɔ tɛɛmbuu ndu. Yɛɛ ŋ cho yɛ niko tosa?
-
Dimi nyɛ o nyɛ le, nduyɛ nɔ laalaŋndo maa finya num cho sina le.
-
Dimul finya num nyɛ kpeekpei yɔŋnuŋndo.
-
Dimul finya num nyɛ yɔŋnuŋndo kɛ ma bii wana cheleŋ tɔɔyaŋ.
A kuɛ o tofaa bɛŋgu kɛ a hiu le kanifuule a pɛɛku le. Yɛɛ ŋ cho yɛ niko tosa?
-
Dimi maa tofaa ndoo kendu bɔɔ.
-
Bii numpila tɔɔyaŋ le mɛɛ ŋ hiu le yɛ.
-
Dimi maa wana num pɛɛkaa nɔ num o kɔl.
Tofawɔ vɛlɛ sɔɔŋ yɔŋnaŋ naŋ soo muŋ okɔɔ woŋ, nduyɛ ma yiyaŋ maa num cho (1) finya num ni (2) wana num pɛɛkaa ni. Vɛɛ finya num a wana num pɛɛkaa cho yɛ yiyaŋ a num te a chɛl pɛ biondɔŋnda numndaŋ? Vɛɛ nda cho yɛ yiyaŋ a num te a veŋ pɛ biondɔŋnda numndaŋ?
Yiyaŋndɔ a biondɔŋ ŋ tosa lapɔmndo okoŋ ma muli nyunalaŋ ndaŋ lebɛŋgu.
Biondɔŋ kuɛɛ num oo tosa yɛ? Vɛɛ ŋ bii yɛ ndu?
-
Mi viaŋ ndu.
-
Mi bii waŋndo tɔɔyaŋ le ndu.
-
Mi chɛl ndu wulee.
Te o yɔŋ pɛ maa a chɛl biondɔŋ numndo le, vɛɛ numaa yiyaŋ yɛ okoŋ kɔɔli?
-
Mi naŋ kɔl tau. Mi chii a keŋ!
-
Mi tambu kɔl. Yaa nɔ mi yaa dimi tonyaa.
Vɛɛ numaa nɔ yɛ maa bii suɛi keŋ nyɛkɛndɛi?
Yɛɛ ŋ pɛɛku yɛ o biondɔŋ numndo niŋ?
YƐƐ Ŋ YIYAŊ YƐ?
Le yɛɛ waŋnda apum kɛɛ yɛ le biondɔŋnda ndalaŋ chɛlɔɔ?
Vɛɛ waŋnda cho yɛ yiyaŋ a num te a wa pɛ lɔɔlɔɔ kindiŋndo le biondɔŋnda numndaŋ kumbɔɔ, kɛ vɛɛ nda cho yɛ yiyaŋ a num te a wa pɛ biondɔŋnda numndaŋ chɛlɔɔ?—Luku 16:10.