တၢ်သံကွၢ်နီၣ်ဂံၢ် ၄
ဖဲယမၤကမၣ်တၢ်အခါ ယကဘၣ်မၤဒ်လဲၣ်
မ့မ့ၢ်နၤန့ၣ် နကမၤဒ်လဲၣ်
ဆိကမိၣ်ကွၢ်တၢ်ဂ့ၢ်အံၤတက့ၢ်– ဖဲ ထံ(မ်) ဂဲၤလိာ်ကွဲဒီးအသကိးတဖၣ်အခါ အဝဲမၤသ့ၣ်ဖးဘၣ်ဝဲ ပှၤဂၤအကါမဲာ်ထံကလၤလီၤ.
နမ့မ့ၢ် ထံ(မ်) န့ၣ်နကမၤဒ်လဲၣ်.
ဟံးန့ၢ်တၢ်ဆၢတီၢ် ဒီးဆိကမိၣ်ထံတၢ် တက့ၢ်
နတၢ်ဃုထၢအိၣ်ဝဲ သၢမံၤလီၤ–
-
က နကဃ့ၢ်ပူၤဖျဲးနသး.
-
ခ နကပာ်တၢ်ကမၣ်လၢပှၤတဂၤဂၤအလိၤ.
-
ဂ နကတဲဘၣ်ကါကစၢ်လၢ နမၤသ့ၣ်ဖးဘၣ်အကါအမဲာ်ထံကလၤဒီး နကလိးက့ၤအပှ့ၤ.
ဘၣ်သ့ၣ်သ့ၣ် နကအဲၣ်ဒိးမၤဒ် တၢ်ဟ့ၣ်ကူၣ် (က) တဲဝဲအသိးလီၤ. နမ့ၢ်မၤသ့ၣ်ဖးကါအမဲာ်ထံကလၤမ့ၢ်ဂ့ၤ, နမ့ၢ်မၤကမၣ်ဘၣ်တၢ်လၢအဂၤမ့ၢ်ဂ့ၤ နမ့ၢ်အၢၣ်လီၤနတၢ်ကမၣ်န့ၣ် မ့ၢ်ကျဲလၢအဂ့ၤကတၢၢ်လီၤ.
တၢ်ဂ့ၢ်အိၣ်ဝဲသၢမံၤလၢ ပဘၣ်အၢၣ်လီၤ ပတၢ်ကမၣ်
-
၁. ပမ့ၢ်အၢၣ်လီၤပတၢ်ကမၣ်န့ၣ် မ့ၢ်ပမၤတၢ်လၢအဘၣ်လီၤ.
လံာ်စီဆှံတဲဝဲလၢ– “ဒီးတၢ်မိၣ်မၤပသးလၢတၢ်အဂ့ၤလၢတၢ်ခဲလၢာ်အပူၤလီၤ.”—ဧ့ၤဘြံၤ ၁၃:၁၈.
-
၂. ဖဲပှၤတဂၤဂၤအၢၣ်လီၤအတၢ်ကမၣ်အခါ ညီနုၢ်ပှၤဂၤတဖၣ်သးအိၣ် ပျၢ်ကွံာ်ဝဲ အတၢ်ကမၣ်လီၤ.
လံာ်စီဆှံတဲဝဲလၢ– “ပှၤလၢအကျၢၢ်ဘၢအတၢ်သရူးကမၣ်န့ၣ် တဘီၣ်ထီၣ်တညီထီၣ်ဘၣ်ဘၣ်. မ့မ့ၢ်ပှၤလၢအတဲလီၤကျဲၤလီၤဒီးညိကွံာ်ဝဲန့ၣ်ကဒိးတၢ်သးကညီၤလီၤ.”—ကတိၤဒိ ၂၈:၁၃.
-
၃. တၢ်လၢအရ့ဒိၣ်ကတၢၢ်န့ၣ် မ့ၢ်တၢ်မၤဘၣ်ယွၤအသးလီၤ.
လံာ်စီဆှံတဲဝဲလၢ– ‘တၢ်သူၣ်တီသးလိၤဒီး တၢ်မ့ၢ်တၢ်တီန့ၣ် မ့ၢ်တၢ်လၢယွၤသးလီန့ၣ်လီၤ.’—စံးထီၣ်ပတြၢၤ ၅၁:၆, ခ့ခါစှီၤကျိာ်.
ခရံနၤ မ့ၢ်ပှၤတဂၤလၢအသးနံၣ်အိၣ်ဝဲ ၂၀ လီၤ. အဝဲနီကါချ့တလၢအဃိ ဘၣ်တၢ်စံၣ်ညီၣ်အီၤလၢ ကဘၣ်ဟ့ၣ်စ့အီၣ်လိးလီၤ. ဒီးအဝဲတတဲဘၣ်အပၢ်လၢ အတၢ်ကမၣ်အံၤဘၣ်. ဘၣ်ဆၣ် အဝဲပာ်ခူသူၣ်အတၢ်ကမၣ်အံၤ ထီဘိတသ့ဝဲဘၣ်. ခရံနၤ တဲဝဲလၢ “ပူၤကွံာ်တနံၣ်ဝံၤအလီၢ်ခံ ယပၢ်သ့ၣ်ညါဝဲ ယတၢ်ကမၣ်တခါအံၤအဃိ အဝဲသိၣ်ယၤသပှၢ်ကတၢၢ်လီၤ.”
ပဒိးန့ၢ်ဘၣ် တၢ်မၤလိဒ်လဲၣ်. ခရံနၤ တဲဝဲလၢ– “နမ့ၢ်ပာ်ခူသူၣ်နတၢ်ကမၣ်န့ၣ် တၢ်အိၣ်သးကနးဒိၣ်ထီၣ်ဝဲလီၤ. လၢခံကတၢၢ်န့ၣ် နကတူၢ်ဘၣ်ဒံးလီၤ.”
ဘၣ်ဃးဒီးနတၢ်ကမၣ်န့ၣ် နဒိးန့ၢ်ဘၣ်တၢ်မၤလိဒ်လဲၣ်.
လံာ်စီဆှံတဲဝဲလၢ– “ပမၤကမၣ်တၢ်အါမံၤ” လီၤ. (ယၤကိာ် ၃:၂) ဒ်ပမၤလိတ့ၢ်အသိး နမ့ၢ်အၢၣ်လီၤနတၢ်ကမၣ်လၢအဆိအချ့န့ၣ် မ့ၢ်နပာ်ဖျါထီၣ်လၢနအိၣ်ဒီးတၢ်ဆီၣ်လီၤသး ဒီး နမ့ၢ်ပှၤလၢအဟံးထီၣ်ဖီၣ်ထီၣ်နနီၢ်ကစၢ်အမူဒါလီၤ.
ဖဲပမၤကမၣ်ဘၣ်တၢ်အခါ ပကြၢးဟံးန့ၢ်တၢ်မၤလိလီၤ. ပိာ်မုၣ်တဂၤလၢအမံၤမ့ၢ်ဝဲ ဝံရၤ န့ၣ်စံးဝဲလၢ– “ဖဲယမၤကမၣ်ဘၣ်တၢ် ကိးဘျီဒဲးန့ၣ် ယဂုာ်ကျဲးစၢးဟံးန့ၢ်တၢ်မၤလိလီၤ. ခီဖျိလၢယမၤဒ်အံၤအဃိ ကဲထီၣ်တၢ်မၤစၢၤ ဒ်သိးယသုတဆဲးမၤဘၣ်တၢ်ကမၣ်ဒ်အလီၢ်လီၢ်တဂ့ၤအဂီၢ်လီၤ.” နၤစ့ၢ်ကီး နမၤထွဲ ဝံရၤ အဒိအတဲာ်ကသ့ဒ်လဲၣ်.
နဃ့ဒိးနပၢ်အလ့ၣ်ယီၢ် ဒီးနမၤဟးဂီၤဘၣ်အီၤအဃိ နကမၤဒ်လဲၣ်.
-
နတတဲဘၣ်နပၢ်ဘၣ် ဒီးနတအဲၣ်ဒိးလၢနပၢ်ကသ့ၣ်ညါဘၣ်.
-
တဲဘၣ်နပၢ်တီတီလိၤလိၤ.
-
နတဲဘၣ်နပၢ်လၢ နမၤဟးဂီၤဘၣ်လ့ၣ်ယီၢ် ဘၣ်ဆၣ် နပာ်တၢ်ကမၣ်လၢပှၤဂၤအလိၤ.
နတဖးလံာ်အဃိ နဒိးစဲးတဖျိဘၣ်. နကမၤဒ်လဲၣ်.
-
နကတဲလၢတၢ်သံကွၢ်ကီဝဲအဃိဧါ.
-
တူၢ်လိာ်နတၢ်ကမၣ်လၢ နတဖးလံာ်အဃိဧါ.
-
နကပာ်တၢ်ကမၣ်လၢ နသရၣ်မုၣ်အလိၤဧါ.
ဖဲနနီကါအခါနမ့ၢ်ကွၢ်လီၤထဲလၢနလီၢ်ခံန့ၣ် တၢ်ဘၣ်ယိၣ်အိၣ်ဝဲလီၤ. ဒ်န့ၣ်အသိး နမ့ၢ်ဆိကမိၣ်ထီၣ်က့ၤထဲ နတၢ်ကမၣ်လၢနမၤတ့ၢ်အီၤလၢအပူၤကွံာ်န့ၣ် နကလီၤဂာ်ဒ်ပှၤနီကါဖိတဂၤအံၤလီၤ
ခဲအံၤ သမံသမိးကွၢ်က့ၤတၢ်အိၣ်သးခံမံၤလၢ ဘၣ်တၢ်ပာ်ဖျါထီၣ်တ့ၢ်အီၤလၢ အမဲာ်ညါတကဘျံးတက့ၢ်. ဒီးဆိကမိၣ်ကွၢ်လၢ (၁) နအိၣ်ဘၣ်လၢပၢ်အလီၢ်ဒီး (၂) နအိၣ်ဘၣ်လၢသရၣ်မုၣ်အလီၢ်တက့ၢ်. နမ့ၢ်အၢၣ်လီၤနတၢ်ကမၣ်န့ၣ် နပၢ်ဒီးနသရၣ်မုၣ်ကထံၣ်နၤလၢ နမ့ၢ်ပှၤဒ်လဲၣ်တဂၤလဲၣ်. ဒီးနမ့ၢ်ပာ်ခူသူၣ်နတၢ်ကမၣ်န့ၣ် အဝဲသ့ၣ်ကထံၣ်နၤလၢ နမ့ၢ်ပှၤဒ်လဲၣ်တဂၤလဲၣ်.
ခဲအံၤ ဆိကမိၣ်ကဒါက့ၤတၢ်ကမၣ်လၢ နမၤတ့ၢ်အီၤလၢအပူၤကွံာ်တနံၣ် ဒီးစံးဆၢက့ၤ တၢ်သံကွၢ်လၢလာ်တဖၣ်အံၤတက့ၢ်.
နမၤဘၣ်တၢ်ကမၣ်မနုၤလဲၣ်. ဘၣ်ဃးဒီးနတၢ်ကမၣ်န့ၣ် နမၤအီၤဒ်လဲၣ်.
-
ယပာ်ခူသူၣ်ဃာ်ယတၢ်ကမၣ်.
-
ယပာ်တၢ်ကမၣ်လၢပှၤဂၤအလိၤ.
-
ယအၢၣ်လီၤယတၢ်ကမၣ်.
နမ့ၢ်တအၢၣ်လီၤနတၢ်ကမၣ်န့ၣ် လၢခံနတူၢ်ဘၣ်ဒ်လဲၣ်.
-
ယသးခု, ယတၢ်ကမၣ်တဖျါထီၣ်ဘၣ်.
-
ယတူၢ်ဘၣ်လၢယတၢ်ကမၣ်အိၣ်ဒံး, ယကြၢးတဲဖျါထီၣ်တၢ်မ့ၢ်တၢ်တီ.
နက့ၤကဒါက့ၤလၢအပူၤကွံာ်မ့ၢ်သ့န့ၣ် နကမၤက့ၤလၢအဂ့ၤကတၢၢ်ဒ်လဲၣ်.
ဘၣ်ဃးဒီးနတၢ်ကမၣ်န့ၣ် နမၤလိန့ၢ်တၢ်မနုၤလဲၣ်.
မ့ၢ်နဆိကမိၣ်ဒ်လဲၣ်
ဘၣ်မနုၤအဃိ ပှၤတနီၤနီၤတအဲၣ်ဒိးအၢၣ်လီၤအီလီၤ အတၢ်ကမၣ်လဲၣ်.
နမ့ၢ်ဂုာ်ကျဲးစၢးပာ်ခူသူၣ်နတၢ်ကမၣ်ထီဘိန့ၣ် ပှၤဂၤကထံၣ်နၤလၢ နမ့ၢ်ပှၤဒ်လဲၣ်တဂၤလဲၣ်. ဒီးနမ့ၢ်အၢၣ်လီၤနတၢ်ကမၣ်န့ၣ် ပှၤဂၤကထံၣ်နၤလၢ နမ့ၢ်ပှၤဒ်လဲၣ်တဂၤလဲၣ်.—လူၤကၣ် ၁၆:၁၀.
